Read Ngombale Jâŋ 9 Bible Online

Jâŋ 9 - Ngombale bible

Jâŋ 9

¹Yěso ghʉ̂ mə́ ndêi có yʉʼ, ə́ njwô cǒ ŋuu yi pə́ lə́ ghí jí yé a pə̂ pə́ fwoghʼ-mə́nyôghʼ.

²Ngaŋə-jyêʼ-no yé túŋu yé ngô: «Cícye wo ŋuu lə ghí kwǎr ləpəm, ə́ mbə́ pə́ fwoghʼ-mə́nyôghʼ gháʼa ńté pə̂ məfaa yé kəʉ pə́ yi tə́ ye kəʉ pə́ yi mə́ ye?»

³Yěso pwôr ngô: «Kâa pə̂ yé ńgó tû-mbəʉ yé kəʉ pə́ pye pi gháp lə jí yé lə fâa có no, lə́ fwoghʼ yé pə́ pə́ ńgó Sê wo lěi lə̂ zə̂u yi a wo ghʉ̌ lə́ zʉ́, ə́ nyarə́ məfaʼ mé.

⁴Ə́ pə́ ntúŋu ńgó nzʉ̂ pyér mə́ fwó gháʼa, paghʼə fáʼ məfaʼ ŋuu yi a lə tə́u ghâa. Ə twûʼ pə́ mə́ ngwo shʉ́ŋ wó, ŋuu kə́ mbou kuʼ yé lə̂ ngʉ̂ có zə̂u po.

⁵Mpfu yi m mbyěr ndəu nzʉ̂, m mbə̂ nkeʼ nzʉ̂.»

⁶Yěso laʼ yə́rə́, ə́ ntyə̌ghʼ mətê sê, ə́ ndaghʼ ńtáptə́ ndesé, ə́ ndǎghʼ ndesé zêi ńzótə́ mənyôghʼ fwoghʼ-mə́nyôghʼ wei,

⁷ə́ ndǎʼ lə́ zʉ́ ngô: «Wo sǒghʼ sʉ̂ gho cər ghəm-nci Silowê» (Silowê wêi laghʼ ńdâʼ ńgó «Ntə̂u»). Fwoghʼ-mə́nyôghʼ wei wô wó sǒghʼ sʉ̂ yé, ə́ ngǐ pə̌ʉ lə̂ nzeʼ zʉ́, ə́ ŋə̌i mə́ njwô yʉʼ.

⁸Pəghaŋə ləpar nzeʼ pé gháp pə pye pi gháp lə nyâŋ njwô ghíʼ a lôu ndôu jwô yé mpfu wo, ə́ ndâʼ ngô: «Kâa yo pə́ ŋuu yi a lə ŋâa ndôu yʉʼ nyâŋ wó ə́ ndôu-ndôu lə̂?»

⁹Pəcó pye pə̂ ndâʼ ngô: «Â zʉ́.» Pəcó pə̂ ndâʼ záp ngô: «Ə ngə́, a shwǐ yé shwí.» Fwoghʼ-mə́nyôghʼ wei lâʼ ngô: «Ə̂ kwaʼ məŋ.»

¹⁰Gháp túŋu yé ngô: «Nyôghʼ mô ghʉ gháʼá mboŋə́ ŋéʼé?»

¹¹A pwôr lə́ páp ngô: «Ŋuu yi pə́ fûŋ yé ńgó Yěso tâptə ndesé ə́ ndǎghʼ ńzóʼtə́ mənyôghʼ mâa, ə́ ndǎʼ lə́ məŋ ńgó n ngwó Silowê, ə́ sǒghʼ sʉ̂ ghâa, n nkə ngwô wó ə́ sóghʼ sʉ̂ ghâa, ə́ njwó yʉʼ.»

¹²Gháp túŋu yé ngô: «Ŋuu wêi ghǒ?» A lâʼ ngô: «Kâa mə́ njî ghâa.»

¹³Pə́ laghʼ ŋuu yi a lə pə́ fwoghʼ-mə́nyôghʼ lêi ńdə́r lə̂ mbi pəfalísia.

¹⁴Ə́ ghi pə́ mə́i Yěso kə laghʼ mətê ńtáptə́ ndesé, ə́ ndághʼ ńzóʼtə́ nyôghʼ ŋuu yi a lə pə́ fwoghʼ-mə́nyôghʼ lêi gháʼá leʼé nji pəyúda.

¹⁵Pəfalísia túŋu záp yé ghíʼ ə́ kə lěi a poŋə́ pə́ jwô yʉʼ. A pwôr lə́ páp ngô: «Ŋuu wêi kə lâghʼ mətê ńtáptə́ ndesé, ə́ ndaghʼ ńzóʼtə́ nyôghʼ mâa, n ngwô sóghʼ sʉ̂ ghâa; m mbə̂ mpfu wo ə́ mə́ njwô yʉʼ.»

¹⁶Pəcó pəfalísia pə̂ ndâʼ ngô: «Ŋuu yi a ghʉ̌ no yo káa a fû yé mbó Sê, ńté ńgó káa a pə́ njî yé leʼé nji.» Pəcó pə̂ ndâʼ záp ngô: «Mboʼ tâʼ ngaŋə-məfaa ghʉ̂ gháʼá tə ngʉ́ yo mbə̂u mənkəʼə-məno?» Ə́ lei yə́rə́, ə ghaptə kə̂u təcər páp.

¹⁷Pəfalísia kə̂ ncí túŋú ŋuu wêi ngô: «O lâʼ zô ńgó hó ńté ŋuu yi a kə ghʉ̌ o jwô yʉʼ lêi?» A pwôr lə́ páp ngô: «Â tâʼ ntsətə-nkəʉ Sê.»

¹⁸Káa pəkə̌m lâʼ pəyúda pə̂i gháp ńgó ŋuu wêi kə pə́ fwoghʼ-mə́nyôghʼ mboŋə́ shwítə́. Ə́ fúŋ mə́ ye gháp tə́ ye.

¹⁹Ə́ ntúŋú gháp ngô: «Yo kwaʼ môu wei yi pei laʼ ńgó pei lə jí yé, a pə̂ pə̂ fwoghʼ-mə́nyôghʼ lə̂, ə́ lei gháʼá a poŋə́ pə́ jwô yʉʼ mpfu wo?»

²⁰Gháp pwôr ngô: «Â kwaʼ môu waghʼ, paghʼ tsuŋu mə́ njî ńgó a lə ghí kwǎr ləpəm, ə́ mbə̂ yé pə̂ fwoghʼ-mə́nyôghʼ.

²¹Lə́, ə́ ngwǒ lə́ no ghíʼ a pə̌ njwô yʉʼ mpfu wo, mə́i káa paghʼ jî wághʼ no mə́u. Kəʉ wǒ ŋuu ghʉ̌ a jwô yʉʼ, mə́i káa paghʼ pə́ njî wághʼ. Pei túŋú pə́ yé, káa a pyér yé pə́ môu lə̂ ndáʼ no yi ə́ pə́ lə́ zʉ́.»

²²Mə́ ye gháp tə́ ye lâʼ yə́rə́, ńté no gháp lə pə́ mbôghʼ pəkə̌m lâʼ pəyúda; ńté ghíʼ gháp lə tághʼ mə́ ńgó ŋuu lə̌i mbə́i ńgó Yěso Nzaʼ-nkʉ, mə́i pə́ wo zǔŋ yé ndə̂ cûʼtə pəyúda.

²³Ə̂ zə̂u yi ə́ lə ghʉ̌, mə́ ye gháp tə́ ye lâʼ ngô: «Pei túŋú pə́ yé, ńté no káa a pyêr yé pə́ môu.»

²⁴Pəfalísia kə̂ ncí fúŋ ŋuu yi a lə pə́ fwoghʼ-mə́nyôghʼ lêi, ə́ ndǎʼ lə́ zʉ́ ngô: «Lǎʼ no lə́nə́ʉ zô mbi Sê, paghʼ pə̌ ntsuŋú njî ńgó ŋuu wêi ngaŋə-məfaa.»

²⁵A pwôr lə́ páp ngô: «Káa məŋ mə́ njî ghâa ńgó kəʉ â ngaŋə-məfaa kəʉ pə́ ŋuu shʉʉ lo, m mə̌ njî zâa pə́ ńgó n nkə́ pə́ fwoghʼ-mə́nyôghʼ, m mbou mbə́ mpfu wo, ə́ mə́ njwô yʉʼ.»

²⁶Gháp túŋu yé ngô: «A kə ghʉ hó lə́ gho? A kə ghʉ gháʼá nyôghʼ mô poŋə́ ŋéʼé?»

²⁷A pwôr lə́ páp ngô: «N nyaa mə́ ndáʼ ndéʼtə́ wéi, káa pei zûʼ wêi. Pei lou ńgó m mbyə́ghʼə́ ńdâʼ ńté hó? Pei pə̌ nkoŋ lə̂ mbə̂ zéi ngaŋə-jyêʼ-no yé mo?»

²⁸Pəfalísia zûʼ yə́rə́, ə́ njǐ lə̂ nzóutə́ yé, ə́ ndǎʼ ngô: «Gho lə̂ pə̌ ngaŋə-jyêʼ-no ŋuu wêi! Paghʼ pə̂ zághʼ pə̂ ngaŋə-jyêʼ-no Mə̌usə̂i.

²⁹Paghʼ pə̌ njî ńgó Sê lə lâʼ no lə́ Mə̌usə̂i, lə́ ə́ ngwǒ lə́ ŋuu wêi, mə́i káa paghʼ pə́ njî wághʼ ləfǔ yé!»

³⁰Ŋuu yi a lə pə́ fwoghʼ-mə́nyôghʼ lêi lâʼ lə́ páp ngô: «Pei laʼ ńgó káa pei pə́ njî ləfǔ yé gháʼa, ə́ kəʼə ghâa gháʼate; lə́ mə́i a kə ghʉ nyôghʼ mâa ŋéʼe!

³¹Paghʼə pə́tsəm pə́ njî ńgó káa Sê pə́ nzûʼ yé nji ngaŋə-məfaa. Lə́ ə́ mbə́ yi ŋuu lə̌i ncóghʼ ntə̂ʉ yé lə̂ Sê, ə́ mbou ngʉ́ zə̂u yi a pə̌ nkǒŋ; mə́i a wo zúʼ sʉ̂ʉtə yé.

³²Pə́ laa kə́ jwó ŋuu yi a ghʉ̌ ŋuu yi pə́ ghí jí yé a pə̂ pə́ fwoghʼ-mə́nyôghʼ jwô yʉʼ.

³³Ŋuu wêi tə̌i ndə̌iʼ pə́ ŋuu yi a fǔ mbó Sê po mə́i káa a kə kûʼ yé lə̂ ngʉ́ có zə̂u.»

³⁴Gháp lâʼ lə́ zʉ́ ngô: «Pə́ kə jí ghô cər məfaa, o wo njyéʼ paghʼ zə̂u áa!» Ə́ ncʉ́ʼ fú ndə̂ cûʼtə, ə́ nzǔŋ yé.

³⁵Yěso ghʉ nzúʼ ńgó pə́ fú ndə̂ cûʼtə ńzúŋ yé, ə́ ngwo ntúŋú yé ngô: «O pə̂i no Môu Ŋuu?»

³⁶A pwôr ngô: «Ə́ Nde Môu Ŋuu wêi wǒ, ńjí ńgó m mbə̂i no yé?»

³⁷Yěso lâʼ lə́ zʉ́ ngô: «O pə̌ njwô yé, â zʉ́ yi a laʼ no lə́ gho mpfu wo lo.»

³⁸A lâʼ ngô: «M mbə̌i no zô Nde.» Ə́ ndǎʼ yə́rə́, ə́ shíʼ ńkʉ́ʼtə́ sê mbi Yěso.

³⁹A lâʼ lə́ zʉ́ ngô: «N nkə tó ndəu nzʉ̂ yo lə̂ fêʼ kôr pye-mə́soŋ, ńjí ńgó pəfwoghʼ-mə́nyôghʼ ghí pə́ jwô yʉʼ, pye pi pə́ njwô yʉʼ cʉ̂ʼ pəfwoghʼ-mə́nyôghʼ.»

⁴⁰Pəcó pəfalísia pi gháp lə pə́ yʉʼ wó zûʼ mətsâr mêi, ə́ ntúŋú yé ngô: «Paghʼ laʼ laʼá ńgó mboʼ o fûŋ pəfwoghʼ-mə́nyôghʼ gháʼá tə ncôghʼ wághʼ nou mo?»

⁴¹Yěso pwôr lə́ páp ngô: «Pei tə̌i mbə́ ghíʼi, ə́ mbə́ pəfwoghʼ-mə́nyôghʼ, mə́i káa pei ghwô wéi cǒ məfaa. Lə́ ghíʼ pei pǒu ndǎʼ ngô: “Paghʼ pə̌ njwô yʉʼ lə̂”, məfaa wei tə́i ndəu pei.»