Read Ngombale Məfaʼ Pəghaŋə-ntə̂u 1 Bible Online

Məfaʼ Pəghaŋə-ntə̂u 1 - Ngombale bible

Məfaʼ Pəghaŋə-ntə̂u 1

¹Ə Nde Tehofîlə, N ndə wo cər nduŋ-mbi ŋwaʼa ghâa ńdéʼtə́ zə̂u tsəm yi Yěso lə ghʉ̌ mbou njyéʼ pye zěi lə̂ fú ləjitə́,

²ə́ ngwo ńkə́u leʼé yi Sê lə fú təcər pei ńkwárə́ yé ńŋə́ tʉ̌-lə́pû, a lə ghí kóʼ lə̂ wó, ə́ ndǎghʼ mətəʉ Zəghʼə Ndêi-lěi, ə́ ndǎʼ pəghaŋə-ntə̂u pé pi a lə tsóʼ gháp, ə́ zə̂u yi gháp wo cʉ́ʼ nzəm ghʉ̌.

³A lə zʉ́ʉ lə̂ ləwʉ̂, ə́ nyarə́ gháp lə̂ məmbə̂u tə nzáa ńgó a pə̌ pə̂ ntə̂ʉ. A lə kwar mbi páp təcər leʼé mə̂m-ləkwo, ə́ mə́ ndâʼ gháp no Ləfou Sê.

⁴Ə́ lə pə̂ có leʼé, gháp pə pǎp pə̂ nzʉ̂ zə̂u, a kwêitə tû záp ngô: «Pei páa lə̂ fú Yelúsalêm ńdə́r, lə́ pei zʉ́ʼtə́ zə̂u yi Tə́ ghâa lə ghʉ̌ ndaʼá mə́u lə̂ ngʉ́ ŋə́ pei, ə́ zə̂u lətəi-ndwuŋ yi n ndə lǎʼ wéi ńgó Sê wo ŋə́ lə́ pei tə́ pfû có zə̂u lə̂.»

⁵Ńté no Jâŋ lə laghʼ pə̂ nci fefe ńŋə́ pye nci, lə́ ngwǒ lə́ pei, mə́i ə́ wo kə́ cî yé po, ə́ pə cʉ́ʼ ndághʼ pə̂ Zəghʼə Ndêi-lěi ńŋə́ wéi nci.

⁶Pye pi gháp lə kəitə́ mbəʉ Yěso cʉ̂ʼ ntúŋu yé ngô: «Ə́ Nde, yo pə mə́ mpfu yi o wo mbəʼə ləfou Ísə́lahêl áa?»

⁷A pwôr lə́ páp ngô: «Káa pei ghwô wéi lə̂ njí leʼé lâʼ kəʉ pə́ mə́nəu yi Tə́ ghâa lə tághʼ pə́ lə̂ tû-mbəʉ mətəʉ mé.»

⁸Lə́ pei wo pfú məcó mətəʉ, ə́ mpfu yi Zəghʼə Ndêi-lěi wo shíʼ lə́ pei, ə́ cʉ́ʼ pə́ pənzǔʼ-njwó pâa Yelúsalêm, ə́ cər pfuʼ Yudêi, ə́ cər Samalə̂i tə ə́ ngwó ńkə́u ləlyəghʼtə́ ngoŋ.

⁹Ə́ ndǎʼ məno mêi mwo tə kûʼ, a lêsê, ə́ ngǐ pə́ kôʼ lə̂ tʉ̌-lə́pû, gháp pə́tsəm tə̂ʉ mə́ nâŋ yé, məlâm tô mbôu yé, a cwî mənyôghʼ páp.

¹⁰Gháp lə pyér mə́ ndə̂i pə̂ tʉ̌ lə̂ yʉʼ yi Yěso lə cwí wó nyôghʼ páp, ə́ ngí woghʼə́, có mbiŋə pwô lə̂ məndǐ fúfú ndəu páp cʉ̂ʼ ntə́ʉ pə́ mbəʉ páp,

¹¹ə́ ndǎʼ lə́ páp ngô: «Ə pye Galilêi, pei pou mbyér ńtə́ʉ yʉʼ wo nâŋ lə́pû ńté hó? Yěso wə̂ yi Sê ghʉ̌ a fû təcər pei ńkwár ńdə̌r lə̂ tʉ̌-lə́pû lə̂, láʼ pǒu kə́ pə̌ʉ tó pə́ lə̂ mbə̂u yi pei jwǒ a lə̂r lo.»

¹²Pəghaŋə-ntə̂u pé cʉ̂ʼ fú ləkôr wêi yi pə́ fûŋ ńgó ləkôr mətʉ̌ məwə̂r Olîvə lêi ə́ mbə̌ʉ lə̂ Yelúsalêm. Mboʼ pə́ fû túsoŋ Yelúsalêm, ə́ ŋə̂i no mənzaʼ mə̂m-tárə́ mboŋə́ kə́u lə̂ ləkôr zêi.

¹³Ə́ nkə́u Yelúsalêm, ə́ nkóʼ lə̂ cər lûm ndə̂ yi tə tʉ̌, ə́ yʉʼ yi gháp lə nyâŋ ńkə̂itə wó. Ə́ lə pə́ Pyêh gháp Jâŋ, ə́ ngʉ̌ Jâghʼ gháp Aŋderê; lə́ Fílîp gháp Tomásʉ; lə́ Patələmî gháp Matyê; lə́ Jâghʼ môu Aləfê gháp Síməu nzoŋ-məno-lâʼ, ə́ ngʉ̌ Jwîdə môu Jâghʼ.

¹⁴Gháp pêi pə́tsəm lə pə́ tâʼ ntsʉ, ə́ nyáŋ ńkə̂itə mpfu tsəm ńsʉ̂ʉtə Sê gháp pə pəcó pəngyě, lə́ Mǎyaa mə́ pə Yěso nou páp gháp pə pəfə̌r Yěso.

¹⁵Ə́ pə̂ có leʼé lə́ mêi məleʼé, pəfə̌r pêi kəitə tə mbə́ no nkʉ lə̂ mə̂m-mbwô, Pyêh lêsê təcər páp, ə́ ndǎʼ ngô:

¹⁶«Pəfə̌r pâa, ə́ lə pə́ ntúŋu ńgó zə̂u yi Zəghʼə Ndêi-lěi lə záʼ nzʉ̂ ńtsətə́ cər ŋwaʼa Sê, ə́ ndéitə́ lə́ fou Ndavîd ńté Yúda pə̂utə́, ə̂ zʉ́ yi a lə cʉ́ʼ tə́ʉ tû-mbi lə́ pye pi gháp lə ghǒu Yěso, ə́ fêi yé ńŋə́.

¹⁷A lə pə́ nou pághʼə tə ə́ nkə́ ngwô yé có ndyəghʼə́ faʼ zághʼə.

¹⁸Lə́ ŋuu wêi lə lâghʼ nkâp yi pə́ lə lǎghʼ ńtsóʼ faʼ tə́poŋ yé, ə́ nzə̂u có pǎp ndesé, ə́ mbou ndághʼ ndəu yé ḿpfúŋ sê, ləpəm yé sâa təcər, mətô mé mə́tsəm cwərə sê.

¹⁹Ə pye Yelúsalêm pə́tsəm zûʼ zêi no, ə́ ncʉ́ʼ fúŋ zêi pǎp ndesé lə̂ tsâr lâʼ záp ńgó Hakeldáma yi ə́ laghʼ ńdâʼ ńgó Nkâʼ məci.

²⁰Ə́ pou mbə́ cər ŋwaʼa Məzap-nci ngô: “Pə méʼ ndə̂ ye ə̂ tə̂ʉ yə́rə́, Koo cǒ ŋuu lâʼ nkə́ ncí cər wó.” Ə́ nkə́ ncí ŋwáʼá cər ŋwaʼa Məzap-nci wêi ngô: “Ńgó ŋuu ndeʼe pfú lətə̌ʉ yé.”

²¹Pyêh lâʼ yə́rə́ tə ə́ kuʼ, a lâʼ ngô: “Ə́ laghʼ mbə́ ńgó paghʼ wo tsóʼ tâʼ ŋuu mpfu wo, ə́ lǎghʼ kʉʼʉ́ nou wághʼ, â kə́ mbə̂ yé nzǔʼ-njwó lə̂ ndáʼ pye ńgó Yěso zʉ̌ʉ lə̂ ləwʉ̂. Ə́ poŋ ńgó ngaŋ pə́ ŋuu yi paghʼ pə pǎp lə tə̂m ku ńŋə̂i nzəm Yěso tə fú leʼé yi Jâŋ lə ŋə̂ Yěso nci, ə́ ngwo ńkə́u leʼé yi Sê lə kwarə́ yé nou paghʼə ə́ ndághʼ yé ńdə̌r lə̂ tʉ̌-lə́pû.”»

²³Ə́ pə̂ yə́rə́, pə́ nyárə mbiŋə pwô: Cǒ ŋuu pə̂ Yosêp yi pə fûŋ yé ńgó Baasabásʉ mbaa ńgó Jwistwísʉ, cǒ ŋuu pə̂ Matyǎsʉ.

²⁴Kəitə pəfə̌r cʉ̂ʼ ngʉ́ sʉ̂ʉtə yo ngô: «Ə́ Nde, gho yi o pə̌ njî ntə̂ʉ maa wǒwó, nyarə́ wághʼ ŋuu yi o tsǒʼ yé lə̂ pye pwo pə́pwô,

²⁵lə̂ fáʼ ghíʼ ngaŋə-ntə̂u ghô lə̂ lətə̌ʉ yi Yúda lə měʼ ńdə́r lə̂ yi ə́ cʉ́ʼ mbə̂ yé mpfu wo.»

²⁶Pə́ cʉ̂ʼ ntə́m pyêr lə̂ ndághʼ ńjwó ngaŋ təcər páp pə́pwô, pyêr pfûŋ lə̂ Matyǎsʉ yi a lə ncʉ́ʼ nkʉ́ʼʉ́ lə̂ nou pəghaŋə-ntə̂u ntsap môʼ lə̂ ləghə̂m.