Read Ngombale Məfaʼ Pəghaŋə-ntə̂u 10 Bible Online

Məfaʼ Pəghaŋə-ntə̂u 10 - Ngombale bible

Məfaʼ Pəghaŋə-ntə̂u 10

¹Cǒ ŋuu lə pə́ túsoŋ Sezarê ləjôghʼ yé pə̂ Koonêi, a pə̂ cǒ tə́-ndə̂ pəlwóʼó-ntso Pəlóma, ə́ sâʼ pəlwóʼó-ntso nkʉ. Pə́ fûŋ wêi nou ńgó nou pəlwóʼó-ntso yi Italî.

²Gháp pə pye pə́tsəm pi gháp lə cî nzeʼ zʉ́ lə pə́ mbôghʼ Sê; ə́ mə́ ŋə̂ məkuʼ mé, ə́ nzûʼ ntsʉ yé. A lə sâa-sǎa ngâp məzə̂u lə́ pəyúda pi gháp pə́ pəpûŋ; ə́ mbou mə́ sʉ̂ʉtə Sê maa mpfu ntsəm.

³Ə́ pə̂ có leʼé lə́ pəmə́nəu pə́tárə́ mpfu mbwǒr-nəu, Sê ŋêʼ nyôghʼ mé: a tsúŋu njwó ghíʼ tâʼ cwôʼ Sê tǒ ńkə́u ndə̂ zʉ́, ə́ fúŋ yé ngô: «Koonêi!»

⁴A tâghʼ nyôghʼ lə́ zʉ́, ə́ njǐ lə̂ mbóghʼ, ə́ ntúŋú yé ngô: «Ə̂ no hó Nde?» Cwôʼ Sê pwôr lə́ zʉ́ ngô: «Sê zûʼ sʉ̂ʉtə zô, ə́ mbou njwó zə̂u yi o ghʉ ndághʼ ḿpfûtə pəpûŋ, ə́ nkʉʉtə́ ghô.

⁵Tə́u pye pə̂ mpfu wo, gháp wó túsoŋ Jopê ə́ fúŋ Síməu yi có ləjôghʼ yé Pyêh.

⁶A cî nzeʼ cǒ Síməu yi a lâa məngəp pəmə́nye pə́ laghʼ ńtə̂ məzə̂u. Ndə̂ ye pə́ nkaŋ mə̂i-nci.»

⁷Cwôʼ Sê lâʼ no lə́ zʉ́ tə ndə́r, a fûŋ pəghaŋə-faʼ pé pə́pwô nkʉ́ʼʉ́ tâʼ sóghəi yi gháp zʉ́ ji mə́ ncí, a pə̂ ŋuu mə́ ŋə̂ məkuʼ Sê.

⁸Koonêi fûŋ gháp yə́rə́, ə́ mbyétə́ zə̂u tsəm yi ə́ lěi ńdǎʼ gháp tə ə́ kuʼ, a tə̂u gháp túsoŋ Jopê.

⁹Nzʉ̂ fôghʼ gháp pə̂ laŋə́, ə́ ndə̌r tə mə́ nkə̂u Jopê, Pyêh kôʼ ntsoʼ ndə̂ ndə́u ntə̌ʉ-nəu, ə́ nyáŋ lə̂ yʉʼ yi ə́ sʉŋtə́ ghíʼ tətáa mə́ sʉ̂ʉtə Sê;

¹⁰nji záŋə yé, a pə̂ nkôŋ lə̂ nzʉ́ zə̂u. Ə́ ghi pə́, pə́ pə̂ ntsúŋu zə̂u yi a wo zʉ́, Sê ŋêʼ nyôghʼ mé a jwô có zə̂u.

¹¹A jwô ntsʉ tʉ̌-lə́pû tsóʼo ńtə́ʉ, có zə̂u fû wó mə́ shíʼ lə̂ sê, ə́ mbə́ ghíʼ tə́koʼ pô-ndí yi pə́ nkǎp mənkʉ lə̂ məlî měi ləkwo.

¹²Mənye mbə̂u lə̂ mbə̂u pə̂ cər wó: ə́ mi ŋəi lə̂ məku ləkwo, mi ə́ shôŋ sê lə̂ məpəm máp gháp pə pəshʉ̌ŋ,

¹³a zûʼ cǒ nji ŋuu lâʼ lə́ zʉ́ ngô: «Pyêh lěsê, jwítə́ ḿpfár!»

¹⁴Pyêh pwôr ngô: «Lyeʼe zâa! Ə Nde, n ndaa kə́ pfár zə̂u yi ləpə̌ʉ tǒʼ, káa kə́ pfár yi ə nji pə́ mə̂u.»

¹⁵Pyêh kə̂ ncí zúʼ nji zêi lâʼ lə́ zʉ́ ngô: «Sê lə̌i ndéi tə ndâʼ ńgó zə̂u pə́ tə́ lǒʼ, koo o kə̂ mbôu ndǎʼ ńgó lǒʼ pə́ mə́u.»

¹⁶Ə́ kə̂ mbə́ pə́ yə́rə́ tə ḿbə́ mpfu tárə́, zêi zə̂u kə̂ ncʉ́ʼ ndêi-lěi ə́ mbə̂ʉ nzəm lə̂ tʉ̌-lə́pû.

¹⁷Pyêh cʉ̂ʼ mə́ ntúŋu cər tû zʉ́ ngô: «Ə́ zə̂u yi n njwǒ ə́ lei mənyôghʼ məŋ lo, ə́ gháʼa ndághʼ ńdaʼ ńgó ho?» Ə́ ghí pə́ mə́i pye pi Koonêi tə̌u gháp, ŋáa mə́ ntúŋú ndə̂u ndə̂ Síməu tə ncʉ́ʼ ntə́ʉ pə́ ntsʉ ndə̂,

¹⁸Gháp fûŋ ə́ ntúŋú ngô: «Yo ndə̂ yi Síməu yi pə́ fûŋ yé ńgó Pyêh cî wó?»

¹⁹Pyêh pyêr mə́ nkwáŋə pə̂ tû yé lə̂ zə̂u yi Sê ŋěʼ nyôghʼ mé a jwô, Zəghʼə Ndêi-lěi tô ńdáʼ lə́ zʉ́ ngô: «Pye pə́tárə́ pwo yaʼa mə́ ndôu ghô.

²⁰Lěsê pə̂ mpfu wo mpfu wo, ə́ shíʼ pei pə pǎp lə̂r; koo o lə̂ʼ ńté ńgó məŋ lə̂ ntə̌u gháp.»

²¹Pyêh shîʼ ńcə́r pye pêi, ə́ ndǎʼ lə́ páp ngô: «Mə̂ŋ ŋuu yi pei lou yé. Ə no ho tə́u wéi yaʼa?»

²²Pye pêi pwor lə́ zʉ́ ngô: «Koonêi yi â cǒ tə́-ndə̂ pəlwóʼó-ntso Pəlóma tə̌u wághʼ, a sâʼ pəlwóʼó-ntso nkʉ. Ə́ mbə́ ndʉŋ-ndʉŋ ə́ mbou mə́ nzûʼ ntsʉ Sê, pəyúda pə́tsəm pou mə́ nkʉ̂ʉ yé shʉʼʉ. Tâʼ cwôʼ Sê kə tó ndǎʼ lə́ zʉ́ ńgó a ghʉ́ pə tó fúŋ ghô, ô tó ndə̂ zʉ́, ə́ ndǎʼ yé no yi o ghwǒ lə̂ ndâʼ yé»

²³Pyêh ghʉ̂ gháp kə̂u ndə̂, gháp pə pǎp lê. Nzʉ̂ fôghʼ gháp pə pǎp tsə̂ʉ laŋə́, pəcó pəfə̌r pi Jopê wo ncághʼə gháp.

²⁴Ə́ pə̂ zou cǒ, gháp ghi kə́u Sezarê, mə́i Koonêi kəitə́ mə́ ngər-ndə̂ ye gháp pə pəsə̌u ləpe pé, gháp pə pǎp pə̂ mbâp Pyêh.

²⁵Pyêh tô tə mə́ nkə́u nzeʼ, Koonêi pə̂utə yé, ə́ nkʉʼtə́ sê mbi zʉ́, ə́ ntsêʼtə́ yé lə̂ məkuʼ.

²⁶Lə́ Pyêh pə́ʼə yé ə́ ndǎʼ lə́ zʉ́ ngô: «Pəʼə́ mbəʉ zô, n nkə̌ mbə̂ zâa pə́ ŋuu-məsoŋ ghíʼ gho.»

²⁷Gháp zʉ́ cʉ̂ʼ ŋə́i mə́ ntsár, ə́ nkə́u ndə̂, Pyêh jwô pə́ pə̂ cər wó tə nzáa záa.

²⁸A lâʼ lə́ páp ngô: «Pei tsuŋu mə́ njî ńgó ləpə̌ʉ pəyúda kâa pə̂i yé ńgó ŋuu ghap ghwô sə̌u ye yi a pə̌ ŋuu lâʼ ndeʼe. Tə mbaa pə́ lə̂ nkə́u ndə̂ zʉ́. Lə́, Sê kə nyar ghâa ńgó kâa n ngwô ghâa lə̂ ndâʼ ńgó ŋuu ghwô lǒʼ tə ə́ pə̂ yi n ngwo lə̂ ndwóʼ yé.

²⁹Ə̂ zə̂u yi ə́ kə ghʉ̌ pei fúŋ ghâa, kâa n ndə̂ʼ ghâa lə̂ ntó. Lə̂ mpfu wo, pei lâʼ ghâa no yi pei kə fûŋ ghâa mə́u.»

³⁰Koonêi pwôr ngô: «Ə́ pə́ mə́ mpfu wo leʼé tárə́ ghíʼ n nkə pə́ ndə̂ məŋ, ə́ mə́ sʉ̂ʉtə Sê lə́ pəmə́nəu pə́tárə́ mpfu mbwǒr-nəu gháʼa, ə́ ngǐ wóghʼə́ ŋuu kwâr ńtə́ʉ mbi məŋ, ə́ mǎʼ məndǐ ə́ ŋwaŋtə ŋwaŋtə́,

³¹ə́ ndǎʼ lə́ məŋ ngô: “Koonêi Sê zûʼ sʉ̂ʉtə zô, ə mbǒu mə́ kʉ̂ʉtə məzə̂u mi o ŋə̂ lə́ pəpûŋ ə́ ndaghʼ ḿpfûtə gháp lə̂.

³²Tə́u pye gháp wó Jopê fúŋ Síməu yi có ləjôghʼ yé Pyêh ńgó â tó. A cî ndə̂ Síməu yi a lâa məngə̂p pəmə́nye pə́ laghʼ ńtə̂ məzə̂u. Ndə̂ zei pə́ nkaŋ mə̂i-nci.”

³³A lə laʼ yə́rə́ n nkə̂ ntóghʼ ńtə́u pye ndǒu gho. Ə́ poŋ ghíʼ o tǒ lo. Lə̂ mpfu wo, paghʼ pə́tsəm tə́ʉ gháʼa mbi Sê lə̂ nzúʼ tsâr yi Nde cǒghʼ ntsʉ gho ńgó o tó ńdáʼ lə́ paghʼ.»

³⁴Ə́ pə̂ yə́rə́, Pyêh pfû tsâr ndǎʼ ngô: «N njwô mpfu wo kwaʼ lə́nə́ʉ ńgó Sê kâa pə́ mbeʼe yé mbî.

³⁵Ŋuu lə̌i mbə́ pə́ ŋuu zárə́ tə̂u lə́ mə́ nzûʼ ntsʉ Sê, ə́ mbǒu mbə́ ŋuu no lə́nə́ʉ, mə́i no yé wo poŋə́ Sê.

³⁶A lə tə̂u tsâr yé ə́ ŋə́ lə́ pye Ísə́lahêl, ə́ pə̂ Nkəʉ Shʉʼʉ, ə́ mbə́ yi ə́ ghʉ ŋuu ntsəm lêi lə́ Nde Yěso Kəlísto, ə́ ngwô mbwórə.

³⁷Pei tsuŋu mə́ njî ńgó no yo lə ji ghíʼ Jâŋ lə kwǎr, ə́ mə́ ndêʼtə tsâr Sê mbó pye Galilêi gháp pə pye Yudêi, ə́ mbou mə́ ŋə̂ gháp nci.

³⁸Pei pə̌ njî ńgó Sê lə cóghʼ mətəʉ Zəghʼə Ndêi-lěi lə́ Yěso Kəlísto môu Nǎazalêi, ə́ mbǒu mə́ ntôutə yé, a ŋə̂i yʉʼ tsəm ngʉ̂ məno shʉʼʉ, ə́ mbou ngʉ́ Sə́tə kwâr lə́ pye pi a lə kə́u ndəu páp.

³⁹Paghʼ pənzǔʼ-njwó lə̂ zə̂u tsəm yi a kə ghʉ̌ cər lâʼ pəyúda gháp cər túsoŋ Yelúsalêm. Gháp pou nkʉ̂ʉ yé lə̂ tʉ̌-mbʉ̂ŋtə, a kwʉ̂.

⁴⁰Lə́, ə́ pə̂ lə̂ mbâatə leʼé tárə́, Sê ghʉ̂ a zʉ̂ʉ lə̂ ləwʉ̂, a ŋə̂ yé mətəʉ, a lâghʼ ŋáa ńnyárə́ mbəʉ ye.

⁴¹Káa nyárə́ mbó ŋuu ntsəm, lə́ ə́ nyárə́ pə́ mbó paghʼ pi Sê lə lǔŋ mbi ntsóʼ wághʼ ə́ ndaghʼ ńgʉ́ pənzǔʼ-njwó. A lə zʉ́ʉ yə́rə́, paghʼ pə pǎp zʉ̂ mbǒu nó.

⁴²A pôu ntə́u wághʼ ńgó paghʼ wó ndeʼtə́ Nkəʉ Shʉʼʉ, ə́ mbǒu ntsúŋú ndǎʼ pye ńgó zʉ́ Yěso wêi, â ŋuu yi Sê lə tsóʼ yé lə̂ fêʼ pətəʉ gháp pə pəpfû-sê.

⁴³Pətsətə́-nkəʉ Sê pə́tsəm lə lâʼ no ńté Yěso, ńgó wǒwó yi a pə̌i no Yěso, Sê táa leitə́ lə́ ləjôghʼ Yěso wêi ə́ lyə́ghʼə́ məno tə́poŋ ngaŋ.»

⁴⁴Pyêh pyêr mə́ tsâr tsarə́, Zəghʼə Ndêi-lěi shîʼ ńkə́u lə́ pye pə́tsəm pi gháp lə pə́ nzûʼ tsâr yé.

⁴⁵Pye Kəlísto pi gháp lə tó lə̂ ncághʼə́ Pyêh lə pə́ pəyúda, ə́ njwó mbə̂u yi Sê lǎghʼ ńŋə́ Zəghʼə Ndêi-lěi lə́ pye pi káa gháp pə̂ gháp pəyúda ghíʼ páp, ə́ kəʼə gháp gháʼate.

⁴⁶Ə́ mbǒu nzûʼ ghíʼ gháp tsâr mətsâr lâʼ mi káa ŋuu pə́ njî yé, ə́ mə́ ngûʼtə Sê. Pyêh jwô yə́rə́, ə́ ncʉ́ʼ ndâʼ ngô:

⁴⁷«Tə mboʼ pə́ pou ndə̂ʼ lə̂ ŋə́ nci lə́ pye pwo pi gháp ghwo mə́ záp Zəghʼə Ndêi-lěi ghíʼ paghʼə lo?»

⁴⁸Ə́ ntúŋú yə́rə́, ə́ ndáʼ ńgó pə́ ŋə́ gháp nci lə̂ ləjôghʼ Yěso Kəlísto. Ə́ pə̂ yə́rə́, gháp pə́tsəm sʉ̂ʉtə yé ńgó gháp pə pǎp nyéʼ nyáŋ leʼé ndwuŋ.