Read Ngombale Məfaʼ Pəghaŋə-ntə̂u 11 Bible Online

Məfaʼ Pəghaŋə-ntə̂u 11 - Ngombale bible

Məfaʼ Pəghaŋə-ntə̂u 11

¹Ngaŋə-ntə̂u Yěso gháp pə pəcó pəfə̌r nzəm Yěso Kəlísto pi ə́ pə́ Yudêi zûʼ ghíʼ pye pi káa gháp pə̂ gháp pəyúda kə pə̂i záp no Sê.

²Pyêh ghʉ̂ mbə̂ʉ tə nkə́u Yelúsalêm, pye Kəlísto pi gháp pə́ pəyúda ji lə̂ fêʼ yé,

³ə́ ndâʼ ngô: «O kə kə́u ndə̂ pye pi káa pə kə púʼ gháp tə pei pə pǎp təm zə̂u nzʉ́.»

⁴Pyêh zûʼ yə́rə́, ə́ mbyétə́ moʼ moʼ ghíʼ zə̂u tsəm kə lěi tə fú ləjǐ wó ngwo ńkə́u ləlyəghʼtə́ ə́ ndáʼ gháp ngô:

⁵«N ndə pə́ túsoŋ jopê mə́ sʉ̂ʉtə Sê, Sê ŋêʼ nyôghʼ mâa, n njwô có zə̂u fû tʉ̌-lə́pû, ə́ mbə́ ghíʼ tə́koʼ pô-ndí yi pə́ nkǎp mənkʉ lə̂ məlî měi ləkwo, ə́ mə́ shíʼ ńtó tə nkə́u mbi məŋ.

⁶N ntsúŋu náŋtə́, ə́ njwó pəmə́nye məku ləkwo pi ə́ pə̂ ndəu ndesé, ə́ njwó mənye ləghěi, mənye mi gháp shuŋu sê lə̂ məpəm máp, gháp pə pəshʉ̌ŋ naa mbə́ cər wó.

⁷N nzûʼ cǒ nji ŋuu lâʼ lə́ məŋ ngô: “Pyêh lěsê, jwítə́ ḿpfár!”

⁸Lə́ m mbwôr ngô: “Lyeʼe zâa Nde! Ə zə̂u yi ləpə̌ʉ lə̌ʼ kəʉ yi ə́ ghwǒ lǒʼ laa kə́ zéʼ kəpə-ntsʉ zâa.”

⁹Nji zêi kə̂ ncí fú tʉ̌-lə́pû ə́ ndǎʼ lə́ məŋ ngô: “Sê lə̌i ndéi tə njwó ńgó zə̂u pə́ tə́ lǒʼ, koo o kə̂ mbóu ndǎʼ ńgó lǒʼ pə́ mə̂u.”

¹⁰Ə́ kə̂ ḿbə́ pə́ yə́rə́ tə ḿbə́ mpfu tárə́, zə̂u pei tsəm pəʉ ńkóʼ lə̂ tʉ̌-lə́pû.

¹¹Ə́ kə̂ mbə́ pə̂ mpfu wêi, pye pə́tárə́ pi pə́ fú Sezarê ntə́u gháp lə́ məŋ tô ńkə́u ndə̂ yi paghʼ lə pə́ wó.

¹²Zəghʼə ndêi-lěi laʼ lə́ məŋ ńgó paghʼ pə pǎp lə̂r, koo məŋ ndə̂ʼ. Pəfə̌r pwo ntóghʼó wo cághʼə́ ghâa, paghʼ pə pǎp lər tə ńkə́u ndê Koonêi.

¹³A pyêtə ńdáʼ wághʼ ńgó a lə wóghʼə woghʼə́, ə́ njwó cwôʼ Sê tə̂ʉ mbi zʉ́ cər ndə̂ zʉ́, ə́ ndáʼ lə́ zʉ́ ngô: “Tə́u pye túsoŋ Jopê gháp wó fûŋ cǒ ŋuu yi a pə́ wó, pə́ fûŋ yé ńgó Síməu, có ləjôghʼ yé pə̂ Pyêh.

¹⁴A wo tó lǎʼ gho məno mi Sê wo lěi mə́u, ə́ ghʉ̌ pei pə pye pə́tsəm pi gháp cî nzeʼ gho cwór.”

¹⁵N ntô tə nkə́u ndə̂ Koonêi mə́ ndâʼ no lə́ páp, Zəghʼə Ndêi-lěi shîʼ ńkə́u lə́ ŋuu ntsəm yi a yǎa mbə́ ndə̂, ə́ ndʉŋ-ndʉŋ ghíʼ ə́ lə fú ləjitə́ ńkə́u lə́ paghʼə zághʼə lə́wó.

¹⁶Ə́ pə̂ yə́rə́, n nkʉ̂ʉtə ghíʼ Nde lə lǎʼ ngô: “Jâŋ lə laghʼ pə̂ nci fefe ńŋə̂ pye nci, lə́ ə́ ngwǒ lə́ pei, mə́i pə́ ghʉ̌ lǎghʼ pə̂ Zəghʼə Ndêi-lěi ńŋə́ wéi nci.”

¹⁷Paghʼə lə pə̂i no Nde Yěso Kəlísto, Sê ŋə̂ zə̂u lətəi-ndwuŋ lə́ paghʼə. A lə kə́ mbou ŋə́ pə́ zěi lə́ páp. N ndə pə̂ zâa wǒ lə̂ ntôʼ Sê lə̂ ngʉ́ zə̂u yi a kǒŋ?»

¹⁸Pye Kəlísto pêi zûʼ mwo mətsâr, ə́ naʼ gháp, ə́ ncʉ́ʼ mə́ ngûʼtə Sê ndaʼ ngô: «Kwaʼ lə́nə́ʉ, Sê kə tsôʼ laŋə́-ndə̂u ŋə́ lə́ pye pi káa gháp pə̂ gháp pəyúda, gháp kə́p cǐ záp, ə́ ngwǒ lənyâŋ yi shʉʼʉ.»

¹⁹Ə́ lə ghíʼ pə́, mə́i pə́ lə lei tə njwí Etyêŋ, pə́ ji lə̂ ŋə́ pye Kəlísto ngwôʼ. Gháp fû Yelúsalêm ə́ sêi sǎr yʉʼ. Pəcó lər tə nkə́u cər ngoŋ Fenisî, pəcó lə̂r lə̂ Shîpələ[4], pəcó lə̂r lə̂ túsoŋ Antyǒshə, ə́ ndə̌r yə́rə́, ə́ nkə́u yʉʼ tsəm, ə́ nkə́ mə́ ndêʼtə pə̂ no Sê, lə́ ə́ ndeʼtə pə́ lə́ pəyúda.

²⁰Pəcó pye Kəlísto pi gháp lə pə́ pye Shîpələ gháp pə pi túsoŋ Silêinə tô záp tə nkə́u Antyǒshə, ə́ mə́ ndêʼtə Nkəʉ Shʉʼʉ Nde Yěso Kəlísto mbó pye pi káa gháp pə̂ gháp pəyúda.

²¹Nde pə̂ ntôutə gháp, pye tə nzáa kə̂ ncí mə́ mbə̂i záp no Yěso Kəlísto, ə́ ncʉ̂ʼ pye pé.

²²Yo no tô tə nkə́u lətuŋú Pye Kəlísto pi Yelúsalêm, gháp tsôʼ Pənə́páasʉ, ə́ ntə́u yé Antyǒshə.

²³A lə̂r tə nkə́u wó, ə́ njwó mbə̂u yi Sê pə̌ ndaghʼ poŋə-ntə̂ʉ yé ńtʉ̂ŋtə pye pi gháp pə́i no yé, ə́ poŋə́ yé gháʼate. A côghʼ mətəʉ máp ńgó gháp kə́ njí pə́ ndaʼ Nde, ə́ nkə́ ncóghʼ ntə̂ʉ gháp pə́ lə́ zʉ́.

²⁴Pənə́páasʉ lə pə́ ŋuu ə́ ngwǒ ncǐ shʉʼʉ, mə́i Zəghʼə Ndêi-lěi lə́ zʉ́ mə́ yé, a pôu ngwô pə̂i-ntə̂ʉ nzəm Kəlísto, pye tə nzáa lei lə́ zʉ́ ə́ ncʉ́ʼ pye Kəlísto.

²⁵Pənə́páasʉ pôu ngwô túsoŋ Táasʉ lə̂ ndôu Sôl.

²⁶Ə́ kə́u wó ə́ njwó yé, ə́ ndághʼ yé ḿbə̌ʉ lə́ Antyǒshə. Gháp zʉ́ tô ńkə́u wó, ə́ nkə́u cər cûʼtə pye Kəlísto ə́ nyáŋ wó tâʼ nguʼ, ə́ mə́ njyêʼ pye tə nzáa no Sê. Pə́ lə ji pə́ Antyǒshə lə̂ fúŋ ngaŋə-jyêʼ-no Yěso ńgó Pye Kəlísto.

²⁷Ə́ pə̂ mpfu wêi, pəcó pətsətə́-nkəʉ Sê pə̂ có leʼé, ə́ fú Yelúsalêm ə́ ntó nkə́u Antyǒshə.

²⁸Cǒ ŋuu pə̂ təcər páp ləjôghʼ yé pə̂ Agabwísʉ, Zəghʼə Ndêi-lěi cʉ́ŋə yé a lâʼ ńgó wáʼ pə̂ ngwo ngwʉ̌ wó cər lâʼ tsəm. Wáʼ wei lə wʉ̂ mpfu yi Kəlôdə lə pə́ fou pəlóma.

²⁹Pye Kəlísto zûʼ yə́rə́, ə́ ntághʼ ńgó wǒwó môutə́ yʉʼ pé, ə́ ŋə̂ yé zə̂u yi a kǔʼ mə́u pə́ tə́u ndághʼ ḿpfútə́ pəfə̌r pi gháp pə́ cər paghʼə-ngoŋ Yudêi.

³⁰Gháp kə̂ ngʉ́ yə́rə́ ə́ cʉ́ʼ ntə́u Pənə́páasʉ gháp Sôl, gháp laghʼ ńdə́r ngwo ńŋə́ lə́ pətə̌ʉ-tú-mbi cər cûʼtə pye Kəlísto.