Read Ngombale Məfaʼ Pəghaŋə-ntə̂u 12 Bible Online

Məfaʼ Pəghaŋə-ntə̂u 12 - Ngombale bible

Məfaʼ Pəghaŋə-ntə̂u 12

¹Ə́ lə pə́ mpfu wêi, Fou Elôdə jî lə̂ ngôutə́ có ngaŋə cûʼtə pye Kəlísto, ə́ ŋə̂ gháp ngwôʼ.

²Ə́ ngʉ̌ pə laghʼ nyǐ ntso ńzáʼ tû Jâghʼ fə̌r Jâŋ.

³A jwô ghíʼ a ghʉ̌ yə́rə́, ə́ poŋə́ pəyúda, ə́ nkə́ ncí ngʉ́ pə ghou Pyêh. Pə́ lə ghou yé yə́rə́, ə́ mpfu yi pə́ pfâr mbələ̂ghʼ tə́ mvuŋ, ə́ ndaghʼ ńtsúŋtə́ lətsei Pásʉ́ka.

⁴Elôdə ghʉ pə́ ghou yé, ə́ ncóghʼ ndə̂-tsâŋ, a tsôʼ pəlwóʼó-ntso ləkwo ləkwo mpfu ləkwo pi gháp wo pə́ pâp yé tə lətsei Pásʉ́ka lêi, pə tághʼ yé mbi lâʼ, ə́ fěʼ yé.

⁵Pyêh pə̂ ndə̂-tsâŋ yə́rə́, cûʼtə pye Kəlísto pə̂ sʉ̂ʉtə Sê tû zʉ́ tə́ kâa.

⁶Ə́ lə pə́ lətwûʼ leʼé yi nzʉ̂ lə tə́i fóghʼ Elôdə tághʼ Pyêh mbi lâʼ pə fêʼ yé, Pyêh nûŋ ndə̂-tsâŋ təcər pəlwóʼó-ntso pə́pwô mə́ ndé, pə́ laghʼ pəcêŋ pə́pwô ńkâp yé, pəcó pəlwóʼó-ntso tə̂ʉ ntsʉ ndə̂ mə́ mbâp ndə̂-tsâŋ.

⁷Cwôʼ Nde ghápə-ghapə́ nkwár, nkeʼ kwâr ńgʉ́ yʉʼ naa fóghʼ cər ndə̂. Cwôʼ Nde pə̂uʼtə Pyêh, ə́ njyě yé, ə́ ndǎʼ lə́ zʉ́ ngô: «Fátə́ nděsê!» Pəcêŋ lêi-lěi fú mbô zʉ́ ńkéʼtə́ ńcwə́rə́ sê.

⁸Cwôʼ Nde kə̂ ncí ndáʼ lə́ zʉ́ ngô: «Kə́r nkədə́ zô, ə́ ngwér məlaŋə́ mô.» A ghʉ̂ yə́rə́. A kʉ́ʼʉ ndáʼ lə́ zʉ́ ngô: «Mǎʼ ndǐ fwôghʼ zô, ə́ ntsə́ʉ nzəm məŋ.»

⁹Pyêh tsə̂ʉ nzəm zʉ́, gháp zʉ́ kwar; lə́ káa Pyêh jî yé ńgó zə̂u yi ə́ pə́ nděi ə̂ no lə́nə́ʉ, ə́ mə́ nkwâŋ yé pə́ ńgó Sê ŋěʼ nyôghʼ mé a pə̂ njwô có zə̂u.

¹⁰Cwôʼ Nde lâghʼ Pyêh ńzéʼ nduŋ-mbi nou pəlwóʼó-ntso, ə́ nzéʼ mbâatə pwô, ə́ nkə́u lə̂ ntsʉ nkâʼ tə̌ʉ yi ə́ ŋwě túsoŋ. Ntsʉ nkâʼ tsóʼo pə́ zʉ́, ə́ ŋéʼé ńtə́ʉ. Gháp kwar, ə́ ntsə́ʉ laŋə́ mə́ ŋə̂i, cwôʼ Sê Nde ghápə-ghapə́ mê mənyôghʼ zʉ́.

¹¹Jîno Pyêh tô, a lâʼ ngô: «N njwo mpfu wo kwaʼ lə́nə́ʉ ńgó Nde tə̌u cwôʼ Sê yé ńgó a tó ḿpfú ghâa mbó Elôdə, ə́ mbǒu mpfú ghâa lə́ məno tə́poŋ mə́tsəm mi pəyúda lə pə́ ndôu lə̂ ngʉ́ lə́ məŋ.»

¹²Jîno yé tô yə́rə́, a lə̂r lə̂ ndə̂ Mǎyaa mə́ pə Jâŋ yi có ləjôghʼ yé Máakúsʉ. Ə́ yʉʼ pye tə nzáa lə kəitə́ wó, ə́ mə́ sʉ̂ʉtə Sê.

¹³A pə̂uʼtə ntsʉ nkâʼ, cǒ ngaŋə-faʼ yi məngyě yi pə́ fûŋ yé ńgó Rôdə tô lə̂ ntsóʼ.

¹⁴Ə́ nzúʼ nji, ə́ ndə̌i ńgó ə̂ nji Pyêh, ə́ poŋə́ yé tə a cʉ̂ʼ lə̂ ntsóʼ ntsʉ nkâʼ, ə́ nkhʉ́tə́ mbə̂ʉ ndə̂ ńdǎʼ ngô: «Pyêh wə̂ ntsʉ nkâʼ!»

¹⁵Pə́ lâʼ lə́ zʉ́ ngô: «Ô pə!» Lə́ a pə̂ fárə́ ńdâʼ gháp ńgó ə̂ no lə́nə́ʉ. Gháp cʉ̂ʼ ndáʼ ngô: «Â cwôʼ Sê yi a pâp yé.»

¹⁶Lə́ Pyêh kə̂ mə́ mbə̂uʼtə pə̂ ntsʉ nkâʼ tə ə́ ghi lyəghʼtə́, gháp tô ńtsóʼ ńjwó, ə́ pə̂ zʉ́. Ə́ fû ntsə̂ gháp gháʼate.

¹⁷Pyêh mə̂iʼtə pô ndaghʼ ńgʉ́ gháp naʼ, a pyêtə ńdáʼ gháp mbə̂u yi Nde Sê lǎghʼ ńkwárə́ yé ndə̂-tsâŋ, ə́ mbou ndáʼ lə́ páp ngô: «Pei lâʼ Jâghʼ mbaa pəfə̌r.» Ə́ ndǎʼ yə́rə́, ə́ nkwár ńdə̌r yé lə̂ yʉʼ ndeʼe.

¹⁸Nzʉ̂ fôghʼ, káa pəlwóʼó-ntso kə́ njwô gháp Pyêh, yʉʼ cʉʼʉ təcər páp, gháp cʉ̂ʼ mə́ ntúŋu təcər páp ngô: «Ə hó ghʉ̌ Pyêh?»

¹⁹Fou Elôdə zûʼ, ə́ ntə́u ńgó pə́ ŋáa ndôu yé, pə́ lou yé kə́káŋ, a ghʉ̂ gháp pyêtə ntsʉ gháp, a lâʼ ńgó pə jwítə́ gháp. Elôdə ghʉ̂ yə́rə́, ə́ fú túsoŋ Yudêi ńdə́r lə̂ túsoŋ Sezarê, ə́ nkə́u wó nyéʼ nyáŋ.

²⁰Elôdə lə pə́ nzáŋə́ lóŋ ə́ ntê pye túsoŋ Tîr mbaa ntê pye túsoŋ Sidôŋ. Gháp kəitə ńgwô tâʼ ntsʉ lə̂ ngwó ńjwó yé, gháp pə pǎp myâghʼ sǎʼ, ə́ ngwo ńjwó Bəlatúsʉ, a pə̂ ŋuu yi a pâp ndə̂ fou, gháp pə pǎp tsâr, gháp côghʼ zə̂u pô zʉ́ ńgó a ŋə̂i kə̌m gháp ə́ ŋə́ lə́ páp, lə̂ no yi ə́ pə́ təcər páp pə fou Elôdə. Ńté no lələʉ məzʉ̂ lə ghí tô lə̂ lâʼ páp, ə́ fû pə́ lâʼ fou Elôdə.

²¹Pə́ tʉ̂ŋ leʼé, fou Elôdə mâʼ ndǐ ləfou ye, ə́ ntó ńnyáŋ lə̂ lwoŋ ləfou yé, ə́ mə́ ndâʼ no lə́ páp.

²²Lâʼ pə̂ sóghʼə yé ə́ ndâʼ ngô: «Káa tsâr yo pə́ pə̂ tsâr ŋuu-məsoŋ, Sê lə̂ tsâr!»

²³Cǒ tâʼ cwôʼ Nde mâʼ ghou lə́ Elôdə pə̂ mpfu wêi ńté no a nkaŋ ləghûʼ Sê ndǎghʼ ńgʉ̂ ye. Ə ntor zʉ̂ yé a kwʉ̂.

²⁴Lə́ ə́ ngwǒ lə̂ tsâr Sê, ə́ kʉʼʉ nzʉ́ pə̂ yʉʼ.

²⁵Ə́ ngwǒ lə́ Pənə́páasʉ gháp Sôl, gháp myaghʼ faʼ yi gháp lə tó lə̂ Yelúsalêm ńté zěi, ə́ ngí pə̌ʉ lə̂ Antyǒshə, ə́ ndághʼ Jâŋ yi có ləjôghʼ yé Máakúsʉ ńdə́r.