Read Ngombale Məfaʼ Pəghaŋə-ntə̂u 13 Bible Online

Məfaʼ Pəghaŋə-ntə̂u 13 - Ngombale bible

Məfaʼ Pəghaŋə-ntə̂u 13

¹Ə́ lə pə́ təcər cûʼtə pye Kəlísto Antyǒshə, pəcó pye pə̂ wó, ə́ mbə́ pye pi gháp nyâŋ ntsə́tə nkəʉ yi fû mbó Sê. Ə́ mbə́ wó yə́rə́, pye pi gháp jyêʼ pye no Sê kə̂ mbə̂ záp wó lə́wó. Ə́ lə pə́ Pənə́páasʉ, ə́ ngʉ̌ Síməu yi ləjôghʼ məsəu yé shíshí ŋuu, ə́ ngʉ̌ Lusyǒsʉ ŋuu Silêinə, ə́ ngʉ̌ Manayêŋ sə̌u ngə́mnaa Elôdə yi gháp zʉ́ lə nǎa ngúʼ, ə́ ngʉ̌ Sôl.

²Ə́ pə̂ có leʼé gháp koŋ koŋə́ nyáŋ nji, ə́ sʉ́ʉtə́ Sê, Zəghʼə Ndêi-lěi lâʼ lə́ páp ngô: «Pei fâghʼ Pənə́páasʉ gháp Sôl ə́ nyér gháp, gháp ghʉ̂ faʼ yi n ndə tsóʼ gháp ńté zěi.»

³Gháp zûʼ yə́rə́, ə́ nkǒŋ koŋə́ ńnyáŋ nji, ə́ sʉ́ʉtə́ Sê tə nyér, ə́ nzápə́ mbô tû páp, ə́ nyér gháp, gháp lər.

⁴Zəghʼə ndêi-lěi lei tə nkə́u lə́ Pənə́páasʉ gháp Sôl yə́rə́, gháp wo túsoŋ Silisî ńkə́u Láanji ńdə́r lə̂ có ngoŋ yi nci lə zə́mə́ ńŋə́ təsoŋ pə́ fûŋ ńgó Shîpələ.

⁵Gháp lər tə ńkə́u wó, ə́ nkwǎr láanji ə́ túsoŋ Salamînə, ə́ njǐ lə̂ ŋáa ŋə̂i məndə̂ cûʼtə pəyúda, ə́ ntsə́tə Nkəʉ Shʉʼʉ. Gháp pə Jâŋ Máakúsʉ pə̂, a pə̂ ŋə́i ḿpfûtə gháp.

⁶Gháp zêʼ ngoŋ Shîpələ tə ńkə́u túsoŋ Pafósʉ, ə́ njwô cǒ ngaŋə ləkaŋ, pə́ fûŋ yé ńgó Baa-Yěso*, a pə̂ ŋuu pəyúda, ə́ mə́ fûtə pye ńgó a ntsətə-nkəʉ Sê,

⁷ə́ mbə́ cǒ ŋuu yi a lə nyâŋ mbəʉ ngə́mnaa Seijwísʉ Polôs, ngə́mnaa wêi pə̂ ŋuu ngwó jîno gháʼate, ə́ ntə́u pye ńgó gháp wó fúŋ Pənə́páasʉ gháp Sôl ə́ ŋə́ lə́ zʉ́, ńté no a lə pə́ ntsâa lə̂ nzúʼ tsâr Sê.

⁸Pənə́páasʉ gháp Sôl lə pə́ ndâʼ tsâr Sê mbó ngə́mnaa, ngaŋə-ləkaŋ wêi yi ləjôghʼ yé Elimásʉ lə̂ tsâr Gərêghʼ pə̂ ndə̂ʼ no záp, ə́ ndaghʼ ńdôu lə̂ nkə́ʼtə́ ngə́mnaa lə̂ mbə́i no Yěso.

⁹Ə́ pə̂ yə́rə́, Zəghʼə Ndêi-lěi kə̂u lə́ Sôl yi có ləjôghʼ yé ə̂ Pôl, a shə́rə nyôghʼ mé ńtághʼ lə́ Elimásʉ,

¹⁰ńdáʼ lə́ zʉ́ ngô: «O ngaŋ píʼí, ə́ mbə́ ŋuu tə́poŋ, môu Sə́tə, ngaŋə-mbəu no shʉʼʉ tsəm, zə̂u tsəm yi Sê tsuŋú ə́ tə̂ʉ ndʉŋ-ndʉŋ o ghôu ŋóʼtə́. Tə o ghʉ̌ nyér lə̂ shə́tə́ tsâr Nde Sê pə́ shʉŋə́?

¹¹Lə̂ mpfu wo, jí ńgó o kə̌u mbó Nde. O wo fwǒghʼ, tə ə̂ nyéʼ ncí tə́ ghó o pôu nkə́ njwó ləjôghʼ mə́nəu.» Pə̂ mpfu wêi mpfu wêi, a fwôghʼ, ə́ cʉ́ʼ mbə́ pə́ cər nzə̌m, ə́ njǐ lə̂ shə́rə́ môutə́ məyʉʼ ńdôu ŋuu yi a wo ghwǒ pô yé ə́ lǎghʼ ńcághʼə́ yé.

¹²Ngə́mnaa jwô zə̂u yi ə́ lěi, ə́ mbə́i no Yěso, ə́ ghi pə́ mə́i a zǔʼ tsâr Nde, ə́ kə̂u yé gháʼate.

¹³Pôl gháp pə ngaŋə-ku yé fû túsoŋ Pafósʉ, ə́ nkə́u láanji ńdə́r lə̂ túsoŋ Pêjə cər paghʼə-ngoŋ Pamfilî. Ə́ nkə́u wó, Jâŋ Máakúsʉ nyêr gháp ə́ mbə̂ʉ yé lə̂ Yelúsalêm.

¹⁴Pôl gháp Pənə́páasʉ cʉ̂ʼ nzəm fú Pêjə ə́ ndə́r lə̂ Antyǒshə yi a pə̌ mbəʉ ngoŋ Pisidî. Leʼé nji pəyúda ghʉ nkûʼ, gháp wo ndə̂ cûʼtə, ə́ nyáŋ sê.

¹⁵Pə́ fûŋ tsâr Sê cər ŋwaʼa ləpə̌ʉ Mə̌usə̂i mbaa cər yi pətsətə́-nkəʉ Sê tə ə́ kuʼ, pətə́-ndə̂ cûʼtə tə̂u pə́ wo ńdáʼ lə́ páp ngô: «Pəfə̌r, pei lə̌i ngwô có tsâr yi mboʼ pei lâghʼ ńtóutə́ pye, pei lâʼ mpfu wo.»

¹⁶Ə́ pə̂ yə́rə́ Pôl lêsê, ə́ mə̂iʼtə pô ndaghʼ ńgʉ́ gháp naʼ, a lâʼ ngô: «Pei pye Ísə́lahêl mbaa pei pi pei pə̌ ngûʼtə Sê, pei zúʼ!

¹⁷Sê pye Ísə́lahêl lə tsóʼ pəmə́ngâa-njʉʼ pághʼ, ə́ ngʉ́ gháp wo nyáŋ tə̂u cər lâʼ Egípto, ə́ nzə́r, a pôu fú wó ńdághʼ mətəʉ ńkwárə́ gháp.

¹⁸Ə́ mbápə́ gháp koŋə-məkwaʼá nguʼ mə̂m-ləkwo;

¹⁹ə́ mbáatə́ ə́ mbə́ghʼ məngoŋ Kánahâŋ saambwô, ə́ ŋə́ məndesé máp lə́ pəmə́ngâa-njʉʼ pághʼ ə́ cʉ̂ʼ máp.

²⁰Ə́ pə̂ mpfu wêi ndághʼ mbə̂ no zə̂u nguʼ nkʉ ləkwo lə̂ mə̂m-taa ghíʼ Sê lə tsóʼ gháp. Sê pâatə ə́ nkə́ ncʉ́ʼ ŋə̂ pə́ pəfěʼ məno lə́ páp tə ndáʼ ngwó ndyəghʼtə́ lə̂ mpfu yi Samyê ntsətə-nkəʉ Sê.

²¹Pəmə́ngâa-njʉʼ pághʼ ghʉ ndóu fou, Sê ŋə̂ Sawûl môu Kîs lə́ páp. A pə̂ ŋuu ngər-ndə̂ Benjamêŋ, ə́ sáʼ lâʼ nguʼ mə̂m-ləkwo.

²²Sê ghʉ̂ mêʼ fou Sawûl, ə́ ncʉ́ʼ ntsóʼ Davîd ńdághʼ ńgʉ̌ fou, ə́ ndáʼ no ńté yé ngô: “N njwǒ Davîd môu Jesê, a pə̂ ŋuu yi m mə̌ ntsáa, ghíʼ a wo ghʉ̌ zə̂u tsəm yi m mə̌ nkǒŋ.”»

²³Ə́ lə leitə́ lə̂ ndaʼá yi Sê lə ghʉ̌ lə̂ ngər-ndə̂ Davîd ńté pye Ísə́lahêl, pə́ jî ŋuu yi a ghʉ pə́ cwór: a pə̂ Yěso.

²⁴Yěso lə ghí tó, mə́i Jâŋ pyəghʼ mə́, ə́ mə́ ndêʼtə tsâr Sê, ə́ ndâʼ lə́ pye Ísə́lahêl ńgó gháp kə́p cǐ záp mpfú nci.

²⁵Ə́ lə pə́ mpfu yi Jâŋ wo myaghʼ faʼ yé, ə́ ndǎʼ lə̂ lâʼ ngô: «Pei kwaŋ ńgó məŋ wǒ? Kâa m mbə̂ ghâa ŋuu yi pei zʉ̂ʼtə yé lə̂! Pei tsuŋú nzúʼ, a pə́ nzəm mə́ ntó, ə́ nděi ghâa tə kâa m mbə́i nkuʼ ghâa lə̂ ŋwúʼú sê ńkeʼtə́ mənkʉ məlaŋə́ mé.»

²⁶«Pəfə̌r, pei pi pei pə̌ ngər Ábələhâm, mbaa pei pi pei pə̌ nzûʼ ntsʉ Sê, pei jí ńgó Sê lə ŋə̂ yo tsâr yi ə́ ghʉ pə́ cwôr gháʼá lə́ paghʼə.

²⁷Lə́, ə́ kə́ mbə́ gháʼa, pye Yelúsalêm gháp pə pəsǎʼ lâʼ páp kâa lə jî gháp ŋuu yi Yěso pə̌ wěi, ə́ njwí yé. Ə́ pə̂ yə́rə́, ə́ ndaghʼ ḿbə̂utə́ lə̂ no yi pətsətə́-nkəʉ Sê lə záʼ nzʉ̂ ndǎʼ, lə́ ə́ mbou mə́ fûŋ zěi cər məndə̂ məcûʼtə máp məleʼé nji mə́tsəm.

²⁸Gháp lə pə́ tə mbúŋ fər yi mboʼ gháp côghʼ paa zʉ́ ndaghʼ ńgʉ́ pə́ jwî yé, lə́ nkə́ ngwó ndǎʼ lə́ Piláto laʼá ńgó a ghʉ pə kə́ njwí yé jwí.

²⁹Gháp lei tə ngʉ́ zə̂u tsəm yi pə́ lə ŋwáʼá cər ŋwaʼa ńté Yěso, ə́ fú lə̂ tʉ̌-mbʉ̂ŋtə shúʼú yé ńgwó ńcóghʼ cər ləshi.

³⁰Lə́, Sê ghʉ̂ a zʉ̂ʉ lə̂ ləwʉ̂;

³¹a lâghʼ məleʼé tə nzáa ńnyárə́ mbəʉ yé mbó pye pi gháp pə pǎp lə fú Galilêi ńdə́r lə̂ Yelúsalêm. Pêi pye lə́ cʉ́ʼ ḿbə́ mpfu wo ḿbə́ pənzǔʼ-njwó pé mbi pye Ísə́lahêl.

³²Paghʼ zághʼ lə́wó tó gháʼa lə̂ ndâʼ wéi Nkəʉ Shʉʼʉ zêi, ə́ pə̂ ndaʼá yi Sê lə ghʉ̌ mbó pəmə́ngâa-njʉʼ pághʼ;

³³a ghʉ ə́ pəutə mpfu wo lə́ paghʼ pye Ísə́lahêl pi paghʼ pə̌ ngər-ndə̂ záp, ə́ ndeitə́ ghíʼ a lə ghʉ̌ Yěso zʉ̂ʉ lə̂ ləwʉ̂. Pə́ lə zâʼ nzʉ̂ ə́ ŋwáʼá məno mêi cər ŋwaʼa məzap-nci kəm pwô ngô: “Ô môu ghâa, lə̂ fú leʼé wo, mə̂ŋ Tə́ gho.”

³⁴Ə́ ngwǒ ghíʼ Sê lə ghʉ̌ Yěso zʉ̂ʉ lə̂ ləwʉ̂ tə́ káa lʉ̂ yé lə̂, a lə záʼ nzʉ̂ ndǎʼ ngô: “N ngʉ̌ cóghʼ mbwórə zâa lə́ pei, ə̂ pə́ kwaʼ zěi yi n ndə ghʉ̌ ndaʼá mə́u mbó fou Davîd.”

³⁵Ə̂ zə̂u yi ə́ lə ghʉ̌ pə́ lə ŋwáʼa cər có yʉʼ ŋwáʼa Sê ngô: “Sê láʼ nyêr yé ŋuu yi a pə̌ yé â lʉ́ cər ləshi po.”

³⁶Ə́ ngwǒ lə́ fou Davîd, mə́i a lə ghʉ̂ zə̂u yi Sê lə tə́u yé ńgó a tó ńgʉ́ lə́ yé mpfu tə́ ə́ kuʼ, a kwʉ̂, pə́ tʉ̂ŋ yé mbəʉ pəmə́ngâa-njʉʼ pé, a lʉ̂.

³⁷Lə́, ə́ ngwǒ lə́ Yěso yi Sê lə ghʉ̌ a zʉ̂ʉ lə̂ ləwʉ̂, káa a lə lʉ̂ yé.

³⁸Pəfə̌r, pei tsúŋú njí ńgó pə́ laʼ wéi leʼé wo ńgó Sê lyə́ghʼə́ məfaa pye gháʼá, ə́ ndwúʼu Yěso. Wǒwó yi a pə̌i no Yěso wêi, Sê wo jwó yé ghíʼ ŋuu ndʉŋ-ndʉŋ mbi zʉ́, ə́ pə̂ zə̂u yi ləpə̌ʉ Mə̌usə̂i kâa lə kûʼ yé lə̂ ngʉ́.

³⁹

⁴⁰Ə́ pə̂ yə́rə́, pei laghʼə́ tû zéi ə́ mbóghʼ lə́ pə́ yi mboʼ no yi pətsətə́-nkəʉ Sê lə ŋwáʼá cər ŋwaʼa ghap ghʉ wéi. Gháp lə laʼ ngô:

⁴¹“Pei pi pei wâghʼ ghâa, pei wo pyér pə́ ndəu ndesé, n ngʉ̂ cǒ tə́koʼ no tə ə̂ pə́ yi mboʼ pə́ lə lâʼ wéi laʼá pei pə̂i wéi po. Pei wo jwó, ə̂ kə́ʼə́ wéi tə pei sêi.”»

⁴²Pôl gháp Pənə́páasʉ fû ndə̂ cûʼtə pəyúda ńkwár, pə́ sʉ̂ʉtə gháp ńgó gháp ghʉ́ ḿbə́ leʼé nji yi ngap gháʼa ə́ nkə́ ncí ntó, ə́ mbyə́ghʼə́ ńdáʼ gháp no ńté no zêi.

⁴³Pə́ kwar ndə̂ cûʼtə ə́ ngí sěi, pəyúda tə nzáa gháp pə pye pi gháp lə pə́i no Sê pəyúda tsə̂ʉ nzəm páp. Pôl gháp Pənə́páasʉ kə̂ ncí ncwôtə́ gháp ńgó gháp ntsúŋu ngwǒ məzə̂u shʉʼʉ mi Sê lə lǎghʼ ḿmâʼ pou záp kwaʼ shʉʼʉ.

⁴⁴Có leʼé nji pəyúda ghʉ tô, lələʉ pye túsoŋ tô lə̂ nzúʼ tsâr Sê.

⁴⁵Pəyúda jwô mbə̂u yi lâʼ lǎghʼ ńkóʼ, ə́ nzáŋə́ lóŋ ńté Pôl gháp Pənə́páasʉ. Ə́ njǐ lə̂ ndə̂ʼ mətsâr Pôl gháp Pənə́páasʉ ə́ mbǒu mə́ nzôutə́ gháp.

⁴⁶Pôl gháp Pənə́páasʉ sâa-sǎa ndáʼ lə́ páp ngô: «Paghʼ yaa ngwǒ lə̂ ntsə́mbi ndáʼ tsâr Sê pə́ lə́ pei pəyúda, lə́ ghíʼ pei kə̌ ndə̂ʼ wéi, ə́ mbǒu nyárə́ ńgó káa pei kûʼ wéi lə̂ ngwô ləcwôr tə me lə̂, paghʼ wǒ lǎʼ zěi lə́ pye pi káa gháp pə̂ gháp pəyúda.»

⁴⁷Ńté no Nde Sê lə lâʼ lə́ paghʼ ngô: «N ndaghʼ gho ńgʉ̌ nkeʼ yi wo kěʼ ngoŋ ngoŋ, ńjí ńgó pei wo maa yʉʼ tsəm ndəu ndesé ə́ ndâʼ ńgó Sê pə̌ ngʉ̌ pə́ cwôr.»

⁴⁸Pye pi káa gháp pə̂ gháp pəyúda zûʼ no zêi, ə́ ntsěi gháʼate, ə́ njǐ lə̂ ngúʼtə́ Nde. Pye pi Sê lə tsóʼ gháp lə̂ ndáʼ ngwô ləcwôr tə me, pə̂i no Yěso Kəlísto.

⁴⁹Tsâr Nde naa sâr zêi paghʼə-ngoŋ tsəm.

⁵⁰Lə́ pəyúda twôtə pəcó pəngyě cʉ̌ pi gháp lə pə́ túsoŋ mə́ ngûʼtə Sê gháp pə pəkə̌m, gháp ŋə̂ Pôl gháp Pənə́páasʉ ngwôʼ, ə́ nzûŋ gháp lâʼ páp.

⁵¹Ə́ pə̂ yə́rə́, Pôl gháp Pənə́páasʉ lər; lə́ ngǐ lə̌r, ə́ pfə̌r pəpə́ lâʼ záp məku páp lə̂ ndághʼ ńdǎʼ gháp ńgó ə́ cʉ́ʼ nâŋ pə́ gháp, ə́ ngʉ̌ yə́rə́ ə́ ndə̂r gháp lə̂ túsoŋ Ikonyôm.

⁵²Ə́ ngwǒ lə̂ ngaŋə-jyêʼ-no Yěso pi túsoŋ Antyǒshə, Zəghʼə Ndêi-lěi fû nkəu lə́ páp, gháp pou nyâŋ gháp lə̂ lətsei.