Read Ngombale Məfaʼ Pəghaŋə-ntə̂u 14 Bible Online

Məfaʼ Pəghaŋə-ntə̂u 14 - Ngombale bible

Məfaʼ Pəghaŋə-ntə̂u 14

¹Pôl gháp Pənə́páasʉ kə̂u Ikonyôm, ə́ nkə́ ngʉ́ pə́ ghíʼ gháp kə́ ghʉ̌ Antyǒshə, ə́ ngwo záp ndə̂ cûʼtə pəyúda, ə́ nkə́u wó, ə mbə̂u yi gháp lǎghʼ ńdeʼtə́ tsâr Sê ghʉ pəyúda tə nzáa gháp pə pye pi káa gháp pə̂ gháp pəyúda pə̂i no Yěso.

²Lə́ pəcó pəyúda pi gháp lə̌ʼ gháp lə̂ mbə́i no Yěso twôtə pye pi káa gháp pə̂ gháp pəyúda lə̂ ngʉ́ no tə́poŋ lə́ pye pi gháp pə́i no Yěso.

³Gháp lə pə́ tə ntwótə́ gháp yə́rə́, lə́ Pôl gháp Pənə́páasʉ ghi nyéʼ nyáŋ Ikonyôm, ə́ ntághʼ pə́ Nde mbi, ə́ mbou mə́ sâa-sǎa ndêʼtə no Sê tə́ pôghʼ. Ə Sê pôu mə́ ndêi lə́ páp ngʉ̂ mənkəʼə-məno lə̂ ndághʼ ńnyárə́ pye ńgó no yi gháp laʼ ńgó Yěso Kəlísto lə mâʼ pou pye-mə́soŋ, ə̂ no lə́nə́ʉ.

⁴Ə́ mə́ ndâʼ yə́rə́, pye pi gháp lə pə́ túsoŋ ghaptə mbəʉ záp. Pəcó ghi tsə́ʉ nzəm pəyúda, pəcó tsə̂ʉ nzəm pəghaŋə-ntə̂u.

⁵Pəyúda gháp pə pye pi káa gháp pə̂ gháp pəyúda mbaa pəfou páp tsâr nzúʼú ńgó pə ghághʼə́ gháp mbǒu ndághʼ məghǒ ńtə́m gháp njwítə́.

⁶Ə́ mbyér mə́ nkwâŋ kwaŋə́, Pôl gháp Pənə́páasʉ jî, ə́ nkhʉ gháp ndə́r lə̂ cər ngoŋ Likahonî, ə́ nkə́u wó, ə́ ndə́r lə̂ túsoŋ Lístələ gháp Dérəbə mbaa cər məcó mətúsoŋ mi ə́ páatə́ yʉʼ wó.

⁷Ə́ ŋə̌i nkə́ mə́ ndêʼtə pə̂ Nkəʉ Shʉʼʉ ńté no Yěso.

⁸Ə́ lə pə́ túsoŋ Lístələ, cǒ ŋuu pə̂ wó, ə́ mbə́ pwoʼtə-mə́ku, mə́i pə́ lə jí yé, a pə̂ pə́ yə́rə́ tə a laa kə́ ŋə̂i yé.

⁹Ə́ pə̂ có leʼé, a nyáŋ sê mə́ nzʉ̂ʼtə tsâr Pôl, Pôl tâghʼ nyôghʼ lə́ zʉ́, ə́ njwó ńgó a ghwo pə̂i-ntə̂ʉ nzəm Yěso tə mboʼ Sê ghʉ̂ a shwîtə;

¹⁰ə́ njwó yə́rə́, ə́ ndáʼ lə́ zʉ́ lə̂ təʉ ngô: «Lěsê ńtə́ʉ tə́ʉ lə̂ məku mô!» A tə̂u sê ə́ njǐ lə̂ ŋə̂i.

¹¹Ə lâʼ jwô zə̂u yi Pôl ghʉ̌, ə́ ndǎghʼ tsâr lâʼ záp ńdyár ńdáʼ ngô: «Yo məsê mi ə́ shə́rə́ ńcʉ́ʼ pye-mə́soŋ, ə́ shíʼ ńtó ḿbə́ təcər paghʼə.»

¹²Gháp jwô yə́rə́, ə́ ncǐ ləjôghʼ Pənə́páasʉ ńgó sê Zə̂s, ə́ ncǐ yi Pôl ńgó sê Erəmésʉ, ńté no zʉ́ lə́ lə tsâr mpfu tsəm[5].

¹³Pə́ lə lei lə̂ yʉʼ sê Zə̂s mboŋə́ kə̂u túsoŋ páp. Ŋuu yi a lə mâʼ zêi yʉʼ sê wô ngôu məfoŋ, ə́ ndǎghʼ pətə́toŋə́ ə́ nkwə̂i gháp, ə́ ndaghʼ ńtó lə̂ ndəu zǎa ghíʼ lâʼ wo kəitə́ wǎr, ə́ lǎghʼ ḿmǎʼ Pôl gháp Pənə́páasʉ ghíʼ pə́ maʼ məsê.

¹⁴Pəghaŋə-ntə̂u Yěso pêi pə́pwô zûʼ yə́rə́, ə́ seʼtə́ məndǐ máp, ə́ ncʉ́ŋə́ ńkə́u nou lâʼ, ə́ ndǎʼ lə̂ təʉ ngô:

¹⁵«Pəsə̌u, ə zə̂u yi pei lou ngʉ́ lə̂, ə̂ hó zə̂u? Paghʼ kə̌ mbə̂ zághʼ pə̂ pye-mə́soŋ ghíʼ pei, paghʼ kə tó lə̂ ntsətə́ Nkəʉ Shʉʼʉ, ə́ mbǒu ndáʼ lə́ pei ńgó pei méʼ məsê mi kâa pə́ mpfútə yé có zə̂u lə̂, ə́ ntsə́ʉ nzəm Sê yi a pə̌ ntəʉ. Ə́ mbə́ Sê yi a lə tsuŋú ləfaŋ gháp ndesé, tə mbaa mə̂i-nci gháp pə məzə̂u mə́tsəm mi ə́ pə́ cər wó.

¹⁶A lə pə́ mpfu ntsəmbi, ə́ nyér pye-mə́soŋ cər məngoŋ mə́tsəm zâp pə̂ máp məlaŋə́-ndə̂u mi gháp kǒŋ.

¹⁷Lə́, káa a láʼ ntî yé tə́ lǎghʼ məfaʼ shʉʼʉ mə́ ńnyárə́ gháp ńgó a pə̂ ntəʉ. Ə́ mé fû lə́pû ngʉ̌ mbʉŋ lô, məzə̂u méi pə̂ nzə́m, pei pə̂ ndôghʼ lə̂ mpfu yi ə́ pə́ ntúŋú. A lâghʼ ńgʉ́ pei pə̂ nzʉ́ ńjwə́r, ntə̂ʉ wéi pə̂ cər lətsei.»

¹⁸Gháp lə pə́ tə nzúʼ no yi Pôl gháp Pənə́páasʉ lǎʼ, lə́ gháp pou ntáŋə́ nzəm páp gháʼate gháp poŋə́ nyér tə́ mǎʼ gháp ghíʼ pə́ maʼ məsê.

¹⁹Pəcó pəyúda fû Antyǒshə yi Pisidî, pəcó fû túsoŋ Ikonyôm ńtó ə́ ngʉ́ pye Lístələ tsə̂ʉ nzəm páp, gháp pə pǎp tə̂m Pôl lə̂ məghǒ tə nkwâŋ záp pə́ ńgó a kwʉ̌, ə́ shuŋ yé ndághʼ ńfú túsoŋ ńgwó měʼ.

²⁰Lə́ pye Kəlísto tô ńzə́mə́ yé ńŋə́ soŋ, a lêsê gháp pə pǎp pəʉ lə̂ túsoŋ. Nzʉ̂ fôghʼ, gháp Pənə́páasʉ lər lə̂ túsoŋ Dérəbə.

²¹Pôl gháp Pənə́páasʉ kə̂u Dérəbə, ə́ ntsətə́ Nkəʉ Shʉʼʉ tə pye tə nzáa cʉ̂ʼ pye Kəlísto. Gháp fû wó ə́ mbə̌ʉ lə̂ Lístələ, ə́ fú wó ńdə́r lə̂ Ikonyôm, ə́ nkə́ ncʉ́ʼ ndə́r pə́ yə́rə́ tə ngwó ńkə́u Antyǒshə yi a pə̌ mbəʉ ngoŋ Pisidî.

²²Ə́ ŋə̌i ncôghʼ ntə̂ʉ pye-Kəlísto ńgó koo gháp kâa lə̂ mbə́i no Yěso, ə mbǒu mə́ ŋə̂ mətəʉ máp ńgó koo gháp nyêr pə̂i-ntə̂ʉ záp pwôr, ə́ mə́ ndâʼ lə́ páp ngô: «Pághʼə ghwo lə̂ njwó ngwôʼ gháʼate mboŋə́ kə́u cər Ləfou Sê.»

²³Pôl gháp Pənə́páasʉ lei yʉʼ tsəm yi cûʼtə pye Kəlísto pə́ wó, ə́ ndághʼ pəcó pye ńgʉ́ pəkə̌m ndə̂ Sê, ə́ sʉ́ʉtə́ Sê ə́ mbǒu nkôŋ koŋə́ nyáŋ nji ə́ sʉ̂ʉtə Sê, ə́ ndaghʼ ńcóghʼ gháp mbó Nde Yěso yi gháp pə̂i no yé.

²⁴Gháp ŋəi tə myâghʼ Pisidî, ə́ nzéʼ ńkə́u cər paghʼə-ngoŋ Pamfilî.

²⁵Ə́ nkə́u wó ńdéʼtə́ Tsâr Sê túsoŋ pêjə tə ə́ kuʼ, gháp shîʼ ńdə́r lə̂ túsoŋ Atalî.

²⁶Gháp fú yʉʼ wó, ə́ kə́u láanji ḿbə̂ʉ lə̂ Antyǒshə ə́ yʉʼ yi pə́ lə́ cóghʼ gháp mbó Sê ńgó a lâghʼ poŋə-ntə̂ʉ yé ńtóutə́ gháp lə̂ faʼ yo yi gháp fǎʼ lo.

²⁷Ə́ ntó tə nkə́u wó, ə́ nkəitə́ pəghaŋə cûʼtə pye-Kəlísto, ə́ ndéʼtə́ gháp zə̂u tsəm yi Sê kə lei lə́ páp ə́ ngʉ́, ə́ mbǒu ndéʼtə́ gháp mbə̂u yi Sê kə lǎghʼ ńgʉ́ pye pi káa gháp pə̂ gháp pəyúda ghwo záp pə̂i-ntə̂ʉ nzəm Yěso.

²⁸Pôl gháp Pənə́páasʉ gháp pə pye-Kəlísto nyêʼ nyáŋ Antyǒshə.