Read Ngombale Məfaʼ Pəghaŋə-ntə̂u 15 Bible Online

Məfaʼ Pəghaŋə-ntə̂u 15 - Ngombale bible

Məfaʼ Pəghaŋə-ntə̂u 15

¹Pəcó pye fû Yudêi ńtó Antyǒshə, ə́ njǐ lə̂ ŋáa ŋə̌i njyéʼ pye-Kəlísto ńgó ŋuu lə̌i ndə́iʼ wǒ ghʉ̌ pə púʼ yé ghíʼ ləpə̌ʉ Mə̌usə̂i pə́ ntúŋú po, mə́i Sê wo ghʉ yé a cwór po.

²Pôl gháp Pənə́páasʉ zûʼ, ə́ ndə̂ʼ; gháp pə pǎp kə̂ nzóŋə́ no mə́u zoŋə́ tə ə́ ghâʼ, pə́ tâghʼ ńgó Pôl gháp Pənə́páasʉ, ə́ nkʉ́ʼʉ pəcó pye páp wó Yelúsalêm, ə́ njwó pəghaŋə-ntə̂u Yěso gháp pə pəkə̌m ndə̂ Sê, gháp pə́ pǎp tsár lə̂ no mə́u.

³Cûʼtə pye Kəlísto yi túsoŋ Antyǒshə ŋə̂ məzə̂u mə́tsəm mi ə́ pə́ ntúŋu gháp lə̂ ndághʼ ńdə̌r. Gháp kə̂u ńdéi cər paghʼə-ngoŋ Fenisî gháp cər paghʼə-ngoŋ Samalə̂i, ə́ ŋə́i ńdeʼtə pye mbə̂u yi pye pi káa pə̂ gháp pəyúda lǎghʼ mə́ ńshərə́ ńcʉ̂ʼ pye Nde. Pəfə̌r pəfə̌r pə́tsəm zûʼ, ə́ poŋə́ gháp gháʼate.

⁴Gháp lər tə nkə́u Yelúsalêm, cûʼtə pye Kəlísto gháp pə pəghaŋə-ntə̂u Yěso ə́ ngʉ̌ pəkə̌m ndə̂ Sê pfû gháp. Gháp pyêtə zə̂u tsəm yi Sê leitə́ lə́ páp ńgʉ́, ə́ ndǎʼ gháp.

⁵Lə́ pəcó pye-Kəlísto pi gháp lə kwǎr lə̂ nou pəfalísia pə̂ ntâghʼ nkwəi ə́ ndâʼ ngô: «Ə́ pə́ ntúŋu ńgó pə pûʼ pye-Kəlísto pi káa gháp pə́ pəyúda, ə́ mbǒu ndáʼ lə́ páp ńgó gháp ŋə̂i ghíʼ ləpə̌ʉ Mə̌usə̂i pə́ ntúŋú.»

⁶Gháp lâʼ yə́rə́, pəghaŋə-ntə̂u Yěso gháp pəkə̌m ndə̂ Sê kəitə nyáŋ sê lə̂ njwó no mə́u.

⁷Ə́ lâʼ nkə́ ntə̂i tə̌i tə Pyêh lêsê ndǎʼ ngô: «Pəfə̌r pâa, pei pə̌ njî ńgó ndǐ saghʼ mə́ ghíʼ Sê lə tsóʼ ghâa təcər péi ńgó n ngwó ńtsətə́ Nkəʉ Shʉʼʉ mbó pye pi káa gháp pə̂ gháp pəyúda, ńjí ńgó gháp zúʼ ə́ mbə́i no Yěso.

⁸Sê yi a pə̌ njî ntə̂ʉ maa ŋuu ntəm lə ŋə̂ Zəghʼə Ndêi-lěi lə́ páp ə́ ndʉŋ-ndʉŋ ghíʼ a lə ŋə́ lə́ paghʼə, ə́ ndaghʼ ńnyárə́ ńgó a pə̌i ńgó ghâp pye pé.

⁹Káa a lə péʼe yé mbî təcər pághʼə pə pǎp. A lə leitə lə̂ pə̂i-ntə̂ʉ záp, ə́ sǒghʼ ntə̂ʉ gháp.

¹⁰Lə̂ mpfu wo, pei ghʉ ńgó Sê záŋə-lóŋ ńté hó? Pei lou lə̂ nkhwór pyeʼ yi káa pətə́ pághʼə lə kûʼ gháp lə̂ nkhwór, káa paghʼə zághʼə kə́ mbou nkûʼ wághʼə lə̂ nkhwór, ə́ ntághʼ tû pye pi gháp pə́i no Yěso ńté hó?

¹¹Paghʼə tsúŋu mə́ njî ńgó Nde Yěso lə ghʉ paghʼə cwôr, ə́ ndaghʼ ńcóghʼ mbwórə lə́ paghʼə. A kə̌ mbou ngʉ́ ndʉŋ-ndʉŋ lə́ páp pə́ yə́rə́.»

¹²Pyêh lâʼ tə ə́ kuʼ, ŋuu ntsəm nâʼ ńgó ntə́uʼ, Pənə́páasʉ gháp Pôl pyêtə mənkəʼə-məno gháp pə pəndǎa-jwô məno mə́tsəm mi Sê kə lěi lə́ páp ə́ ngʉ́ təcər pye pi káa gháp pə̂ gháp pəyúda, ə́ ndáʼ pye; gháp pə̂ nzʉ́ʼtə́.

¹³Gháp pyêtə tə nâʼ, Jâghʼ pfû tsâr ńdǎʼ ngô: «Pəfə̌r pâa, pei zúʼ no yi n ngwo ńdǎʼ wo.

¹⁴Síməu nyǎŋ nkʉ́ʉtə́ ńdâʼ wághʼə ghíʼ Sê lə fú ləjitə́ Nkəʉ Shʉʼʉ, ə́ ngwó təcər pye pi káa gháp pə̂ gháp pəyúda, ə́ ntsóʼ pye ńdághʼ ńgʉ̌ pye pé.

¹⁵Ə́ laghʼ ḿbə̂utə lə̂ no yi Sê lə cóghʼ ntsʉ pətsətə́-nkəʉ Sê gháp laʼ, pə́ ŋwaʼa ngô:

¹⁶“Mêi mwo məno táa lěi, m mbə̂ʉ ńtó nkə́ ncí nkə́r ndə̂ fou Ndavîd yi ə lə wʉ̌. N ntáa pə́ʼə́ ndə̂ ye yi pə́ lə vǒghʼ tə ə̂ tə́ʉ tə̂ʉ.

¹⁷Ə̂ lêi yə́rə́, pye pə́tsəm lôu Nde, n ndaʼ gháʼá mətə̂u mə́tsəm mi n ngʉ̌ fúŋ gháp, gháp tó ə́ ncʉ́ʼ pye pâa. Yo məno mi məŋ Nde, n ndǎʼ;

¹⁸tə fú leʼé pə́ yaa mə́ njî ńgó n ndei tə ngʉ́ ndaʼá lə̂ có zə̂u, ə́ ndáʼ ngʉ́.”

¹⁹Ə́ pə̂ yə́rə́, Jâghʼ lâʼ ngô: “N njwô zâa ńgó koo paghʼə ghʉ̂ wághʼə məcó məzə̂u mi mboʼ ə́ kə̂ʼtə pye pi káa gháp pə̂ gháp pəyúda lə̂ mbə́i no Sê.

²⁰Paghʼə ghʉ́ pə́ ŋwaʼa, ə́ ndaghʼ ńdáʼ lə́ páp ńgó koo gháp pfâr mbap yi pə́ lǎghʼ ḿmǎʼ sê, koo gháp pfâr mbap yi cǒ nye yi pə́ fə́mə́ yé fə́mə́ ńjwí, koo gháp zʉ̂ məci, koo gháp pəu pə̌u nzóʼ.

²¹Paghʼə ŋwáʼá yə́rə́, ńté ńgó tə fú mənguʼ mənguʼ, pə́ pə̂ cər mətúsoŋ mə́tsəm, ə́ mə́ njyêʼ pye ləpə̌ʉ Mə̌usə̂i, ə́ mbǒu mbə̂ maa leʼé nji tsəm, ə́ mə́ fûŋ zěi cər məndə̂ cûʼtə pəyúda.”»

²²Pəghaŋə-ntə̂u Yěso gháp pə pəkə̌m ndə̂ Sê Yelúsalêm, tə mbaa pye-Kəlísto pə́tsəm cʉ̂ʼ ntághʼ ńgó pə wó təcər páp, ə́ ntsóʼ pəcó pye, ə́ ntə́u gháp pə Pôl lə́ Pənə́páasʉ Antyǒshə. Pə́ tsôʼ Jwîdə yi có ləjôghʼ yé Baasabásʉ, ə́ nkə́ ntsóʼ Silásʉ, ə́ pə̂ pye pə́pwô pi gháp lâʼ no təcər pəfə̌r, pə́ zûʼ gháʼate.

²³Pə́ ghʉ ŋwaʼa yi gháp wo lǎghʼ lə̌r, ə́ ŋwaʼá cər wó ngô: «Paghʼ pəfə̌r nzəm Yěso Kəlísto, lə̂ pəghaŋə-ntə̂u Yěso, ə́ nkʉ́ʼʉ́ pəkə̌m ndə̂ Sê Yelúsalêm, paghʼ tsêʼtə́ wéi pə́tsəm; pei pəfə̌r pəfə̌r pi káa pei pə̂ wéi pəyúda, ə́ ncî túsoŋ Antyǒshə, mbaa pei pi pei ncî cər ngoŋ Sirî mbaa pi pei cî cər paghʼə-ngoŋ Silisî.

²⁴Paghʼ kə zúʼ ńgó pəcó pye kə fú nou paghʼ ńtó ńdághʼ mətsâr máp ḿmâʼ tághʼə́ təcər pei, ə́ mbǒu ndághʼ mətsâr máp mbə́u mətû méi. Káa gháp kə pə̂ gháp pye pi paghʼ tə̌u gháp.

²⁵Ə̂ zə̂u yi ə́ ghʉ̌, paghʼ pə́tsəm kəitə ngwô tâʼ ntsʉ, ə́ ntsóʼ pye ə́ nkʉʼʉ́ lə́ Pôl gháp Pənə́páasʉ, ə́ ntə́u gháp lə́ pei; páp pi paghʼ kǒŋ gháp gháʼate,

²⁶páp pi gháp lə pə́i lə̂ ncwí ləcǐ-mbî gháp ńté Nde waghʼə Yěso Kəlísto.

²⁷Paghʼ tə̂u Jwîdə gháp Silásʉ gháʼá ńgó gháp tó pə́ páp, ə́ ntə́ʉ mbi pei, ə́ ndǎʼ wéi no yi paghʼ nyǎŋ sê ńŋwáʼá cər ŋwaʼa wo.

²⁸Ńté no Zəghʼə Ndêi-lěi kə ghʉ paghʼ jwô ńgó kâa pôŋ yé lə̂ kʉʼʉ pyeʼ péi, tə ndyéʼ mwo məno mi pei ghwǒ lə̂ ngʉ́, tə ə́ pə̂ mi tə nyêr:

²⁹ə́ pə́ ńgó koo pei pfâr mbap yi pə́ lǎghʼ ḿmǎʼ sê, koo pei pfâr mbap pəmə́nye pi pə́ fə́mə́ gháp fə́mə́ ńjwí, koo pei zʉ̂ məci, koo pei pəu pə̌u nzóʼ. Pei lə̌i ndwóʼtə́ mêi mwo məno, mə́i pei ghʉ shʉʼʉ. Ə̂ cʉ́ʼ wághʼə.»

³⁰Pə́ ŋwáʼa yə́rə́, ə́ ndaghʼ ńtə́u pə Pôl, gháp lər tə nkə́u Antyǒshə, ə́ nkəitə́ pye-Kəlísto, ə́ ŋə́ ŋwaʼa wêi lə́ páp.

³¹Gháp pfû ńfúŋ, a côghʼ məntə̂ʉ máp, gháp tsêi gháʼate.

³²Ghíʼ Jwîdə gháp Silásʉ lə pə̂ záp pətsətə́-nkəʉ Sê lə̂, gháp pou ŋə́ gháp ntǎghʼ ncí mə́u lə̂ ndághʼ ńŋə́ gháp mətəʉ mbaa lə̂ ndághʼ ńgʉ̌ pə̂i-ntə̂ʉ záp ghûʼ.

³³Gháp pə pǎp nyêʼ ncí Antyǒshə, gháp ghi lə̌r, pəfə̌r pəfə̌r láʼa gháp ńgó gháp pə̂ʉ pə́ lə̂ ku shʉʼʉ ńgwó ńcə́r pye pi gháp lə tə́u gháp.

³⁴[Lə́ Silásʉ jwô ńgó a wo nyâŋ yé Antyǒshə.]

³⁵Pôl gháp Pənə́páasʉ, ə́ nkʉʼʉ́ pəcó pye tə nzáa pi gháp pə́i mə́ no Yěso Kəlísto cʉ̂ʼ nyáŋ Antyǒshə, ə́ mə́ ŋáa ńjyêʼ pye no Sê, ə́ mbou mə́ ntsə̂tə Nkəʉ Shʉʼʉ yi Nde.

³⁶Ə́ lei leʼé ndwuŋ, Pôl lâʼ lə́ Pənə́páasʉ ngô: «Poghʼo pə̂ʉ cər mətúsoŋ mi poghʼo kə lěi wó ńdáʼ no Nde, ə́ njwó yʉʼ yi pəfə̌r pəfə̌r pi ə́ kə pə́i no Yěso laghʼ mə́ ndə̌r tə ntə́ʉ wó.»

³⁷Pənə́páasʉ pə̂ nkôŋ ńgó gháp pə Jâŋ yi có ləjôghʼ yé Máakúsʉ nâa ndə̌r.

³⁸Lə́ Pôl káa a pə́ nkôŋ yé, ńté no Jâŋ Máakúsʉ lə kə́u cər paghʼə-ngoŋ Pamfilî, ə́ měʼ gháp wó ə́ ndə̂r yé, tə fú yə́rə́ gháp pə pǎp laa kə́ póu nkə́ ntə̂m gháp ku faʼ có faʼ.

³⁹Pôl gháp Pənə́páasʉ kə̂ nzóŋə́ no mə́u zoŋə́ tə ngí lyəghʼtə́, ə́ sěi. Pənə́páasʉ cʉ̂ʼ mbyé pô Máakúsʉ gháp zʉ́ kə̂u láanji ńdə́r lə̂ cər ngoŋ Shîpələ.

⁴⁰Pôl cʉ̂ʼ tsôʼ yé Silásʉ, ə́ ngʉ̌ a tsə̂ʉ nzəm zʉ́, gháp zʉ́ ghi lə̌r, pəfə̌r pəfə̌r côghʼ gháp mbó Nde yi a pə̌ ngaŋə poŋə ntə̂ʉ.

⁴¹A lêi cər paghʼə-ngoŋ Sirî gháp cər paghʼə-ngoŋ Silisî, ə́ ŋə̌i ŋə̂ mətəʉ pye-Kəlísto lə̂ no pə̂i-ntə̂ʉ.