Read Ngombale Məfaʼ Pəghaŋə-ntə̂u 16 Bible Online

Məfaʼ Pəghaŋə-ntə̂u 16 - Ngombale bible

Məfaʼ Pəghaŋə-ntə̂u 16

¹Pôl lə̂r tə nkə́u túsoŋ Dérəbə, ə́ fú wó ńdə́r lə̂ Lístələ, cǒ ŋuu Kəlísto pə̂ wó ləjôghʼ yé pə̂ Timotêi, ə́ mbə́ môu cǒ məngyě yi a lə pə́ môu pəyúda yi a lə pə́i no Yěso, lə́ tə́ ye pə̂ pə́ ŋuu Gərêghʼ.

²Timotêi pə̂ ŋuu yi pye Kəlísto pi Lístələ, mbaa pi Ekonyôm kʉ́ʉ yé shʉʼʉ gháʼate.

³Ə́ pə̂ yə́rə́, Pôl pə̂ nkôŋ ńgó gháp zʉ́ tə́m ku ŋə̂i, ə́ mbúʼ yé, ə́ mbóghʼ no pəyúda pi ə́ lə pə́ lə́ zêi paghʼə-ngoŋ wo lə̌ʼ no yé, ńté no gháp lə pə́ njî ńgó tə́ ye ŋuu Gərêghʼ.

⁴Gháp pə Pôl pə́ ŋáa ŋə̂i cər mətúsoŋ, ə́ ntsə̂tə məno mi pəghaŋə-ntə̂u Yěso gháp pə pəkə̌m ndə̂ Sê pi Yelúsalêm lə tághʼ, ə́ mə́ ndâʼ ńgó gháp ŋə́i ghíʼ məno mêi pə́ ntúŋú.

⁵Pə̂i-ntə̂ʉ cûʼtə pye Kəlísto pə̂ ngúʼ, nou gháp pou mə́ nkʉ́ʼʉ́ nzâa pə̂ leʼé tsəm.

⁶Pôl gháp Silásʉ pə̂ ŋə̂i ndâʼ no Sê, Zəghʼə Ndêi-lěi toʼ gháp lə̂ ndâʼ cər paghʼə-ngoŋ Azî. Gháp cʉ̂ʼ ndêi Fəlijî gháp Galasî lěi.

⁷Ə́ ŋə̌i tə nkə́u lə̂ ndaghʼə paghʼə-ngoŋ Misî, ə́ nkwǎŋ lə̂ ngwó cər paghʼə-ngoŋ Bitinî, lə́ Zəghʼə Yěso kə̂ ncí ntôʼ gháp lə̂ ngwó wó.

⁸Ə́ pə̂ yə́rə́, gháp cʉ̂ʼ ndêi Misî lěi, ə́ shíʼ ńdə́r lə̂ túsoŋ Tərowásʉ.

⁹Ə́ ghʉ mbə̂ cǒ lətwûʼ, Sê ŋêʼ nyôghʼ Pôl, a jwô cǒ ŋuu Masedwânə tə̂ʉ mə́ sʉ̂ʉtə yé ńdâʼ ngô: «Tə́sə́u, tó tə nkə́u Masedwânə ḿpfútə́ wághʼ!»

¹⁰Sê ŋêʼ nyôghʼ Pôl yə́rə́, paghʼ kə̂ ncʉ́ʼ ndú pə́ lə̂ ndə́r lə̂ Masedwânə, ńté no paghʼ lə tsuŋu mə́ njí ńgó Sê lə̂ fûŋ wághʼ wó lə̂ ngwó ntsətə́ Nkəʉ Shʉʼʉ[6].

¹¹Paghʼ kə̂u láanji túsoŋ Tərowásʉ, ə́ ndə̌r ndʉŋ-ndʉŋ tə nkə́u cər lâʼ yi nci lə zə́mə́ ńŋə́ soŋ, pə́ fûŋ ńgó Samotərásʉ. Nzʉ̂ fôghʼ, paghʼ kə̂ ncí ndághʼ pə́ láanji ndə́r lə̂ túsoŋ Nehapolísʉ.

¹²Ə́ fú wó ńdə́r lə̂ túsoŋ Fílîp yi ə́ pə́ túsoŋ jwǐ cər paghʼə-ngoŋ Masedwânə, túsoŋ zêi pə̂ ntwoʼ Pəlóma. Paghʼ kə̂u túsoŋ wêi, ə́ ncí wó leʼé ndwuŋ.

¹³Ə́ pə̂ leʼé nji pəyúda, paghʼ fû túsoŋ ńkwár, ə́ ngwó nkaŋ nci có, ə́ mə́ nkwâŋ zághʼ pə́ ńgó ə́ wo ghʉ̌ hó, paghʼ kə́u wó, ə́ njwó yʉʼ yi pəyúda kəitə wó, ə́ sʉ̂ʉtə Sê. Ə́ nkə́u wó, ə́ jwô pəcó pəngyě pi gháp lə kəitə́ yʉʼ wó, ə́ nyáŋ sê ə́ njǐ lə̂ ndâʼ gháp no Sê.

¹⁴Cǒ tâʼ lə́ páp pə̂ môu Tiyatî, ə́ mə́ ntâŋ pəpaŋ-paŋ məndǐ mi ə́ cóghʼ gháʼate, ə́ mbou mə́ mbôghʼ Sê, ləjôghʼ pə̂ Lítyê. A lə tə̂ lətuŋú ə́ mə́ nzʉ́ʼtə no yi paghʼ lâʼ, ńté no Sê lə pə́ ntôutə yé lə̂ ntsúŋú ńzúʼ no yi Pôl laʼ zěi.

¹⁵Lítyê pfû nci gháp pə pye pə́tsəm pi ə́ cî ndə̂ zʉ́, ə́ mə́ ngə̂u wághʼ lə̂ ntó ńcí ndə̂ zʉ́, ə́ ndǎʼ ngô: «Pei lə̌i njwó ńgó m mbə̂i no Nde tə fú mbə́i, pei tô ńcí ndə̂ məŋ.» Ə́ nkə́ ŋə́ʼtə́ wághʼ ŋə́ʼtə́ tə paghʼ pə̂i.

¹⁶Ə́ pə̂ có leʼé, paghʼ pə̂ ndə̂r lə̂ yʉʼ sʉ̂ʉtə, cǒ môu-məngyě yi a lə pə́ puʼ tô ḿbə̂utə́ wághʼ, mə́i có zəghʼə tə́poŋ pə̂ lə́ zʉ́, ə́ ngʉ́ a pə̂ njwô məno mi ə́ pyér poŋə́ tó, ə́ ndâʼ pye. Mə́ngâa ye pə̂ ngʉ́ pye pi gháp lə zə́u yé ghwo nkâp gháʼate.

¹⁷A tsə̂ʉ nzəm paghʼ pə Pôl, ə́ mə́ mâʼ wâr ə́ ndâʼ ngô: «Pye pwo ə̂ ngaŋə-faʼ Sê yi a pə̌ tʉ̌-lə́pû, gháp pə́ ndeʼtə wéi laŋə́-ndə̂u yi ŋuu lə̌i ndêi mə́u, a ghʉ̂ ncwór.»

¹⁸Ə́ nkə́ ndâghʼ məleʼé ndwuŋ ńdâʼ pə́ yə́rə́, tə ə́ ghi lyəghʼtə́, Pôl záŋə-lóŋ; ə́ ndáʼ lə́ zəghʼə tə́poŋ zêi ngô: «Məŋ ndâghʼ ləjôghʼ Yěso Kəlísto ńdáʼ lə́ gho; fú lə́ məngyě wo ńkwǎr!» Zəghʼə tə́poŋ zêi kə̂ ntóghʼ fú lə́ zʉ́ nkwár.

¹⁹Pye pi gháp lə zə́u yé jwô ńgó laŋə́-ndə̂u nkâp záp tsághʼə́, ə́ ngǒu Pôl gháp Silásʉ, ə́ shûŋ gháp ndaghʼ ńdə́r lə̂ ndəu zǎa, ə́ ntághʼ gháp mbi pəsǎʼ-lâʼ.

²⁰Ə́ ndǎʼ lə́ Pəlóma pi gháp lə feʼ pəkôr ngô: «Pye pwo pə́ maʼ tághʼə́ cər túsoŋ zaghʼə, ə́ mbə́ pəyúda,

²¹ə́ mbou mə́ njyêʼ pye məzə̂u mi kâa pə́ yé lə̂ nôghʼ-lâʼ wághʼə, ə́ pə̂ mi mboʼ paghʼə pi paghʼə pə̌ Pəlóma pə̂i wághʼə po, ə́ nkə ŋə̂i wághʼə ghíʼ gháp lâʼ lêi po.»

²²Ə nou lâʼ yi ə́ lə pə́ yʉʼ wó záŋə-lóŋ ńté Pôl gháp Silásʉ, Pəlóma pi gháp lə feʼ kôr ghʉ pə́ sar məndǐ máp, ə́ ndághʼ məngwaa ntsúŋú ńsə́u gháp.

²³Ə́ ntsúŋú sə́u gháp tə nyér, ə́ mǎʼ gháp ndə̂-tsâŋ, ə́ ndǎʼ lə́ ŋuu yi a pâp ndə̂-tsâŋ ńgó a tsúŋú mə́ mbâp gháp.

²⁴Pə́ lâʼ yə́rə́, ŋuu yi a pâp ndə̂-tsâŋ zûʼ, ə́ ngwo ncóghʼ gháp lə́ lûm yi a pə́ kwaʼ təcər ndə̂-tsâŋ, ə́ ncóghʼ koʼo məku páp.

²⁵Ə́ pə̂ ndə̂u ntəʉ-twûʼ, Pôl gháp Silásʉ pə̂ sʉ̂ʉtə Sê, ə́ mə́ nzâp ə́ ndághʼ ńgûʼtə yé, pəghaŋə-tsâŋ pə̂ nzúʼ.

²⁶Pə́ ghi jwó, ndesé fû ncʉ́ʼʉ́, tə məcû ndə̂-tsâŋ cʉʼʉ, məntsʉ ndə̂ lêi-lěi ŋéʼé ńtə́ʉtə́, pəcêŋ fû lə́ pəghaŋə-tsâŋ pə́tsəm kêʼtə ńcwə́rə́ sê.

²⁷Ŋuu yi a pâp ndə̂-tsâŋ jye, ə́ njwó məntsʉ ndə̂ mə́tsəm tə̂ʉtə ə́ mbə́ mi ŋéʼé, a kwâŋ ńgó pəghaŋə-tsâŋ kwatə́ mə́ ńkhʉ̌, ə́ sǒŋ mə́puʼ ye, ə́ mə́ ndôu ndághʼ ńsǎp mbəʉ ye ə́ nkwʉ́.

²⁸Lə́ Pôl cwôr ngwuŋ, ə́ ndáʼ ngô: «Koo sâp mbəʉ zô, paghʼ pwo pə̂ pə́tsəm!»

²⁹Ŋuu yi a pâp ndə̂-tsâŋ ghʉ̂ pə́ laghʼ nkeʼ ńtó, a lâghʼ ndʉ ńkə́u ndə̂-tsâŋ, ə́ mbóghʼ tə ncʉ́ʼ ngwə̂r wərə́, ə́ mpfúŋ məku Pôl gháp Silásʉ.

³⁰Ə́ ngʉ̌ gháp kwar, a túŋu gháp ngô: «Pənde, mboʼ n ngʉ̂ gháʼá tə ncwór?»

³¹Gháp pwor lə́ zʉ́ ngô: «Pə́i Nde Yěso Kəlísto, ə Sê ghʉ́ ô cwór mbaa pye pi gháp cî ndə̂ gho kə́ ncwór záp lə́wó.»

³²Ə́ pə̂ yə́rə́ Pôl gháp Silásʉ cʉ̂ʼ ndeʼtə́ tsâr Nde mbó zʉ́, mbaa mbó ŋuu ntsəm yi a lə pə́ ndə̂ zʉ́.

³³Ə́ kə̂ mbə́ pə̂ ntəʉ-twûʼ wei, ŋuu yi a pâp ndə̂-tsâŋ lâghʼ gháp ńdə́r ńgwo sóghʼ məfʉ̌ŋ máp, Pôl gháp Silásʉ lêi-lěi ŋə́ yé nci, pye pə́tsəm pi gháp cî ndə̂ zʉ́ kə̂ mpfû záp nci lə́wó.

³⁴A lâghʼ Pôl gháp Silásʉ ndə́r lə̂ ndə̂ zʉ́, ə́ ŋə́ məzʉ̂ lə́ páp. Gháp pə ngər-ndə̂ ye naa ntsêi ńté no gháp pə́i no Sê.

³⁵Nzʉ̂ fôghʼ, Pəlóma pi gháp lə sâʼ zêi túsoŋ tə̂u pəmə́káa páp ńgó gháp wó ndǎʼ lə́ ŋuu yi a pâp ndə̂-tsâŋ ńgó a nyér pye pə̂ gháp lə̂r.

³⁶Ŋuu yi a pâp ndə̂-tsâŋ tô ńdáʼ lə́ Pôl ngô: «Pəfěʼ-kôr lâʼ ńgó məŋ nyér wéi pei lə́r, pei kwâr mpfu wo, ə́ ndə́r wéi lə̂ mbwórə!»

³⁷Lə́ Pôl pwôr lə́ páp ngô: «Pâghʼ Pəlóma, gháp kə ghʉ̂ pə́ sə̂u wághʼ ndəu zǎa tə́ fěʼ wághʼ, ə́ mbou ncóghʼ wághʼ ndə̂-tsâŋ; gháp cʉ́ʼ mbə́ mpfu wo, ə́ mə́ ndôu pə̂ só só ńkwárə́ wághʼ! Lə́, mboʼ ə́ pə̂ yé yə́rə́ po. Kwaʼ tû-mbəʉ záp lə̂ tó ńkwárə́ wághʼ.»

³⁸Pəmə́káa pəʉ, ə́ mbyétə́ no tsəm ńdáʼ pəfěʼ-kôr Pəlóma, gháp zûʼ ńgó Pôl gháp Silásʉ gháʼá mbə́ Pəlóma, ə́ mbóghʼ gháʼate.

³⁹Ə́ ntó ḿbwó gháp, ə́ ngʉ̌ gháp fû ndə̂-tsâŋ ńkwǎr, ə́ mbǒu sʉ́ʉtə́ gháp ńgó gháp fú túsoŋ ńdə́r.

⁴⁰Pôl gháp Silásʉ kwar ńdə́r lə̂ nzeʼ Lítyê, ə́ nkə́u wó ḿbyétə́ no tsəm ə́ ndáʼ pəfə̌r, ə́ ncóghʼ ntə̂ʉ gháp mboŋə́ lə̌r.