Read Ngombale Məfaʼ Pəghaŋə-ntə̂u 17 Bible Online

Məfaʼ Pəghaŋə-ntə̂u 17 - Ngombale bible

Məfaʼ Pəghaŋə-ntə̂u 17

¹Pôl gháp Silásʉ lesê, ə́ nděi Anfipolísʉ gháp Apolonî ə́ nkə́u Tesalonîkə, ə́ yʉʼ yi ndə̂ cûʼtə pəyúda kə pə́ wó.

²Pôl kə̂u ndə̂ wêi ghíʼ a yaa ncí nkə̂u cər məndə̂ cûʼtə. Ə́ ngwo wó məleʼé nji pəyúda mə́ntárə́ tə́ zêʼ, gháp pə pǎp kə̂ nzóŋə pə̂ məno mi ə́ pə́ cər ŋwaʼa Sê.

³A pə̂ mbyétə́ ńdâʼ gháp mbǒu mə́ nyárə gháp ńgó Kəlísto lə ghwo lə̂ njwó ngwôʼ ə́ nkwʉ́, ə́ mbǒu nzʉ́ʉ lə̂ ləwʉ̂. Ə́ mə́ ndâʼ lə́ páp ngô: «Yěso yi məŋ ndâʼ wéi lo, â Kəlísto.»

⁴Pəcó Pəyúda nou páp zûʼ no yi Pôl gháp Silásʉ lǎʼ, ə́ mbə́i, ə́ ntsə́ʉ nzəm páp. Pəcó pye Gərêghʼ tə nzáa pi gháp lə pə́ mbôghʼ Sê kə̂ mbə́i záp lə́wó, ə́ ntsə́ʉ nzəm páp, tə mbaa pəcó pəngyě jwǐ tə nzáa.

⁵Lə́ pəyúda pi káa gháp lə pə̂i gháp no zêi ji lə̂ ŋwə́itə́ gháp, ə́ ngwǒ mətû ndə̂u ńkəitə́ pətəkə̌u-no, ə́ ntwótə́ gháp ńgó gháp máʼ tághʼə́ túsoŋ; ə́ ngwǒ ntâʼ nzeʼ Njásoŋ ńgó gháp lou Pôl gháp Silásʉ lə̂ ngwó ntághʼ gháp mbi lâʼ.

⁶Ə́ nkə́u wó káa jwó gháp, ə́ ncʉ́ʼ ngôu Njásoŋ gháp pə pəcó pəfə̌r, ə́ ndǎghʼ gháp ndə́r ngwo ntághʼ gháp mbi kəitə pəfěʼ-kôr, ə́ máʼ wâr ńdǎʼ ngô: «Pye pwo maʼ mə́ tághʼə́ cər ngoŋ tsəm, ə́ yo gháp laghʼ mə́ ntó tə nkə́u yaʼa lo!

⁷Lə́ Njásoŋ loʼo gháp nzeʼ zʉ́. Káa gháp pə́ ŋə̂i gháp ghíʼ ləpə̌ʉ fou pəlóma pə́ ntúŋú, ə́ mbǒu mə́ ndâʼ pye ńgó cǒ fou yi ndeʼe pə́ wó, pə́ fûŋ yé ńgó Yěso.»

⁸Mətsâr mei pə̂u tû lâʼ mbaa yi pəfěʼ-kôr.

⁹Pə́ ghi nyér Njásoŋ gháp pə pəfə̌r, gháp nuŋu có ləkaʼá nkâp[7]sê.

¹⁰Twûʼ shʉ̂ŋ, pəfə̌r kə̂ ntóghʼ ngʉ́ Pôl gháp Silásʉ lər lə̂ túsoŋ Berê. Ə́ nkə́u wó, ə́ ngwó ndə̂ cûʼtə pəyúda.

¹¹Pəyúda pi túsoŋ Berê lə ghwo ntə̂ʉ shʉʼʉ ə́ ndêi pi Tesalonîkə, ə́ nzʉ́ʼtə tsâr Pôl gháp Silásʉ kwaʼ shʉʼʉ. Ə́ mbə̂ leʼé tsəm fûŋ tsâr Sê, ə́ mbéʼe no mə́u lə̂ njí ńgó kəʉ no yi pə́ laʼ gháp ə̂ no lə́nə́ʉ.

¹²Pye tə nzáa təcər páp leitə yə́rə́, ə́ mbə́i no Yěso. Ə́ ngwǒ təcər pye Gərêghʼ, pəcó pəngyě jwǐ túsoŋ tə mbaa mbiŋə tə nzáa kə̂ mbə̂i záp lə́wó.

¹³Lə́ pəyúda pi Tesalonîkə zûʼ ńgó Pôl pə́ Berê ə́ nkə́ mə́ ndâʼ pə̂ no Sê, ə́ nzǔŋtə́ ńtó wó, ə́ njǐ lə̂ ntwótə́ pye, ə́ mǎʼ tághʼə́ cər mənou lâʼ.

¹⁴Pəfə̌r kə̂ ntóghʼ ngʉ́ Pôl pyê ndə̂u yi mə̂i-nci ńdə́r; Silásʉ gháp Timotêi cʉ̂ʼ nyáŋ Berê.

¹⁵Pye pi gháp wô ncághʼə́ Pôl laghʼ ye ńdə́r tə nkə́u Atênə. Ə́ ngǐ pə̌ʉ nzəm Pôl lâʼ lə́ páp ńgó gháp kə́u ńtsə́tə́ lə́ Silásʉ gháp Timotêi ńgó gháp tóghʼ ntó ńcə́r yé wó.

¹⁶Pôl lə ghí pə́ zʉ̂ʼtə gháp Atênə, ə́ njwó məzə̂u mi pye túsoŋ zêi ghûʼtə ə́ ndághʼ ńfûŋ məsê ə́ zâa gháʼate; ə́ pə̂ yə́rə́, mbəʉ ye pə̂ ncâtə́.

¹⁷A cʉ̂ʼ mə́ ngwô ndə̂ cûʼtə pəyúda, gháp pə pəyúda ə́ ngʉ̌ pye pi gháp pə́i no Sê pəyúda pə̂ nzóŋə məno lə̂ tsâr Sê, ə́ mbǒu mbə̂ leʼé tsəm, ə́ ngwô ndəu zǎa, ə́ ndâʼ no Sê lə́ pye pi a kwátə́ gháp wó.

¹⁸Gháp pə pəcó pəkwaŋtə́-mə́no ghʉ mə́ ntsár, ə́ pə̂ pi gháp pə́ lə̂ nou yi Epikwî mbaa pi gháp pə́ lə̂ nou yi Zenôŋ. Pəcó pə̂ ntúŋu ngô: «Wo fou-ntsʉ mə́shʉ́ŋ gháʼa ndâʼ ye ńgó hó ló?» Ə́ mə́ ndâʼ ngô: «Ə́ shwí pə́ ghíʼ a pə̌ ndâʼ wághʼə no lə̂ məcó məsê mi káa pághʼə pə́ njî wághʼə.» Gháp laʼ yə́rə́, ńté no Pôl lə pə́ ndâʼ gháp Nkəʉ Shʉʼʉ Yěso, tə mbaa no lə̂ ləzʉ̌ʉ lə̂ ləwʉ̂.

¹⁹Gháp laghʼ Pôl ńdə́r lə̂ mbi cûʼtə pəzáʼ-kôr yi pə́ fûŋ ńgó Ayeropâajə, ə́ ntúŋú yé ngô: «Mboʼ paghʼ jî zághʼ no lə̂ no shwî yi o jye pye zěi lo?

²⁰Məno mi o lâʼ wághʼ lo pə́ mvúŋu tû zághʼ, tsúŋu nkéʼtə́ ńdáʼ wághʼ, paghʼ zúʼ.»

²¹Ə́ lə pə́ yə́rə́, ńté ńgó pye Atênə gháp pə pye tə̂u pi gháp kə tô ńcí wó lə nyâŋ ncwî məleʼé lâʼ máp, ə́ ngwo ncwíʼi mətû máp ə́ ndeʼtə́ məno, ə́ nkə́u mə́ nzûʼ mi shwî mi ə́ pə́ nkwatə́.

²²Ə́ pə̂ yə́rə́, Pôl lêsê ńtə́ʉ mbi cûʼtə pəzáʼ-kôr zêi, ə́ ndǎʼ ngô: «Pye Atênə, n njwǒ pei wô lə̂ zə̂u tsəm yi pei pə̌ ngʉ̌, ə́ ncóghʼ ntə̂ʉ wéi lə̂ məsê gháʼate.

²³N ndaʼ gháʼá, ńté no n ntə̌i mə́ ŋáa ŋə̂i túsoŋ pei, ə́ nkə́ njwó məndə̂ məsê méi jwó, tə njwô có yʉʼ sê zéi, pə́ ŋwáʼa mə́u ngô: “Yo yʉʼ sê yi káa pə pə́ njî yé yé.” Sê yi pei ghûʼtə tə́ pə́ njî yé lə̂, n ntǒ gháʼa lə̂ nkêʼ wéi yé.

²⁴Ə Sê yi a lə tsúŋú ngoŋ gháp pə zə̂u tsəm yi ə́ pə́ cər wó, zʉ́ yi a pə̌ Nde tʉ̌-lə́pû gháp ndesé, kâa pə́ ncî yé cər məndə̂ məsê mi pye-mə́soŋ lǎghʼ mbô máp ńkə́r.

²⁵Kâa pə́ nzʉ̂ʼtə yé ńgó pye-mə́soŋ ghʉ̂ có zə̂u lə́ zʉ́, a poŋə́ lǎghʼ pə́ wó. Kâa có zə̂u pə́ mbûŋ yé yé. Zʉ́ lə́ ŋə̂ ləcǐ-mbî, ə́ ŋə̂ Zəghʼə tə mbaa zə̂u tsəm mbó zə̂u tsəm.

²⁶A lə leitə́ lə́ tâʼ ŋuu, ə́ ngʉ́ pye-mə́soŋ pə́tsəm pə̂ wó lə́ pə́ yi gháp wo cí ndəu ndesé tsəm. Ə́ nzáʼ fəiʼ ləcǐ-mbî maa wǒwó, ə́ mbǒu sáa məndaghʼə məyʉʼ mi gháp wo cí wó.

²⁷Ə́ ndaghʼ ńdôu ńgó pye-mə́soŋ lôu yé, ndeʼ có gháp cî ndə̂ ndǒu zʉ́ mbaa pə̂ moutə moutə́, ə́ nkə́u ńkwár lə́ zʉ́ yi káa a pə́i mbə̂ yé ndǐ təsə lə́ paghʼə.

²⁸Ńté no: “Zʉ́ lə́ ghʉ paghʼə cî mbî, ə́ mbǒu ngʉ́ paghʼə ŋárə, ə́ ngʉ pághʼə pə̂ wó.” Ə́ yaa mbəi mbə́ zə̂u yi có ngaŋə-péʼ zéi lə lǎʼ ngô: “Paghʼə kə̌ mbə̂ zághʼə pə̂ ngər ye.”

²⁹Ə́ pə̂ yə́rə́, ə́ ndaghʼ mbə́ ńgó pághʼə ghəpə́ Sê. Koo paghʼə kwaŋ ńgó Sê gháʼá mbə́ ghíʼ có zə̂u yi pye-mə́soŋ lǎghʼ tə̌ʉ-gôl, kəʉ tə̌ʉ-nkâp, kəʉ ləghǒ, ə́ ndǎghʼ jîno záp ńkwáŋtə́ ńtsuŋú.

³⁰Lə̂ mpfu wo, ə Sê káa pyér mə́ ntsôʼtə yé lə̂ məno mi pye lə lǎghʼ ghəghəʉ záp ńgʉ́ mpfu ntsəmbi. A pə̌ ndâʼ ńgó ŋuu ntsəm, ə́ maa yʉʼ tsəm kə́p cǐ yé.

³¹Ńté ńgó Sê lə tâghʼ leʼé yi a táa lǎghʼ no lə́nə́ʉ fěʼ ŋuu ntsəm, ə́ leitə́ lə́ ŋuu yi a lə tsóʼ yé. A lə ghʉ ngaŋ zʉ̂ʉ lə̂ ləwʉ̂ təcər pəpfû sê ə́ ndághʼ ńnyárə ńgó a táa ghʉ̌ yə́rə́ lə́ ŋuu ntsəm.»

³²Pye Gərêghʼ lei tə nzúʼ ghíʼ Pôl lǎʼ no lə̂ ləzʉ̌ʉ lə̂ ləwʉ̂, pəcó ghi pə́ zoutə yé, pəcó pə̂ ndâʼ ngô: «Paghʼ táa cʉ́ʼ zúʼ no yi o lâʼ lə̂ pə̂ có leʼé ndeʼe.»

³³Ə́ pə̂ yə́rə́, Pôl fû təcər páp ńdə̂r yé.

³⁴Lə́ có ntâʼ pye kə̂ tsə́ʉ pə́ nzəm zʉ́, ə́ ncʉ́ʼ pye Kəlísto; ə́ lə pə́ Denísʉ ngaŋə cûʼtə pəzáʼ-kôr túsoŋ Atênə, ə́ ngʉ̌ cǒ məngyě yi pə́ lə fûŋ yé ńgó Damarísʉ gháp pə pəcó pye lə́wó.