Read Ngombale Məfaʼ Pəghaŋə-ntə̂u 19 Bible Online

Məfaʼ Pəghaŋə-ntə̂u 19 - Ngombale bible

Məfaʼ Pəghaŋə-ntə̂u 19

¹Apolósʉ ghi pə́ Korêŋtə, Pôl pə̂ ŋáa ŋə́i ndaʼ no Sê cər paghʼə-ngoŋ Azî yi mə́ceʼé yi a ghwǒ pətə́koʼ məkôr, ə́ ndə́r tə nkə́u Efêzə, ə́ njwó có ntâʼ pye Kəlísto wó, ə́ ntúŋú gháp ngô:

²«Pei lə pə́i no Kəlísto ghíʼi tə Sê ŋə̂ wéi Zəghʼə Ndêi-lěi?» Gháp pwôr ngô: «Paghʼ laa kə́ pə́i nzûʼ wághʼ pə́ kʉ̂ʉ có zə̂u ńgó Zəghʼə Ndêi-lěi.»

³Pôl túŋu gháp ngô: «Tə pei lə pfû pə́ warə́ nci?» Gháp pwôr ngô: «Paghʼ lə pfû-nci yi Jâŋ Baptísʉ lə ŋə̂ lə́ pye.»

⁴Pôl lâʼ lə́ páp ngô: «Jâŋ lə ŋə̂ nci lə́ pye pi gháp lə pə́i lə̂ nkə́p cǐ záp ə́ mbə́i no Sê, ə́ mbǒu mə́ ndâʼ lə́ pye ńgó gháp pə́i no ŋuu yi a pə́ nzəm mə́ ntó, wêi ŋuu pə̂ Yěso.»

⁵Gháp zûʼ tsâr zei, ə́ ngʉ̌ pə́ ŋə̂ gháp nci lə̂ ləjôghʼ Nde Yěso.

⁶Pôl zápə mbô tû páp, Zəghʼə Ndêi-lěi kə̂u lə́ páp, gháp jî lə̂ ntsár mətsâr mi káa ŋuu pə́ njî yé, ə́ mbǒu mə́ ntsə́tə Nkəʉ Shʉʼʉ yi fǔ mbó Sê.

⁷Pye pêi pə́tsəm lə pə́ no ntsap pwô lə̂ ləghə̂m.

⁸Pôl lâghʼ saŋ tárə́ ə́ nkə̂ ngwô pə́ ndə̂ cûʼtə pəyúda, ə́ ndâʼ no Sê pə́ sâa-sǎa, ə́ ndâʼ pye ghíʼ no Ləfou Sê pə̂, ə́ ndôu məsʉ̂ lə̂ ndáʼ tə gháp pə̂i.

⁹Lə́ pəcó pye təi ndəʼ lə̂ mbə́i, ə́ sâa-sǎa ndə̌ʼ mbi lâʼ, ə́ mbou ntsár tə́poŋ lə̂ no Yěso yi Pôl laʼ zěi. Ə́ pə̂ yə́rə́, Pôl kwâr yé təcər páp, ə́ fǎghʼ pye pi gháp pə́i lə̂ ntsə́ʉ nzəm Yěso, ə́ ndǎghʼ gháp ndə́r lə̂ yʉʼ səkwə̂r Tiranyúsʉ, ə́ ncʉ́ʼ mə́ jyêʼ gháp zə̂u wó leʼé tsəm.

¹⁰Ə́ nkə́ njyêʼ gháp pə́ yə́rə́ təcər nguʼ pwô. Ə́ leitə yə́rə́, ŋuu ntsəm yi a pə̌ cər paghʼə-ngoŋ Azî, pye pi gháp pə́ pəyúda gháp pə pye pi káa gháp pə̂ gháp pəyúda zûʼ no Nde.

¹¹Sê lêitə lə́ Pôl, ə́ ngʉ́ mənkəʼə-məno mi pə́ laa kə́ jwó.

¹²Ə́ pə̂ tə pə́ cʉ̂ʼ ndâghʼ məzə̂u ndǐ gháp pə məzə̂u laghʼ ńzâghʼ sʉ̂ mi ə́ kə̂u mə́ Pôl, ə́ ngwo nzápə lə́ pəghou, gháp ghi shwítə́, məzəghʼə tə́poŋ fú lə́ páp nkwátə́.

¹³Pəcó pəyúda pə̂ wó pi gháp lə ŋâa ŋə́i nzuŋ məzəghʼə tə́poŋ lə́ pye, ə́ ngʉ mə́ ndôu məsʉ̂ lə̂ ndághʼ ləjôghʼ Yěso ńzúŋ məzəghʼə tə́poŋ lə́ pye, ə́ mə́ ndâʼ lə̂ məzəghʼə tə́poŋ ngô: «Məŋ ndaghʼ ləjôghʼ Yěso yi Pôl leʼtə no yé lə̂, ə́ ndáʼ ńgó pei kwâr!»

¹⁴Pye pi gháp lə ghʉ yə́rə́ lə pə́ saambwô, ə́ mbə́ ghəpə́ tə́-ndə̂ pənuŋú-poʼ Sê pəyúda, ləjôghʼ yé pə̂ Séva.

¹⁵Lə́ ə́ pə̂ có leʼé, zəghʼə tə́poŋ laʼ lə́ páp ngô: «M mə̌ njî Yěso, ə́ mə́ njî ŋuu yi Pôl pə̌ zʉ́, lə́ ngwǒ lə́ pei, pêi pəwǒ?»

¹⁶Ŋuu yi zəghʼə tə́poŋ tə́i mbə́ lə́ zʉ́ kə̂m ghəpə́ Séva lə̂ nkor, ə́ ntə̌i ndêi gháp, ə́ sə́u gháp ńcóghʼ məfʉ̌ŋ lə́ páp tə gháp kwatə ńkhʉ́ tə́ mǎʼ məndǐ.

¹⁷Ŋuu ntsəm túsoŋ Efêzə, pəyúda gháp pə pye pi káa gháp pə̂ gháp pəyúda zûʼ yo no fú mbóghʼ gháʼate, ə́ ngúʼtə́ ləjôghʼ Nde Yěso.

¹⁸Pye tə nzáa lə́ pye pi gháp lə pə́i no Yěso pə̂ ntó ḿbə̂i məfaa gháp, ə́ mbǒu mbə̂i məno tə́poŋ mi gháp lə ghʉ̌.

¹⁹Lələʉ pəghaŋə ləkaŋ laghʼ pəŋwaʼa ləkaŋ páp ə́ ntó ńtôu mbi lâʼ. Pə́ peitə nkâp pəŋwaʼa pêi ə́ pə̂ məpaghʼ tóusʉ mə̂m-taa.

²⁰Ə̂ zə̂u yi ə́ lə ghʉ̌, ə́ leitə lə̂ mətəʉ Nde, tsâr Sê kʉʼʉ sâr yʉʼ ə́ mbǒu ngwô mətəʉ.

²¹Mwo məno lei, Pôl tâghʼ ńgó a wǒ Yelúsalêm, ə́ ghǐ lə̌r ə́ lěi cər paghʼə-ngoŋ Masedwânə gháp Akayî. Ə́ mə́ ndâʼ ngô: «N ndə̌r tə kə́u wó, ə́ kə́ wǒ Lóma lə́wó.»

²²Ə́ nkwǎŋ yə́rə́, ə́ nzáʼ nzʉ̂ ńtə́u Timotêi gháp Erâstə Masedwânə, ə́ pə̂ pye pi gháp pfûtə yé. Ə́ ntə́u gháp yə́rə́, ə́ mbǒu nkə́ ncí nyéʼ nyáŋ cər paghʼə-ngoŋ Azî.

²³Ə́ pə̂ mpfu wêi, cǒ tə́koʼ tághʼə́ wʉ̂ túsoŋ Efêzə ńté pye pi gháp pə́ lə̂ laŋə́-ndə̂u Yěso.

²⁴Cǒ taalaa pə̂ wó ləjôghʼ yé pə̂ Ndemətwísʉ, a nyâŋ ndâghʼ tə̌ʉ nkâp ə́ tî pəmə́ceʼé məndə̂ ə́ ndaghʼ ńfə̂iʼtə ndə̂ Sê Arətəmísʉ, pə́ fəi, pye pi gháp tî leitə mə́u ə́ ngwo nkâp gháʼate.

²⁵A kə̂itə pə́taalaa pêi gháp pə pəcó pye pi gháp lə kə́ mə́ faʼ záp mbə̂u faʼ zêi ə́ ndǎʼ lə́ páp ngô: «Pəsə̌u pâa, pei jí ńgó paghʼə zûʼ shʉʼʉ gháʼá ńté pə̂ faʼ yo.»

²⁶Lə́ pei pə̌ njwó ə́ mbǒu mə́ nzúʼ, ŋuu wo yi pə́ fûŋ yé ńgó Pôl lo pə̌ ndaʼ ńgó məsê mi pye-mə́soŋ lə́ tsúŋu kâa pə́ yé məcó məsê. A lâʼ mə́ tə lələʉ pye zûʼ ḿbə́i. Káa ə̂ pə́ pə́ ndaʼ Efêzə yáʼa, ə́ pə́ mə́ tə mə́ myâghʼ pə̂ paghʼə-ngoŋ Azî tsəm.

²⁷No yo lou gháʼa lə̂ côŋ faʼ zághʼə. Ə́ wo pə́ yə́rə́, pye kə́ ndâghʼ gháp ndə̂ Sê Arətəmísʉ fûŋ có zə̂u po; lə́u ə́ kə́ lâʼ gháp ńgó sê Arətəmísʉ ə̂ sê zághʼə yi njwǐ po. Lə́ ə́ pə̂ sê yi pə́ pə́ ngûʼtə yé cər paghʼə-ngoŋ Azî ntsəm tə mbaa ndəu ndesé tsəm.

²⁸Lóŋ pye pi gháp lə zúʼ yo no zâŋ, gháp ji lə̂ ndáʼ lə̂ təʉ ngô: «Arətəmísʉ, sê pye Efêzə ghǔʼ!»

²⁹Túsoŋ tsəm naa tághʼə́, gháp ghou Gawísʉ gháp Aristâkə ə́ pə̂ pye Masedwânə pi gháp pə Pôl kə təm ku ńŋə̂i, ə́ shǔŋ gháp ndaghʼ ńdə́r lə̂ ndəu cǒ mbə̂u zǎa yi pə́ kəitə wó ńgʉ̂ məghaa.

³⁰Pôl pə̂ ndôu lə̂ nyárə́ mbəʉ ye mbi lâʼ, lə́ pye Kəlísto tôʼ yé.

³¹Pəcó pəghaŋə-faʼ ngə́mnaa pi jwǐ cər paghʼə-ngoŋ Azî pi ə́ lə pə́ pəsə̌u Pôl tə̂u ńgó pə wó ńdǎʼ lə́ zʉ́ ńgó koo a wô ndəu zǎa

³²Ə́ ghi pə́, mə́i yʉʼ fú mə́ tághʼə́. Pwo pye tə̂ʉ yaʼa mə́ ndâʼ záp, pi pye tə̂ʉ yiʼi mə́ ndâʼ záp yi ndeʼe, lələʉ pye tə̂ʉ káa pə̌i pə́ jî gháp zə̂u yi pə́ yǎa nkəitə́ ńté zěi.

³³Ə́ pə̂ yə́rə́ pəcó pye fû nou lâʼ, ə́ ntsuŋú ndáʼ Alezâŋdələ no yi ə́ pə́ nděi, pəyúda cághʼə yé ńŋə́ mbi, a ŋáʼa pô yé ńŋə́ tʉ́ lə̂ ndaghʼ ńdâʼ mbó lâʼ ńgó a ghwo no yi a wo lǎʼ.

³⁴Lə́ lâʼ jwô ńgó â ŋuu pəyúda, ə́ nǎa ndáʼ lə̂ təʉ təcər no pəmə́nəu pə́pwô ngô: «Arətəmísʉ, sê pye Efêzə ghǔʼ!»

³⁵Ŋuu yi a pə́ túsoŋ ḿbə́ nkeʼtə-ləpə̌ʉ ghʉ̂ tə lâʼ nâʼ, a lâʼ lə́ páp ngô: «Pye Efêzə, ŋuu ntsəm pə̌ nji ńgó tə́koʼ ndə̂ Sê Arətəmísʉ tə̌ʉ túsoŋ Efêzə, tə mbaa tə́tó ye yi a lə fú pə́ ləfaŋ mpfúŋ kə̂ mbə́ pə́ wó.

³⁶Cǒ ŋuu yi mboʼ a lə̂ʼ kâa pə́ yé wó. Ə̂ zə̂u yi ə́ ghʉ̌, pei nâʼ! Koo pei ghʉ̂ no tə́ kwáŋə́ tû zéi.

³⁷Pei laghʼ pye pwo ńtó yáʼa gháʼá, mə́i gháp kə́ côŋ gháp có zə̂u lə̂ ndə̂ Sê Arətəmísʉ, káa kə́ zoutə gháp yé.

³⁸Ə́ lə̌i mbə́ yi Ndemətwísʉ gháp pə pye pi gháp pə pǎp fâʼ pə́ nkoŋ lə̂ mbútə́ ŋuu pə́ feʼ yé, mə́i məyʉʼ mi pə́ feʼ məno pə́ wó, pəfěʼ-məno kə̂ mbə́ wó. Ə́ mbə́ yʉʼ yi gháp ghwǒ lə̂ ngwó wó ḿbútə́!

³⁹Ə́ nkə́ mbə́ yi pei yaa ngwo có no ndeʼe yi mboʼ pei túŋu, pei lâghʼ ńtó ndə̂ kəitə yi pəfěʼ-kôr tʉ̂ŋtə məno wó.

⁴⁰Mboʼ pei ghʉ̂ gháʼá pə́ leitə lə̂ məno mi paghʼə ghʉ̌ leʼé wo lo, ə́ ncóghʼ fər paa paghʼə ńgó paghʼə maʼ tághʼə́ túsoŋ. Pə́ lə̌i ntúŋú wághʼə ńgó paghʼə kəitə yáʼa ngʉ̂ hó? Paghʼə kûʼ wághʼə lə̂ ndáʼ po.»

⁴¹Nkeʼtə-ləpə̌ʉ wêi lâʼ tə ə́ kûʼ, a lâʼ lə̂ lâʼ ńgó gháp pə̂ʉ lə̂ mənzeʼ páp.