Read Ngombale Məfaʼ Pəghaŋə-ntə̂u 20 Bible Online

Məfaʼ Pəghaŋə-ntə̂u 20 - Ngombale bible

Məfaʼ Pəghaŋə-ntə̂u 20

¹Tághʼə́ lə lei tə mé túsoŋ Efêzə, Pôl kə̂itə pye-Kəlísto, ə́ ncóghʼ mətəʉ máp ə́ ndáʼá gháp, ə́ ntsə́ʉ laŋə́-ndə̂u lə̂ ndə́r lə̂ Masedwânə.

²Ə́ ŋə̂i ńdâghʼ mətsâr mbə̂u lə̂ mbə̂u ńcôghʼ məntə̂ʉ pye-Kəlísto. Ə́ fú wó ńdə́r lə̂ cər paghʼə-ngoŋ Gərêghʼ.

³Ə́ nkə́u wó ńcí saŋ tárə́ tə ə́ nkwâŋ lə̂ ngwó nkə́u láanji mbə̂ʉ lə̂ Sirî, ə́ nzúʼ ńgó pəyúda pə́ ntâa mənyaŋ lə̂ njwí yé. Ə́ pə̂ yə́rə́, a cʉ̂ʼ ntâghʼ lə̂ mbə̂ʉ pə́ lə̂ ndə̂u yi Masedwânə.

⁴Yo pye pi gháp pə Pôl lə təm ku ńŋə̂i. Ə́ lə pə́ Sopatê môu Pirúsʉ ŋuu Berê; ə́ ngʉ̌ Aristâkə gháp Sekoŋdúsʉ, ə́ pə̂ pye Tesalonîkə; ə́ ngʉ́ Gawísʉ yi a lə fú Dérəbə; ə́ ngʉ̌ Timotêi lə́ Tishîkə gháp Tərofîmə, ə́ pə̂ pye pi gháp fú cər paghʼə-ngoŋ Azî.

⁵Pye pwo pyəghʼ mbə́ mbi, ə́ nkə́u Tərowásʉ ə́ mbâp wághʼ.

⁶Ə́ ngwǒ lə́ paghʼ, mə́i lətsei mbələ̂ghʼ tə mvuŋ lə lei, paghʼ kə̂u láanji túsoŋ Fílîp, ə́ ŋə̌i leʼé taa, ə́ nkwátə́ gháp Tərowásʉ, paghʼ pə pǎp nyâŋ wó tâʼ ngap.

⁷Ə́ pə̂ nduŋ-mbi leʼé lə̂ ngap-lâʼ, paghʼ kə̂itə nyáŋ tâʼ yʉʼ lə̂ nzʉ́ məzʉ̂ ndêi-lěi, ə́ laghʼ ḿbə̂ leʼé yi nzʉ̂ wo fóghʼ Pôl lə̂r, Pôl pə̂ ndâʼ no Sê lə̂ pəfə̌r pəfə̌r, ə́ nkə́ ndâʼ laʼá tə ngwó nkə́u ntəʉ-twûʼ.

⁸Pə́ lə látə́ pəlâm ə́ zâa gháʼate cər lûm ndə̂ yi tʉ̌ yi paghʼ lə nyáŋ wó.

⁹Cǒ môu-ngwəsəu ləjôghʼ yé pə̂ Etîshə nyâŋ ntsʉ wúndəu. Pôl kə̂ nkʉ́ʼʉ́ ndaʼ no saghʼ saghʼə́, a lê tə mbwôr ə́ ŋéi fú lə́ dêghʼ mbâatə tárə́ ḿpfúŋ nzəm pěi. Pə́ wo lə̂ mbəʼə́ yé, ə́ njwó mə́i a pfǔŋ gháʼá ńkwʉ́.

¹⁰Pôl shîʼ, ə́ ŋwúʼú sê, ə́ nkhwǒr yé ngwô mbô zʉ́ ə́ ndǎʼ ngô: «Koo pei pə̂uʼ mbəʉ zéi, a pyěr mbə́ pə́ wó!»

¹¹Ə́ mbə̌ʉ nkóʼ lə̂ tʉ̌, gháp pə pǎp zʉ̂ məzʉ̂ ndêi-lěi. A kə̂ ncí mbóu ntsár tə nkə́u nkôʼ-nzʉ̂, ə́ mboŋə́ lə̌r.

¹²Pə́ ghi lǎghʼ môu-ngwəsəu wêi lə̌r, a pə̂ pə̂ ntəʉ. Ə́ pə̂ yə́rə́, ə́ ncóghʼ məntə̂ʉ pye gháʼate.

¹³Paghʼ kə̂u láanji ə́ mbyə́ghʼ Asôs lə̂ nkhwôr Pôl wó, ńté no a lə tághʼ ńgó a wo ŋəi yé pə́ sê kə́u wó.

¹⁴A kwâtə wághʼ Asôs, paghʼ pə pǎp kə̂u láanji ńdə́r lə̂ Mitilênə.

¹⁵Ə́ fú wó ə́ nkə́ ndághʼ pə́ láanji ndə́r, ə́ ndé pə́ ŋəi ŋə̌i tə yʉʼ ghi fóghʼ paghʼ kə̂u mbəʉ Shiyô. Ə́ ntó nkə́u wó, ə́ ndêi-lěi ndə́r tə́ tə̂ʉ tə cǒ nzʉ̂ pôu nkə́ ncí ngí fóghʼ, mə́i paghʼ lər mə́ tə nzéʼ Samósʉ, cǒ nzʉ̂ tâa mbóu ngǐ fóghʼ, mə́i paghʼ lər mə́ tə nkə́u túsoŋ Milê.

¹⁶Paghʼ lə ŋəi pə̂ fatə-fatə́ ńté no Pôl lə tághʼ ńgó a wo tə̂ʉ yé Efêzə ə́ cwí məleʼé lâʼ cər paghʼə-ngoŋ Azî po, ə́ mə́ ntsâa lə̂ ndə́r tə nkə́u Yelúsalêm leʼé Paŋtekôtə poŋə́ kǔʼ, ghíʼ Sê lə̌i mbə́i.

¹⁷Pôl kə̂u Milê, ə́ ntə́u pə́ fúŋ pəkə̌m ndə̂ Sê cər cûʼtə pye Kəlísto Efêzə.

¹⁸Gháp tô tə nyáŋ sê, a lâʼ lə́ páp ngô: «Pei pə̌ njî mbə̂u yi n nkə lǎghʼ ńnyáŋ təsoŋ pei tə fú leʼé yi n ndə nkə́u cər paghʼə-ngoŋ Azî.

¹⁹N nkə faʼ faʼ Nde tə́ ŋáʼtə́ mbəʉ, ə́ ngǐ fǎʼ, ə́ mə́ ngêʼtə́, ə́ mbǒu mə́ njwô ngwôʼ ńté mənyaŋ yi pəyúda kə ghwǒ nzəm məŋ.

²⁰N ndə jyéʼ wéi zə̂u tsəm lə̂ tsâr Sê yi mboʼ ə́ pfûtə wéi tə́ nyér có, ə́ məndə̂ cûʼtə, mbaa məndə̂ pei.

²¹N nkə laʼ lə́ pəyúda, mbaa lə́ pye pi káa gháp pə̂ gháp pəyúda, ńgó gháp shərə́ ńtsə́ʉ nzəm Sê, ə́ mbə́i no Nde waghʼə Yěso.

²²N ntə̂ʉ mpfu wo, ə́ mə́ ndə̂r lə̂ Yelúsalêm, Zəghʼə Sê lə́ pə́ ncʉ́ŋə ghâa ńgó n ngwó wó. Lə́ káa m mə́ njî ghâa zə̂u yi ə́ wo kə́u wo ghʉ̌ ghâa.

²³M mə̌ njî pə́ ńgó maa túsoŋ ntsəm yi n nkə̌u wó, Zəghʼə Ndêi-lěi kə̂ ndâʼ lə́ məŋ pə́ ńgó tsâŋ gháp ngwôʼ pə́ mbi, mə́ mbâp ghâa.

²⁴Lə́ ə́ ngwǒ lə́ məŋ, mə́i ghâa ləcǐ-mbî kâa pə̂ yé pə̂ có zə̂u lətəi-ndwuŋ mbó məŋ. Zə̂u yi n ntsâa zěi, ə́ pə̂ pə́ ńgó m myâghʼ faʼ yi pə́ lə cóghʼ mbó məŋ. Ə́ pə́ lə̂ fâʼ faʼ yi Yěso lə tsətə́ ńgó n fâʼ zěi. Məŋ ndaʼ lə̂ ngwó ńtsətə́ Nkəʉ Shʉʼʉ mbó pye-mə́soŋ, lə̂ ndáʼ gháp mbə̂u yi Sê lə fú lə́ Yěso, ə́ mǎʼ pou pye-mə́soŋ.

²⁵Lə̂ fú mpfu wo, pei láʼ kə́ pǒu jwô wéi ghâa po; pei pə́tsəm pi n nkə lěi təcər péi ə́ ŋə́i ndeʼtə no Ləfou Sê.

²⁶Ə̂ zə̂u yi ə́ ghʉ̌, m mə̂ ntsúŋú ndaʼ wéi ńgó n nkə ghʉ zə̂u tsəm yi n nkə ghwǒ lə̂ ngʉ́ ndaghʼ ḿpfútə́ wéi. Cǒ wei lə̌i mbóu ncwí, mə́i zâa pô kâa kə́ mbə̂ yé mə́u.

²⁷Ńté no n ndə laʼ wéi zə̂u tsəm yi Sê lə ghʉ̌ ndaʼá mə́u lə̂ ngʉ́ ŋə́ tə́ lwǒ wéi có.

²⁸Pei pápə́ tû-mbəʉ zéi shʉʼʉ, ə́ mbou mbápə́ məndənzʉ Sê mi Zəghʼə Ndêi-lěi ŋə́ lə́ pei ńgó pei pápə́. Pei pápə́ cûʼtə pye Kəlísto yi Sê lə cwə̌r məci Môu yé ə́ ndághʼ ńgʉ̌ zěi cwôr.

²⁹M mə̌ njí ńgó n ngwo lěi tə lə̌r, pənye-njwi kə́utə́ nou məndənzʉ mâa, ə́ ndáp məno tə̌i.

³⁰Pye kə́ nkwátə́ pə́ təcər pei, ə́ ntáŋ məlaa ə́ ndaghʼ ńshúŋ ngaŋə-jyêʼ-no Yěso ə́ ŋə́ nzəm páp.

³¹Pei páa lə̂ ngwáʼá mbəʉ zéi, ə́ mbou nkʉ́ʉtə́ ńgó n nkə laghʼ nguʼ tárə́ ńŋə́ ntǎghʼ lə́ wǒwó təcər pei tə́ kâa ə́ ntə̌ʉ-nəu mbaa lətwûʼ, tə ngí ŋə́ ə́ mə́ ntsə́rə́.»

³²«Lə̂ mpfu wo, n ncóghʼ wéi mbó Sê ə́ mbǒu ndáʼ lə́ pei ńgó pei zúʼ tsâr yé yi ə́ nyárə mbə̂u yi a lə lǎghʼ ḿmâʼ pou zághʼə. Tsâr zei ghwo mətəʉ lə̂ ngʉ́ pə̂i-ntə̂ʉ zéi ghûʼ, ə́ mbǒu ngʉ́ pei ghwô məzə̂u shʉʼʉ mi Sê lə tsúŋtə́ lə̂ ŋə́ mbó pye pi gháp pə̂ pé.

³³N ndaa nkə́ tsáa nkâp cǒ ŋuu, kəʉ tə̌ʉ-gôl, kəʉ pə̂ ndǐ cǒ ŋuu.

³⁴Pei tsúŋu mə́ njî ńgó n nkə laghʼ pə̂ mbô mâa mwo fáʼ mboŋə́ ghwô zâa zə̂u, ə́ nkə́u ŋə̂ yi pye pi paghʼ pə pǎp fâʼ.

³⁵N nkə pə́ nyárə wéi mpfu tsəm mbə̂u yi mboʼ pei lâghʼ ńfâʼ, ə́ nkə́u ḿpfútə́ mbaa pəpûŋ, ə́ poŋ lə̂ nkʉ́ʉtə́ mətsâr mi Nde Yěso lə lǎʼ ngô: “Fuʼ pə́ lə̂ ŋə́ zə̂u lə́ ŋuu, ə́ ndéi lə̂ mpfú!”»

³⁶Pôl tsâr tə nâʼ, gháp pə pǎp shîʼ nkʉ́ʼtə́ sê, ə́ sʉ́ʉtə́ Sê.

³⁷Gháp pə́tsəm páʼa Pôl, ə́ njǐ lə̂ ngêʼtə́ ńdaghʼ ńdáʼá yé.

³⁸Gháp lə gheʼtə yə́rə́, ńté no a lə láʼ lə́ páp ńgó gháp láʼ kə́ jwô gháp yé po. Ə́ ngʉ̌ yə́rə́ tə ə́ kuʼ, gháp wo ncághʼə́ yé mbəʉ láanji.