Read Ngombale Məfaʼ Pəghaŋə-ntə̂u 21 Bible Online

Məfaʼ Pəghaŋə-ntə̂u 21 - Ngombale bible

Məfaʼ Pəghaŋə-ntə̂u 21

¹Paghʼ pə pǎp lei tə sêi, paghʼ kə̂u láanji ə́ ndêi-lěi ndə́r lə̂ Kôs, nzʉ̂ fôghʼ paghʼ lə̂r tə kə́u Rôdə, ə́ fú wó ndə́r lə̂ Patara.

²Ə́ nkə́u Patara, ə́ njwó láanji yi a lə̂r lə̂ Fenisî; ə́ nkə́u wěi ńdə́r.

³Ə́ ŋə̌i tə mə́ njwô Shîpələ lə̂ ndyəghʼə́ pô zághʼ yi kwap, ə́ pə̂ lâʼ yi nci lə zə́mə́ ə́ ŋə́ təsoŋ, ə́ nkwaatə́ lə̂ sʉ̂ yi ncʉ̂ŋ ə́ ndə̌r lə̂ Sirî; ə́ ndə̌r tə nkə́u Tîr, ə́ pə̂ yʉʼ yi láanji wo tə́ʉ wó ə́ shúʼú pyeʼ.

⁴Ə́ nkə́u wó njwó pye Kəlísto, paghʼ pə pǎp nyâŋ leʼé saambwô. Zəghʼə Sê laʼ gháp no, gháp laʼ lə́ Pôl ńgó koo a wô Yelúsalêm.

⁵Lə́ məleʼé mêi lei, paghʼ tsə̂ʉ laŋə́. Gháp pə pəngyě páp ə́ nkʉʼʉ́ ghəpə́ záp wo ńcághʼə́ wághʼ tə nkə́u nkaŋ mə̂i-nci; paghʼ pə pǎp nkʉ́ʼtə́ sê, ə́ nsʉ́ʉtə́ Sê.

⁶Paghʼ pə pǎp laʼa, paghʼ ghi kə́u láanji lə̌r, gháp pəʉ lə̂ mənzeʼ páp.

⁷Paghʼ fû Tî yə́rə́ ə́ nkwár láanji Petolemayísʉ, ə́ ntsêʼtə́ pəfə̌r pi wó, paghʼ pə pǎp nyâŋ tâʼ leʼé.

⁸Nzʉ̂ fôghʼ paghʼ tsə̂ʉ laŋə́ ə́ ndə̌r lə̂ Sezarê. Ə́ nkə́u wó, ə́ ngwǒ nzeʼ Fílîp ntsətə Nkəʉ Shʉʼʉ, ə́ ncʉ́ʼ ncî pə́ wó; a pə̂ cǒ ŋuu lə̂ pye saambwô pi pə́ lə tsóʼ gháp Yelúsalêm.

⁹A ghwô ngwəngou nzeʼ zʉ́ ləkwo, gháp nyâŋ ńtsə̂tə məno mi ə́ fû mbó Sê lə́ lâʼ.

¹⁰Paghʼ kə̂u wó, ə́ nyáŋ məleʼé tə nzáa, cǒ ntsətə-nkəʉ Sê yi ləjôghʼ yé Agabwísʉ fû Yudêi ńshíʼ ńtó nzeʼ paghʼ.

¹¹Ə́ mbyé nkʉ ndǐ yi Pôl laghʼ ńcwôʼ ndǐ yé ńŋə̂ tʉ́, ə́ ndaghʼ ńshə́rə́, ńkə́r ndʉʉ məku ye, gháp pə mbô mé ə́ ndǎʼ ngô: «Zəghʼə Ndêi-lěi laʼ ńgó pə́ wo kə́u Yelúsalêm, ə́ kə́ kə́r ngaŋə nkʉ ndǐ wo pə́ gháʼa, ə́ ŋə́ yé mbó pətəpə̌i-no Sê.»

¹²Paghʼ pə pəfə̌r pi Sezarê zûʼ yə́rə́, ə́ sʉ́ʉtə́ Pôl ńgó koo a kôʼ ńgwó Yelúsalêm.

¹³Lə́ Pôl pwôr ngô: «Pei laghʼ ləghe ngwə́rə ghâa ńté hó? N ntə̌ʉ gháʼa, mə́i n ntsuŋtə́ mə́ mbəʉ zâa ə́ pə̂ yi, ə́ lə̌i mbə́ yi n ngwo kə́u Yelúsalêm, ə́ pə kə́r ghâa kəʉ njwí ghâa ńté Nde Yěso, n nzôŋ ghâa po.»

¹⁴Paghʼ lû wághʼ lə̂ ntôʼ yé kə́káŋ, ə́ nyêr wághʼ, ə́ ncʉ́ʼ ndáʼ ngô: «Nde ghʉ́ ye ləkoŋtə!»

¹⁵Ə́ pou ndêi leʼé ndwuŋ, paghʼ tsûŋtə mbəʉ zághʼ, ə́ nkóʼ ńdə́r lə̂ Yelúsalêm.

¹⁶có ngaŋə-jyêʼ-no Yěso pi Sezarê wo ńcághʼə́ wághʼ Yelúsalêm, ə́ nkə́u wó ńdághʼ wághʼ ńdə̌r lə̂ nzeʼ Náasoŋ, a pə̂ ŋuu Shîpələ, mə́i a lə pə̂i no Yěso tə ndǐ saghʼ mə́, ə́ nyér wághʼ wó ghíʼ paghʼ wo le wó.

¹⁷Paghʼ lə̂r tə nkə́u Yelúsalêm, pəfə̌r laghʼ lətsei ḿpfú wághʼ.

¹⁸Nzʉ̂ fôghʼ, paghʼ pə Pôl lər lə̂ nzeʼ Jâghʼ. Ə́ nkə́u wó, pəkə̌m cûʼtə pye Kəlísto pi Yelúsalêm tô záp.

¹⁹Pôl tsêʼtə gháp tə ə́ kuʼ, a pyêtə məno mə́tsəm mi Sê lə leitə́ lə́ zʉ́ ə́ ngʉ̌ təcər pye pi káa gháp pə́ gháp pəyúda, ə́ ndǎʼ gháp.

²⁰Gháp zûʼ tsâr zei, ə́ poŋə́ gháp gháʼate, gháp ghûʼtə Sê. Ə́ mbǒu ndáʼ lə́ Pôl ngô: «Ə fə̌r, jwó ndwuŋ pətóusʉ pye pi gháp kwǎr nou pəyúda ə́ mbə́i no Kəlísto ńjwó; ə́ mbou mbə́ kwaʼ pye pi gháp ŋəi ghíʼ ləpə̌ʉ Mə̌usə̂i pə́ ntúŋú.

²¹Lə́ pə́ pə ŋáa ndêʼtə gháp ńgó o pə̌ njyêʼ pəyúda pi gháp pə́ nou pye pi káa gháp pə̂ gháp pəyúda, ńgó gháp méʼ ləpə̌ʉ Mə̌usə̂i, lə́u ə́ nkə́ mbúʼ gháp ghəpə́ záp po, lə́u ə́ nkə́ ŋə̂i gháp ghíʼ nôghʼ-lâʼ pəyúda pə́ ntúŋú po.

²²Tə paghʼə wo ghʉ̌ gháʼá? Ə́ wo ghʉ̌ hó, gháp jí ńgó o to mə́ tə mbə́ yáʼa.

²³Ə̂ zə̂u yi ə́ ghʉ̌, no yi paghʼ wo lǎʼ gho, ə́ poŋ ńgó ô ghʉ́ zěi. Pye ləkwo pə́ təcər paghʼ pi gháp kə pə̂i lə̂ ngʉ̂ có zə̂u ńŋə́ mbó Sê.

²⁴Lǎghʼ gháp ngwó pə sóghʼ lǒʼ lə́ pei pə pǎp, ə́ nkóu mətû méi, o pêi zap nkâp, ə́ pə̂ yə́rə́, ŋuu ntsəm jwó, ə́ njí ńgó məno mə́tsəm mi pə́ kǎp tû gho lə̂, ə̂ məlaa. Ńgó kwaʼ gho zô, o pə̌ ŋəi ghíʼ ləpə̌ʉ pəyúda pə́ ntúŋú.

²⁵Ə́ ngwǒ lə́ pye pi káa gháp pə̂ gháp pəyúda, ə́ pi gháp pə́i no Yěso, mə́i paghʼ kə ŋwaʼa məno mi paghʼ kə tághʼ, ə́ ŋə́ lə́ páp ngô: Koo gháp pfár mbap yi pə́ lǎghʼ ḿmǎʼ sê, koo gháp zʉ̂ məci, koo gháp pfár mbap nye yi pə́ fə́mə́ yé fə́mə́ ńjwí, koo gháp pəu pə̌u nzóʼ.»

²⁶Nzʉ̂ fôghʼ, Pôl lâghʼ pye pêi ləkwo ńdə́r, gháp pə pǎp ji lə̂ ngʉ̂ məno mi pə́ ghʉ ńdághʼ ńsoghʼ lǒʼ tə ə́ kuʼ, gháp lər lə̂ ndə̂ Sê, ə́ ndáʼ ndwuŋ məleʼé mi ləsǒghʼ lǒʼ zei ghwǒ lə̂ mé mə́u, zêi leʼé pə̂ yi wǒwó təcər páp wo nuŋu yé poʼ Sê.

²⁷Məleʼé saambwô mi pə́ laghʼ ńsôghʼ lǒʼ lə́ ŋuu pə̂ mé, pəcó pəyúda pi cər paghʼə-ngoŋ Azî jwô Pôl ndə̂ Sê, ə́ mǎʼ tághʼə́ ə́ nou lâʼ, ə́ ngǒu Pôl.

²⁸Ə́ ncwór ngwuŋ lə̂ təʉ ńdáʼ ngô: «Pye Ísə́lahêl, pei tó ḿpfútə́ wághʼ ee! Ŋuu wə̂ yi a ŋáa ŋə̂i yʉʼ tsəm ə́ nkʉ̂ʉ wághʼə tə́poŋ, ə́ mbǒu ntsâr tə́poŋ ńté ləpə̌ʉ Mə̌usə̂i mbaa ńté ndə̂ Sê zághʼə lə̂ wo. A pəi ndǎghʼ pəcó pye pi káa gháp pə̂ gháp pəyúda ńtó ńkə́u ndə̂ Sê, ə́ ndǎghʼ ńcôghʼ lǒʼ lə̂ yʉʼ yi ə́ pə̂ ndêi-lěi.»

²⁹Ə́ ndaʼ yə́rə́, ńté no gháp lə jwó Pôl gháp Tərofîmə ŋuu Efêzə pə̂ túsoŋ mə́ ŋə̂i, gháp cʉ̂ʼ nkwâŋ ńgó a laghʼ mə́ yé ńkə́u ndə̂ Sê.

³⁰Tághʼə́ fû nzʉ́ túsoŋ tsəm, lâʼ tô mənou mə́nou, ə́ ngǒu Pôl, ə́ shǔŋ yé ńdághʼ yé fú ndə̂ Sê ńkwǎr, ə́ ntsághʼə́ məntsʉ měi.

³¹Ə́ mə́ ndôu njwí yé; fou pətə́-ndə̂ pəlwóʼó-ntso Pəlóma zûʼ ńgó tághʼə́ zʉ̂ túsoŋ tsəm.

³²Ə́ nkə́ ntóghʼ nkə́itə́ pətə́-ndə̂ pəlwóʼó-ntso gháp pə pəlwóʼó-ntso, gháp pə pǎp nâatə ndə́r lə̂ yʉʼ yi nou lâʼ kəitə́ wó. Ə lâʼ jwô ghíʼ gháp pə́ ntó, ə́ nyér lə̂ nkə́ sə́u Pôl.

³³A tô ńkə́u yʉʼ wó, ə́ ngʉ́ pə́ ghou Pôl, ə́ nkə́r yé lə̂ pəcêŋ pə́pwô. A túŋu lâʼ ngô: «Ŋuu wo wǒ, a ghʉ gháʼá?»

³⁴Lə́ gháp maʼ wâr, ŋuu pə̂ ndâʼ yé, ŋuu pə̂ ndâʼ yé. Lə́ a wô lə̂ məno mi pə́ pə́ ndǎʼ káa kuʼ yé lə̂ nzûʼ có, ə́ ncʉ́ʼ ndáʼ ńgó pə lághʼ yé ńdə́r lə̂ cər nkâʼ pəmǎʼ-ntso.

³⁵Pôl ŋə̂i tə ncʉ́ʼ lə̂ nkóʼ pəsətêp ńkə́u cər nkâʼ, pəlwóʼó-ntso cʉ̂ʼ nkhwór yé khworə́ ńté ghíʼ lâʼ lə pə́ nzəm mə́ nâatə lə̂ njwí yé, ə́ ncʉ́ʼ mə́ ndâʼ ngô:

³⁶«Pə jwí yé, pə jwí yé.»

³⁷Pə́ lər tə ncʉ́ʼ lə̂ ncóghʼ Pôl cər nkâʼ pəmǎʼ-ntso, a túŋu fou pətə́-ndə̂ pəlwóʼó-ntso ngô: «Mboʼ o pə̂i n ndâʼ no lə́ gho?» A pwôr lə́ zʉ́ ngô: «O gháʼá mə́ njî ńtsár Gərêghʼ mo?»

³⁸Ə́ njí ńgó koo o pə́ ŋuu Egípto wə̂ yi a kə mǎʼ tághʼə́ tə́ ə́ kə́ cî yé, ə́ nkə́itə́ məfwôr tóusʉ ləkwo ńdághʼ ńtsə́ʉ koŋə-məkwaʼá lə́ mo?

³⁹Pôl pwôr ngô: «Məŋ ŋuu pəyúda, pə́ lə jí ghâa túsoŋ Táasʉ cər paghʼə-ngoŋ Silisî, ə́ mbə́ ŋuu túsoŋ yi pə́ pə́ ghó-ghó mə́ njî zěi. Tə́sə́u pə̂i n ndáʼ no lə̂ lâʼ.»

⁴⁰Fou pətə́-ndə̂ pəlwóʼó-ntso pə̂i, Pôl tə̂ʉ ndəu pəsətêp ə́ ŋáʼá pô yé ńŋə́ tʉ́, yʉʼ nâʼ ńgó ntə́uʼ. A lâghʼ tsâr pəyúda ńdáʼ lə́ lâʼ ngô: