Read Ngombale Məfaʼ Pəghaŋə-ntə̂u 22 Bible Online

Məfaʼ Pəghaŋə-ntə̂u 22 - Ngombale bible

Məfaʼ Pəghaŋə-ntə̂u 22

¹«Pəfə̌r pâa, pətə́ pâa, pei zʉ́ʼtə́ ńzúʼ no yi n ngwo ndǎʼ pei lə̂ ndághʼ ńzǒŋ tû zâa.»

²Pəyúda zûʼ ghíʼ a laghʼ pə̂ kwaʼ tsâr lâʼ záp ńdâʼ no lə́ páp, ə́ kʉʼʉ́ nâʼ, ə́ ntsúŋú ńzʉ́ʼtə́. Pôl lâʼ lə́ páp ngô:

³«Mə̂ŋ ŋuu pəyúda, pə́ lə jí ghâa túsoŋ Táasʉ cər paghʼə-ngoŋ Silisî; lə́ n ngûʼ pə́ túsoŋ Yelúsalêm yáʼa, Gamalyê jyêʼ ghâa ləpə̌ʉ pətə́ pághʼə ə́ ndʉŋ-ndʉŋ ghíʼ ə́ pə̂. N ndə pə́ ŋuu, ə́ ngwǒ zaŋə-mbəʉ lə̂ no Sê pə́ ghíʼ pei ghʉ zéi leʼé wo lo.

⁴N ndə fú ḿbə́ pə́ tə ŋáa ngôutə́ mbiŋə gháp pə pəngyě pi gháp pə́ nzâp laŋə́-ndə̂u zei, ə́ ŋə̂ gháp ngwôʼ, ə́ nkaptə gháp ńgwó maʼ ndə̂-tsâŋ ghíʼ mboʼ gháp pəi nkə́u wó nkwʉ́tə́.

⁵Nuŋu-poʼ Sê yi njwǐ gháp pə kəitə pəkə̌m lâʼ ə̂ pə nzǔʼ-njwó lə̂ no yi n ndaʼ lo, ńté ńgó gháp lə ŋə́ ŋwaʼa lə́ məŋ, ə́ ndaghʼ ńŋə́ ghâa mətəʉ lə̂ ndághʼ ńgwǒ túsoŋ Damásʉ, ə́ ngoutə́ pye Kəlísto, ə́ nkaptə gháp ńdaghʼ ḿbə̌ʉ lə̂ Yelúsalêm pə́ ńŋə̂ gháp ngwôʼ.»

⁶N ntsə̂ʉ laŋə́ ńdə́r tə mə́ nkə̂u Damásʉ ə́ ndə́u ntə̌ʉ-nəu, cǒ tə́koʼ nkeʼ fû tʉ́ ləfaŋ, ə́ ńzə́mə́ ghâa.

⁷M mpfûŋ sê, ə́ nzúʼ nji ŋuu lâʼ lə́ məŋ ngô: «Sôl, Sôl, o tsóʼo ku zâa tə́poŋ ńté hó?»

⁸N ntúŋu ngô: «Ô wǒ Nde.» Nji zêi pwôr ngô: «Ə̂ məŋ Yěso môu Nǎazalêi yi o tsóʼo ku yé tə́poŋ lə̂.»

⁹Ngaŋə-jyêʼ-no zâa lə tsúŋu njwó nkeʼ, lə́ káa zûʼ gháp nji yi kə lâʼ no lə́ məŋ lêi. Ə́ pə̂ yə́rə́, n ntúŋu ngô:

¹⁰«N ngʉ́ gháʼá Nde.» Nde lâʼ lə́ məŋ ngô: «Lěsê, ə́ ndə̌r lə̂ Damásʉ, o kə́u wó pə lâʼ gho zə̂u yi m mə̌ nkoŋ ńgó o ghʉ̂.»

¹¹Ghíʼ nkeʼ zêi lə ghʉ̌ tə nyôghʼ mâa shʉ̂ŋ lə̂, ngaŋə-ku zâa lə́ cʉ̂ʼ ngwô pô zâa ə́ ndaghʼ ghâa ńkə́u Damásʉ.

¹²Cǒ ŋuu pə̂ wó ləjôghʼ yé pə̂ Ananyǎsʉ, ə́ mbə́ ŋuu, ə́ ŋə́ məkuʼ Sê gháʼate, ə́ ŋə̂i ghíʼ ləpə̌ʉ pə́ ntúŋú, pəyúda pou mə́ nkʉ́ʉ yé shʉʼʉ gháʼate.

¹³Ananyǎsʉ wêi tô ńjwó ghâa ə́ ndǎʼ lə́ məŋ ngô: «Fə̌r ghâa Pôl kə́ ncí njwó yʉʼ.» Pə̂ mpfu wêi mpfu wêi, nyôghʼ mâa ŋéʼe n njwô yé.

¹⁴A lâʼ lə́ məŋ ngô: «Sê pətə́ pághʼə lə tsóʼ gho lə́ pə́ yi o wo jí ləkoŋtə yé, mbaa lə̂ njwó ŋuu no lə́nə́ʉ, ə́ mbǒu nzúʼ tsâr yi ə́ kwar ntsʉ zʉ́;

¹⁵ńté ńgó o táa pə́ nzǔʼ-njwó yé mbi pye-mə́soŋ pə́tsəm lə̂ zə̂u yi o jwǒ mbǒu nzúʼ.

¹⁶Lə̂ mpfu wo, o zʉ̂ʼtə hó? Lěsê ńtó pə lághʼ ləjôghʼ yé ŋə́ gho nci ə́ ndaghʼ ńsóghʼ məfaa gho.»

¹⁷N ngʉ̂ mbə̂ʉ lə̂ Yelúsalêm, ə́ mbə́ leʼé có ə́ mbə́ ndə̂ Sê mə́ ngʉ̂ sʉ̂ʉtə, Yěso tô ńnyárə́ mbəʉ ye mbó məŋ,

¹⁸N njwô yé, a lâʼ lə́ məŋ ngô: «Fátə́ fú Yelúsalêm yaʼa ndə́r ńté no pye pi gháp cî wó wo pə̂i gháp no yi o wo lǎʼ gháp ńté ghâa po.»

¹⁹M mbwôr ngô: «Ə́ Nde gháp tsuŋu mə́ njî ghíʼ n ndə ŋáa ŋə́i cər məndə̂ cûʼtə pəyúda, ə́ ngôutə pye pi gháp pə́i no zô, ə́ ngʉ́ pə́ cóghʼ gháp ndə̂-tsâŋ, ə́ mbǒu ńgʉ́ pə́ laghʼ ngwaa ńsə̂u gháp.

²⁰Məci Etyêŋ yi a lə pə́ nzǔʼ-njwó gho lə ghí cwərə́ m mbə̂ zâa yʉʼ wó, paghʼ pə pye pi gháp lə njwí yé pə̂ tâʼ ntsʉ, gháp ghi pə́ tə̂m yé lə̂ məghǒ, m mə̂ mbâp məndǐ máp.»

²¹A lâʼ lə́ məŋ ngô: «Tû! N ngwo tə́u ghô ndǐ təsə cər məlâʼ pye pi káa gháp pə̂ gháp pəyúda.»

²²Pəyúda kə̂ nzʉ́ʼtə́ pə̂ tsâr Pôl tə a lâʼ wei wo tâʼ, lâʼ kóʼo nji záp ŋə́ tʉ́ ńdáʼ ngô: Pə́ və́rə́ sʉ̂ mbə̂u ŋuu yo ndəu ndesé, kâa pə́ ŋuu mboʼ pə́ nyêr yé a nyâŋ mbə̂ wó.

²³Ə́ ngʉ̌ yə́rə́, ə́ mə́ ncwôr məngwuŋ, ə́ sətə́ məndǐ máp[8], ə́ mbou ntə̂uʼ pəpə́ shwâʼ tʉ́.

²⁴Fou pətə́-ndə̂ pəmǎʼ-ntso Pəlóma lâʼ ńgó pəlwóʼó-ntso lághʼ yé ńkə́u cər nkâʼ páp, ə́ ndághʼ ngwaa ntsúŋú ńsə́u yé, ə́ ŋə́ʼtə́ yé a lâʼ no yi lâʼ kuŋ yé ńté zěi

²⁵Pə́ ji lə̂ nkə́r Pôl ghíʼ pə́ wo sə́u zʉ́, a túŋu tə́-ndə̂ pəlwóʼó-ntso yi a kə pə́ yʉʼ wó ngô: ləpə̌ʉ gháʼá mbə́i ńgó pə sə́u môu lâʼ Pəlóma tə́ tsə̌ mbi fêʼ yé mo? Wǒ lâʼ wéi yə́rə́?

²⁶Tə́-ndə̂ pəsóghəi nkʉ zûʼ mwo mətsâr, ə́ ngwoghʼə́, ə́ nkhʉ́tə́ ngwo ńdáʼ tə́-ndə̂ gháp. Ə́ ntúŋú yé ngô: Tə o wo ghʉ̌ gháʼá? Ŋuu wə̂, â ŋuu Pəlóma.

²⁷Tə́-ndə̂ ghap zûʼ yé, ə́ ntó ńtúŋú Pôl ngô: Ə̂ no ńgó ô ŋuu Pəlóma? Pôl pwôr ńgó ə̂ŋ.

²⁸Fou pətə́-ndə̂ pəsóghəi lâʼ lə́ zʉ́ ngô: pə́ lə ghí pə́i ńgó m mbə́ ŋuu Pəlóma, n nkóʼo nkâp tə kâa khwóghʼ. Pôl lâʼ yé lə́ zʉ́ ngô: N ndə ghí kwǎr ləpəm, ə́ mbə́ pə́ wěi.

²⁹Pye pi gháp lə wo sə́u Pôl lə̂ ndághʼ ńŋə́ʼtə́ yé a lâʼ no, gháp fû mbəʉ zʉ́ nkhʉ̂ gháp, fou pətə́-ndə̂ pəsóghəi jî ńgó a wʉ̂ mə́ ləpə̌ʉ lə̂ ngʉ́ pə́ laghʼ pəcêŋ ńkə́r ŋuu Pəlóma, ə́ tə́ʉ ncʉ́ʼ mbôghʼ poghʼə́.

³⁰Nzʉ̂ fôghʼ, fou pətə́-ndə̂ pəsóghəi pə̂ ndôu lə̂ njí kwaʼ no yi pəyúda kə pûtə Pôl ńté, ə́ ngʉ̌ pə́ kêʼtə pəcêŋ lə́ zʉ́, a fûŋ cûʼtə pətə́-ndə̂ pənuŋú-poʼ Sê pə́tsəm gháp pə kəitə pəfěʼ pəkôr pəyúda, ə́ ngʉ̌ pə́ laghʼ Pôl ńshíʼ ńtó lə̂ mbi páp.