Read Ngombale Məfaʼ Pəghaŋə-ntə̂u 23 Bible Online

Məfaʼ Pəghaŋə-ntə̂u 23 - Ngombale bible

Məfaʼ Pəghaŋə-ntə̂u 23

¹Pôl ntsúŋu ntághʼ nyôghʼ mé lə́ pəfěʼ-məno, ə́ ndǎʼ ngô: «Pəfə̌r pâa, m mə̌ nji ńgó tə fú ghíʼ n ndə jǐ lə̂ faʼ mbó Sê tə nkə́u leʼé wo, n nkəi nkə́ ghwô ghâa có kotə. Kâa có zə̂u pə́ ngághʼə yé ghâa cər ntə̂ʉ məŋ.»

²Pôl lâʼ yə́rə́, Ananyǎsʉ tə́-ndə̂ pənuŋú-poʼ lâʼ lə́ pye pi gháp tə́ʉ mbəʉ zʉ́ ńgó gháp sə́u ntsʉ yé.

³Pôl lâʼ lə́ zʉ́ ngô: Fúfú saghʼə́ ndə̂! Sê ghʉ̌ sə́u ghô. O nyáŋ sê yʉʼ wə̂ ńgó o laghʼ ləpə̌ʉ ńfêʼ ghâa, ə́ mbǒu ndáʼ ńgó pə sə́u ghâa, ə́ pou káa pə̂ yé zə̂u yi ləpə̌ʉ pə́ ntúŋú.

⁴Pye pi gháp lə tə́ʉtə́ mbəʉ Pôl laʼ lə́ zʉ́ ngô: «O zoutə gháʼá tə́-ndə̂ pənuŋú-poʼ yi Sê lə tsóʼ yé!»

⁵Pôl pwôr ngô: «Pəfə̌r pâa, kâa ntə́i mə́ njî ghâa ńgó â tə́-ndə̂ pənuŋú-poʼ Sê. ŋwaʼa Sê yaa mbə̌i ndáʼ ńgó koo o tsâr tə́poŋ ńté fou lâʼ wei.»

⁶Pôl pə̂ njî ńgó, ə́ wo lə̂ nou pəfěʼ-məno pəcó pə̂ pye Sadúsia, pəcó pə̂ pye Falísia, ə́ ntə́ʉ mbi páp, ə́ ndǎʼ lə̂ təʉ ngô: «Pəfə̌r pâa, mə̂ŋ ŋuu Falísia, pətə́ pâa pə̂ pye Falísia. Pə́ feʼ ghâa gháʼa ńté no m mə̌ mbə̌i ńgó pəpfû táa zʉ́ʉ lə̂ ləwʉ̂.»

⁷Ə́ nkə́ ndéi tə ndáʼ yə́rə́, pye Sadúsia gháp pye Falísia ji lə̂ nzóŋə́ təcər páp, ə́ ngaptə́ mbəʉ záp yʉʼ pwô.

⁸Ńté no pye Sadúsia kâa pə́ mbə́i gháp ńgó ləzʉ̌ʉ lə̂ ləwʉ̂ pə́ wó, pəcwôʼ Sê, tə mbaa məzəghʼə kâa pə̂ yé wó, lə́ pye Falísia pou mə́ mbə̂i ńgó məzə̂u mei mə́tsəm pə́ wó.

⁹Ŋuu ntsəm ji lə̂ ntsátə́ lə̂ təʉ, pəcó pəkeʼtə́-lə́pə́ʉ Mə̌usə̂i pi gháp pə̂ pye Falísia lesê, ńdáʼ ngô: «Káa paghʼ jwô wághʼ có no tə́poŋ yi ŋuu wo ghʉ̌. Mboʼ có Zəghʼə kəʉ pə̂ cǒ cwôʼ Sê lə̂ kə lâʼ no lə́ zʉ́.»

¹⁰Məzoŋə ghâʼ təcər páp, fou pətə́-ndə̂ pəsóghəi jwô, ə́ mbóghʼ ńgó mboʼ gháp sêʼtə Pôl, ə́ ndǎʼ lə́ pəlwóʼó-ntso ńgó gháp shíʼ ńkə́u soŋ pye, ə́ nkwárə́ Pôl ndághʼ yé ḿbə̌ʉ lə̂ cər nkâʼ páp.

¹¹Twûʼ pou shʉ́ŋ, Nde tô ńdáʼ lə̂ Pôl ngô: «Sáʼ pə̂ təʉ, o kə laʼ pye Yelúsalêm ŋuu yi məŋ mbə̂ wěi, ə́ pə́ ntúŋú ńgó ô kə́ ndáʼ pye túsoŋ Lóma lə́wó ŋuu yi məŋ mbə̂ wěi.»

¹²Pəcó pəyúda nyâŋ sê, ə́ ntsár ńgwô tâʼ ntsʉ, ə́ ndǎʼ tə nkâa ńgó gháp wo nyáŋ tə́ zʉ́ zə̂u, tə́ nó nci, tə láʼ ŋə́ ghíʼ gháp jwí Pôl.

¹³Pye pi gháp lə kə́r zêi ləsəp, lə pə́ tə ndêi mə̂m-ləkwo.

¹⁴Ə́ ngwo njwó pətə́-ndə̂ pənuŋú-poʼ Sê gháp pə pəkə̌m, ə́ ndǎʼ lə́ páp ngô: «Paghʼ kə tə́ʉ mbi Sê, ə́ ndǎʼ tə nkâa ńgó paghʼ kə́ zʉ̂ wághʼ zə̂u tə́ ghó paghʼ jwǐ Pôl po.

¹⁵Lə̂ mpfu wo, ə́ pə́ ntúŋu ńgó pei pə pəkə̌m wó ńjwó fou pətə́-ndə̂ pəsóghəi ə́ ndáʼ lə́ zʉ́ ńgó â nyér Pôl pə laghʼ yé ńtó ńtághʼ mbi pei, pei lôu lə̂ ńjwó kwaʼ ghíʼ no yé pə̂. Lə́, ə́ ngwǒ lə́ paghʼ, mə́i paghʼ wo záʼá yé laŋə́ jwí yé pə́ tə́ ghó a tǒ tə nkə́u yaʼa.»

¹⁶Gháp pə̂ ndâʼ yə́rə́, cǒ môu mbiŋə zûʼ ghíʼ pə́ ləʼ lənkʉ Pôl, ə́ mbə́ môu fə̌r ye yi məngyě, ə́ ngwǒ nkâʼ pəlwóʼó-ntso, ə́ ndáʼ Pôl.

¹⁷A fûŋ cǒ tə́-ndə̂ pəlwóʼó-ntso, ə́ ndáʼ lə́ zʉ́ ngô: «Lǎghʼ môu-ngwəsəu wo ngwó njwó tə́-ndə̂ wei, a ghwo no yi a wo lǎʼ yé.»

¹⁸A kə̂ ndághʼ yé ńdə́r lə̂ mbi tə́-ndə̂ ghap, ə́ ndáʼ lə́ zʉ́ ngô: «Pôl, ngaŋə-tsâŋ laʼ ńgó n ndâghʼ môu-ngwəsəu wo ńtó ńjwó ghô ńté no a ghwo no yi a wo lǎʼ ghô.»

¹⁹Fou pətə́-ndə̂ pəsóghəi pyê pô môu-ngwəsəu wêi, gháp zʉ́ wo ntə́ʉ ntsəm, a ntúŋu yé ngô: «Ə̂ no hó o wo ndǎʼ məŋ?»

²⁰A pwôr ngô: «Pəyúda tsuŋtə ńgó gháp wo tó lǎʼ lə́ gho ńgó nzʉ̂ fóghʼ, ô lâghʼ Pôl ńtó ńtághʼ yé mbi kəitə pəfěʼ-məno, pə tsúŋú ndǒu no yé. Ə́ lǎʼ yə́rə́, ə́ lǎghʼ futə́ ghô.»

²¹Lə́ gháp lə̌i ntó ńdáʼ, koo o pə̂i. Ńté no pye tə ndêi mə̂m-ləkwo tsuŋtə́ mə́ ghíʼ pə́ wo pə́ laghʼ Pôl lěi, gháp jwí yé. Gháp laʼ mə́ tə nkâa ńgó gháp lə̌i ndáʼ ndə́iʼ jwí Pôl po, gháp kə nzʉ̂ gháp məzʉ̂ po, ə́ nkə́ nô gháp nci po. Gháp tsuŋtə́ mə́ mbəʉ záp mpfu wo tə ncʉ́ʼ mə́ mbâp pə́ ńgó ô pə́i.

²²Fou pətə́-ndə̂ pəsóghəi cwôtə môu-ngwəsəu wêi ńgó koo a kə̂ mbóu nkʉ́ʉ tə ndáʼ cǒ ŋuu ndeʼe no yi a tǒ ńdǎʼ yé lo. Ə́ ngʉ̌ a lə̂r yé.

²³A cʉ̂ʼ ngwó lə́ pətə́-ndə̂ pəlwóʼó-ntso pé, ə́ ntsóʼ pi pə́pwô, ə́ ndáʼ lə́ páp ngô: «Pei kə̂itə pəlwóʼó-ntso nkʉ pwô, ə́ ngʉ̌ pəkóʼ pəlwô mə̂m-saambwô, lə́ pəghwǒ məkoŋ nkʉ pwô, pei tsúŋtə́ mbəʉ zéi ghíʼ pə mə́nəu ləpfuʼú lətwûʼ wo kǔʼ, pei lə́r lə̂ Sezarê.

²⁴Pei tsúŋtə́ pəcó pəlwô pi Pôl wo ŋə̌i mə́u, pei wó ŋə́ yé lə́ gə́mnaa Felísʉ, tə́ ghó ntyar kə yé.»

²⁵Ə́ ngʉ̌ yə́rə́, ə́ ŋwáʼá ŋwaʼa yi pə́ kə́u ńŋə́ lə́ gə́mnaa Felísʉ, ə́ ŋwáʼá cər wó ngô:

²⁶«Məŋ Kəlôdə Lisíya, n ŋwaʼá wo ŋwaʼa ńŋə́ lə́ gho nye-tə-maʼ gə́mnaa Felísʉ, n ntsêʼtə́ ghô.

²⁷Pəyúda kə ghou ŋuu wo yi n ŋə̂ yé lə́ gho lo, ə́ mə́ ndôu njwí yé, n nzûʼ ńgó â ŋuu Pəlóma, ə́ ndǎghʼ pəlwóʼó-ntso pâa ngǒu yé ḿpfú mbó páp.

²⁸N ndə pou mə́ ndôu lə̂ ntsúŋú njí zə̂u yi gháp pfû mbó zʉ́, ə́ ndǎghʼ yé ngwó mbi kəitə pəfěʼ-məno páp.

²⁹N nkə jwó ńgó gháp pútə yé, ńté pə́ məcó məyʉʼ lə̂ ləpə̌ʉ lâʼ záp mi káa gháp pə pǎp pə́ ntsár ńzúʼu mə̂u. Ə́ mbǒu káa jwô ghâa zə̂u yi a ghʉ̌ tə mboʼ pə́ jwî yé kəʉ ńcóghʼ yé pə́ ndə̂-tsâŋ lo.

³⁰N nkə pou nzúʼ ńgó pəyúda kə kəitə, ə́ mə́ ndôu ńjwí yé, ə̂ zə̂u yi ə́ ghʉ̌, n ntə̂u yé ŋə́ mbó gho tə́ látə. Ə́ ndǎʼ lə̂ pye pi gháp pútə yé, ńgó gháp tó ḿbútə́ no záp pə́ mbó gho. Ə̂ cʉ́ʼ wághʼə[9].»

³¹Pəlwóʼó-ntso ghʉ zə̂u yi tə́-ndə̂ ghap lǎʼ lə́ páp, ə́ ndǎghʼ Pôl ńdə́r lətwûʼ tə nkə́u Aŋtipatəlísʉ.

³²Nzʉ̂ fôghʼ, pəcó pəlwóʼó-ntso pəʉ lə̂ nkâʼ páp, pəkóʼ-lwô cʉ̂ʼ ndâghʼ Pôl ńdə́r.

³³Gháp pə pǎp lər tə nkə́u Sezarê, pəkóʼ-lwô ŋə̂ ŋwaʼa lə́ gə́mnaa, ə́ ncóghʼ Pôl mbó zʉ́.

³⁴Gə́mnaa fûŋ ŋwaʼa wêi, ə́ ntúŋú Pôl ngô: «O fǔ lə́ zarə́ paghʼə-ngoŋ?» A pwôr ngô: «Mə̂ŋ ŋuu paghʼə-ngoŋ Silisî.»

³⁵Gə́mnaa lâʼ lə́ zʉ́ ngô: «N ngwo zʉ́ʼtə́ tə pye pi gháp pútə́ ghô tó, m mboŋə́ zúʼ no yi o wo lǎʼ.» Ə́ ndǎʼ yə́rə́, ə́ ngʉ́ pə́ wo ndoʼó Pôl ntôʼ fou Elôdə.