Read Ngombale Məfaʼ Pəghaŋə-ntə̂u 24 Bible Online

Məfaʼ Pəghaŋə-ntə̂u 24 - Ngombale bible

Məfaʼ Pəghaŋə-ntə̂u 24

¹Ə́ lei leʼé taa, Ananyǎsʉ tə́-ndə̂ pənuŋú-poʼ shîʼ lə́ Sezarê. Ə́ ngǐ tó, ə́ ŋə̌i lə́ pəcó pəkə̌m nzəm zʉ́, ə́ ngʉ́ cǒ ŋuu pə́ fûŋ yé ńgó Teitulúsʉ a pə̂ nzoŋ-tû ghap yʉʼ kôr. Gháp tô, ə́ mbútə́ Pôl mbó gə́mnaa Felísʉ.

²Pə́ fûŋ Pôl, Teitulúsʉ jî lə̂ mbútə́ yé ə́ ndǎʼ ngô: «Ə́ Nde paghʼ ghí pə́ nyâŋ lə̂ mbwórə mpfu wo, ə́ ndwúʼu ghô mbaa ńté məno mi o ghʉ̌ pə́ kə́ptə cər lâʼ paghʼ.

³Paghʼ ŋə̌ nkhwo lə́ gho Nde Felísʉ lə̂ pəi yi paghʼ pə̌ nzʉ̂ lə̂ məno mêi, ə́ mpfu tsəm, ə́ yʉʼ tsəm.

⁴Lə́ kâa mə́ nkôŋ ghâa lə̂ ntə́ʉ mbi gho ə́ ntsáŋə́ lə̂ tsâr, ə́ pə̂ yə́rə́ m mə̂ sʉ̂ʉtə ghô ńgó o lághʼ poŋə-ntə̂ʉ zô ə́ nzʉ́ʼtə́ no yi paghʼ wo ndǎʼ gho lo.

⁵Paghʼ kə jwó ŋuu wo, a pə̂ ngaŋə tághʼə́. A tə̌ʉ gháʼa ə́ mbə́ zə̂u tə́poŋ, â tə́-ndə̂ có faghʼ jóghʼ yi pə́ fûŋ ńgó pənazarêŋ, a maʼ mə́ tághʼə́ təcər pəyúda pə́tsəm ndəu ndesé.

⁶A kə pə́ ndôu lə̂ ncóghʼ lǒʼ lə̂ ndə̂ Sê, paghʼ poŋə́ ghôu yé. [Ə́ mə́ ndôu ndághʼ ləpə̌ʉ lâʼ zághʼ ńfêʼ yé,

⁷lə́ Lisyǎsʉ, tə́-ndə̂ pətə́-ndə̂ pəlwóʼó-ntso tô ndághʼ təʉ ńkwárə́ yé mbô paghʼ.

⁸Ə́ mbǒu ndáʼ ńgó pye pi gháp pûtə yé lághʼ kôr ńtó lə̂ mbi gho.] O lə̌i ntúŋú ŋuu wə̂ no, mə́i o wo zúʼ pə́ gho ńgó məno mi paghʼ pûtə yé mə́u, ə́ pə́ lə́nə́ʉ.»

⁹A lâʼ yə́rə́ pəyúda tôutə tsâr yé, ə́ ndáʼ ńgó a lâʼ no lə́nə́ʉ.

¹⁰Ə́ pə̂ yə́rə́, gə́mnaa Felísʉ lâghʼ pô yé ńdáʼ ńgó Pôl tsár. Pôl lâʼ ngô: «Ə́ mpfu wo nguʼ ndwuŋ ghíʼ o sâʼ lâʼ zághʼ. Ə̂ zə̂u yi ə́ ghʉ̌, n ndə̌i ntə́ʉ mbi gho lə̂ nzôŋ tû zâa, m mbôghʼ ghâa có zə̂u po.

¹¹Ə no yi ngwo ndǎʼ wó, tû-mbəʉ zô wo náŋtə́ jwó ńgó kəʉ ə̂ no lə́nə́ʉ, ə̂ mpfu wo leʼé ntsap pwô lə̂ ləghə̂m ghíʼ n nkə kóʼ ngwó Yelúsalêm lə̂ sʉ́ʉtə́ Sê.

¹²Ə́ nkə́u wó, káa pə jwó ghíʼ paghʼ cǒ ŋuu pə́ nzóŋə no cər ndə̂ Sê, ə́ cər məndə̂ cûʼtə pəyúda, mbaa cər mətúsoŋ, káa kə́ jwó ghíʼ n ntyəptə́ lâʼ.

¹³Mboʼ pə́ lâʼ ńgó pye pə̂ pyétə́ məno mi gháp tâghʼ tû məŋ lo, gháp kuʼ gháp mə́u po.

¹⁴Lə́ no yi ngwo sâa-sǎa tə́ʉ mbi gho pə́i, ə́ pə́ ńgó m mə̌ ŋəi lə̂ laŋə́-ndə̂u shwî yi gháp fûŋ ńgó ə̂ yi tə́poŋ lə̂, ə́ mə́ fâʼ mbó Sê pəmə́ngâa-njʉʼ pághʼə. Ə́ mbǒu mə́ mbə̂i zə̂u tsəm yi pə́ lə ŋwáʼá cər ŋwáʼa ləpə̌ʉ, gháp pə yi pətsətə́-nkəʉ Sê.

¹⁵N ngwo có zə̂u yi m mə̌ nzʉ̂ʼtə mbó Sê, ə́ pə̂ yi pye pi gháp pûtə ghâa lə̂ kə̂ mə́ nzʉ̂ʼtə záp pə́ zěi, ə́ pə̂ ńgó Sê táa ghʉ̌ pye shʉʼʉ gháp pə pye tə́poŋ zʉ́ʉ lə̂ ləwʉ̂.

¹⁶Ə̂ zə̂u yi ghʉ̌, m mə̂ sâʼ təʉ lə̂ ḿbə́ ndʉŋ-ndʉŋ mbi Sê mbaa mbi pye-mə́soŋ.»

¹⁷N kə cí tə̂u gháʼate, ə́ mbǒu mbə̂ʉ ńtó Yelúsalêm lə̂ ŋə́ məzə̂u ndaghʼ ḿpfútə́ pye lâʼ pâa, ə́ mbǒu nkə́u ńŋə́ məzə̂u poʼ Sê.

¹⁸Gháp lə ghí tó kwátə́ ghâa ndə̂ Sê, m mə̂ sôghʼ lǒʼ lə́ məŋ, káa lâʼ lə pə̂ yé yʉʼ wó, lə́u tághʼə́ kə̂ mbə̂ yé yʉʼ wó po.

¹⁹Lə́ mboʼ pəcó Pəyúda pi gháp lə fú Azî ńtó ḿbə́ záp yʉʼ wó lə́ tə̂i mbútə́ ghâa mbó gho ghíʼ lə̌i ḿbə́ yi n ndə ghʉ̂ có no tə́poŋ.

²⁰Ə́ nkə́ ndə́iʼ yə́rə́ po, pye pwo lâʼ zə̂u yi pə́ kə lǎghʼ ghâa ngwǒ mbi kəitə pəfěʼ-məno ghíʼi, gháp jwô ńgó n faa zěi.

²¹Tə ndyéʼ ndaʼ tâʼ no yi n ndə tə́ʉ mbi páp ə́ ndǎʼ lə̂ təʉ ngô: «Sê táa ghʉ̌ pəpfû zʉ́ʉ lə̂ ləwʉ̂.»

²²Ə́ pə̂ yə́rə́, Felísʉ pə̂ ntsúŋú njî no lə̂ laŋə́-ndə̂u Yěso Kəlísto, ə́ tsóʼ leʼé kôr, ə́ ndǎʼ lə́ pəyúda ngô: «Lisyǎsʉ fou pətə́-ndə̂ pəlwóʼó-ntso lə̌i ndáʼ ńtó, n fêʼ kôr wei.»

²³Ə́ ndǎʼ yə́rə́, ə́ ndǎʼ lə́ tə́-ndə̂ pəlwóʼó-ntso ńgó â lâghʼ Pôl mbə̂ʉ lə̂ ndə̂-tsâŋ. Ə́ kə́u wó koo pə́ kə̂ nkâp yé, koo pə́ kə̂ ntôʼ pye pé lə̂ ntó ńtóutə́ yé.

²⁴Ə́ lei leʼé ndwuŋ, Felísʉ gháp ngwě yé Ndwurisîlə môu pəyúda tô ńkə́u ndə̂-tsâŋ, Felísʉ ghʉ̂ pə́ wo fúŋ Pôl ńgó a tó ńdáʼ gháp no lə̂ pə̂i-ntə̂ʉ nzəm Yěso Kəlísto.

²⁵Lə́ Pôl tô tə mə́ ndêʼtə gháp no lə̂ mbə́ ŋuu no lə́nə́ʉ, lə̂ no ngwôtə́ mbəʉ, mbaa lə̂ mbə̂u yi Sê táa lǎghʼ fěʼ pye, ngə́mnaa Felísʉ zûʼ, ə́ ncʉ́ʼ mbôghʼ poghʼə́, ə́ ndáʼ lə́ zʉ́ ngô: «Lə̂ mpfu wo, lər! N táa ghwǒ mpfu, ə́ kə́ cí fúŋ ghô.»

²⁶Felísʉ lə pə́ kwâŋ ńgó Pôl wo ŋə́ nkâp lə́ zʉ́. Ə̂ zə̂u yi ə́ lə ghʉ̂ a nyâŋ fûŋ Pôl pə̂ mpfu tsəm gháp zʉ́ tsâr.

²⁷Ə́ lei nguʼ pwô, Posiyúsʉ Festúsʉ tô ńkə́p tû ngə́mnaa Felísʉ. Felísʉ ghi lə̌r, ə́ nyér Pôl ndə̂-tsâŋ ə́ ndaghʼ ńdôu ńgó pəyúda kôŋ no yé.