Read Ngombale Məfaʼ Pəghaŋə-ntə̂u 25 Bible Online

Məfaʼ Pəghaŋə-ntə̂u 25 - Ngombale bible

Məfaʼ Pəghaŋə-ntə̂u 25

¹Gə́mnaa Festúsʉ lə nyáŋ lwoŋ ə́ lei leʼé tárə́, a kôʼ ngwó Yelúsalêm.

²Ə́ nkə́u wó, pətə́-ndə̂ pənuŋú-poʼ Sê gháp pə pəkə̌m pəyúda tô ḿbútə́ Pôl mbó zʉ́, ə́ ndǎʼ ngô:

³«Tə́sə́u paghʼə́ Pôl ŋə́ Yelúsalêm.» Ə́ ngǐ lǎʼ yə́rə́, ə́ mə́ ntsûŋtə ghíʼ pə́ wo pə́ laghʼ Pôl lěi, gháp záʼá yé njwí.

⁴Lə́ Festúsʉ zûʼ ə́ mbwôr ngô: «Pôl pə́ ndə̂-tsâŋ Sezarê, kwaʼ məŋ kâa m mə́ ngwô ghâa ncî wó yaʼa gháʼa.

⁵Paghʼ pə pye pi gháp kǔʼ shíʼ lə̂ Sezarê, ə́ mbə́ yi ŋuu wo kə ghʉ̂ có no tə́poŋ, gháp kə̂u wó, ə́ ndâʼ.»

⁶Festúsʉ nyâŋ wó no leʼé ləfǎa kəʉ leʼé ləghə̂m, ə́ mbə̌ʉ shíʼ lə̂ Sezarê. Nzʉ̂ fôghʼ a nyâŋ sê lə̂ féʼ pəkôr, ə́ ngʉ̌ pə́ laghʼ Pôl ńtó.

⁷Pôl tô, pəyúda pi gháp kə fú Yelúsalêm ntó, zə́mə yé ŋə́ soŋ ə́ ntághʼ mətəi məno tû zʉ́ tə ə́ zâa, lə́ ŋuu yi a wo pyétə́ tə cʉŋ kwâr kâa pə̂ yé wó.

⁸Pôl lâʼ lə̂ ndághʼ ńzǒŋ tû yé ngô: «N nkə́ ghʉ̂ ghâa có no tə́poŋ, kâa fǎa ləpə̌ʉ Pəyúda, káa kʉ́ʉ ndə̂ Sê tə́poŋ, káa kʉ́ʉ Fou Pəlóma tə́poŋ.»

⁹Festúsʉ pə̂ nkôŋ ńgó pəyúda kôŋ no yé, ə́ ntúŋu Pôl ngô: «O pə̌ nkoŋ ńgó m mbághʼə́ ghô ŋə́ Yelúsalêm ə́ ncʉ́ʼ ntó pə́ wó fěʼ no zô?»

¹⁰Pôl pwôr lə́ zʉ́ ngô: «N ntə̌ʉ gháʼa mbi kôr Fou Pəlóma. Pə́ wo fěʼ no zâa pə́ yáʼa. N nkə́ wʉ̂ ghâa có no mbó Pəyúda, kwaʼ gho zô o pə̌ njí.

¹¹Ə́ tə́i mbə́ yi n ngʉ̌ mə́ có no tə mboʼ pə́ jwí ghâa jwǐ, mə́i káa m mə́ mbôghʼ ghâa nkwʉ́. Lə́, có no lə́nə́ʉ lə̌i ndə́iʼ pə́ lə́ məno mi gháp tâghʼ tû məŋ lə́ po, mə́i mboʼ cǒ ŋuu ŋə̂ yé ghâa lə́ páp po. Pə́ cʉ̌ʼ fěʼ kôr ghâa pə́ mbi fou Pəlóma.»

¹²Festúsʉ gháp pə pye pi gháp ŋə́ yé ntǎghʼ lúŋə mətû máp mə́u, a lâʼ lə́ Pôl ngô: «Ghíʼ o caghʼə́ kôr gho ŋə́ mbi fou lə́, o wo lə̌r lə̂ mbi zʉ́.»

¹³Ə́ lei leʼé ndwuŋ, fou Agərípa gháp fə̌r ye yi məngyě yi ləjôghʼ yé Berenísʉ tô Sezarê lə̂ ntsêʼtə́ Festúsʉ.

¹⁴Ghíʼ gháp lə ghwǒ lə̂ ncí wó məleʼé ndwuŋ lêi, Festúsʉ pyêtə no Pôl ndáʼ fou Agərípa ngô: «Cǒ ŋuu pə́ yáʼa yi gə́mnaa Felísʉ kə ghí lə̌r, ə́ nyér yé ndə̂-tsâŋ.

¹⁵N nkə wó Yelúsalêm, ə́ nkə́u wó pətə́-ndə̂ pənuŋú poʼ gháp pə pəkə̌m pəyúda pûtə yé lə́ məŋ ńgó n nzáʼ tsâŋ yé.

¹⁶M mbwôr lə́ páp ńgó Pəlóma kâa pə́ nzâʼ gháp tsâŋ ŋuu ńgó pə jwí yé tə́ ghó gháp pə pye pi gháp pútə́ yé tə́ʉ fěʼ a zôŋ tû yé lə̂ no yi pə́ pútə́ yé mə́u.

¹⁷N nkə lâʼ yə́rə́, paghʼ pə pəyúda pêi naa ntó lə̂ yáʼa, nzʉ̂ fôghʼ n ndêi lěi fúŋ kôr ŋuu wêi, ə́ ngʉ̌ pə́ laghʼ yé ńtó.

¹⁸Pəpútə́ yé tô, m mə̂ nkwâŋ zâa ńgó gháp wo lâʼ cǒ ntəʉ no yi a ghʉ̌, ə́ pou káa pə̂ yé yə́rə́.

¹⁹N njwô gháp pə̂ nzóŋə pə̂ no Sê záp pə pǎp, mbaa no cǒ ŋuu yi a lə mə́ nkwʉ́, pə́ fûŋ yé ńgó Yěso, lə́ Pôl pə̂ nyʉ̂ŋ ncʉŋə ńgó a pyěr pə̂ ntəʉ.

²⁰N ntə̂ʉ ntə́pə́, káa kə́ jwô ghâa sʉ̂ lə̂ ndághʼ ńzáʼ kôr yé, ə́ njwó kə́káŋ ə́ ncʉ́ʼ ndáʼ lə́ Pôl ngô: o lə̌i nkôŋ o pə̂ʉ lə́ Yelúsalêm, pə́ cʉ̂ʼ féʼ kôr gho pə́ wó.

²¹Lə́ Pôl lâʼ ńgó pə cághʼə́ kôr ye ŋə́ mbi Fou. A lâʼ yə́rə́, n ncʉ̂ʼ ndáʼ ńgó pə wó ndoʼó yé ndə̂-tsâŋ tə nkə́u leʼé yi n ngwo tə́u yé ŋə́ lə́ Fou.»

²²Agərípa zûʼ tə ndáʼ lə́ Festúsʉ ngô: «M mə̌ nkôŋ nzúʼ no yi ə́ kwǎr ntsʉ ŋuu wêi pə́ məŋ.» Festúsʉ pwôr ngô: «O wo zúʼ no yi ə́ kwǎr ntsʉ zʉ́ zou.»

²³Nzʉ̂ fôghʼ, pətə́-ndə̂ pəlwóʼó-ntso gháp pə pye jwǐ túsoŋ twôʼtə fou Agərípa gháp Berenísʉ ndaghʼ ńkə́u ndə̂ kôr pə̂ sâa-sǎa. Gə́mnaa Festúsʉ ghʉ̂ pə́ laghʼ Pôl ńtó.

²⁴A lâʼ ngô: «Nye-tə-maʼ Agərípa, mbaa pei pə́tsəm pi paghʼə pə̌ ndə̂ yaʼa, pei jwô ŋuu wo gháʼa, mə́i pəyúda tə nzáa kə pútə́ yé lə́ məŋ Yelúsalêm tə mbaa yaʼa, ńgó kâa pə́ ŋuu mboʼ pə́ nyêr yé a kə̂ mə́ ncî pə́ mbi.

²⁵Ə́ ngwǒ lə́ məŋ, mə́i kâa nkə jwô ghâa có zə̂u yi a ghʉ̌, tə ə́ pə̂ yi mboʼ pə́ jwî yé. Lə́, a pôu ntúŋú ńgó pə cághʼə́ kôr ye ŋə́ lə́ Fou, m mbə̂i ńgó n ngwo tə́u yé ŋə́ lə́ zʉ́.

²⁶Lə́, n ngwo ntə́u zʉ́ gháʼa, n nkə́ ghwô ghâa có no yi mboʼ n ŋwáʼa cər ŋwaʼa ə́ ndaghʼ ńtə́u yé ŋə́ lə́ Fou. Ə̂ zə̂u yi ə́ ghʉ̌ n ndaghʼ yé ńtó mbi lâʼ, lə̂ ntághʼ mbi nye-tə-maʼ Agərípa ńgó a túŋú yé no, kəʉ mboʼ n ndêitə lə́ zʉ́ ə́ ngwǒ no yi mboʼ n ŋwáʼa ə́ ndághʼ ńtə́u yé ə́ ŋə́ lə́ Fou Pəlóma.

²⁷M mə̌ njî ńgó n ndə̌i ntə́u ngaŋə-tsâŋ ə́ ŋə́ lə́ Fou tə́ lǎʼ no tə́poŋ yi a ghʉ̌ zěi, ə́ cʉ̂ʼ mbə́ pə́ ghíʼ məno ghəghəʉ.»