Read Ngombale Məfaʼ Pəghaŋə-ntə̂u 26 Bible Online

Məfaʼ Pəghaŋə-ntə̂u 26 - Ngombale bible

Məfaʼ Pəghaŋə-ntə̂u 26

¹Fou Agərípa lâʼ lə́ Pôl ngô: «N ŋə̂ tsâr lə́ gho. Pyétə́ ntsʉ ghô lə̂ məno mi pə́ pûtə ghô mə́u lo, n nzúʼ.» Pôl ŋáʼa pô yé ə́ ŋə́ tʉ́, ə́ njǐ lə̂ ntsár ndághʼ ńzǒŋ tû yé, ə́ ndâʼ ngô:

²«N ngwo lətsei cər ntə̂ʉ məŋ leʼé wo lə̂ ntə́ʉ mbi ghô nye tə mâʼ fou Agərípa, ə́ mbyétə́ ntsʉ ghâa lə̂ məno mi Pəyúda tâghʼ tû məŋ lo.

³M mə̌ ntsěi gháʼate ńté no Zaa-môu pə̌ njî mar lâʼ gháp, ə́ mbǒu ntsúŋú mə́ njî məno mi gháp zoŋə. Ə́ pə̂ yə́rə́, m mə̂ sʉ̂ʉtə Zaa-môu ńgó â shə̂ghʼ, ə́ ntsúŋú nzúʼ no yi n ngwo ndǎʼ wó.»

⁴Pəyúda pə́tsəm pə́ njî cǐ zâa tə fú ghíʼ n ndə pə́ môu-ngwəsəu, m mbə̂ pə́ təcər pye lâʼ paghʼ Yelúsalêm; gháp tsuŋu mə́ njî lənyâŋ ghâa.

⁵Gháp pə́ njî ghâa tə fú leʼé. Gháp lə̌i nkóŋ gháp lâʼ Zaa-môu ńgó no yi n ndâʼ lo, ə̂ no lə́nə́ʉ. N ndə nyâŋ ghíʼ pye Falísia, ə̂ pye nkúʼtə́ ləpə̌ʉ Sê pəyúda gháʼate.

⁶N ntə̌ʉ kôr mpfu wo gháʼa, ńté no yi Sê lə ghʉ̌ ndaʼá mə́u lə̂ ngʉ́ ngʉ̌ lə́ pətə́ pághʼə, m mə̂ nzʉ̂ʼtə ghíʼ ə́ wo pəutə́.

⁷Məngər-ndə̂ mághʼə tsap pwô lə̂ ləghə̂m pə́ fâʼ mbó Sê tə́ kâa, ə́ ntə̌ʉ-nəu gháp lətwûʼ, ə́ ndaghʼ ńzʉ̂ʼtə ńgó zêi no pə̂utə́. Zaa-môu, pəyúda pûtə ghâa gháʼa ńté no m mə̌ nzʉ̂ʼtə zêi no.

⁸Pei pəyúda, pei ləʼ ńgó mboʼ Sê zə́ghʼə pye lə̂ ləwʉ̂ po ńté hó?

⁹Kwaʼ məŋ zâa, n ndə kwâŋ lə̂ ndwóʼó Yěso môu Nǎazalêi lə̂ məsʉ̂ mə́tsəm.

¹⁰Ə̂ zə̂u yi n ndə ghʉ̌ Yelúsalêm. N ndə laghʼ mətəʉ mi pətə́-ndə̂ pənuŋú poʼ lə ŋə́ lə́ məŋ, ə́ ńgóutə́ pye Kəlísto tə nzáa ńcóghʼ gháp ndə̂-tsâŋ; pə́ pou ngí jwítə́ gháp, zâa pô pə̂ mə́u.

¹¹N ndə ŋâa ŋə̂i cər məndə̂ cûʼtə pəyúda, ə́ ŋə̂ pye Kəlísto ngwôʼ, ə́ fárə́ gháp lə̂ nzôutə́ ləjôghʼ Yěso. N ndə fú ntsóʼó ku záp tə́poŋ tə ngwô mətúsoŋ mi ndeʼe, ə́ ngôutə gháp ńŋə̂ gháp ngwôʼ.

¹²N ndə kə́ ngʉ̂ pə́ yə́rə́ tə ə́ pə̂ có leʼé, pətə́-ndə̂ pənuŋú poʼ Sê ŋə̂ ŋwáʼa lə́ məŋ, ə́ ndaghʼ ńtə́u ghâa Damásʉ.

¹³M mbə̂ laŋə́ mə́ ndə́r, ə́ ngǐ njwó cǒ nkeʼ fû tʉ̌ lə́pû, ə́ nkěʼ wághʼ pə pye pi paghʼ pə pǎp yǎa mbə́, ə́ ŋwaŋə́ tə ndêi mə́nəu.

¹⁴Paghʼ pə́tsəm pfûŋtə sê, n nzûʼ nji ŋuu lâghʼ tsâr pye Hebələ̂ ńdáʼ lə́ məŋ ngô: «Sôl, Sôl, o tsóʼo ku zâa tə́poŋ ńté hó? O pə̌ kʉʼʉ fʉ̌ŋ zô ghíʼ mənye yi pə́ lǎghʼ lətû ləkoŋ sâp ku yé ńgó a lə́r lə̂ mbi, a kʉ́ʼʉ nyə̂ghʼ ku yé nzəmə-nzəmə.»

¹⁵N ntúŋu ngô: «Ə̂ gho wǒ Nde?» Nde pwôr lə́ məŋ ngô: «Ə̂ məŋ Yěso yi o tsóʼó ku yé tə́poŋ lə̂.

¹⁶Lə́ lěsê ńtə́ʉ tə́ʉ. Məŋ nyárə mbəʉ zâa mbó gho gháʼá, lə̂ ndághʼ gho ńgʉ̌ ngaŋə-faʼ ghâa; o ghwo lə̂ ngʉ́ pə́ jî zə̂u yi o jwǒ leʼé wo, mbaa məno mi n ngʉ̌ poŋə́ nyarə́ ghô.

¹⁷N ngwo tə́u gho lə́ pəyúda mbaa lə́ məcó məlâʼ mi ndeʼe, ə́ pə́ pápə ghô tə lə́u có zə̂u ghʉ̂ yé gho po.

¹⁸N ntə̂u gho gháʼá, ńgó o wó ŋéʼé nyôghʼ máp, ə́ ngʉ̌ gháp fú cər nzə̌m nkwátə́ ńkə́u cər nkeʼ, ə́ mbou ngʉ́ gháp kwátə́ mbó Sə́tə, ə́ ntó lə̂ mbó Sê, ə́ mbǒu cóghʼ ntə̂ʉ gháp lə́ məŋ, Sê lyə́ghʼə́ məfaa ghap ə́ ŋə̂ záp yʉʼ təcər pye pé.»

¹⁹«Ə́ pə̂ yə́rə́, nye tə mâʼ fou Agərípa, kâa n nkə tə̂i ghâa tû ə́ ŋə́ mbó Sê lə̂ no yi a lə fú tʉ̌-lə́pû ə́ ŋéʼ nyôghʼ mâa n njwô, ə́ mbóu nzúʼ;

²⁰n njî lə́ pye Damásʉ lə̂ ndâʼ gháp no Sê, ə́ mbáatə́ lə́ pye Yelúsalêm, ə́ fú lə́ pye Yelúsalêm ńkə́u lə́ pye cər paghʼə-ngoŋ Yudêi tsəm, ə́ fú lə́ pye Yudêi ńkə́u lə̂ məcó məlâʼ mi ndeʼe; n ndâʼ lə́ páp ńgó gháp kə́p cǐ záp ə́ mbə́i no Sê, ə́ mbou ndághʼ məngʉ̌ məno máp ńnyárə́ ńgó gháp kə́p mə́ cǐ záp.

²¹Ə̂ zə̂u yi ə́ lə ghʉ̌ pəyúda ghou ghâa ndə̂ Sê, ə́ mə́ ndôu lə̂ njwí ghâa.

²²Lə́, m mbyěr wó leʼé wo gháʼa, Sê lə̂ pə̂ mbápə́ ghâa, m mbôu mə́ ndêʼtə məno mi m mə́ njî lə́ zʉ́ ə́ mbó ghəpə́ mbaa mbó pətikáŋ; tə́ kʉʼʉ có yi ndeʼe lə̂ mi pətsətə́-nkəʉ Sê gháp pə Mə̌usə̂i lə lǎʼ ńgó ə́ táa tó.

²³Ə́ ńgó Kəlísto ghʉ̌ jwó ngwôʼ, ə́ pə́ nduŋ-mbi ŋuu lə̂ nzʉ́ʉ lə̂ ləwʉ̂ təcər pəpfû, ə́ pǒu nyárə́ nkeʼ yi ə́ ghʉ pə́ cwôr mbó lâʼ gháp pə mbó pye pi káa gháp pə̂ gháp pəyúda.»

²⁴Pôl pə̂ mbyêtə ntsʉ yé yə́rə́, Festúsʉ lâʼ lə́ zʉ́ lə̂ təʉ ngô: «Pôl! Ô pə. O lə jyéʼ ŋwaʼa tə́sə́ʉ a côŋ tû zô.»

²⁵Pôl pwôr ngô: «Ə́ Nde kâa mbə́ ghâa pə, məno mi n ndâʼ pə́ lə́nə́ʉ, m mbôu nkwâŋ mboŋə́ lǎʼ.

²⁶Fou Agərípa pə̌ njî məno mwo mə́tsəm, ə̂ zə̂u yi ə́ ghʉ̌ n ntə̂ʉ mbi zʉ́ ńtsár pə̂ sâa-sǎa ńté no kâa có pə́ mə́u yi pə́ lə ghʉ̌ pə́ ləlwǒ.

²⁷Nye-tə-maʼ Agərípa, o pə̂i no pətsətə́-nkəʉ Sê lə lǎʼ? M mə̌ njî ńgó o pə̌ mbə́i.»

²⁸Agərípa lâʼ lə́ Pôl ngô: «Tə o kwaŋ ńgó o kə́ tə́ʉ pə̂ mpfu wo gháʼa, ə́ ghʉ̌ n ncʉ́ʼ ŋuu Kəlísto áa?»

²⁹Pôl pwôr ngô: «Ə́ lə̌i mbə́i mbə́ pə́ mpfu wo kəʉ pə̂ mpfu ndeʼe, mə́i zâa zə̂u yi m mə̌ ndôu mbó Sê pə́ ńgó gho nye-tə-maʼ Agərípa mbaa pei pə́tsəm pi pei pə̌ yáʼa leʼé wo ə́ mə́ nzûʼ no yi məŋ ndâʼ lo, pei pə́ ghíʼ məŋ lə́ koo pəcêŋ pwo pi pə́ lə́ məŋ lo pə̂ lə́ pei!»

³⁰Fou, Ngə́mnaa lə́ Berenísʉ, gháp pə pye pi gháp tə́i mbə́ yʉʼ wó cʉ̂ʼ ndêse,

³¹ə́ mə́ nkwatə́, ə́ ŋə̌i ndâʼ təcər páp ngô: «Ŋuu wo kə́ ghʉ̂ yé có no tə mboʼ pə́ jwî yé kəʉ ncóghʼ yé tsâŋ ńté zěi.»

³²Nye-tə-maʼ Agərípa pôu ndáʼ lə́ gə́mnaa Festúsʉ ngô: «Ŋuu wo kə ghíʼi ə́ ndə́iʼ lǎʼ ńgó fou pəlóma lə̂ cʉ́ʼ feʼ yé po, mə́i pə́ tyaghʼ yé nyér a lə̂r.»