Read Ngombale Məfaʼ Pəghaŋə-ntə̂u 27 Bible Online

Məfaʼ Pəghaŋə-ntə̂u 27 - Ngombale bible

Məfaʼ Pəghaŋə-ntə̂u 27

¹Pə́ ghʉ nyáŋ tə ntsúŋtə́ ńgó paghʼ wo kə́u láanji lə̌r lə́ Italî, pə́ côghʼ Pôl gháp pə pəcó pəghaŋə-tsâŋ mbó cǒ tə́-ndə̂ pəlwóʼó-ntso, ləjôghʼ yé pə̂ Jwilyôs, a pə̂ cǒ tâʼ tə́-ndə̂ pəlwóʼó-ntso Pəlóma lə̂ nou pəlwóʼó-ntso yi pə́ fûŋ ńgó nou pəlwóʼó-ntso fou pəlóma.

²Paghʼ kə̂u láanji yi a fû túsoŋ Adəramîtə, ə́ mə́ ngwô lěi mbəʉ mətúsoŋ mi pə́ mənkaŋ nci cər paghʼə-ngoŋ Azî, paghʼ pə cǒ ŋuu naa ndə́r, ləjôghʼ yé pə̂ Aristâkə. A pə̂ ŋuu túsoŋ Tesalonîkə cər paghʼə-ngoŋ Masedwânə.

³Nzʉ̂ fôghʼ paghʼ kə̂u Sidôŋ. Jwilyôs ghwô ntə̂ʉ shʉʼʉ nzəm Pôl, ə́ nyér yé a wó ngwə́ pəsə̌u pé, gháp tóutə yé.

⁴Paghʼ fû wó mə́ ndə́r, kəfwor fû mbi mbi ntôʼ wághʼ lə̂ ndə́r ndʉŋ-ndʉŋ, paghʼ cʉ̂ʼ ngʉ́ŋə́ ńdə́r ndə̂u yi məghʉ̂ŋ Shîpələ. Ə́ pə̂ có lâʼ yi nci lə zə́mə́ ńŋə́ təsoŋ.

⁵Paghʼ cʉ̂ʼ nkə́ ŋə́i pə́ yə́rə́, ə́ nděi cər mə̂i-nci mbəʉ Silisî gháp Pamfilî, ə́ nkə́u Míra cər paghʼə-ngoŋ Lisî ńtə́ʉ.

⁶Ə́ njwô cǒ láanji yi a fǔ túsoŋ Alezaŋdələ̂i mé ndə̂r lə̂ paghʼə-ngoŋ Italî, tə́-ndə̂ pəlwóʼó-ntso yi paghʼ pə pǎp ŋə̌i, kwárə wághʼ ə́ ncóghʼ cər wó.

⁷Paghʼ lâghʼ láanji ńŋə́i pə̂ ndaa-ndaa təcər leʼé ndwuŋ tə ngí jwó túsoŋ Sənîdə, mə́i paghʼ jwô mə́ ngwôʼ gháʼate. Fə̂m toʼ wághʼ lə̂ ndə́r ndʉŋ-ndʉŋ. Paghʼ lwôʼ kəfwor, ə́ nzə́mə́ nzəm Kəlêtə; Kəlêtə pə̂ có lâʼ yi nci lə zə́mə́ ńŋə́ soŋ. Ə́ ntó ńdéi mbəʉ Salomônə, ə́ pə̂ yʉʼ ndesé Kəlêtə yi ə́ lə shwoghʼə́ ńkə́u nci.

⁸Paghʼ fû wó, ə́ nkwátə́ mənkaŋ nci Kəlêtə tə ngí nkə́u lətə̌ʉ láanji yi pə́ fûŋ ńgó Lətə̌ʉ pəláanji Shʉʼʉ, ə́ njwó ngwôʼ gháʼate. Lətə̌ʉ láanji zêi pə̂ mbəʉ túsoŋ Lasê.

⁹Paghʼ ghi kə́u wó, mə́i paghʼ cî mə́ laŋə́ gháʼate, tə saŋ ləpfuʼú yi pəyúda koŋ koŋə́ ńnyâŋ nji ə́ sʉ̂ʉtə Sê mə́u lei. Ə́ mbə́ yi ŋuu lə̌i mbóu nkə́ mə́ ndâghʼ láanji ńŋə̂i, a cʉ̂ʼ ndôu pə́ ləwʉ̂ ye. Pôl zâʼ nzʉ̂ ndǎʼ lə́ pəshǔŋ láanji ngô:

¹⁰«Pəsə̌u pâa, n njwǒ ńgó paghʼə lə̌i nkə́ mə́ ndə̂r pə́ gháʼa, mə́i paghʼə wo kə́u mbi, láanji gháp pə məzə̂u mətǎa mi ə́ pə́ cər wó ghí kə́u cwí, ndeʼ có paghʼə zághʼə kwʉ́tə.»

¹¹Tə́-ndə̂ pəlwóʼó-ntso zûʼ, káa lǎghʼ fûŋ yé có no, ə́ nzúʼ pə̂ no yi kwar ntsʉ tə́-faʼ pye pi gháp faʼ cər láanji mbaa yi ə́ kwar ntsʉ ngaŋ láanji.

¹²Ə́ yaa ngí pə́, Lətə̌ʉ pəláanji Shʉʼʉ kə̂ mbə̂ yé yʉʼ yi mboʼ ŋuu nyâŋ wó mpfu məghǎa tə nzúʼ shʉʼʉ po. Ə́ lei yə́rə́, lələʉ pye cər láanji tâghʼ ńgó pə fú yʉʼ wó ńdə́r. Ə́ mə́ nkwâŋ ńgó Sê lə̌i mbə́i, gháp lər tə nkə́u lə̂ lətə̌ʉ láanji cər túsoŋ Fenisî cər ngoŋ Kəlêtə, ə́ pə̂ yʉʼ yi ləlí ndesé lə kə́u yʉʼ wó ńkwár, ə có ndyəghʼə́ túsoŋ nâŋ sʉ̂ ntsǒ-nəu yi tû, ə có nâŋ sʉ̂ ntsǒ-nəu yi ncʉ̂ŋ. Gháp tsâa lə̂ nkə́u wó ńnyáŋ tə məghǎa láʼ mé.

¹³Pəghaŋə láanji jwô cǒ mə́ceʼé kəfwor fû ncʉ̂ŋ, ə́ njǐ lə̂ ncʉ̂ʼ yʉʼ, gháp kwâŋ záp ńgó no yi gháp tə́i kwǎŋ zěi wo pəutə́. Ə́ nkhwǒr láanji ə́ ndághʼ mə́ ńkwâtə məghʉ̂ŋ ngoŋ Kəlêtə.

¹⁴Lə́ ə́ kə́u lə̂ ŋə́i, cǒ tə́koʼ kəfwor yi pə́ fûŋ ńgó Əlakilôŋ fû cər lâʼ, ə́ njǐ lə̂ nkhʉ̂,

¹⁵ə́ ndǎghʼ láanji ḿbyé sʉ̂ yi ndeʼe. Paghʼ jwô kə́káŋ ə́ nyér láanji, kəfwor lə̂ cʉ̂ʼ shûŋ ńdaghʼ ńzâp yé sʉ̂ yi a kǒŋ.

¹⁶Láanji laghʼ wághʼ mə́ ńdêi cʉŋə cǒ mə́ceʼé lâʼ yi nci lə zə́mə́ ńŋə́ soŋ, pə́ fûŋ ńgó Kodâa. Lâʼ zei nyêʼ nkhʉ́ŋə́ fə̂m lə́ láanji, paghʼ lúʼu, ə́ sáʼ təʉ tə ngôu kənyúʼ yi pə́ laghʼ shúʼu məzə̂u mətǎa cər láanji.

¹⁷Ə́ ndǔ tə nkóʼó kənyúʼ zêi ńŋə́ cər láanji, pəghaŋə-faʼ laghʼ mənkʉ ńkə́r nkâʼ láanji. Ghíʼ gháp lə pə́ mbóghʼ lə́ pə́ yi mboʼ láanji wô ndwúŋ lə̂ saŋə-sáŋə yi ə́ kəitə́ nkaŋ nci Libî lə̂, ə́ shúʼú kə́mə tə̌ʉ yi pə́ laghʼ ńgôu láanji tâghʼ tâʼ yʉʼ, ə́ máʼ nci lə́ nyér ə́ tsʉ́ŋə tsʉŋə́. Ə́ nyér kəfwor kə̂ ncʉ́ʼ mə́ ndâghʼ gháp ŋə̂i ŋə̌i.

¹⁸Nzʉ̂ fôghʼ, ə fə̂m kə̂ mə́ ncʉ̂ʼ láanji cʉʼʉ́ tə pəshǔŋ láanji jwô kə́káŋ, ə́ njǐ lə̂ cwótə́ pyeʼ láanji, ə́ mâʼ nci.

¹⁹Ə́ pə̂ lə̂ mbâatə leʼé tárə́, tû-mbəʉ pəghaŋə-faʼ ji lə̂ nkhwótə́ məzə̂u mi gháp laghʼ fâʼ cər láanji, ə́ máʼtə́ nci.

²⁰Ə fə̂m kə̂ ncʉ̂ʼ pə́ yə́rə́ məleʼé tə nzáa; lə́u pə́ kə̂ mbyér mə́ njwô yé ləjôghʼ mə́nəu po, lə́u nkə́ njwô yé pəcwôʼ-saŋ po. Ə fə̂m kə̂ ngâʼ gháʼá tə kâa paghʼ kə́ njî wághʼ ńgó paghʼ wo cwór.

²¹Ə́ nyáŋ nji məleʼé tə nzáa, Pôl lêsê ntə́ʉ mbi lâʼ ə́ ndǎʼ ngô: «Pəsə̌u pâa pei kə ghíʼi ńzúʼ ntsʉ ghâa mə́i káa pághʼə kə fú Kəlêtə ńgwó yʉʼ. Mə́i káa láanji kə cwóŋtə yé, məzə̂u mətǎa kə̂ nkə̂u yé cwí po.

²²Lə́ lə̂ mpfu wo, m mə̌ ndaʼ lə́ pei ńgó pei shə̂ghʼ, cǒ ŋuu wei wo kwʉ̂ yé po, ə ndaʼ láanji lə̂ wo kə́u cwí.

²³N ndaʼ yə́rə́ ńté no Sê yi ngûʼtə yé tə̌i ntə́u tâʼ cwôʼ yé lətwûʼ leʼé wo lə́ məŋ yi m mbə̌ ngaŋə-faʼ ye.

²⁴A tô ńdáʼ lə́ məŋ ngô: “Pôl koo pôghʼ có zə̂u, ə́ pə́ túŋu ńgó pə́ féʼ no zô mbi fou pəlóma. Sê wo lǎghʼ poŋə-ntə̂ʉ yi a ghwǒ nzəm ghô, ə́ ghʉ̌ ŋuu tsəm yi pei pə pǎp pə́, ə̂ cwór.”

²⁵Pəsə̌u pâa pei shə̂ghʼ, ńté no n ngwo pə̂i-ntə̂ʉ nzəm Sê ńgó no yi a lǎʼ lə́ məŋ lo, ə́ wo pəutə́.

²⁶Fə̂m kə́ khwǒr wághʼə pə́ gháʼa, tə ə́ wǒ kə́u cər có lâʼ yi nci lə zə́mə́ ńŋə́ soŋ, ə́ měʼ wághʼə yʉʼ wó.»

²⁷Ə́ lə pə́ lə̂ mbâatə pələtwûʼ tsap-kwo lə̂ ləghə̂m, ə fə̂m kə̂ ndághʼ wághʼ ḿbə́ pə́ ndəu mə̂i-nci Medíteranê, tə ə́ pə̂ ndə̂u ntəʉ-twûʼ, pye pi gháp faʼ cər láanji zûʼ, ə́ shwî pə́ ghíʼ pə́ pə́ mə́ nkə̂u lə̂ có pǎp ndesé.

²⁸Gháp laghʼ zə̂u yi gháp ŋəi ndághʼ fəiʼ nci lə̂ njwó mbə̂u yi nci lǎghʼ shǐ, ə́ fə̌iʼ ńjwó nci shî tə mbə́ mítə tsap saambwô lə̂ mə̂m-tárə́, gháp nyêʼ njí ŋə̌i, ə́ nkə́ ncí fə̂iʼ, ə́ njwó mítə tsap-ləfǎa lə̂ mə̂m-mbwô.

²⁹Gháp pə̂ mbôghʼ ńgó láanji wǒ lúŋ lə̂ məghǒ jwǐ, ə́ ngwǒ nzəm shúʼú məzə̂u mi gháp laghʼ ngôu láanji ntâghʼ tâʼ yʉʼ ləkwo ə́ máʼtə́ nci, ə́ ncʉ́ʼ ntə́ʉ yʉʼ wó mə́ ntsâa ńgó yʉʼ fátə́ fóghʼ.

³⁰Lə́ pye pi gháp faʼ cər láanji pə̂ ndôu məsʉ̂ lə̂ ndághʼ ńkhʉ̂ gháp, ə́ shúʼú kənyúʼ yi gháp laghʼ ńshúʼu məzə̂u mətǎa ntághʼ nci, ə́ ndǎʼ lə́ pye ńgó gháp lǎghʼ wǒ mbi, ə́ shúʼú məzə̂u mi ə́ ghou láanji tâghʼ tâʼ yʉʼ.

³¹Pôl lâʼ lə́ tə́-ndə̂ pəlwóʼó-ntso Pəlóma gháp pə pəlwóʼó-ntso ngô: «Pye pə̂ lə̌i ndə́iʼ nyáŋ cər láanji po, mə́i pei wo cwôr wéi po.»

³²Pəlwóʼó-ntso zêʼtə mənkʉ mi ə́ kə nkǎp kənyúʼ, ə́ nyér ə́ lər nci.

³³Gháp ghi pə́ zʉ̂ʼtə ńgó yʉʼ fóghʼ, Pôl côghʼ ntə̂ʉ gháp ńgó gháp zʉ́ məzə̂u, ə́ ndǎʼ ngô: «Ə́ tə̂ʉ leʼé wo, ə́ ndághʼ mbə̂ leʼé tsap-kwo lə̂ ləghə̂m ghíʼ pei nyǎŋ tə́ zʉ́ zə̂u, ə́ mə́ nzʉ̂ʼtə ńgó yʉʼ pôŋ.

³⁴M mə̌ ndâʼ ńgó pei sáʼ təʉ ńzʉ́ zə̂u, ńté no měi lə́ wo ŋə́ wéi mətəʉ, pei cwôr, káa mbəm lənyuŋu tû cǒ wei pə́ ngwô yé ncwí wó.»

³⁵Pôl lâʼ yə́rə́, ə́ mbyé mbələ̂ghʼ, ə́ ntə́ʉ mbi ŋuu ntsəm, ə́ sʉ́ʉtə́ Sê, ə́ mbwóʼ, ə́ njǐ lə̂ mpfár.

³⁶Ə́ pə̂ yə́rə́, ntə̂ʉ ŋuu ntsəm kə̂u, wǒwó pfâr yé lə́wó.

³⁷Paghʼ pə́tsəm pi paghʼ lə pə́ cər láanji lə kəitə́ ḿbə́ pye nkʉ pwô lə̂ tsap-ntóghʼó lə̂ mə̂m-saambwô.

³⁸Wǒwó pfâr tə njwə́r, paghʼ khwôtə ngəsâŋ-ncʉ̂ŋ ḿmǎʼ nci lə̂ ndághʼ ńgʉ̌ láanji záŋə́.

³⁹Nzʉ̂ fôghʼ, pə́ jwô ndesé, lə́ pye pi gháp faʼ cər láanji kâa jî gháp yʉʼ yi pə́ tə́ʉ wó. Lə́ njwô có yʉʼ yi nci shóghʼə́ ńkə́u lə̂ ndesé, gháp cʉ̂ʼ mə́ nkwâŋ ńgó Sê lə̌i mbə́i, mə́i gháp lǔ tə lǎghʼ láanji lə̌r lə̂ yʉʼ wó.

⁴⁰Ə́ nkwǎŋ yə́rə́, ə́ nkéʼtə́ mətə̌ʉ mi pə́ laghʼ ngôu láanji tâghʼ tâʼ yʉʼ máʼtə́ nci. Ə́ nkə́ ncí nkéʼtə́ mənkʉ mi ə́ kâp zə̂u yi ə́ nyárə láanji ndə̂u, ə́ mbǒu nkóʼó tə́koʼ zə̂u-ndí yi pə́ mbi láanji, ə́ ngôu fôghʼ, ə́ ngʉ láanji ŋə̂i, ə́ njí ńgó kəfwor cî láanji ndághʼ ńdə̌r lə̂ nkaŋ mə̂i-nci.

⁴¹Lə́ mə́ ndə́r, mbi láanji sô cər saŋə-sáŋə yi ə́ kəitə́ cər nci, nci pə̂ nkhʉ̂ lə̂ məndyəghʼə́ měi mə́mbwô, ə́ ndeʼe tə cǒ lə ghʉ kâa pyér; mələ̂ʉ nci ncʉ̂ʼ ndwúŋ nzəm láanji ə́ mbwóʼtə́.

⁴²Pəlwóʼó-ntso pə̂ ndôu njwítə́ pəghaŋə-tsâŋ ə́ mbóghʼ no mboʼ cǒ ghap zôʼ nci, ə́ nkhʉ yé.

⁴³Lə́ tə́-ndə̂ pəlwóʼó-ntso yi kâa lə pə́ nkôŋ yé ńgó có no kwátə́ Pôl, lə̂ʼ ńgó koo gháp ghʉ zə̂u yi gháp kwǎŋ zěi. Ə́ ndǎʼ lə́ pye pi gháp pə́ njî ńzóʼ nci shʉʼʉ ńgó gháp pyə̂ghʼ ntyátə́ ńtsə́ʉ nci ńkwátə́;

⁴⁴pəcó cʉ̂ʼ mbə́ nzəm páp lə̂ məpaghʼə-plâŋ mbaa pə́ lə̂ məkəm láanji mi ə́ pwóʼtə́. Ə́ pə̂ yə́rə́, ŋuu ntsəm fû nci ńkóʼ tə́ ghó zə̂u ghʉ ŋuu.