Read Ngombale Məfaʼ Pəghaŋə-ntə̂u 28 Bible Online

Məfaʼ Pəghaŋə-ntə̂u 28 - Ngombale bible

Məfaʼ Pəghaŋə-ntə̂u 28

¹Paghʼ lə táŋə́ tə fú ntsʉ ləwʉ̂ nkwǎr tə ntə́ʉ nkaŋ nci yə́rə́, pə́ laʼ wághʼ ńgó ləjôghʼ ngoŋ yi paghʼ tə̌ʉ wó lêi, ə̂ ngoŋ Mâltə; ə́ pə̂ ngoŋ yi nci lə zə́mə́ ńŋə́ təsoŋ.

²Pye lâʼ pêi pfû wághʼ kwaʼ shʉʼʉ, ə́ ntsuŋú tə́koʼ mǒghʼ ńgó paghʼ zághʼ ńté no ə́ lə ghí pə́ mbʉŋ pə̂ ndó, fwôghʼ pôu mə́ nkó.

³Pə́ pə̂ nzâghʼ mǒghʼ, Pôl wô ŋwâr ghéghé nkwə̂i ə́ ntó mə́ mâʼ mǒghʼ, ə nô tə̂i mbə́ cər wó, ə́ nzúʼ jaghʼə́ mǒghʼ ə́ ndə́u pô yé ńtsʉ́ŋə́ mə́u.

⁴Pye ngoŋ pêi jwô ghíʼ nô tsʉ́ŋə́ lə̂ pô yé, ə́ ndǎʼ təcər páp ngô: «Ŋuu wo, wo ghʉ̌ hó, ə́ pə́ fwôr; a táŋə́ tə ncwór nci lə́ káa Sê pə̂i yé ńgó â pə́ wó.»

⁵Lə́ Pôl nyarə́ pô yé ndəu mǒghʼ, ə́ ncʉ́ʼtə́, nô tsóʼo ḿpfúŋ mǒghʼ, lə́ kâa có zə̂u ghʉ̂ yé yé.

⁶Pye pêi pə̂ nzʉ̂ʼtə lə̂ njwó ghíʼ pô Pôl kôʼ, kəʉ pə́ ghíʼ a ghapə́ ghapə́ mpfúŋ ńkwʉ́ lo; ə́ njǐ ńzʉ́ʼtə́ káa jwó có zə̂u ghʉ̂ yé, gháp kə̂p kwaŋtə záp ə́ ncʉ́ʼ ndáʼ ńgó â cǒ sê.

⁷Cǒ ŋwâr-lâʼ yi njwǐ yi a lə pə́ mbəʉ yʉʼ wó, ləjôghʼ yé pə̂ Pwibilwîs jwô wághʼ, ə́ mpfú wághʼ nzeʼ zʉ́ ghíʼ pəsə̌u pé, paghʼ cî wó leʼé tárə́.

⁸Ə́ ghi pə́, tə́ pə́ Pwibilwîs nûŋ mə́ ngôu, fípaa gháp pə kǒʼ pə̂ lə́ zʉ́, Pôl tô ńkə́u ndə̂ ńzápə́ mbô lə́ zʉ́, ə́ sʉ́ʉtə́ Sê, a shwîtə.

⁹Ə́ leitə yə́rə́ pəcó pəghou pi gháp lə pə́ cər ngoŋ wêi fû məsʉ̂ məsʉ̂ ńtó ńcə́r Pôl, a ghʉ̂ gháp shwîtə.

¹⁰Gháp lə ŋə́ məkuʼ mághʼ gháʼate, paghʼ nyâŋ tə mə́ ndə́r, gháp ŋə̂ zə̂u tsəm yi mboʼ kə̂u laŋə́ ḿpfútə́ wághʼ.

¹¹Paghʼ lə cí cər ngoŋ wêi saŋ tárə́, ə́ mə́ ndə́r, ə́ nkə́u láanji yi a fǔ Alezaŋdələ̂i, ləiʼi láanji wêi pə̂ «məsê məfâghʼ», ə́ pə̂ yi ə́ lə fú túsoŋ Alezaŋdələ̂i, ə́ ngǐ kə́u yʉʼ wó ə́ pə̂ mpfu məghǎa, a tə̂ʉ wó ə́ nzʉʼtə́.

¹²Paghʼ fû cər ngoŋ Mâltə, ə́ ndə̌r tə nkə́u Serakwîs ə́ shíʼ, ə́ ncí wó leʼé tárə́.

¹³Ə́ fú wó nkwatə́ pə́ mənkaŋ nci tə nkə́u Rəjíyo. Nzʉ̂ fôghʼ kəfwor ncʉ̂ŋ pfûtə wághʼ, paghʼ lâghʼ leʼé pwô ńkə́u mbəʉ Puzolês.

¹⁴Ə́ nkə́u wó, ə́ njwó pəcó pəfə̌r gháp sʉ̂ʉtə wághʼ ńgó paghʼ pə pǎp nyáŋ tâʼ ngap lâʼ. Yo ghíʼ paghʼ lə ŋə̌i mboŋə́ kə́u túsoŋ Lóma.

¹⁵Pəfə̌r pi wó zûʼ ńgó paghʼ pə̌ ntó, pəcó tó mbə̂utə́ wághʼ mətǎa Apiyûs, pəcó pəutə wághʼ yʉʼ yi pə́ fûŋ ńgó məndə̂ ləzətə́ pəghəʉ mə́ntárə́. Pôl lei tə njwó gháp, ə́ ŋə́ nkhwo mbó Sê, ntə̂ʉ yé kʉʼʉ nkə́u.

¹⁶Paghʼ kə̂u túsoŋ Lóma, pə́ pə̂i ńgó Pôl lôu ye ndə̂ yi a wo cí wó, lə́ ə́ ŋə́ tâʼ sóghəi yi a wo pə́ pâp yé.

¹⁷Ə́ lei leʼé tárə́, Pôl fûŋ pəkə̌m pəyúda pi Lóma nzeʼ zʉ́. Gháp tô tə nyáŋ sê, a lâʼ lə́ páp ngô: «Pəfə̌r, n ndaa kə́ ghʉ̂ có no tə́poŋ lə́ pye lâʼ pághʼə, káa kə́ fǎa ləpə̌ʉ pətə́ pághʼə, lə́ pə́ lə ghou ghâa Yelúsalêm ńŋə́ lə́ Pəlóma.

¹⁸Gháp feʼ ghâa, ə́ mə́ ndôu lə̂ ntyâghʼ ghâa nyér, ńté no káa gháp lə jwô gháp có no yi n ngʉ̌ tə mboʼ pə́ lei mə́u ə́ njwí ghâa.

¹⁹Ə́ ndǎʼ yə́rə́ pəyúda ləʼ, n njwô kə́káŋ ə́ cághʼə́ no zâa ŋə́ lə́ fou pəlóma, lə́ káa lâʼ yə́rə́ ə́ lǎghʼ lou lə̂ ńtó yáʼa fə́i lâʼ zághʼə.

²⁰Yo zə̂u yi ə́ ghʉ̌, n fûŋ wéi ńgó pei tó paghʼə tsár. Ńté no pei pə̌ njî zə̂u yi pye Ísə́lahêl cî mbâp, pəcêŋ pwo pə́ mbô məŋ gháʼa, ə́ ntê pə́ zěi.»

²¹Gháp pwor lə́ zʉ́ ngô: «Paghʼ laa kə́ jwô wághʼ cǒ ŋwáʼa yi pə́ fú Yudêi ntə́u ńŋə́ ńté ghô, káa kə́ jwô wághʼ cǒ ŋuu yi a kə tó ńdáʼ ńgó o ghʉ̂ có no tə́poŋ.

²²Lə́ paghʼ pə̌ nkoŋ ńgó kwaʼ gho lâʼ wághʼ no yi ə́ pə́ ntə̂ʉ gho, ńté ńgó nou pye pi gháp lə fǎghʼ mbəʉ záp, ə́ yi o lə kə́u mə́u lə̂, pə́ pə́ ndəʼ zěi yʉʼ ntsəm.»

²³Pəyúda lâʼ yə́rə́, gháp pə pǎp tʉ̂ŋ leʼé yi gháp pə pǎp kə́ cí pəutə́. Leʼé zêi ghʉ nkûʼ, gháp tô nzáa gháʼate, ə́ ncə́r yé yʉʼ yi a cî wó. Pôl kə̂ nkêʼtə pə̂ no Ləfou Sê ńdâʼ gháp lə̂ fú mbaʼa-mbaʼ ńgwó ńkə́u mpfu-ngwʉ̂. Ə́ mə́ ndôu məsʉ̂ lə̂ ngʉ́ gháp jî ŋuu yi Yěso pə̌ wěi. Ə́ nkwárə́ məyʉʼ ŋwaʼa cər ŋwaʼa ləpə̌ʉ Mə̌usə̂i gháp pə yi pətsətə́-nkəʉ Sê, ə́ ndaghʼ ńtsúŋú ńkéʼtə́ ńdáʼ gháp.

²⁴Pəcó pye təcər páp zûʼ no yi a lǎʼ, ə́ ngí pə́i, pəcó ləʼ.

²⁵Gháp ghi sěi yʉʼ wó, káa pyér tsâr gháp zuʼú. Pôl cʉ̂ʼ ndáʼ lə páp ngô: «Ə Zəghʼə Sê lə laʼ gháʼá no lə́nə́ʉ, ə́ lə laghʼ ntsʉ Esǎya ntsətə-nkəʉ Sê,

²⁶ə́ ndǎʼ lə́ pəmə́ngâa-njʉʼ péi ngô: “Wo ńdǎʼ lə̂ lâʼ zə̂ ngô: Pə́ ghʉ̌ lǎʼ no, pei zúʼ kwaʼ shʉʼʉ, lə́ ə́ njî wéi no yi pə́ laʼ zěi po, ə́ pǒu tsuŋú náŋtə́, lə́ ə́ jwô wéi po.

²⁷Ńté no lâʼ zêi káa pə́ nkôŋ gháp nzûʼ có no, gháp lə ghuʼu mə́ mətuŋú máp, ə́ ncétə́ nyôghʼ máp tə káa pə́ kôŋ gháp njwô có zə̂u, káa pə́ koŋ gháp nzúʼ yʉʼ, Káa kə́ pə́ kôŋ gháp ńgó ə̂ kə́u məntə̂ʉ páp. Ə́ nkə́ ngʉ́tə pə́ yə́rə́, ə́ mbóghʼ no gháp pə̌ʉ lə̂ mbó məŋ Sê, n ngʉ́ gháp shwítə́.”

²⁸Pôl kə̂ ncí ndáʼ lə́ páp ńgó pei jí ńgó ə́ tə́ʉ mpfu wo gháʼá, mə́i Sê kə tə̂u Nkəʉ Shʉʼʉ yi ə wo ghʉ̌ pə cwór, ə́ ŋə́ lə́ pye pi káa gháp pə̂ gháp pəyúda, gháp wo zúʼ ə́ pə́i.» [

²⁹A lâʼ yə́rə́, pəyúda fû gháp yʉʼ wó ńdə́r, ə́ ŋə̌i ńzóŋə no mə́u təcər páp, tə ə́ ncʉ́ʼ sâʼ saʼá.]

³⁰Pôl nyâŋ Lóma təcər nguʼ pwô cər ndə̂ yi a lə pfú ə́ mə́ mbéi. Wǒwó yi a pə̌ nkoŋ ńjwó yé tô wó, gháp zʉ́ tsâr.

³¹Ə́ mə́ ndêʼtə pye zə̂u yi Ləfou Sê pə́ zěi, ə́ mbou mə́ ndâʼ gháp ŋuu yi Nde Yěso Kəlísto pə̌ wěi pə̂ sâa-sǎa; lə́u cǒ ŋuu kə̂ mə́ nkə́ʼtə yé yé po.