Read Ngombale Məfaʼ Pəghaŋə-ntə̂u 3 Bible Online

Məfaʼ Pəghaŋə-ntə̂u 3 - Ngombale bible

Məfaʼ Pəghaŋə-ntə̂u 3

¹Ə́ lə pə̂ có leʼé mpfu mbwǒr-nəu, Pyêh gháp jâŋ pə̂ nkóʼ ńdə̂r lə̂ ndə̂ Sê lə̂ ngwó ngʉ̌ sʉ̂ʉtə yi pəmə́nəu pə́tárə́.

²Ə́ ŋə̌i tə nkə́u lə̂ ntsʉ nkâʼ yi pə́ fûŋ ńgó ntsʉ nkâʼ məsəu, ə́ njwó ghíʼ pə́ pə́ ndaghʼ cǒ ngaŋə-pwóʼtə́ ńtó. Ngaŋ lə pə́ nkhwô tə fú pə̂ leʼé lə́jí, pə́ pə̂ leʼé tsəm, ə́ nkhwôr yé ńtó ńnyâŋ yé yʉʼ wó, a lôu məzə̂u mbó pye pi gháp pə́ nkə̂u ndə̂ Sê.

³Ŋuu wêi jwô ghíʼ gháp pə́ nkə̂u cər nkâʼ, ə́ ndóu gháp zə̂u.

⁴Pyêh gháp Jâŋ tâghʼ nyôghʼ lə́ zʉ́, Pyêh lâʼ lə́ zʉ́ ngô: «Náŋtə́ wághʼ!»

⁵Ŋuu wêi ntsúŋu náŋtə́ gháp, ə́ mə́ nkwâŋ ńgó ə́ wo ghʉ̌ hó gháp ŋə̂ có zə̂u lə́ zʉ́.

⁶Pyêh lâʼ lə́ zʉ́ ngô: «Kâa n ngwô ghâa nkâp yi mboʼ n ŋə̂ lə́ gho, lə́ zə̂u yi n ngwǒ, n ngwo ńŋə́ lə́ gho: Lə̂ ləjôghʼ Yěso Kəlísto môu Nǎazalêi: Lěsê ńŋə̌i!»

⁷Ə́ ndǎʼ yə́rə́, ə́ ngwǒ pô yé yi təʉ, ə́ mə́ mbəʼə́ yé, məku mé gháp pə məlʉŋə́ məku mé lêi-lěi ntə̂itə́.

⁸A tə̂u sê, ə́ njǐ lə̂ ŋə̂i, gháp pə ngaŋə-ntə̂u Yěso naa nkə̂u ndə̂ Sê, a pə̂ ŋə́i mə́ ntyátə́, ə́ mə́ ŋə̂ nkhwo mbó Sê.

⁹Ə lâʼ yi ə́ lə pə́ yʉʼ wo jwô, a pə̂ ŋə́i, ə́ mbou mə́ ŋə̂ nkhwo mbó Sê.

¹⁰Gháp tsuŋu náŋtə́ yé, ə́ ndə̌i yé, ə́ njwó a pə̂ ngaŋə-pwóʼtə́ yi a lə nyâŋ nyâŋ mbəʉ ntsʉ nkâʼ Məsəu yi ndə̂ Sê ńdôu məzə̂u lə̂. Ə́ fû nkəʼə́ gháp, gháp pôghʼ ńté zə̂u yi gháp jwó ə́ lei lə́ ŋuu wêi.

¹¹Ŋuu wêi kâa kə́ mə́ mbə́i yé lə̂ fú mbəʉ Pyêh gháp Jâŋ ńcʉ́ŋtə́, ə́ pə̂ nkə́ʼə pye pə́tsəm, gháp cuu ńtó ńkə́itə́ mbəʉ páp lə̂ puŋú yi pə́ fúŋ ńgó yi Salə́məu.

¹²Pyêh jwô ghíʼ gháp pə́ nkəitə mbəʉ páp yə́rə́, ə́ ndǎʼ lə̂ lâʼ ngô: «Pye Ísə́lahêl, ə́ pou nkəʼə wéi kəʼə ghíʼ pei jwǒ ŋuu wo shwítə áa? Ńté hó pei pou nâŋ wághʼ pə́ ghíʼ mpfu yi paghʼ laghʼ pə̂ ndʉʉ mətəʉ waghʼ kəʉ pə̂ mbə̂u yi paghʼ lǎghʼ mbə́ pye shʉʼʉ mbi Sê ńgʉ́ ŋuu wo shwítə?

¹³Ə Sê Ábələhâm yi a pə̌ Sê Ísaghʼ gháp Yokôp, mbaa yi pətə́ pághʼə lə ghʉ pə́ jwô ləghûʼ ngaŋə-faʼ ye Yěso. Pei kə fêi yé ńŋə́ lə́ pəsǎʼ lâʼ, Piláto lâʼ ńgó a wo nyér yé, pei lə̂ʼ.

¹⁴Pei kə ləʼ no ŋuu yi a pə̌ ndêi-lěi, ə́ mbǒu mbə́ ndʉŋ-ndʉŋ, ə́ ndǎʼ lə́ Piláto ńgó â kwárə́ pə̂ fwôr ndə̂-tsâŋ ńŋə́ lə́ pei, ə̂ poŋə́ wéi.

¹⁵Pei lə ghʉ pə́ jwi ŋuu yi ndaʼ zʉ́ lə́ ŋə̂ ləcwôr, lə́ paghʼ pə̌ ndaʼ lə́ pei ńgó a kə zʉ́ʉ lə̂ ləwʉ̂ tə paghʼ jwo yé. Pei lə ghʉ yə́rə́, pə́ jwî ŋuu yi ndaʼ zʉ́ lə ŋə̂ ləcwôr.

¹⁶Ŋuu wo yi pei pə̌ njwô yé, ə́ mbou mə́ nji yé lo, shwitə́ gháʼa ńté no paghʼ pə̌i no Yěso, mətəʉ mi ə́ pǒu mbə́ lə̂ ləjôghʼ yé ghʉ ŋuu wêi wo shwítə.»

¹⁷«Pəfə̌r pâa, m mə̌ ntsúŋú njî ńgó pei pə pəfou péi kə lâghʼ pə̂ ghəghəʉ ńdáp zêi mbə̂u no lə́ Yěso.

¹⁸Lə́, Sê lə leitə́ mə́u, ə́ ngʉ̌ no yi a lə záʼ nzʉ̂, ə́ ndǎghʼ ntsʉ pətsətə́-nkəʉ Sê pə́tsəm ńdáʼ ə́ pəutə. Zêi no pə́ ńgó Nzaʼ-nkʉ yi a lə ghʉ̌ ndaʼá lə̂ ngʉ́ ŋə́ lə ghwo lə̂ njwó ngwôʼ.

¹⁹Ghíʼ ə́ kə́ mbə́ yə́rə́ lə́, pei kə́p cǐ zéi, ə́ mbə̌ʉ ńtó lə̂ mbó Sê, â lyə́ghʼə́ məfaa wei.

²⁰Ə̂ lêitə́ yə́rə́, ə Nde ghʉ́ pei pə́ cər mə́shwítə, â póu ntə̂u Yěso lə́ pei, ə̂ zʉ́ yi a Nzaʼ-nkʉ yi a lə záʼ nzʉ̂ ntsóʼ yé ńté wéi.

²¹Lə́ ə́ pə̂ mpfu wo, Yěso ghwo lə̂ nyáŋ pə́ tʉ̌-lə́pû tə ndáʼ nkə́u leʼé yi Sê wo shərə́ zə̂u tsəm ə̂ cʉ́ʼ yi shwî, ə́ ndʉŋ-ndʉŋ ghíʼ a lə lǎghʼ ntsʉ pətsətə́-nkəʉ pé ńdáʼ tə ndǐ saghʼ mə́.

²²Mə̌usə̂i lə yaa ndǎʼ ngô: “Ə Nde Sê zei ghʉ̌ wǒ təcər pei, ə́ kwarə́ tâʼ ntsətə-nkəʉ Sê ghíʼ məŋ. Pei ghʉ̌ zûʼ ntsʉ yé lə̂ maa no tsəm yi a pə̌ ndâʼ wéi.

²³Pə́ ghʉ̌ fú nou pye Sê, ə́ kwarə́ wǒwó yi a ghʉ̌ lə̌ʼ lə̂ nzúʼ ntsʉ ntsətə-nkəʉ Sê wêi, ə́ jwí yé.”

²⁴Pyêh kə̂ ncí ndáʼ ńgó pətsətə́-nkəʉ Sê pi gháp lə lǎʼ no tə fú lə́ Samyê, gháp pə pi ə́ lə pou ntó, wǒwó lə̂ ye mpfu nzəm zʉ́, lə leʼtə́ ghíʼ mwo məleʼé ghʉ̌ pə́.

²⁵Zə̂u yi Sê lə ghʉ̌ ndaʼá mə́u lə̂ ngʉ́ ŋə́ ə́ ndeitə́ lə̂ pətsətə́-nkəʉ Sê, ə̂ zéi. Pei pou ngwô zéi yʉʼ lə̂ kaa yi Sê gháp pə pəmə́ngâa-njʉʼ péi lə wǎr, a lə lâʼ lə́ Ábələhâm ngô: “N ntáa leitə́ pə́ lə̂ ngər zô, ə́ cóghʼ mbwórə lə̂ məcʉŋə-ndə̂ mə́tsəm mi ə́ pə́ ndəu ndesé.”

²⁶Sê lə ghʉ́ ngaŋə-faʼ yé zʉ̂ʉ lə̂ ləwʉ̂ gháʼá, ə́ ntsə̌mbi ńté pə́ wéi. Ə́ mbou ntə̂u yé lə́ pei njí ńgó a côghʼ mbwórə lə́ pei, ə́ ngʉ̌ wǒwó lə́ pei nyér lə̂ nkə́ ngʉ́ məno tə́poŋ.»