Read Ngombale Məfaʼ Pəghaŋə-ntə̂u 4 Bible Online

Məfaʼ Pəghaŋə-ntə̂u 4 - Ngombale bible

Məfaʼ Pəghaŋə-ntə̂u 4

¹Pyêh gháp jâŋ pyêr mə́ ntsâr tsarə́, pənuŋú-poʼ gháp pə fou pəpáp-ndə̂ Sê, ə́ ngʉ̌ pəsadúsia tô,

²ə́ fú nzáŋə́ lóŋ gháʼate, ńté no gháp lə pə́ njyêʼ pye zə̂u, ə́ mə́ ndâʼ gháp ńgó Yěso lə zʉ́ʉ lə̂ ləwʉ̂; ə́ ndaʼ yə́rə́, ə́ ndaghʼ mbə̂i ńgó pəpfû sê táa zʉ́ʉ lə̂ ləwʉ̂.

³Gháp ghou gháp ńgwo ncóghʼ ndə̂-tsâŋ lə́ pə́ yi gháp wo lê pə́ wó tə nzʉ̂ fóghʼ, ńté no ə́ lə cʉ́ʼ mbə́ pə̂ mpfu-ngwʉ̂.

⁴Lə́ ə́ ngwǒ lə̂ pye pi gháp lə zúʼ tsâr Pyêh gháp Jâŋ, lələʉ pye pə̂i no Yěso, tə mbiŋə pə̂ no tóusʉ taa.

⁵Nzʉ̂ cʉ́ʼ fóghʼ, pəsǎʼ-lâʼ pəyúda gháp pə pəkə̌m lâʼ mbaa pəkeʼtə́-lə́pə́ʉ Mə̌usə̂i naa mbə̂utə́ Yelúsalêm.

⁶Ánə yi a pə̌ tə́-ndə̂ pənuŋú-poʼ-Sê, ə́ ngʉ̌ Kayífa, ə́ ngʉ̌ Jâŋ gháp Alezâŋdələ, tə mbaa pye pə́tsəm lə̂ məcʉŋə-ndə̂ pətə́-ndə̂ pənuŋú-poʼ-Sê pə̂ yʉʼ wó.

⁷Gháp ghʉ pə́ laghʼ Pyêh gháp Jâŋ ntó lə̂ mbi páp, gháp feʼ gháp, ə́ ntúŋú gháp ngô: «Mətəʉ kə fú ghó, pei poŋə́ lǎghʼ ghʉ̌ yi mbə̂u no? Pei kə laghʼ ləjôghʼ wǒ ńgʉ́ yə́rə́?»

⁸Zəghʼə ndêi-lěi lóghʼə lə́ Pyêh, a lâʼ lə́ páp ngô: «Pəfou lâʼ pághʼ gháp pə pəkə̌m,

⁹pə́ feʼ wághʼ leʼé wo gháʼa ńté no shʉʼʉ yi paghʼ kə ghʉ̌ lə́ tâʼ nkhwô. Ə́ mə́ ntúŋu wághʼ ghíʼ paghʼ kə ghʉ̌, a poŋə́ shwítə́.

¹⁰Pei tsúŋú njí, pei pə́tsəm tə mbaa pye Ísə́lahêl pə́tsəm ńgó ə́ leitə́ pə́ lə̂ ləjôghʼ Yěso Kəlísto ŋuu Nǎazalêi, yi pei lə kʉ̌ʉ yé lə̂ tʉ̌-mbʉ̂ŋtə, a kwʉ̂, Sê pou ngʉ́ a zʉ̂ʉ lə̂ ləwʉ̂ lə̂, ŋuu wo shwítə ghíʼ pei jwo lo.

¹¹Ə̂ zʉ́ yi a pə̌ ləghǒ yi pei pəpóu-ndə̂ lə měʼ, ə́ pou ncʉ́ʼ mbə́ yi ləlí ndə̂.»

¹²Kâa cǒ ŋuu pə̂ yé wó yi mboʼ a ŋə̂ ləcwôr tə ndyéʼ yé, ńté no kâa cǒ ŋuu ndeʼe kə́ mbóu mbə̂ yé cər yo nzʉ̂ yi Sê lə tsóʼ yé lə́ pə́ yi mboʼ pye-mə́soŋ leitə lə́ zʉ́ ncwór.

¹³Gháp jwô mbə̂u yi Pyêh gháp Jâŋ laghʼ ńtsâr tə́ pôghʼ cǒ ŋuu, ə́ mə́ njî ńgó gháp pə́ pə̂ pətəjyěʼ-ŋwaʼa, ə́ mbou mbə́ pə̂ pye fefe, ə́ kəʼə gháp gháʼate. Gháp pə̂ njî ńgó gháp pə Yěso kə təm ku ŋə̂i.

¹⁴Ə́ nkə́ ncí njwó ghíʼ ŋuu yi a kə shwítə́ lə̂ tə̌ʉ mbəʉ Pyêh gháp Jâŋ, káa kə́ jî gháp có no yi mboʼ gháp kə̂ ndâʼ.

¹⁵Gháp ghʉ, pə́ laghʼ gháp fú ndə̂ cûʼtə ńkwár, gháp cʉ̂ʼ nzəm ə́ nkwáŋə́ tû záp ghíʼ gháp wo ghʉ̌ lə́ pye pêi.

¹⁶ə́ ncʉ́ʼ ndâʼ təcər páp ngô: «Ŋuu ntsəm Yelúsalêm pə̌ njî nkəʼə-no yi gháp kə ghʉ̌ lə́ ŋuu wo, mboʼ paghʼə múŋu wághʼə po. Tə paghʼə wo ghʉ̌ gháʼá lə́ páp?

¹⁷Lə́ kâa pə́ ntúŋu yé ńgó no zêi yo kʉ́ʼʉ́ sǎr yʉʼ ə lâʼ zúʼ, paghʼə nâatə́ ńtôʼ gháp lə̂ nkə́ mbóu nkʉ́ʉ ləjôghʼ Yěso zêi mbó cǒ ŋuu.»

¹⁸Ə́ ntsuŋtə́ təcər páp tə ə́ kuʼ, Gháp fûŋ Pyêh gháp Jâŋ, ə́ ntôʼ gháp lə̂ nkə́ mbóu njyêʼ có zə̂u yi ə́ náŋtə́ Yěso, tə mbaa lə̂ nkʉ́ʉ ləjôghʼ yé.

¹⁹Pyêh gháp Jâŋ laʼ lə́ páp ngô: «Pei kwaŋtə zéi pə́ pei ə́ nzúʼ, ńgó ə́ pôŋ lə̂ nyér ləkoŋtə Sê, ə́ ncʉ́ʼ ngʉ́ pə̂ wêi! Pei jwô zéi ńgó ho?

²⁰Ə́ lə̌i ngwó lə́ paghʼ, mə́i mboʼ paghʼ nyêr wághʼ lə̂ ndêʼtə́ no yi paghʼ lə jwó ə́ mbóu nzúʼ po.»

²¹Pəfěʼ-kôr kʉʼʉ ńsáʼ gháp, ə́ nyér gháp, gháp lər ńté no káa gháp lə jwô gháp fər yi mboʼ gháp côghʼ paa páp. Ńté no ŋuu ntsəm yi a lə pə́ yʉʼ wó lə pə́ ngûʼtə Sê ntê zə̂u yi ə́ lə lěi.

²²Ŋuu wêi yi a lə shwítə́ pə́ lə̂ mbə̂u yi ə kəʼə pye kəʼə lêi lə ghí pə́, mə́i a lei mə́ nguʼ mə̂m-ləkwo.

²³Pə́ lə lei tə nyér gháp, Pyêh gháp Jâŋ wo ńcə́r ngaŋə-ku záp, ə́ mbyétə́ məno mə́tsəm mi pətə́-ndə̂ pənuŋú-poʼ gháp pə pəkə̌m lâʼ kə lǎʼ lə́ páp ə́ ndǎʼ gháp.

²⁴Gháp zûʼ yə́rə́, ə́ nǎa ngwô tâʼ ntsʉ, ə́ sʉ́ʉtə́ Sê ngô: «Ə́ Nde, gho lə tsúŋu ləfaŋ gháp ndesé mbaa mənci, ə́ ngʉ̌ zə̂u tsəm yi ə́ pə́ cər wó.

²⁵O lə laghʼ Zəghʼə Ndêi-lěi ńgʉ́ mə́ngâa-njʉʼ wághʼ fou Ndavîd yi a lə pə́ ngaŋə-faʼ gho lâʼ ngô: “Mətə̂u ndeʼe cʉʼʉ gháʼa ńté hó? Gháp pə́ nkə̂itə lə̂ ndwóʼó Nde, lə́ mboʼ ə́ kwar yé có zə̂u po.

²⁶Pəfou ndəu ndesé gháp pə pəsǎʼ-lâʼ naa nkəitə́ ə́ mbə́ tâʼ ŋuu lə̂ ndwóʼó Nde gháp ŋuu yi a lə́ zóʼ yé ńdaghʼ ńgʉ́ fou.”

²⁷Ə̂ŋ, Elôdə gháp Póŋsə́ Piláto kə kəitə cər túsoŋ yo gháp pə mətə̂u ndeʼe, ə́ ngʉ̌ məcʉŋə-ndə̂ Ísə́lahêl; ə́ nkəitə́ yə́rə́ lə̂ ndwóʼó Yěso ngaŋə-faʼ gho yi o lə zóʼ yé, a pə̂ ndêi-lěi.

²⁸Gháp lə ghʉ yə́rə́, ə́ laghʼ ḿbə̂utə lə̂ no tsəm yi o lə láʼ nzáʼ nzʉ̂ ńgʉ̌ ndaʼá mə́u lə̂ ngʉ́ ndǎghʼ mətəʉ mô ńgʉ̌.

²⁹Lə̂ mpfu wo, Ə Nde jwó mbə̂u yi gháp laghʼ ngághʼə wághʼ, ə́ ŋə́ wághʼ mətəʉ lə̂ ndághʼ ndêʼtə́ tsâr zô tə́ pôghʼ có zə̂u.

³⁰Ŋə́ wághʼ mətəʉ paghʼ lághʼ ləjôghʼ Yěso Kəlísto ngaŋə-faʼ gho yi a pə̌ Ndêi-lěi ńgʉ́ pəghou shwítə́, ə́ mbou ngʉ́ mənkəʼə-məno.»

³¹Gháp lə sʉ̂ʉtə Sê tə nyér, yʉʼ yi gháp lə kəitə́ wó cʉʼʉ́, ə Zəghʼə Ndêi-lěi kə̂u lə́ páp pə́tsəm, gháp jî lə̂ ŋáa ndêʼtə́ tsâr Sê tə́ pôghʼ cǒ ŋuu.

³²Pye pi gháp lə pə́i no Yěso lə ghwo pə́ tâʼ ntə̂ʉ, ə́ mbou ngwǒ tâʼ kwaŋtə. Lə́u ŋuu pə̂ ngwô yé zə̂u, ə́ ndaʼ ńgó ə́ pə́ pə̂ ndʉʉ yé po, lə́ gháp lə tə̂mtə zə̂u páp tsəm təmtə́.

³³Ə́ leitə yə́rə́, ə Sê ŋə̂ tə́koʼ mətəʉ lə́ ngaŋə-ntə̂u Yěso gháp laghʼ ŋáa ńŋə̂i, ə́ ntsúŋú ndêʼtə́ lə̂ mbəu yi pye wo zúʼ, ə́ jí ńgó ə Sê lə ghʉ Nde Yěso zʉ̂ʉ lə̂ ləwʉ̂. Ə Sê pə̂ ncôghʼ mbwórə lə́ ngaŋə-ntə̂u Yěso gháʼate.

³⁴Kâa ŋuu lə pə́ mbûŋ yé có zə̂u təcər páp, ńté no pye pi gháp lə ghwǒ məndə̂ kəʉ pə̂ mənkâʼ lə pə́ ngwo fəitə́, ə́ ndâghʼ nkâp zěi ńtó;

³⁵ə́ núŋu məku pəghaŋə-ntə̂u. Pə́ ghâptə́, ə́ ŋə̂ yi wǒwó ghíʼ ə wo kǔʼ lə̂ no yé.

³⁶Cǒ ŋuu shîpərə fə̂i ye nkâʼ lə́wó, ə́ ndǎghʼ nkâp ńtó ńŋə́ lə́ pəghaŋə-ntə̂u ghíʼ gháp wo ghâptə́ lə̂ pye Kəlísto. Ləjôghʼ ŋuu wêi lə pə́ Yosêp, mə́i pə́ lə cî có ləjôghʼ yé ńgó Pənə́páasʉ, ə́ ndaghʼ ńdâʼ ńgó (ŋuu yi a côghʼ məntə̂ʉ pye). A lə pə́ ŋuu cʉŋə-ndə̂ Levî.