Read Ngombale Məfaʼ Pəghaŋə-ntə̂u 5 Bible Online

Məfaʼ Pəghaŋə-ntə̂u 5 - Ngombale bible

Məfaʼ Pəghaŋə-ntə̂u 5

¹Lə́ cǒ ŋuu yi pə́ lə fûŋ yé ńgó Ananyǎsʉ gháp ngwě ye Safíra tsâr nzúʼú, ə́ ngwo fə̂i nkâʼ gháp;

²ə́ fə̌i nkâʼ yə́rə́, ə́ ntsuŋtə́ təcər páp ńgó Ananyǎsʉ zâʼ có ndyə́ghʼə́ nkâp ńdóʼó, ə́ ndághʼ pfuʼ zěi ngwo ńnúŋú məku pəghaŋə-ntə̂u Yěso.

³Pyêh túŋu yé ngô: «Ananyǎsʉ ńté hó, o pə̂i Sə́tə zʉ̂ ntə̂ʉ gho tə o fûtə Zəghʼə Ndêi-lěi, ə́ fə̌i nkâʼ gho, ə́ nzâʼ có ndyə́ghʼə́ nkâp ndóʼó?»

⁴O kə ghí fə̌i nkâʼ, ə́ yaa mbə́ pə̂ ghô; o pou mə́ fə̌i, nkâp kə̂ mbə́ pə̂ zô, o pou ngʉ̌ gháʼá mboŋə́ ghwǒ yo mbə̂u kwaŋtə tə́poŋ ntə̂u gho? Koo o fûtə ghô gháʼá pye-mə́soŋ, o futə pə̂ Sê.

⁵Ananyǎsʉ zûʼ mêi mwo mətsâr, ə́ mpfúŋ ńkwʉ́. Ləpôghʼ ghôu ŋuu ntsəm yi a zǔʼ no mə́u.

⁶Nkaŋ-ŋuu tô, ə́ ndǎghʼ zə̂u-ndí ńzə́mtə́ pfû yé, ə́ nkhwór ńgwǒ ńtʉ́ŋ.

⁷Ə́ ghi lěi no pəmə́nəu pə́tárə́, ngwě ye tô yé ńkə́u ndə̂ káa pə́ jî yé zə̂u yi ə́ lei mə́.

⁸Pyêh túŋu yé ngô: «Lǎʼ ghâa! Pei yǎa fə̌i nkâʼ wéi pə̂ ndwuŋ keke áa?» A pwôr ngô: «Ə̂ŋ! Ə̂ ndwuŋ wěi»

⁹Pyêh cʉ̂ʼ ndáʼ lə́ zʉ́ ngô: «Ə́ lei gháʼá pei tsûŋtə təcər pei lə̂ fútə́ Zəghʼə Nde? Jwô zô! Pye pwo tô lo fû gháʼa ntʉ̂ŋ ndə̌u gho; gháp kə́ khwor gho zô wǒ tʉ́ŋ.»

¹⁰Pə̂ mpfu wêi mpfu wêi, a pfûŋ mbi Pyêh ńkwʉ́. Nkaŋ-ŋuu kə̂u ndə̂ ńjwó mə́i a kwʉ̂ mə́, gháp khwor pfû yé ngwo ntʉ́ŋ mbəʉ ndə̂u ye.

¹¹Cûʼtə pye Kəlísto tə mbaa pəcó pye pi gháp lə zúʼ məno mêi mwo, ə́ fú mbóghʼ gháʼate.

¹²Pəghaŋə-ntə̂u Yěso lə pə́ ngʉ̂ məndǎa-jwô-mə́no gháp mənkəʼə-məno mbə̂u lə̂ mbə̂u təcər pye. Gháp lə naa ngwô tâʼ ntsʉ, ə́ ngwo ntə̂ʉ lə̂ có yʉʼ ndə̂ Sê yi pə́ fûŋ ńgó puŋú Salə́məu.

¹³Kâa cǒ ŋuu ndeʼe kə́ mbóu fəiʼ yé fəiʼí tə ntó ńkʉ́ʼʉ́ lə́ páp, lə́ lâʼ pə̂ ŋə̂ məkuʼ máp gháʼate.

¹⁴Ə́ pə̂ tə mbə́ yə́rə́, lə́ mbiŋə gháp pə pəngyě pi gháp pə́i no Nde pə̂ ntô leʼé tsəm ńkʉʼʉ lə́ páp, ə ndwuŋ gháp kə̂ ncʉ́ʼ nkʉ́ʼʉ kʉʼʉ́.

¹⁵Pəghaŋə-ntə̂u lə fú mə́ ngʉ̂ mənkəʼə-məno tə pə́ cʉ̂ʼ nkhwôtə pəghou ńdághʼ fû məndə̂ ńkwatə́ ə́ ngwó nuŋtə məkaŋ laŋə́-ndə̂u, lə̂ məkweʼ káa ndəu pəmátə, ə́ ndaghʼ ńtsâa ńgó Pyêh pə́ ndêi, mə́jʉ̂ŋtə ye zêʼ gháp, gháp shwítə́.

¹⁶Mənou pye fû mətúsoŋ mi ə́ pə́ ləpar Yelúsalêm ə́ nzuŋtə́, ə́ ndághʼ pəghou gháp pə pye pi məzəghʼə tə́poŋ pə́ mbə̂u gháp ńtó. Gháp pə́tsəm pou mə́ shwítə́.

¹⁷Tə́-ndə̂ pənuŋú-poʼ Sê gháp pə ngaŋə-ku yé laghʼ ŋwə́itə́ ńděsé nzəm pəghaŋə-ntə̂u. Ngaŋə-jyêʼ-no yé zêi lə pə́ pəsadúsia.

¹⁸Ə́ ngʉ̌ pə́ ghoutə pəghaŋə-ntə̂u, ə́ mǎʼ ndə̂-tsâŋ.

¹⁹Lə́ ə́ pə̂ lətwûʼ, tâʼ cwôʼ Nde tô ńtsóʼ məntsʉ ndə̂-tsâŋ, ə́ nkwárə́ gháp ńdáʼ lə́ páp ngô:

²⁰«Pei lə́r lə̂ ndə̂ Sê, ə́ ndáʼ pye no tsəm yi ə́ náŋtə́ ləcǐ-mbî yi shwî.»

²¹Gháp zûʼ ntsʉ ye, ə́ mə́ʉ məmbaʼa-mbaʼ, ə́ ndə́r lə̂ ndə̂ Sê ə́ njí lə̂ njyéʼ pye zə̂u. Tə́-ndə̂ pənuŋú-poʼ Sê gháp ngaŋə-ku ye nyâŋ tə nkə̂itə́ pəkə̌m lâʼ pəyúda lə̂ fêʼ kôr. Gháp pə pǎp tə̂u ńgó pə wó ndə̂-tsâŋ ndǒu pəghaŋə-ntə̂u ńdaghʼ ńtó.

²²Pəpǎp ndə̂ Sê káa jwô gháp gháp. Ə́ mbə̌ʉ nzəm ńdáʼ pye pi gháp yǎa ntə́u gháp ngô:

²³«Paghʼ jwǒ ntsʉ ndə̂ tsuŋu mbə́ yi tsaghʼə́, pəpáp-pəghaŋə-tsâŋ pə̂ məntsʉ ndə̂ mə́ ngʉ̂ faʼ záp, paghʼ pou ntsóʼ káa jwô wághʼ cǒ ŋuu cər wó.»

²⁴Fou pəpáp-ndə̂ Sê gháp pə tə́-ndə̂ pənuŋú-poʼ-Sê zûʼ, káa kə́ jî gháp no yi mboʼ gháp laʼ. Ə́ ncʉ́ʼ mə́ ntúŋu zə̂u yi ə́ ghʉ̌ pəghaŋə-ntə̂u.

²⁵Lə́ cǒ ŋuu tô ńdáʼ lə́ páp ngô: «Pei zúʼ! Ə pye pei kə ghǒu gháp ḿmâʼ ndə̂-tsâŋ lə̂ wó ndə̂ Sê mə́ njyêʼ pye zə̂u.»

²⁶Fou pəpáp-ndə̂ Sê lâghʼ pye pé ńgwó ńgoutə́ pəghaŋə-ntə̂u ndə̂ cûʼtə tə́ ghʉ̌ mətəʉ, ə́ mbóghʼ no mboʼ lâʼ laghʼ məghǒ ńtə́mtə́ gháp.

²⁷Ə́ ndǎghʼ gháp ḿbə̂ʉ, ə́ ntághʼ gháp mbi kəitə pəkə̌m lâʼ pəyúda, tə́-ndə̂ pənuŋú-poʼ Sê yi njwǐ jî lə̂ ntúŋú gháp məno ngô:

²⁸«Paghʼ lə laʼ lə́ pei ńgó koo pei lâʼ nkə́ ndághʼ ləjôghʼ Yěso ńjyéʼ pye zə̂u gháʼá, káa pei zúʼ mo? Pei pou mə́ ndǎghʼ ləjôghʼ yé ńsár Yelúsalêm ntsəm, ə́ ncʉ́ʼ mə́ ndôu ńgó məci mé lə́r tû paghʼ!»

²⁹Lə́ Pyêh gháp pə pəcó pəghaŋə-ntə̂u pwôr ngô: «Ə́ poŋ lə̂ nzúʼ ntsʉ Sê, ə́ nděi lə̂ nzʉ́ʼ ntsʉ pye-mə́soŋ.

³⁰Sê pətə́ pághʼ kə ghʉ Yěso yi pei kə kʉ̌ʉ yé lə̂ tʉ̌-mbʉ̂ŋtə a kwʉ̂ lə̂, zʉ̂ʉ lə̂ ləwʉ̂.

³¹Sê kə kóʼó yé ńnyáŋ lə̂ ndyəghʼə́ pô yé yi təʉ, ə́ ngʉ́ a cʉ̂ʼ Fou, ə́ mbou ńgʉ́ a cʉ̂ʼ Nzaʼ-nkʉ, ńjí ńgó pye Ísə́lahêl leitə mə́u, ə́ nkə́p cǐ záp, a lyə́ghʼə məfaa ghap.

³²Paghʼ pə Zəghʼə Ndêi-lěi yi Sê lə ŋə́ lə́ pye pi gháp pə́ nzûʼ ntsʉ ye, ə̂ pənzǔʼ-njwó lə̂ məno mêi mə́tsəm.»

³³Pəghaŋə cûʼtə zûʼ no yi pəghaŋə-ntə̂u lǎʼ, ə́ nzáŋə́ lóŋ, ə́ mə́ ndôu lə̂ njwítə́ pəghaŋə-ntə̂u.

³⁴Lə́ ə́ ghi pə́, cǒ ŋuu pə̂ təcər páp, ə́ mbə́ ŋuu falísia, ləjôghʼ yé pə̂ Ngamalyê. A lêsê ńtə́ʉ, ə́ mbə́ nkeʼtə-ləpə̌ʉ Mə̌usə̂i yi ŋuu ntsəm pə̌ ŋə̂ məkuʼ mé gháʼate, ə́ ndǎʼ ńgó pə ghʉ́ pəghaŋə-ntə̂u Yěso kwátə́, ə́ nyéʼ ntə́ʉ pěi.

³⁵A cʉ̂ʼ ndáʼ lə́ ngaŋə cûʼtə ngô: «Pye Ísə́lahêl, pei laghʼə́ tû zéi lə̂ zə̂u yi pei lou ngʉ́ lə́ pye pwo lə̂.»

³⁶Ńté no ndǐ kə́ sâghʼ yé ghíʼ Tədásʉ lə nyáŋ tə mbə́i ŋuu njwǐ, ə pye nkʉ ləkwo tsə̂ʉ nzəm zʉ́, pə́ jwî yé, gháp pə́tsəm sêi, ye no me yé.

³⁷Ə yé no lei, ə́ tâa mbə́ mpfu ləkwǎʼ pye, Yúda ŋuu Galilêi kwâr yé ńtə́ʉ, ə lâʼ tsə̂ʉ nzəm zʉ́, pə́ kə̂ njwî yé yé lə́wó, pye pi gháp lə tsə́ʉ nzəm zʉ́ sêi gháp.

³⁸Lə̂ mpfu wo, m mə̌ ndâʼ lə́ pei ńgó pei tsóʼ pô lə́ pye pwo, ə́ nyér gháp, gháp lə́r. Ńté ńgó məkwaŋtə máp gháp pə məfaʼ máp lə̌i mbə́ mi pye-mə́soŋ, mə́i ə́ táa ghǐ lyəghʼtə́, ə́ kə́ mê yé mě lə́wó.

³⁹Lə́ měi lə̌i fú mbó Sê lə́nə́ʉ, mə́i mboʼ pei kûʼ wéi lə̂ ngʉ́ tə ə́ me po. Pei páa lə̂ ndwóʼó Sê lə̂ ntsoʼ! Ngaŋə cûʼtə pə̂i no yi Ngamalyê lǎʼ zěi.

⁴⁰Gháp fûŋ ngaŋə-ntə̂u Yěso, ə́ ngʉ̌ pə́ laghʼ məngwaa sə́u gháp, ə́ ntǒʼ gháp lə̂ nkə́ mbóu ntsár tə nkʉ́ʉ ləjôghʼ Yěso, ə́ nyér gháp.

⁴¹Gháp lər ńŋə́i ńtsěi gháʼate ńté ńgó Sê jwǒ ńgó gháp kuʼ pye pi mboʼ gháp jwô ngwôʼ ńté ləjôghʼ Yěso.

⁴²Ə́ cʉ̂ʼ mbə̂ leʼé tsəm mpfu wo, gháp pə̂ ndə̂ Sê gháp pə mənzeʼ, ə́ ndâghʼ ləjôghʼ Yěso yi a pə̌ Nzaʼ-nkʉ njyêʼ pye Nkəʉ Shʉʼʉ.