Read Ngombale Məfaʼ Pəghaŋə-ntə̂u 6 Bible Online

Məfaʼ Pəghaŋə-ntə̂u 6 - Ngombale bible

Məfaʼ Pəghaŋə-ntə̂u 6

¹Ə́ lə pə́ mpfu wêi ndwuŋ ngaŋə-jyêʼ-no Yěso kʉʼʉ pə̂ mpfu tsəm, ə́ leitə yə́rə́ pye pi gháp lə tsâr tsâr Ngərêghʼ lə pə́ ntsâtə tə́poŋ nzəm pye pi gháp tsâr tsâr pəyúda ńgó gháp pə́ ngap məzʉ̂, ə́ nyiʼi páp pəpfǒghʼ nyiʼí.

²Ngaŋə-ntə̂u Yěso ntsap pwô lə̂ ləghə̂m kəitə ngaŋə-jyêʼ-no yé, ə́ ndǎʼ lə́ páp ngô: «Kâa pôŋ yé ńgó paghʼ nyér lə̂ ndâʼ tsâr Sê, ə́ cʉ́ʼ ŋáa táŋə pə́ lə̂ no məzʉ̂.

³Ə̂ zə̂u yi ə́ ghʉ̌, paghʼ pə̂ ndâʼ lə́ pei pəfə̌r ńgó pei tsóʼ pye saambwô təcər pei pi lâʼ pə́i no záp, ə́ mbə́ pye pi Zəghʼə Ndêi-lěi lə fú mə́ nzʉ́ gháp, gháp pou ngwô jîno, paghʼ tághʼ gháp lə́ zêi faʼ.

⁴Ə zághʼ faʼ ncʉ́ʼ nkə́ mbə̂ pə̂ ngʉ́ sʉ̂ʉtə gháp pə ndéʼtə́ tsâr Sê.»

⁵Ngaŋə-jyêʼ-no Yěso zûʼ, ə́ nǎa mbə́i, ə́ ngwǒ təcər páp ntsóʼ Etyêŋ, a pə̂ ŋuu ngwô pə̂i-ntə̂ʉ, Zəghʼə Ndêi-lěi pou mbə́ lə́ zʉ́, ə́ nkə́ ncí ntsóʼ Fílîp, ə́ nkʉʼʉ́ Porokôo, ə́ ngʉ̌ Nikanôr, ə́ ngʉ̌ Timôŋ, ə́ ngʉ̌ Parəmənásʉ gháp Nikolâa yi a lə pə́ ŋuu Antyǒshə, ə́ nkə́u lə̂ no Sê pəyúda ə́ mboŋə́ tsə́ʉ nzəm Yěso.

⁶Ə́ ntsóʼ gháp yə́rə́, ə́ ngwo ŋə́ gháp lə́ pəghaŋə-ntə̂u, gháp nzápə́ mbô ndəu páp ə́ sʉ́ʉtə́ Sê.

⁷Tsâr Sê kʉʼʉ ngáʼ lə̂ sâr yʉʼ. Ngaŋə-jyêʼ-no Yěso kʉʼʉ nzáa Yelúsalêm, pətə́ ndə̂ pənuŋú-poʼ Sê tə nzáa pou mbə̂i záp no Yěso lə́wó.

⁸Etyêŋ yi pə́ lə tsóʼ yé lə̂, lə pə́ ŋuu yi Sê lə cóghʼ mbwórə lə́ zʉ́, ə́ mbou ŋə́ mətəʉ lə́ zʉ́ lə̂ ndághʼ ńgʉ̌ pəndǎa-jwô gháp pə mənkəʼə-məno təcər pye-mə́soŋ.

⁹Lə́ ə́ leitə lə̂ məno mi Etyêŋ ghʉ měi, pəcó pye fû ndə̂ cûʼtə pəyúda yi pə́ fûŋ ńgó ndə̂ cûʼtə məpuʼ mi pə́ nyér gháp. Pye pi gháp lə kə̂u cûʼtə ndə̂ wei lə fú cər paghʼə-ngoŋ Silêinə, ə́ fú Alezaŋdələ̂i, pəcó pə̂ pəyúda pi gháp fú cər ngoŋ Silisî gháp pə pi gháp fú Azî ńtó, ə́ mə́ ndə̂ʼ məno mi Etyêŋ ghʉ̂, gháp pə pǎp ji lə̂ nzoŋə́.

¹⁰Gháp pə pǎp lə pə́ nzóŋə yə́rə́, káa gháp kûʼ gháp lə̂ nzóŋə́ tə nzʉ́ yé, ńté ńgó a lə laghʼ pə̂ jîno yi Zəghʼə Ndêi-lěi ńŋə́ lə́ zʉ́ ńtsár.

¹¹Gháp jwô kə́káŋ, ə́ cʉ́ʼ ndúŋ pye ńgó gháp láʼ ńgó gháp lə zúʼ ghíʼ Etyêŋ tsâtə tə́poŋ ńté Mə̌usə̂i gháp Sê.

¹²Gháp ghʉ yə́rə́, ə́ ndaghʼ ńtwótə́ lâʼ gháp pə pəkə̌m lâʼ, mbaa pəkeʼtə́-lə́pə́ʉ Mə̌usə̂i ḿmâʼ nzəm Etyêŋ. Gháp ghou yé ndaghʼ ńdə́r lə̂ mbi cûʼtə pəkə̌m lâʼ.

¹³Ə́ nkə́ ncí ndôu pəcó pəghaŋə məlaa ndaghʼ ńdə́r lə̂ wó. Gháp kə̂u ndâʼ ngô: «Ŋuu wo kə̌ mbə̂ yé mpfu tsəm nzôutə́ ndə̂ Sê zághʼə yi ə́ pə́ ndêi-lěi zoutə́, mbaa mə́ nzôutə́ ləpə̌ʉ Mə̌usə̂i!»

¹⁴Ńté no paghʼ kə pəi nzúʼ a lâʼ ńgó Yěso ŋuu Nǎazalêi wêi táa kə̌m ndə̂ Sê ə́ pǒu kə́p nôghʼ-lâʼ yi Mə̌usə̂i lə jyéʼ wághʼə.

¹⁵Ŋuu ntsəm yi a lə pə́ ndə̂ cûʼtə shə́rə mənyôghʼ ńtághʼ lə́ Etyêŋ, ə́ njwó sʉ̂ yé cʉ̂ʼ ḿbə́ pə́ ghíʼ yi tâʼ cwôʼ Sê.