Read Ngombale Məfaʼ Pəghaŋə-ntə̂u 7 Bible Online

Məfaʼ Pəghaŋə-ntə̂u 7 - Ngombale bible

Məfaʼ Pəghaŋə-ntə̂u 7

¹Tə́-ndə̂ pənuŋú-poʼ Sê yi njwǐ túŋu Etyêŋ ngô: «Ə no pə́ lâʼ ńté gho lo, ə̂ no lə́nə́ʉ?»

²Etyêŋ pwôr ngô: «Pətə́ pâa, pəfə̌r pâa, pei zúʼ no yi ngwo ńdǎʼ wó. Ə́ lə pə́ mpfu yi mə́ngâa-njʉʼ wághʼə Ábələhâm lə pyér mbə́ pə́ Mezopotamî, ə́ ntáa mboŋə́ lə̌r lə̂ Harâŋ, Sê kwâr mbi zʉ́ cər ləghûʼ ye, a poŋə́ lə̌r lə̂ Harâŋ

³ə́ ndǎʼ lə́ zʉ́ ngô: “Nyér cʉŋə-ndə̂ zéi, ə́ fú lâʼ pei ńkwár ńdə̌r lə̂ có lâʼ yi məŋ ngwo nyárə́ gho zěi.”

⁴Ábələhâm fû lâʼ pə Kalədəhêŋ, ə́ ngwo ńnyáŋ Harâŋ, ə́ nyáŋ wó tə tə́ ye ghʉ̂ nkwʉ́, Sê ghʉ̂ a fû Harâŋ, ə́ cʉ́ʼ ntó ńnyáŋ cər yo lâʼ yi pei pə̌ cər wó mpfu wo lo.

⁵A tô ńkə́u wó, káa Sê ŋə̂ yé có nkâʼ lə́ zʉ́ tə mbaa pə̂ lətǎghʼ ku. Lə́ ə́ ngʉ̌ ndaʼá mə́u, ńgó a táa ŋə́ lâʼ zêi lə́ zʉ́, â ghʉ́ nkwʉ́, ə̂ cʉ̂ʼ yi ghəpə́ yé. Ə́ ngǐ lǎʼ mpfu wêi mə́i Ábələhâm kə́ pə́i ngwo yé môu.

⁶Sê kə̂ ncí ndáʼ lə́ zʉ́ ngô: “Ghəpə́ zô táa wǒ cî có tə̂u, pə kə́u ńdághʼ gháp ngʉ̌ məpuʼ, ə́ ŋə́ gháp ngwôʼ təcər nguʼ nkʉ ləkwo.”

⁷Lə́ n ntáa fěʼ ngoŋ yi ə́ lǎghʼ gháp ńgʉ́ məpuʼ, ə́ cóghʼ ngwôʼ tû páp. Ngər-ndə̂ zô ghʉ̌ fú wó mbə̂ʉ ńtó ńnyáŋ yaʼa mə́ ngúʼtə ghâa.

⁸Sê gháp Ábələhâm lə wâr kaa, ə́ ləiʼi zěi pə̂ ńgó pə́ lə̌i njí môu mbiŋə, pə́ pə̂uʼ yé. Ə́ lei yə́rə́, Ábələhâm jî Ísaghʼ, ə́ pə̂ mbâatə leʼé ləfǎa, a ghʉ̂ pə́ pə̂uʼ yé; Ísaghʼ ghʉ̂ njí Yokôp, ə́ ngʉ̌ pə́ pə̂uʼ yé yé lə́wó; Yokôp táa nkə́ ngʉ̂ yé pə́ yə́rə́ lə́ ghəpə́ yé pi mbiŋə ntsap pwô lə̂ ləghə̂m pi gháp pə́ pəmə́ngâa-njʉʼ pághʼə.»

⁹Pəmə́ngâa-njʉʼ pághʼə ghʉ ngwô fúʼ-lóŋ nzəm fə̌r gháp Yosêp, ə́ fə̌i yé pə́ laghʼ yé ńdə́r lə̂ Egípto. A kə̂u wó ə́ mbə́ puʼ, lə́ Sê pə̂ lə́ zʉ́;

¹⁰ə́ kwárə́ yé cər ngwôʼ tsəm. Ə́ ŋə́ yé jîno, ə́ mbou ngʉ́ fou Egípto kôŋ no yé. Ə́ ndǎghʼ yé ńgʉ́ ngə́mnaa, a pə̂ nâŋ lâʼ Egípto, ə́ mbou mə́ nâŋ məno ntôʼ.

¹¹Cǒ wáʼ pôu ngʉ́ ngwʉ̌ cər lâʼ Egípto tsəm mbaa cər lâʼ Kánahâŋ. Ngwôʼ ghâʼ tə pəmə́ngâa-njʉʼ pághʼə pûŋ zə̂u yi mboʼ gháp zʉ̂.

¹²Yokôp zûʼ ńgó ngəsâŋ-ncʉ̂ŋ pə́ Egípto, ə́ ntə́u pəmə́ngâa-njʉʼ pághʼə wó nduŋ-mbi mpfu.

¹³Ə́ ngʉ mbôu ntə́u gháp lə̂ mbâatə mpfu pwô, Yosêp kêʼ mbəʉ ye mbó pəfə̌r pé, Farahôŋ lêitə yə́rə́ ńjí ləfǔ Yosêp.

¹⁴Yosêp tə̂u pə́ wo ndôu tə́ ye Yokôp ndághʼ ńtó lə̂ Egípto, ə́ ngʉ̌ ngər-nzeʼ záp tsəm yi lə pə́ pye ntsap tâa lə̂ mə̂m saambwô.

¹⁵Yokôp lə̂r lə́ Egípto wêi, ə́ nkə́u wó nkwʉ́; tə mbaa pə́ pəmə́ngâa-njʉʼ pághʼə kə̂ nkwʉ́tə́ záp pə́ wó lə́wó.

¹⁶Gháp kwʉ̂tə yə́rə́, pə́ khwotə məpfû máp ndǎghʼ ńgwó Sishêm ńtʉ́ŋ cər ləshi yi Ábələhâm lə lǎghʼ nkâp nzə́u mbó ghəpə́ Hamôr tə́ pə sishêm.

¹⁷Mpfu lə pə́ nkûʼ ghíʼ Sê wo ghʉ̌ zə̂u yi a lə ghʉ̌ ndaʼá mə̂u lə̂ ngʉ́ ŋə́ mbó Ábələhâm, ngər zaghʼə zə̂r Egípto gháʼate.

¹⁸Cǒ fou shwî tô ńnyáŋ lwoŋ mə́ sâʼ lâʼ, káa pə́ jî yé ŋuu yi Yosêp lə pə́ zʉ́,

¹⁹ə́ futə́ pye lâʼ pághʼə, mbou ngághʼə́ pəmə́ngâa-njʉʼ pághʼə, ə́ ngʉ́ gháp jwô ngwôʼ tə ncʉ́ʼ méʼtə ghəpə́-paŋə́ gháp kwʉ́tə́.

²⁰Pə́ jî Mə̌usə̂i mpfu wêi, a pə̂ môu, kwâŋ-sʉ̂ ye lêi gháʼate, Sê pôu nkôŋ no yé, pə́ kôʼtə yé ndə̂ tə́ yé təcər saŋ tárə́,

²¹pə́ lei tə ngwó měʼ yé, môu fou Farahôŋ yi məngyě tô nkhwór yé, ə́ ntsuŋú yé ghíʼ ndʉʉ môu yé lə̂.

²²Ə́ pə̂ yə́rə́ pə́ jyêʼ Mə̌usə̂i məjîno pye Egípto mə́tsəm, a ghûʼ tə mbə́ ŋuu, ə́ ncʉ́ʼ lə̂ ndáʼ no, kəʉ pə́ lə̂ ngʉ́, ə́ ngʉ̌ ghíʼ ŋuu yi a pə̌ njí zə̂u yi a ghʉ zěi.

²³A tâa nyáŋ tə ngwô nguʼ mə̂mkwo, kwaŋtə lə̂ ngwó ntsêʼtə́ pəfə̌r pé pye Ísə́lahêl tô tû zʉ́.

²⁴A kwâr ə́ mə́ ŋáa ntsêʼtə́ gháp yə́rə́, ə́ ngǐ tó, cǒ ŋuu Egípto pə̂ ngághʼə ŋuu Ísə́lahêl, a zôŋ tû ŋuu Ísə́lahêl, ə́ njwí ŋuu Egípto ə́ ndághʼ ḿbʉ̌ŋ mbəu no mə̂u.

²⁵Ə́ nkwǎŋ ńgó pəfə̌r pə́ wo jwó yə́rə́, ə́ jí ńgó â ŋuu yi Sê kə tə́u yé ńgó â tó nkwárə́ gháp cər ngwôʼ. Lə́ gháp jwô, káa jî gháp.

²⁶Nzʉ̂ fôghʼ a jwô pye Ísə́lahêl pə́pwô pə̂ mbúʼu nkor a pə̂ fâghʼ gháp, ə́ ndǎʼ ngô: «Pəfə̌r pâa! Pêi pəfə̌r ə́ mbou ngághʼə mbəʉ zéi ńté hó?»

²⁷Lə́ ŋuu yi a yǎa ngwǒ təʉ ndêi cǒ, cî Mə̌usə̂i ŋə́ nzəm, ə́ ndáʼ lə́ zʉ́ ngô: «Wǒ kə lǎghʼ ghô ńgʉ̌ fou lə̂ nfêʼ məno mághʼ?

²⁸O pə̌ ndou njwí ghâa zâa ghíʼ o kə pə́ zou njwí ŋuu Egípto lə́ mo?»

²⁹Mə̌usə̂i zûʼ yə́rə́, ə́ khʉ̌ ńdə́r lə̂ ngoŋ Madyâŋ, ə́ nyáŋ wó, ə́ njí ghəpə́ mbiŋə pwô.

³⁰Ə́ ghʉ ndéi nguʼ mə̂mkwo, Mə̌usə̂i wo mbəʉ ləkôr Sinayî koŋə məkwaʼá, cwôʼ Sê kwâr mbi zʉ́, ə́ ntə́ʉ lə̂ mǒghʼ cər có cuʼú ləghěi yi ə́ pə́ sʉ́.

³¹Mə̌usə̂i jwô wěi mǒghʼ, ə́ kəʼə yé, a pə́ ncʉ́ŋʉ́ lə̂ tsuŋu njwó, ə́ nzúʼ nji Nde, a lâʼ lə́ zʉ́ ngô:

³²«Ə̂ məŋ Sê pətə́ péi, ə́ Sê Ábələhâm, ə́ Ísaghʼ, mbaa yi Yokôp.» Mə̌usə̂i zûʼ ḿbóghʼ ə́ njǐ lə̂ ngwə̂r, káa pyér pə́ koŋ yé ńnáŋ yʉʼ zêi.

³³Nde lâʼ lə́ zʉ́ ngô: «Sǎr məlaŋə́ mô ńté ńgó yʉʼ yi o tə̌ʉ wó lo, ə̂ yʉʼ ndêi-lěi.

³⁴Məŋ njwo mə́ mbə̂u yi pye pâa laghʼ ńjwô ngwôʼ Egípto. N nzuʼ mə́ mbə̂u yi gháp laghʼ ńgêʼtə́, n nshǐʼ ńtó lə̂ nkwárə́ gháp cər ngwôʼ zei. Lə̂ mpfu wo, lər n ngwó tə́u ghô cər ngoŋ Egípto!»

³⁵Sê lâʼ yə́rə́, ə́ kə́ ncí ntə́u Mə̌usə̂i cər ngoŋ Egípto ńgó a pə́ fou pye Ísə́lahêl ə́ mbou nkwárə́ gháp cər ngwôʼ, ə́ fou pye Ísə́lahêl pə̂ pi gháp lə lə̌ʼ no yé, tə ntúŋú yé ńgó wǒ lə lǎghʼ yé ńgʉ́ fou ghap ghíʼ a wo nyáŋ pə́ feʼ məno máp? Ə́ ncʉ́ʼ ngí tə́u yé yə́rə́, cwôʼ Sê yi a lə jwó yé cər mǒghʼ lə̂ pǎp ləghěi lə̂, pə̂ tóutə yé.

³⁶Zʉ́ lə pǒu ngʉ́ mənkəʼə-məno gháp pə məndǎa-jwô-mə́no cər ngoŋ Egípto, cər paŋ-paŋ mə̂i-nci tə mbaa koŋə-məkwaʼá nguʼ mə̂mkwo lə̂ ndághʼ nkwarə́ gháp cər ngwôʼ zei.

³⁷Mə̌usə̂i wêi lə̂ lə kə́ ncí ndáʼ lə̂ pye Ísə́lahêl ngô: «Sê táa kwarə́ cǒ ntsətə-nkəʉ-sê ghíʼ məŋ təcər pei.»

³⁸Mə̌usə̂i lə̂ kə̂ ncí mbə́ ŋuu yi ə́ lə pə́ mpfu yi pəmə́ngâa-njʉʼ pághʼə lə kəitə́ koŋə-məkwaʼá, a tə̂ʉ təcər páp pə Sê yi a lə laʼ no lə́ zʉ́ lêi ndəu ləkôr Sinayî ə́ mə́ mpfû tsâr ləcwôr mbó zʉ́, ə́ ŋə̂ lə́ paghʼə.

³⁹Lə́ pəmə́ngâa-njʉʼ pághʼə pêi pə̂ nkôŋ gháp lə̂ nzúʼ ntsʉ Mə̌usə̂i po, ə́ ndəʼ no yé tə ntsâa lə̂ mbə̂ʉ gháp lə̂ ngoŋ Egípto.

⁴⁰Ə́ ndǎʼ lə́ Áloŋ ngô: «Tsuŋú məcó məsê ńŋə́ lə́ pághʼ, ə́ mi ə́ wo pə́ laghʼ wághʼ ńŋə̌i. Ńté ńgó káa paghʼ pə́ njî wághʼ zə̂u yi ə́ lěi lə́ Mə̌usə̂i wə̂ yi a kə lǎghʼ wágh fú cər ngoŋ Egípto nkwâr lə̂.

⁴¹Ə́ pə̂ lə̂ məleʼé mêi, gháp pə pǎp tsuŋu tə́tó, a pə̂ ghíʼ môu-foŋ; gháp watə mənye ndǎghʼ ńnuŋú poʼ mbó zʉ́. No poŋə́ gháp, tə gháp zʉ̂ lətsei lə̂ zə̂u yi gháp lǎghʼ mbô máp ńtsúŋú.»

⁴²Ə́ pə̂ yə́rə́, Sê tə̂m nzəm ńŋə́ lə́ páp, ə́ nyér gháp, gháp ji lə̂ ngúʼtə́ məzə̂u mi ə́ pə́ ləfaŋ, ə́ ndʉŋ-ndʉŋ ghíʼ ə́ pə̂ cər ŋwaʼa pəntsətə́-nkəʉ Sê ngô: «Pye Ísə́lahêl, mənye mi pei lə watə́ mpfu yi pei lə pə́ koŋə-məkwaʼá, mbaa zə̂u tsəm yi pei lə ghʉ̌ lə̂, pei lə laghʼ ńgûʼtə gháʼá pə́ ghâa mo?»

⁴³Ə ngə́, pei lə khwor ntap Sê Molôghʼ, ə́ nkə́ ncí nkhwór cwôʼ-saŋ sê zei Rəfâŋ. Ə́ pə̂ məzə̂u mi pei lə tsuŋú pə́ pei lə̂ nyáŋ mə́ ngúʼtə́. Ə́ zə̂u yi ə́ ghʉ̌, n ngwo zǔŋ wéi pei lə́r tə ndéi ngoŋ Babilônə.

⁴⁴Pəmə́ngâa-njʉʼ pághʼə lə pə́ koŋə-məkwaʼá yə́rə́, ə́ ngwó ntap yi ə́ nyar ńgó Sê pə́ təcər páp, Sê lə̂ lə nyarə́ Mə̌usə̂i mbə̂u yi a lǎghʼ tsuŋú wêi ntap, ə́ ndǎʼ lə́ zʉ́ ńgó â kə́ ntsúŋú pə́ ghíʼ a lə nyárə́ yé a jwô, ə́ pə̂.

⁴⁵Pə́ tâa ŋə́ ntap wêi mbó pəmə́ngâa-njʉʼ pághʼə, gháp laghʼ ńtó tə nkə́u yaʼa. Yǒsówa pə́ nsâʼ gháp, Sê pə̂ nzûŋ pye cər məlâʼ, gháp pə̂ nyáŋ. Ntap wêi kə mbə̂ pə́ wó tə nkə́u mpfu yi fou Davîd lə pə́ sâʼ lâʼ.

⁴⁶Ə́ pə̂ yə́rə́, Sê kôŋ fou Davîd gháʼate. A sʉ̂ʉtə Sê ńgó a pə́i â kə́r yʉʼ ndêi-lěi yi mboʼ ghəpə́ Yokôp nyâŋ ńkə̂itə wó, ə́ sʉ̂ʉtə yé.

⁴⁷Lə́ môu ye Salə́məu lə̂ lə nkə́r ndə̂ ə́ ŋə́ lə̂ Sê.

⁴⁸Lə́, Sê yi a pə̂ tʉ̌-lə́pû kâa pə́ ncî yé cər ndə̂ yi pye-mə́soŋ kə̂r. Ə́ ndʉŋ-ndʉŋ ghíʼ ntsətə-nkəʉ Sê yi a ghǔʼ nděi məsê mə́tsəm lə lǎʼ ńgó,

⁴⁹Sê laʼ ngô: «tʉ̌-lə́pû lwoŋ-lə́fou zâa, ndəu ndesé pə̂ lətǎghʼ məku zâa. Mboʼ pei kə̂r zarə́ mbə̂u ndə̂ ńŋə́ lə́ məŋ? Tə mboʼ n nzə́tə ghó?

⁵⁰Kâa n ndə lághʼ mbô mâa ńtsuŋú zə̂u pei pwo tsəm mo?»

⁵¹Pei pəghaŋə tə̂i tû pei ghuʼu mətuŋú mə́i, ə́ ndəʼ tsâr Sê lə̂ nkə́u məntə̂ʉ pei, ə́ ndəʼ Zəghʼə Ndêi-lěi, ə́ ndaghʼ nkə́ ḿbə̂ zéi pə́ ghíʼ pətə́ péi.

⁵²Pətə́ péi lə nyér tə́ ghághʼə́ warə́ ntsətə-nkəʉ Sê? Gháp lə jwítə pye pi gháp lə tsə̌mbi ntó mə́ ndêʼtə ńgó ŋuu ghʉ̌ tó yi a pə̌ ŋuu no lə́nə́ʉ pə́ zə́ghʼə́-zʉ́. A kə pou ntó, pei féi yé ŋə́ pə́ jwî yé.

⁵³Pei pi cwôʼ Sê lə pfú ləpə̌ʉ Sê ńŋə́ lə pei, káa pei pə́ ŋə̂i wéi mə̂u.

⁵⁴Pəghaŋə cûʼtə zûʼ tsâr zei, ə́ fú nzáŋə́ lóŋ gháʼate, ə́ njǐ lə̂ mpfár məsoŋ máp ńté Etyêŋ.

⁵⁵Lə́ Zəghʼə Ndêi-lěi kə̂u lə́ Etyêŋ, a pəʼə tû yé ńnáŋ tʉ̌-lə́pû, ə́ njwó ləghûʼ Sê, ə́ nkə́ nci jwó Yěso, a tə̂ʉ lə̂ ndyəghʼə́ pô Sê yi təʉ.

⁵⁶Ə́ ndǎʼ ngô: «Ə̂ yo, tʉ̌-lə́pû tsóʼo ńtə́ʉ, m mə̌ njwô Môu ŋuu ghíʼ a tə̌ʉ lə̂ ndyəghʼə́ pô tǎa Sê yi təʉ.»

⁵⁷Gháp zûʼ yə́rə́, ə́ ncwór ngwuŋ lə̂ təʉ, ə́ nguʼú mətuŋú máp, ə́ nzéʼ pə́tsəm ńcwə́rə́ lə́ zʉ́.

⁵⁸Ə́ shǔŋ yé ndághʼ ńfú túsoŋ ńkwâr, ə́ njǐ lə̂ ndâghʼ məghǒ ńtə́m yé. Ə́ ghí pə́, mə́i pənzǔʼ-njwó pi gháp lə táŋ məlaa lə̂ sar məndǐ fwôghʼ máp ə́ ndóʼó mbó cǒ môu-ngwəsəu, ləjôghʼ yé pə̂ Sôl

⁵⁹Gháp lə pə́ ntə̂m Etyêŋ lə̂ məghǒ, a pə̂ nsʉ̂ʉtə Sê, ə́ ndâʼ ngô: «Nde Yěso, Zəghʼə zâa pə́ mbó gho.»

⁶⁰Ə́ nkʉ́ʼtə́ sê, ə́ ndǎʼ lə̂ təʉ ngô: «Tǎa lyəghʼə́ məfaa ghap ńté ńgó káa gháp pə́ njî gháp zə̂u yi gháp ghʉ zěi!» Ə́ ndǎʼ yə́rə́, ə́ nkwʉ́.