Read Ngombale Məfaʼ Pəghaŋə-ntə̂u 8 Bible Online

Məfaʼ Pəghaŋə-ntə̂u 8 - Ngombale bible

Məfaʼ Pəghaŋə-ntə̂u 8

¹Pə́ lə ghí pə́ laghʼ məghǒ ńtə̂m Etyêŋ, Sôl pə̂ mbə́itə́ ńgó pə jwí yé. Ə́ fû leʼé wêi, pə́ ji lə̂ fú ńŋə́ cûʼtə pye Kəlísto Yelúsalêm ngwôʼ gháʼate. Gháp pə́tsəm sêi nkhʉ́ ńdə̌r lə̂ sʉ̂ Yudêi gháp samalə̂i, tə ə́ cʉ̂ʼ ndaʼ pəghaŋə-ntə̂u Yěso Yelúsalêm.

²Ə́ pə̂ yə́rə́, pəcó pye pi gháp lə ŋə̂ məkuʼ Sê gháʼate khwor pfû Etyêŋ ngwó ntʉ́ŋ, ə́ mbǒu ndâa ləwʉ̂ yé gháʼate.

³Sôl pə̂ sâʼ təʉ ə́ ngághʼə cûʼtə pye Kəlísto, ə́ ncʉ́ʼ mə́ ŋáa nkə̂u məndə̂ ə́ ngoutə pi mbiŋə gháp pə pi pəngyě ngwǒ ŋə́ pə́ côghʼ gháp tsâŋ.

⁴Pye Kəlísto pi gháp lə sǎr yʉʼ, pə̂ ŋáa ŋə̂i yʉʼ tsəm, ə́ ndêʼtə Nkəʉ Shʉʼʉ Yěso.

⁵Fílîp lə̂r lə̂ có túsoŋ Samalə̂i, ə́ nkə́u wó, ə́ njǐ lə̂ ndêʼtə́ no Nzaʼ-nkʉ.

⁶Lâʼ lə pə́ ntsúŋú nzʉ́ʼtə məno mi Fílîp leʼtə, ńté no gháp lə ghí pə́ zúʼ, ə́ mbǒu mə́ njwô mənkəʼə-məno mi a lə ghʉ měi.

⁷Ə́ ghi pə́, məzəghʼə tə́poŋ pə̂ fû lə̂ pəghou tə nzáa ə́ nkwátə́, ə́ ŋə́i ncwôr nguŋ lə̂ təʉ, pəghaŋə-pwóʼtə́ gháp pə pənkhwô pə̂ shwítə́ záp lə́wó

⁸Ə́ pə́ yə́rə́, pə́ fû mə́ ntsêi cər zêi túsoŋ gháʼate.

⁹Ə́ lə pə́ cər túsoŋ Samalə̂i wêi, mə́i cǒ ŋuu lə pyəghʼ mə́ ḿbə́ wó, ləjôghʼ yé pə̂ Síməu, a pə̂ ngʉ məkaŋ. Ə́ nyáŋ ngʉ̂ məno pye jwô ńdyár, a cʉ̂ʼ mə́ nkwâŋ ńgó â ŋuu njwǐ,

¹⁰ŋuu ntsəm lə̂ fú lə̂ ngwəsəu ngwó nkə́u lə̂ pəlwuŋu pye tsə̂ʉ nzəm zʉ́, ə́ mə́ ndâʼ ngô: «Ŋuu wo, â mətəʉ Sê, ə́ mətəʉ mi pə́ fûŋ ńgó tə́koʼ mətəʉ lə̂.»

¹¹Gháp lə tsə̂ʉ nzəm zʉ́ yə́rə́, ńté no tə fú, a pə̂ ndâghʼ ləkaŋ ńgʉ̂ mənkəʼə məno, gháp pə̂ njwó ə́ kəʼə gháp.

¹²Fílîp tô yé, ə́ mə́ ntsə́tə Nkəʉ Shʉʼʉ yi Ləfou Sê, ə́ nkə́u mə́ ndêʼtə no Yěso Kəlísto, mbiŋə gháp pə pəngyě pə̂i tsâr yé, pə́ ŋə̂ gháp nci.

¹³Síməu wêi pə̂i, pə́ ŋə̂ yé nci lə́u a kə̂ mbóu mbə̂i yé fú mbəʉ Fílîp ncʉ́ŋtə́ po, ə́ mə́ njwô mənkəʼə-məno gháp pə məndǎa-jwô-mə́no mi a lə pə́ ngʉ́, ə́ fû nkəʼə́ yé gháʼate.

¹⁴Pəghaŋə-ntə̂u Yěso pi gháp lə pə́ Yelúsalêm zûʼ ńgó pye Samalə̂i pə̂i no Sê, ə́ tə́u Pyêh gháp Jâŋ lə́ páp.

¹⁵Gháp lər tə nkə́u wó, ə́ sʉ́ʉtə́ Sê ńgó a tə́u Zəghʼə Ndêi-lěi ə́ ŋə́ lə́ pye Samalə̂i pi gháp pə́i no yé.

¹⁶Ə́ lə ghí pə́, mə́i Zəghʼə Ndêi-lěi kə́ kə̂u yé lə́ cǒ ghap, pə́ lə pou ŋə̂ gháp nci pə́ lə̂ ləjôghʼ Nde Yěso.

¹⁷Ə́ pə̂ yə́rə́, Pyêh gháp Jâŋ zápə mbô tû páp ə́ sʉ́ʉtə́ Sê, Zəghʼə Ndêi-lěi kə̂u lə́ páp.

¹⁸Síməu jwô ghíʼ pəghaŋə-ntə̂u pə́ nzápə mbô tû pye Zəghʼə Ndêi-lěi kə̂u lə́ páp, ə́ mbwʉ́ gháp nkâp, ə́ ndǎʼ lə́ páp ngô:

¹⁹«Péi ŋə́ ghâa zâa mətəʉ ghíʼ n ndə̌i nzápə́ mbô lə́ pye, Zəghʼə Ndêi-lěi kə̂ nkə́u lé páp záp lə́wó.»

²⁰Lə́ Pyêh lâʼ lə́ zʉ́ ngô: «Pei nkâp zô zêi nâa ntsó! Ńté no o kwaŋ lə̂ ndághʼ nkâp ńzə́u zə̂u yi Sê ŋə̂ lə́ pye pə̂ fefe.»

²¹Koo o pə́i ngwo ghô có no lə́ no zêi yo, káa yǎa kǔʼ ghô mə́u ńté ńgó koo o pə́ ndʉŋ-ndʉŋ mbi Sê.

²²Kə́p cǐ zô lə̂ kwaŋtə tə́poŋ yi o ghwǒ zěi, ə́ sʉ́ʉtə́ Nde kəʉ mboʼ a lyə́ghʼə mbə̂u kwaŋtə zêi ńŋə́ lə́ gho.

²³Ńté no m mə̌ njwô ńgó no tə́poŋ lə́ mə́ nzʉ́ ghô tə o cʉ̂ʼ nkwaa ye.

²⁴Síməu pwôr ngô: «Kwaʼ pei lə̂ sʉ́ʉtə́ Sê tû məŋ njí ńgó no yi pei laʼ zěi lə̂, cə̂r yé ghâa po.»

²⁵Pyêh gháp Jâŋ leʼtə məno mi gháp jí lə́ Yěso, ə́ mbou ndâʼ tsâr Nde tə mə́ mbə̂ʉ lə́ Yelúsalêm, ə́ ŋə́i ngâp tsâr Sê cər məlâʼ Samalə̂i tə nzáa.

²⁶Tâʼ cwôʼ Nde lâʼ lə́ Fílîp ngô: «Lěsê ńdə̌r lə̂ sʉ̂ ncʉ̂ŋ, ə́ nděi lə̂ laŋə́-ndə̂u yi ə́ fû Yelúsalêm shíʼ ńkə̂u Káza, ə́ pə́ pə̂ fəm ndə̂u.»

²⁷Fílîp lesê ə́ nkə́ ncʉ́ʼ ńtsə́ʉ laŋə́, ə́ ŋə̌i tə nkwár lə̂ cǒ ŋuu Etyopî, a pə̂ ŋuu mə́i pə́ lə́ shú yé, ə́ mbə́ ŋuu njwǐ yi a nâŋtə nkâp cər lâʼ məngyě yi a sâʼ ngoŋ Etyopî, pə́ fûŋ yé ńgó Kandásʉ.[2] Zʉ́ lə́ lə nâŋ məzə̂u nkâp mə́tsəm cər wêi ngoŋ, ə́ ndə tô Yelúsalêm lə̂ ngúʼtə́ Sê,

²⁸ə́ mə́ mbə̂ʉ, ə́ nyáŋ ndəu kə́lə́ghʼə mə́ fûŋ ŋwaʼa Esǎya ntsətə-nkəʉ-Sê.

²⁹Zəghʼə Sê lâʼ lə́ Fílîp ngô: «Fátə́ ŋə̌i ńkwátə́ kálə́ghʼə wə̂.»

³⁰Fílîp zûŋtə kə́lə́ghʼə wêi tə nkwátə́, ə́ nzúʼ ŋuu wêi pə̂ fûŋ ŋwaʼa Esǎya ntsətə-nkəʉ-Sê. A túŋu yé ngô: «O fûŋ gháʼa tə mə́ nzúʼ?»

³¹A pwôr ngô: «Tə m mboʼ nzûʼ gháʼá tə́ ghó pə́ kéʼtə́ ndǎʼ ghâa?» Ə́ ntúŋú yə́rə́, ə́ ncʉ́ʼ ndâʼ lə́ Fílîp ńgó a kóʼ ńtó ńnyáŋ mbəʉ zʉ́ cər kə́lə́ghʼə.

³²Ə́ ghí pə́, yʉʼ ŋwaʼa yi a lə pə́ fúŋ pə̂ ndâʼ ngô: Pə́ lə laghʼ yé ńdə́r ghíʼ ndənzʉ yi pə́ laghʼ yé ndə̂r lə̂ ləjwǐ-mə́nye. A nâʼ ghíʼ môu ndənzʉ yi pə́ pə̂ nkôu mənyuŋ mé.

³³Pə́ lə tə̂m sə̂ʉ tû zʉ́, ə́ nzáʼ kôr yé tə́poŋ, cǒ ŋuu láʼ kʉ̂ʉ yé ngər ye po, ńté ńgó pə́ lə záʼá yé záʼá njwí tə́ ghó a ghwo môu.

³⁴Ŋuu Etyopî wêi lâʼ lə́ Fílîp ngô: «Tə́sə́u kéʼtə́ tsâr yo ńdáʼ ghâa, ntsətə-nkəʉ Sê laʼ yo no gháʼa lə̂ wǒ? A lâʼ pə́ lə̂ tû-mbəʉ yé kəʉ pə́ lə̂ cǒ ŋuu ndeʼe?»

³⁵Fílîp cʉ̂ʼ nkə́ ngí pə́ tsətə Nkəʉ Shʉʼʉ Yěso, ə́ njǐ pə́ lə́ yʉʼ ŋwaʼa Sê zei.

³⁶Gháp zʉ́ pyêr pə́ laŋə́, ə́ ŋə́i tə njwó nci, ŋuu Etyopî lâʼ lə́ Fílîp ngô: «Nci wo, mboʼ hó pou nkə́ʼtə́ ghâa lə̂ mpfú nci?»

³⁷[Fílîp lâʼ ngô: «O lə̌i mbə́i no Yěso Kəlísto lə̂ ntəʉ ghô tsəm, mə́i có zə̂u kə́ kə́ʼtə yé ghô po.»] [3]

³⁸Ə́ ndǎʼ yə́rə́ ə́ ngʉ́ kə́lə́ghʼə tə̂ʉ, gháp Fílîp shîʼ ńkə́u nci, Fílîp ŋə̂ yé nci.

³⁹Gháp lei tə fú nci nkwár, Zəghʼə Nde laghʼ Fílîp ńdə́r tə lə́u ngaŋə-faʼ gə́mnaa Etyopî wêi kə̂ njwó yé yé po. Ə́ ngí pə̌ʉ tsə́ʉ laŋə́, ə́ ŋə̌i mə́ ntsêi.

⁴⁰Ə́ ngwǒ lə́ Fílîp, a ghí jwó ə́ ncʉ́ʼ ntə́ʉ pə́ Azôo, ə́ fú wó, ə́ ŋə́i mə́ ntsə̂tə Nkəʉ Shʉʼʉ cər mətúsoŋ mə́tsəm mi a lěi wó tə ngwó nkə́u Sezarê.