Read Ngombale Məfaʼ Pəghaŋə-ntə̂u 9 Bible Online

Məfaʼ Pəghaŋə-ntə̂u 9 - Ngombale bible

Məfaʼ Pəghaŋə-ntə̂u 9

¹Ə́ pə̂ mpfu wêi, Sôl kə̂ mbyér mbə́ pə́ nzəm pəghaŋə-jyêʼ-no Yěso, ə́ nzâʼ nkwaa zap lə̂ njwítə́ gháp. Ə́ ngwo njwó Tə́-ndə̂ pənuŋú-poʼ Sê,

²ńgó a ŋə́ pəŋwaʼa lə́ zʉ́; â lághʼ ńgwǒ məndə̂ cûʼtə pəyúda mi ə́ pə́ túsoŋ Damásʉ. Ə́ mpfû yə́rə́ ghíʼ a lə̌i nkə́u wó ńjwó pye pi gháp ŋəi ghíʼ Yěso pə̌ nkǒŋ, ə́ mbiŋə kəʉ pəngyě, a kuʼtə lə̂ ngôutə́ gháp, ə́ nkaptə́ gháp ndǎghʼ gháp mbə̌ʉ lə̂ Yelúsalêm.

³Pôl pyêr mbə́ pə́ laŋə́-ndə̂u, mə́i a ŋəi mə́ tə mə́ nkə̂u Damásʉ, cǒ nkeʼ gháp ghapə́ fû tʉ̌-lə́pû fú nkêʼ yé gháʼate.

⁴A tsóʼo mpfúŋ sê, ə́ nzúʼ nji ŋuu lâʼ lə́ zʉ́ ngô: «Sôl, Sôl, O tsóʼo ku zâa tə́poŋ ńté hó?»

⁵Sôl túŋu ngô: «Ô wǒ Nde?» Ngaŋ pwôr ngô: «Mə̂ŋ Yěso yi o tsôʼ ku yé tə́poŋ lə̂,

⁶lə́ lěsê ńkə́u cər túsoŋ; o wo kə́u wó, pə lâʼ ghô zə̂u yi o wo ghʉ̌.»

⁷Pye pi gháp pə Sôl tə́i mbə́, zûʼ zêi nji, lə́ káa jwô gháp cǒ ŋuu, ə́ ntə́ʉ káa kuʼ gháp ndâʼ no.

⁸Sôl lêsê, ə́ ŋéʼ nyôghʼ mé, lə́ káa pyér pə́ jwô yé yʉʼ, pə́ ghwo pô yé ndághʼ yé ńdə́r lə̂ Damásʉ.

⁹A kə̂u wó ə́ nyáŋ leʼé tárə́ tə́ jwó yʉʼ, tə́ zʉ́ zə̂u, tə́ nô có zə̂u.

¹⁰Ə́ lə ghí pə́ mpfu wêi, cǒ ngaŋə-jyêʼ-no Yěso pə̂ túsoŋ Damásʉ ləjôghʼ yé pə̂ Ananyǎsʉ, Nde ŋêʼ nyôghʼ mé, a jwô yé, ə́ ndǎʼ lə́ zʉ́ ngô: «Ananyǎsʉ!» A pwôr ngô: «Məŋ ngwo Nde.»

¹¹Nde kə̂ ncí ndáʼ lə́ zʉ́ ngô: «Lěsê pə̂ mpfu wo mpfu wo, wǒ lə̂ laŋə́-ndə̂u yi pə́ fûŋ ńgó “Ndʉŋ-ndʉŋ” lə̂, ə́ nkə́u ndə̂ ŋuu yi pə́ fûŋ yé ńgó Jwídásʉ, ə́ ntúŋú ŋuu Táasʉ yi pə́ fûŋ yé ńgó Sôl. A pə́ wó mpfu wo, ə́ mə́ sʉ̂ʉtə Sê;

¹²mə́i a le mə́ njwo, ə́ njwó cǒ ŋuu yi pə fûŋ yé ńgó Ananyǎsʉ tô ńkə́u ndə̂, ə́ nzápə́ mbô tû zʉ́, a kə̂ ncí njí lə̂ njwó yʉʼ.»

¹³Ananyǎsʉ pwôr ngô: «Ə́ Nde, n nzuʼ mə́ ghíʼ pye tə nzáa nkʉ̂ʉ ŋuu wə̂ yi o lâʼ yé lə̂, ńté məno tə́poŋ mə́tsəm mi a kə ghʉ̌ lə̂ pye pô Yelúsalêm.

¹⁴A kə ghí tó lə̂ yaʼa gháʼá, pətə́-ndə̂ pənuŋú-poʼ Sê lə́ tə̂u yé, ńgó a tó ńgóutə́ pye pi gháp fûŋ ləjôghʼ zô, ə́ nkaptə́ gháp.»

¹⁵Lə́ Nde lâʼ lə́ Ananyǎsʉ ngô: «Kə́ ngwo njwó yé jwó, ńté ńgó a pə́ mbó məŋ, ə́ mbə́ kwaʼ zə̂u faʼ shʉʼʉ yi n ndə tsóʼ. A wo ghʉ̌ Ngoŋ ngoŋ pi káa gháp pə̂ gháp pəyúda gháp pə pəfou páp, tə mbaa ghəpə́ Ísə́lahêl jí ŋuu yi məŋ mbə̌ wěi.

¹⁶Kwaʼ məŋ, n ngwo nyárə́ yé ndwuŋ ngwôʼ yi a wo jwó ńté ghâa.»

¹⁷Ananyǎsʉ zûʼ yə́rə́, ə́ ndə̌r tə nkə́u ndə̂ wêi, ə́ nzápə́ mbô tû Sôl, ə́ ndáʼ lə́ zʉ́ ngô: «Fə̌r ghâa Sôl, Nde Yěso yi a kə kwǎr mbi gho ə́ mpfu yi o kə pyér pə́ laŋə́-ndə̂u mə́ ntó lə̂ yaʼa lə̂, ntə̌u ghâa ńgó n ntó ńgʉ́ o kə́ ncí njwó yʉʼ, Zəghʼə Ndêi-lěi póu nkə́u lə́ gho tə fú nzʉ́ ghô.»

¹⁸Pə̂ mpfu wêi mpfu wêi, məcó məzə̂u ghíʼ məghaʼá shû ŋêʼtə mənyôghʼ Sôl mpfúŋtə́ sê, a jî lə̂ nkə́ ncí njwó yʉʼ, ə́ nděsê pə́ ŋə̂ yé pfû-nci;

¹⁹ə́ mbou nzʉ́ məzʉ̂, mətəʉ mé kə̂ ncí ntó. Sôl gháp ngaŋə-jyêʼ-no Yěso pi gháp lə pə́ túsoŋ Damásʉ nyêʼ nyáŋ wó leʼé ndwuŋ.

²⁰A cʉ̂ʼ nkə́ ndêi-lěi, ə́ njî lə̂ ŋáa nkə́u cər məndə̂ cûʼtə pəyúda, ə́ sâa-sǎa ndéʼtə́ ńgó Yěso Môu Sê.

²¹Wǒwó zûʼ ghíʼ a leʼtə, ə́ ndyár gháʼate, ə́ mə́ ndâʼ ngô: «Ée, káa yo pə́ ŋuu yi a kə pə́ Yelúsalêm ńgʉ́ pye pi gháp sʉ̂ʉtə Sê ə́ mbǒu ngûʼtə ləjôghʼ Yěso jwô ngwôʼ lə̂? Lə́u a kə tô yaʼa gháʼá lə̂ ngôutə́ gháp ńkaptə́ gháp ńgwo ńŋə́ mbó pətə́-ndə̂ pənuŋú-poʼ Sê péh?»

²²Gháp ghi pə́ lâʼ yə́rə́, Sôl kə̂ mə́ sâʼ pə̂ təʉ ndâʼ ńgó ə no yi a laʼ zěi no lə́nə́ʉ, ńgó Yěso Kəlísto, â ŋuu yi a wo ghʉ̌ pə cwór; lə́u pəyúda pi gháp lə nyâŋ Damásʉ kə̂ njî gháp có no yi gháp wo lâʼ lə́ zʉ́ po.

²³Ə́ tâa mbə́ cǒ mpfu, gháp tsuŋtə təcər páp ə́ ngwǒ tâʼ ntsʉ ńgó pə́ jwí Sôl,

²⁴ə́ ntsár yə́rə́, ə́ ncʉ́ʼ mə́ mbâp məntsʉ nkâʼ túsoŋ ntə̌ʉ-nəu gháp lətwûʼ ghí Sôl wo pə́ lěi, gháp jwi yé; lə́ pə́ sô ńtó ńkêʼ Sôl.

²⁵Ngaŋə-jyêʼ-no yé pə̂ cǒ lətwûʼ, ə́ ndǎghʼ yé ńdə́r ńgwo ńcóghʼ yé cər tə́koʼ kəkaghʼ, ə́ nzéʼé yé ndəu tâa-nkâʼ yi pə́ lə lǎghʼ ńzə́mə́ túsoŋ, ə́ ntághʼ yé lə̂ cǒ nzəm a lə̂r.

²⁶Sôl lə̂r tə nkə́u Yelúsalêm, ə́ mə́ ndû lə̂ nkə́u təcər pəghaŋə-jyêʼ-no, lə́ gháp pə́tsəm pə̂ mbôghʼ yé, ə́ ncʉ́ʼ ndwôʼtə yé lwóʼtə́; káa pə́ pə̂i gháp ńgó kwaʼ lə́nə́ʉ a pə mə́ tâʼ ngaŋə-jyêʼ-no.

²⁷Ə́ pə̂ tə Pənə́páasʉ lâghʼ yé ńgwo ńcə́r pəghaŋə-ntə̂u Yěso, ə́ ndéʼtə́ gháp ghíʼ Sôl lə jwó Nde Yěso laŋə́-ndə̂u Damásʉ, a lâʼ no lə́ zʉ́; ə́ mbǒu ndáʼ gháp mbə̂u yi Sôl kə lǎghʼ sâa-sǎa ńdeʼtə́ no Yěso Damásʉ tə́ pôghʼ.

²⁸Lə̂ fú mpfu wêi, Sôl kə̂u nou pəghaŋə-jyêʼ-no Yěso gháp pə pǎp cʉ̂ʼ ŋáa ŋə̂i yʉʼ tsəm cər túsoŋ Yelúsalêm, ə́ ntsə̂tə Nkəʉ Shʉʼʉ Nde Yěso Kəlísto tə́ pôghʼ.

²⁹Ə́ nkə́u mə́ ntsə́tə lə́ pəyúda pi gháp tsâr tsâr Ngərêghʼ, lə́ gháp pə pǎp kə̂ nzóŋə no mə́u zoŋə́ tə ə́ ghi lyəghʼtə́, gháp cʉ̂ʼ mə́ ndôu pə́ lə̂ njwí yé.

³⁰Lə́ pəfə̌r zûʼ, ə́ ngwo cághʼə́ yé túsoŋ Sezarê; ə́ nkə́u wó, ə́ ngʉ́ a lə̂r lə̂ túsoŋ Táasʉ.

³¹Məno mêi mwo lei yə́rə́, cûʼtə pye Kəlísto nyâŋ lə̂ mbwórə cər paghʼə-ngoŋ Yudêi ntsəm, tə mbaa Galilêi gháp Samalə̂i; ə́ mə́ tôutə mbəʉ záp ə́ nkʉ́ʼʉ́ ńtəitə́ cər pə̂i-ntə̂ʉ ə́ mbou mə́ nzûʼ ntsʉ Nde, Zəghʼə Ndêi-lěi pou mə́ ntôutə gháp, ə́ ngʉ́ nou gháp kʉʼʉ nzáa.

³²Pyêh lə pə́ ŋáa ŋə̂i cər lâʼ, ə́ mbə̂ có leʼé ngwó ngwə́ pye Sê pi gháp cî cər túsoŋ Lída.

³³Ə́ nkə́u wó njwô cǒ ŋuu wó yi pə́ fûŋ yé ńgó Enê, a pə̂ ngaŋə-pwóʼtə́; mə́i a nuŋ mə́ kə̌u ghou nguʼ ləfǎa.

³⁴Pyêh lâʼ lə́ zʉ́ ngô: «Enê, Yěso Kəlísto ghʉ o shwîtə! Lěsê ńtsuŋú kə̌u gho pə́ gho.» A kə̂ ntóghʼ ndésê.

³⁵Ŋuu tsəm yi a cî túsoŋ Lída gháp pə pye pi gháp cî cər toʼo Sarôŋ jwô ghíʼ Enê shwítə̂, ə́ nkə́p cǐ záp, ə́ mbə́i záp no Nde Yěso lə́wó.

³⁶Cǒ məngyě lə pə́ túsoŋ Jopê, yi a lə pə́i no Yěso, ləjôghʼ yé pə̂ Tabíta, ə́ mbə́ lə̂ tsâr Ngərêghʼ ńgó Dookásʉ (ə́ ndaghʼ ndâʼ ńgó môu ngâp) a pə̂ mpfu tsəm ə́ ngʉ̂ məno shʉʼʉ, ə́ mbou mpfûtə pəpûŋ.

³⁷A pfûŋ ghou lə̂ məleʼé mêi, ə́ nkwʉ́, pə́ sôghʼ pfu yé ə́ khwór, ə́ nkóʼ ńnúŋú cər cǒ lûm ndə̂ lə́ dêghʼ yi tʉ̌.

³⁸Ghíʼ ndǐ lə̂ fú Lída nkə́u Jopê kâa sâghʼ yé lə̂, ngaŋə-jyêʼ-no Yěso pi Jopê zûʼ ńgó Pyêh pə́ Lída, ə́ ntə́u mbiŋə pwô, gháp wo ndáʼ lə́ zʉ́ ngô: «Tə́sə́u, khʉtə́ khʉtə́ ńtó tə nkə́u lâʼ páp.»

³⁹Pyêh kə̂u nzúʼ, ə́ nkə́ ntóghʼ ndêse gháp pə pǎp lər tə nkə́u wó, pə laghʼ yé ńkóʼ lə́ lûm ndə̂ yi tʉ̌. Pəpfǒghʼ-pəngyě pə́tsəm pi gháp lə pə́ túsoŋ cʉ́ŋə mbáatə́ yé mə́ ndâa, ə́ nyarə yé məndǐ mi Tabíta kə pyér ntəʉ, ə́ mə́ ntə́.

⁴⁰Pyêh ghʉ ŋuu tsəm kwâr lə̂ pěi, a shîʼ ńkʉ́ʼtə́ sê ńsʉ́ʉtə́ Sê, ə́ shərə́ náŋtə́ mpfû-sê ńdǎʼ ngô: «Tabíta lěsê!» Tabíta ŋêʼ nyôghʼ mé, ə́ njwó Pyêh, ə́ mbəʼə́ mbəʉ yé ncʉ́ʼ nyáŋ nyáŋə́.

⁴¹Pyêh ghwô pô yé, ə́ mbəʼə́ yé a lêsê ńtə́ʉ tə́ʉ. A fûŋ pye Sê gháp pə pəpfǒghʼ-pəngyě, ə́ nyarə́ yé mbó páp, a pə́ pə̂ ntəʉ.

⁴²No zêi sar yʉʼ tsəm cər túsoŋ Jopê, pye tə nzáa pə̂i no Nde Yěso.

⁴³Pyêh nyêʼ nyáŋ Jopê nzeʼ cǒ ŋuu yi pə́ fûŋ yé ńgó Síməu, a pə̂ ŋuu yi a lâa məngəp pəmə́nye pə́ laghʼ ńtə̂ məzə̂u.