Read Ngombale Lóma 1 Bible Online

Lóma 1 - Ngombale bible

Lóma 1

¹Məŋ Pôl yi m mbə̌ ngaŋə-faʼ Yěso Kəlísto n ŋwáʼá ŋwaʼa wo; Sê lə fúŋ ghâa ńdaghʼ ńgʉ́ ngaŋə-ntə̂u Yěso Kəlísto, ə́ ntsóʼ ghâa lə̂ ŋáa ntsə́tə́ Nkəʉ Shʉʼʉ.

²Ndǐ saghʼ mə́ ghíʼ Sê lə leitə́ lə́ pətsətə́-nkəʉ pé, ə́ ngʉ̌ ndaʼá lə́ Nkəʉ Shʉʼʉ zêi cər pəŋwaʼa pé.

³Nkəʉ Shʉʼʉ zêi pə̂ yi náŋtə́ Môu yé Yěso Kəlísto yi a pə̌ Nde wághʼə: a lə tó ndəu ndesé lə̂ mbəʉ ŋuu-məsoŋ, pə́ jî yé cər cʉŋə-ndə̂ fou Davîd;

⁴Sê lə leitə́ lə̂ Zəghʼə Ndêi-lěi ńgʉ́ pə́ jî ńgó â Môu ye; ə́ ŋə́ mətəʉ lə́ zʉ́ yi a pə̌ Nde wághʼə ə́ mpfu yi a lə ghʉ̌ a zʉ̂ʉ lə̂ ləwʉ̂ təcər pəpfû-sê.

⁵Sê lə leitə́ lə̂ Yěso Kəlísto wêi, ə́ ngwǒ poŋə-ntə̂ʉ yi tə́ ndaghʼə nzəm məŋ, ə́ ndaghʼ ghâa ńgʉ̌ ngaŋə-ntə̂u Kəlísto ńgó n ngwó ndeʼtə́ tsâr yé mbó pye məlâʼ məlâʼ, ńjí ńgó gháp pə̂i no yé, ə́ mbou nzúʼ ntsʉ yé. Ə̂ lêi yə́rə́ gháp ŋə́ məkuʼ Yěso Kəlísto.

⁶Pei kə̌ mbə̂ zéi lə̂ nou pye pêi, pei pi Sê lə fúŋ wéi ə́ ndághʼ ńgʉ̌ pye Yěso Kəlísto.

⁷N ŋwaʼa ŋwaʼa wo ŋə̂ lə́ pei pə́tsəm pi pei pə̌ túsoŋ Lóma, mə́i Sê lə koŋ wéi ə́ mbou fúŋ wéi ńgó pei cʉ́ʼ mbə́ pə̂ pye pé. Ńgó Tə́ waghʼə Sê gháp Nde wághʼə Yěso Kəlísto ghwo poŋə-ntə̂ʉ yi tə́ ndaghʼə nzəm pei, ə́ ncóghʼ mə́shwítə məntə̂ʉ pei.

⁸N nduŋ-mbi n ndêi lə́ Yěso Kəlísto ə́ mə́ ŋə̂ nkhwo mbó Sê zaghʼə ńté wéi pə́tsəm, ńté ńgó pə́ pə́ cər nzʉ̂ tsəm, ə́ mə́ ndêʼtə mbə̂u yi pei lǎghʼ ngwǒ pə̂i-ntə̂ʉ nzəm Yěso Kəlísto.

⁹Sê pə̌ njî ńgó no yi n ndaʼ ə̂ no lə́nə́ʉ, ə́ zʉ́ yi n faʼ mbó zʉ́ lə̂ ntə̂ʉ ghâa tsəm lə̂ ŋáa ntsə́tə́ Nkəʉ Shʉʼʉ yi pə̌ nâŋtə Môu ye. A pə̌ njî ńgó ə́ pə̂ mpfu tsəm yi m mə̌ sʉ̂ʉtə Sê, káa m mə́ ntî ghâa tə kʉ̌ʉ wéi.

¹⁰Ə́ mə́ ndâʼ lə́ zʉ́ ńgó â ntsóʼ laŋə́-ndə̂u, n ntó ngwó wéi, ghíʼ ə́ lə̌i mbə́ ləkoŋtə ye.

¹¹Ə́ ndaʼ yə́rə́ ńté no, m mə̌ ntsâa gháʼate lə̂ njwó wéi, ńjí ńgó n ngʉ Zəghʼə Ndêi-lěi ŋə̂ wéi zə̂u pə̂ fefe, ə́ yi ə́ wo ghʉ̌ pə̂i-ntə̂ʉ zéi kʉʼʉ́ ntəitə́.

¹²N ndou gháʼa ndâʼ ńgó n ngwo tó tə kə́u lâʼ pei, paghʼə tóutə́ məntə̂ʉ mághʼə təcər paghʼə, zaa mbə̂u yi n ndaghʼ ḿbə̂i no Yěso Kəlísto ghí pə́ tôutə məntə̂ʉ méi, zei mbə̂u kə́ mə́ ntôutə ghâa zâa lə́wó.

¹³Pəfə̌r, pei jí ńgó n ntʉŋ mə́ lə̂ ntó lâʼ pei məmpfu tə nzáa, məno kə̂ nkə́ʼtə́ ghâa kəʼtə́ tə ntó nkə́u mpfu wo. N ndə tsâa lə̂ ntó yə́rə́, ə́ ngʉ́ faʼ zâa zə̂m məntǎa lâʼ pei zéi, ə́ ndʉŋ-ndʉŋ ghíʼ ə́ pə́ nzə̂m məntǎa ə́ lâʼ pəcó pye lə́wó.

¹⁴Sê lə côghʼ faʼ mbó məŋ lə̂ ngwó ndéʼtə́ Nkəʉ Shʉʼʉ mbó pye pə́tsəm, ə́ pye pi gháp lə jyéʼ jîno, mbaa pi káa gháp lə jyéʼ, ə́ pye pi gháp jí pəŋwaʼa, mbaa pye pi káa gháp pə́ njî gháp.

¹⁵Ə̂ zə̂u yi ə́ ghʉ̌, n ntsâa lə̂ ntó ə́ ntsə̂tə́ Nkəʉ Shʉʼʉ mbó pei zéi pi pei cî Lóma.

¹⁶Kâa m mə́ nkô ghâa sə̂ʉ lə̂ ntsə́tə́ Nkəʉ Shʉʼʉ: zěi yaa mbəi mbə́ mətəʉ mi Sê laghʼ ńgʉ́ pye pə́tsəm pi gháp pə́i no Yěso cwôr, Pəyúda tsə́mbi ncwór, pye pi kâa gháp pə́ Pəyúda poŋə́ cwôr záp lə́wó.

¹⁷Ńté no Nkəʉ Shʉʼʉ ə̂ zə̂u yi ə́ nyárə ghíʼ ə́ leitə záʼa ndě, Sê fûŋ ŋuu ńgó ŋuu ndʉŋ-ndʉŋ mbi zʉ́: ə́ leitə lə̂ mbə̂u yi ŋuu laghʼ ńgwô pə̂i-ntə̂ʉ nzəm Yěso Kəlísto, ə́ mbə́i lə̂ fú ləjitə́ ə́ ngwo nkə́u ləlyəghʼtə́. Pə́ yaa mbəi ŋwáʼá cər ŋwaʼa Sê ngô: «Ŋuu yi a láʼ cí pə̂ pə́ wó, â ŋuu yi a ghwǒ pə̂i-ntə̂ʉ nzəm Sê, ə́ pə̂ yə́rə́, a fûŋ yé ńgó ŋuu ndʉŋ-ndʉŋ.»

¹⁸Sê fǔ tə tʉ̌-lə́pû, ə́ mə́ ngʉ́ pye-mə́soŋ jî ńgó a pə̌ nzáŋə lóŋ ńté pəghaŋə məfaa pə́tsəm mbaa ńtê pye pə́tsəm pi gháp ghʉ məno tə́poŋ, ə́ pye pi gháp ghʉ məno tə́poŋ ńdághʼ ḿbə̂ghʼ no lə́nə́ʉ.

¹⁹Lə́, ə́ pou mbə́ gháʼá, pye-mə́soŋ pə́tsəm sâa-sǎa mə́ njî no lə́nə́ʉ yi ə́ pə́ lə̂ Sê: ńté ńgó Sê zʉ́ tû-mbəʉ yé lə sâa-sǎa nyárə́ gháp.

²⁰Tə fú ghíʼ Sê lə tsúŋu nzʉ̂, pye-mə́soŋ pə́ fû lə̂ məzə̂u mi a lə ntsúŋu, ə́ njwô ŋuu yi a pə̌ wěi, tə mbaa pə́ ghíʼ káa pə pə́ njwô yé yé. Zə̂u pei tsəm nyarə mətəʉ mé mi tə́ láʼ mé, ə́ nkə́ mə́ nyárə ńgó â kwaʼ Sê. Ə́ pə̂ yə́rə́, ə́ mbə́ ńgó mboʼ Sê lâʼ ntî yé tə́ cóghʼ ngwôʼ tû ŋuu yi a laʼ ńgó káa a pə́ njî yé yé po.

²¹Gháp pə́ njî ńgó Sê pə́ wó, lə́ káa pə́ ghûʼtə gháp yé, káa kə́ pə́ ŋə̂ gháp nkhwo lə́ zʉ́ ghíʼ ə́ yǎa mə́ ntúŋú. Tə ncʉ́ʼ yə́rə́, məkwaŋtə máp mi káa pə́ mpfútə yé gháp lə̂ có zə̂u ghʉ gháp faa laŋə́-ndə̂u; lə pə́ yi káa gháp pə́ tsúŋú kwaŋtə gháp no shʉʼʉ, ghʉ gháp pfûŋ cər nzə̌m.

²²Gháp lə pə́ kwâŋ záp ńgó gháp ghwo jîno, lə́ mbou ngáʼá mbə́ məpə:

²³gháp nyêr lə̂ ngúʼtə́ Sê yi a pə̌ tə kwʉ̂, ə́ ngúʼtə́ pətə́tó pi pə́ lə tsúŋu ə̂ pə́ ghíʼ ŋuu-məsoŋ; lə́ pou ngáʼá ŋuu-məsoŋ pə̂ nkwʉ́, pəcó pətə́tó pêi pə̂ ghíʼ pəshʉ̌ŋ, pəcó pə̂ ghíʼ mənye pi ə́ ŋəi lə̂ məku ləkwo, pəcó pə̂ ghíʼ mənye mi ə́ shuŋu məpəm máp pə́ sê.

²⁴Ə̂ zə̂u yi ə́ lə ghʉ̌, Sê tsôʼ pô lə́ páp, gháp cʉ̂ʼ ngʉ̂ pə̂ məno coŋ ndwuŋ mi məntə̂ʉ máp cʉ́ŋə gháp lə̂ ngʉ́, tə ncʉ́ʼ shə́rə təcər páp ə́ ngʉ̂ məno mi ə́ wo tə́m sə̂ʉ tû páp.

²⁵Ə́ ndâghʼ məlaa ńkə̂p no lə́nə́ʉ yi ə́ fû mbó Sê; ə́ ngûʼtə məzə̂u mi Sê lə tsuŋú, ə́ mbou nzûʼ ntsʉ gháp, lə́ mə́i ə́ yǎa mə́ ntúŋu pə̂ ngúʼtə́ Sê yi a lə tsúŋú məzə̂u mêi; ə́ zʉ́ yi pə́ ghwǒ lə̂ ngúʼtə yé lə̂ mənguʼ mənguʼ! Ámeŋ.

²⁶Ə̂ zə̂u yi ə́ lə ghʉ̌, Sê tsôʼ pô lə́ páp, gháp cʉ̂ʼ ngʉ̂ pə̂ məno sə̂ʉ mi məmbəʉ máp cʉ́ŋə gháp lə̂ ngʉ́. Pəngyě ləʼ lə́ pə́ yi gháp pə mbiŋə kə́ nǔŋ, ə́ ncʉ́ʼ ngwó ncə̂r pə́ pəcó pəngyě ghíʼ páp, gháp pə pǎp nuŋ, ə́ pə̂ yə́rə́ káa pǒŋ.

²⁷Ə mbiŋə kə̂ mə́ ngʉ̂ záp pə́ yə́rə́, ə́ nyêr pəngyě páp, ə́ ntsâa lə̂ núŋ gháp pə pəcó mbiŋə ghíʼ páp. Ə́ nzôʼ mbəʉ záp yə́rə́, ə́ pə̂ məno sə̂ʉ! Ə Sê ghʉ̌ tághʼ ngwôʼ tû páp ə́ ndʉŋ-ndʉŋ ghíʼ pə́ ghwǒ lə̂ ntághʼ ngwôʼ tû pye pi gháp ghʉ zêi mbə̂u məno.

²⁸Ghíʼ gháp lə lə̌ʼ gháp lə̂ njí ŋuu yi Sê pə̌ zʉ́ lə̂, a tsôʼ pô lə́ páp ə́ nyér gháp, gháp cʉ̂ʼ mə́ ngʉ̂ pə̂ məno mi məkwaŋtə tə́poŋ máp cʉ́ŋə gháp, gháp ghʉ, ə́ leitə́ yə́rə́ gháp cʉ̂ʼ ngʉ̂ pə̂ məno mi káa gháp lə yaa ngwo gháp lə̂ ngʉ́.

²⁹Gháp pə́ ntâŋ məlaa mbə̂u lə̂ mbə̂u, ə́ mə́ ngʉ̂ məno tə́poŋ mbə̂u lə̂ mbə̂u, ə́ mə́ ndôu ńgó zə̂u tsəm pə́ pə̂ záp, ə́ mbə́ pəghaŋə-sôu, gháp ghwo fúʼ-lóŋ, ə́ mə́ njwîtə pye, ə́ mə́ nkə́ghʼə məfeʼ təcər páp, ə́ mə́ ngʉ̂ píʼí, ə́ mə́ ngwô məkwaŋtə tə́poŋ nzəm pəfə̌r páp, ə́ nzápə sôu tû pəfə̌r páp;

³⁰ə́ mə́ ntâŋ ngə̂u təcər páp; ghâp pəghaŋə mbəu Sê, ə́ mə́ nzôutə́ pye, ə́ mbə́ ngaŋə-ŋâʼtə, ə́ mbə́ pəghaŋə jwô-mbəʉ, ə́ mbə́ mpfu tsəm ə́ mə́ nkwâŋ pə̂ məno tə́poŋ mi gháp wo ghʉ̌; ə́ mbə́ pətəzǔʼ ntsʉ pətə́ páp;

³¹jîno záp kâa pə́ faʼ yé shʉʼʉ, gháp laʼ no káa pǒu pə̂ gháp mə́u; káa kwaŋtə záp pə́ feʼ yé gháp lə̂ məno máp, lə́u gháp pou mə́ ntsâa gháp məjʉ̂ŋ ŋuu po.

³²Tə mbaa pə́ ghíʼ gháp pə́ ntsúŋú njî ləpə̌ʉ Sê yi ə́ laʼ ngô: ntsoʼó-faʼ pye pi gháp ghʉ mbə̂u məno zêi ə̂ ləwʉ̂; ə́ mbǒu kə́ mə́ ngʉ̂ pə̂ məno tə́poŋ ə́ ndághʼ ńdə̌r lə̂ mbi, ə́ mbóu mə́ shî mbô pye pi gháp ghʉ məno tə́poŋ ghíʼ páp ńŋə̂ tʉ́.