Read Ngombale Lóma 10 Bible Online

Lóma 10 - Ngombale bible

Lóma 10

¹Pəfə̌r, ə zə̂u yi məŋ tsâa zěi lə̂ ntə̂ʉ ghâa, ə́ mbou mə́ ntúŋu zěi mbó Sê ńtê Pəyúda, ə́ pə́ ńgó gháp pə́i, Sê ghʉ̂ gháp cwôr.

²Kwaʼ lə́nə́ʉ, mboʼ n ndâʼ ńgó gháp côghʼ ntə̂ʉ gháp lə̂ no Sê gháʼate, lə́ ə zə̂u yi ə́ pə́ mə́u pə̂ ńgó káa gháp pə́ njî gháp laŋə́-ndə̂u yi pə́ lei mə́u, ə́ njwô Sê.

³Káa gháp lə pə́ njî gháp ghíʼ Sê lei mboŋə́ fûŋ ŋuu ńgó ŋuu ndʉŋ-ndʉŋ mbi zʉ́. Ə́ ntsúŋu záp laŋə́-ndə̂u yi gháp wo lei mə́u, ə́ pə́ ndʉŋ-ndʉŋ mbi Sê. Ə́ ngʉ yə́rə́, ə́ ndaghʼ ńdə̂ʼ laŋə́-ndə̂u yi Sê lei mə́u, ə́ fûŋ pye ńgó pye ndʉŋ-ndʉŋ mbi zʉ́.

⁴Ləpə̌ʉ Mə̌usə̂i lə lər tə ngwó mbəutə́ lə́ Kəlísto, ńjí ńgó ŋuu ntsəm yi a pə̌i no Yěso Kəlísto, Sê fǔŋ yé ńgó ŋuu ndʉŋ-ndʉŋ mbi Sê.

⁵Ə́ wo lə̂ no yi ə́ náŋtə́ mbə̂u yi mboʼ pə́ lei lə̂ ləpə̌ʉ ə́ mbə́ ndʉŋ-ndʉŋ mbi Sê, Mə̌usə̂i lâʼ ngô: «Ŋuu yi a pə̌ ŋəi ghíʼ ləpə̌ʉ pə́ ndǎʼ ghʉ̌ lěi mə́u ə́ pə́ wó.»

⁶Lə́ tsâr Sê pə́ ndaʼ ghíʼ mboʼ pə́ lei lə̂ pə̂i-ntə̂ʉ mboŋə́ pə́ ndʉŋ-ndʉŋ mbi Sê ngô: «Koo o lâʼ cər ntə̂ʉ gho ngô: “Tə wǒ ŋuu wo kóʼ tʉ̌-lə́pû?”» Ə́ laghʼ ńdâʼ ńgó wǒ ŋuu wo kóʼ tʉ̌-lə́pû ə́ lǎʼ lə́ Kəlísto ńgó â shíʼ ńtó?

⁷Tə mbaa koo o kə̂ ncí ndâʼ ngô: «Tə wǒ ŋuu wo shíʼ, ə́ wǒ tə nzəm sê?» Ə́ laghʼ ńdâʼ ńgó tə wǒ wo shíʼ, ə́ wǒ tə nzəm sê, ə́ lâʼ pəpfû, ə́ ghʉ̌ Kəlísto kóʼ ńtó?

⁸Ŋwaʼa Sê lou gháʼa ndâʼ ńgó ho? «A laʼ gháʼá ńgó tsâr Sê pə́ mbəʉ gho, ə́ mbə́ ntsʉ gho, ə́ mbóu mbə́ cər ntə̂ʉ gho.» Ə tsâr Sê zei ə̂ Nkəʉ Shʉʼʉ yi paghʼə ŋâa ndêiʼtə ńgó pə́ ghwo lə̂ ngwô pə̂i-ntə̂ʉ nzəm Sê.

⁹Ə́ pə̂ yə́rə́, ə́ mbə́ ńgó o lə̌i ntə́ʉ mbi lâʼ, ə́ ntsóʼ ntsʉ gho ə́ mbə́i ńgó Yěso Nde, ə́ mbou mbə́i cər ntə̂ʉ gho ńgó Sê lə ghʉ a zʉ̂ʉ lə̂ ləwʉ̂ təcər pəpfû, mə́i Sê wo ghʉ̌ o ncwór.

¹⁰Ŋuu lə̌i mbə́i no Yěso Kəlísto lə̂ ntə̂ʉ yé tsəm, mə́i Sê wo fúŋ ngaŋ ńgó ŋuu ndʉŋ-ndʉŋ mbi zʉ́. Ŋuu lə̌i ntə́ʉ mbi lâʼ, ə́ ntsóʼ ntsʉ yé ə́ mbə́i ńgó Yěso Nde, mə́i Sê wo ghʉ̌ ngaŋ cwór.

¹¹Ŋwaʼa Sê yaa mə́ ndâʼ ngô: «Ŋuu lə̌i mbə́i no Yěso Kəlísto, ə sə̂ʉ lâʼ nkô yé yé po.»

¹²Ə́ pə̂ yə́rə́, ə́ mbə́ ńgó ŋuu Pəyúda gháp ŋuu yi kâa pə́ ŋuu Pəyúda naa mbə́ pə́ tâʼ zə̂u; ńté ńgó gháp pə́tsəm naa ngwǒ pə́ tâʼ Nde moʼ. Ə́ zʉ́ yi a ŋə̂ məzə̂u shʉʼʉ tə nzáa mbó pye pi gháp pə̂uʼ mbô lə́ zʉ́ ńgó â pfútə́ gháp.

¹³Ńté no ŋwaʼa Sê pə̌ ndaʼ ngô: «Nde wo ghʉ̌ ŋuu ntsəm yi a pə̂uʼ mbô lə́ zʉ́ ńgó â pfútə́ yé cwór.»

¹⁴Tə mboʼ ŋuu lə́iʼ ghwǒ pə̂i-ntə̂ʉ nzəm zʉ́ po, a pôu ngí pə́uʼ mbó ńgó â tó mpfútə́ yé gháʼa, ə́ nděi gháʼá? Tə mboʼ ŋuu ghwô pə̂i-ntə̂ʉ nzəm zʉ́ lə́ zárə́ mbə̂u tə́ ghó a lə zúʼ mə́ ghíʼ pə́ kʉ̂ʉ ləjôghʼ yé? Tə mboʼ ŋuu lêi lə̂ hó ə́ mboŋə́ kʉ́ʉ ləjôghʼ tə́ ghó cǒ ŋuu tǒ ndǎʼ yé no ńté yé?

¹⁵Tə mboʼ ŋuu lêi lə̂ hó ə́ ntó ndâʼ no yé tə́ ghó pə́ tə́u yé? Ə̂ ghíʼ pə́ lə ŋwáʼá cər ŋwaʼa Sê ngô: «Ə̂ tə́koʼ lətsei lə̂ njwó pye pi gháp tô ntsətə Nkəʉ Shʉʼʉ!»

¹⁶Lə́ káa ŋuu ntsəm lə̂ pə̂i yé Nkəʉ Shʉʼʉ zêi. Esǎya ntsətə Nkəʉ Sê lə yaa ndǎʼ ngô: «Ə́ Nde paghʼ lə tsətə Nkəʉ Shʉʼʉ, lə́ wǒ ŋuu pə̂i?»

¹⁷Pə́ fû lə̂ tsár yi pə́ zúʼ, ə́ ngwo pə̂i-ntə̂ʉ nzəm Yěso Kəlísto. Ə tsâr zêi, ə̂ Nkəʉ Shʉʼʉ yi ə́ leʼtə no Kəlísto.

¹⁸Ə́ pə̂ yə́rə́, mboʼ n ntúŋu ngô: Ńjí ńgó káa Pəyúda lə zûʼ gháp tsâr zei áa? Ə́ ngə́ gháp lə zûʼ. Ə̂ ghíʼ pə́ lə ŋwáʼá cər ŋwaʼa Sê ngô: «Ə nji pətsətə́-nkəʉ Sê lə lər, tə nkə́u yʉʼ tsəm ndəu ndesé, ə tsâr záp lə lər tə nkə́u ləlyəghʼtə́ ndesé.»

¹⁹N nkə̌ ncí mə́ ntúŋu ngô: Ńjí ńgó káa pye Ísə́lahêl lə zúʼ gháp no yi tsâr zêi laghʼ ndâʼ áa? Káa gháp lə zûʼ gháp. Sê lə côghʼ tsâr yé ntsʉ Mə̌usə̂i a lâʼ lə́ páp ngô: «N ngʉ̌ ghʉ̌ lôŋ wei kóʼ ńté pye pi káa gháp lə pə̂ gháp pye lâʼ pâa. N ngʉ̌ pʉ́ʼtə́ záŋə́ lóŋ zéi ńté lâʼ yi kâa tû záp tsóʼo yé.»

²⁰Esǎya ntsətə nkəʉ Sê Esǎya lâʼ tə́ pôghʼ có zə̂u ńgó Sê lâʼ ngô: «Pye pi káa gháp lə pə́ ndôu gháp ghâa, lə pou njwó ghâa. M mbôu ngʉ̂ pye pi káa gháp lə pə́ ntúŋu gháp ghâa có no, jî ŋuu yi məŋ m mbə̌ zʉ́.»

²¹Lə́ mbǒu ngwó lə́ pye Ísə́lahêl, Sê lâʼ ngô: «M mbə̂ leʼé tsəm, ə́ ncághʼə mbô mâa ə́ ndaghʼ ńfûŋ pəghaŋə təi tû, ə́ mbou mbə́ məfwôr nzəm məŋ.»