Read Ngombale Lóma 11 Bible Online

Lóma 11 - Ngombale bible

Lóma 11

¹Ə́ pə̂ yə́rə́, m mə̂ ntúŋu ngô: Ńjí ńgó Sê lə mêʼ pye pé? Ə́ ngə́ kâa pə̂ yé yə́rə́! Ńté ńgó məŋ zâa lə́wó, məŋ ŋuu Ísə́lahêl ə́ nkwǎr lə̂ ngər Ábələhâm, lə̂ cʉŋə-ndə̂ Benjamêŋ.

²Káa Sê lə mêʼ yé pye pé pi a lə záʼ nzʉ̂ ə́ ntsóʼ gháp. Pei kʉ́ʉtə́ yʉʼ ŋwaʼa Sê yi Elyê tsətə nkəʉ Sê pə̌ cər wó, ə́ mə́ ndâʼ no yi ə́ pə́ nzáŋə yé mbi Sê ńté pye Ísə́lahêl ngô:

³«Ə́ Nde, gháp lə jwítə́ pətsətə nkəʉ pô, ə́ mvǒghʼ məyʉʼ mi pə́ nuŋu poʼ wó lə́ gho: N ncʉ̂ʼ mvûʼ məŋə məŋ, gháp pou nkə́ ncí mə́ ndôu njwí ghâa.»

⁴A lə laʼ yə́rə́ gháʼa, tə Sê pwôr yé mə́u ńgó ho? A lə laʼ ngô: «N ndə tétə́ pye tóusʉ saambwô pi káa gháp lə kʉ́ʼtə́ gháp mbi sê Bâal ə́ ngúʼtə́ yé, ə́ ndaghʼ gháp ńgʉ́ pye pâa.»

⁵Ə́ kə́ mbə́ pə́ yə́rə́ mpfu wo, ə́ có ntâʼ pye pə́ wó pi Sê lə lǎghʼ poŋə-ntə̂ʉ yé yi tə́ ndaghʼə ńtsóʼ gháp.

⁶A lə laghʼ pə̂ poŋə-ntə̂ʉ yé yi tə́ ndaghʼə ńtsóʼ gháp, káa a lə tsôʼ yé gháp ńté pə̂ məfaʼ máp, a lə ghíʼi ntsôʼ gháp ntê pə̂ məfaʼ máp mə́i poŋə-ntə̂ʉ yé yi tə́ ndaghʼə yé zêi kâa kə́ mbə̂ yé kwaʼ zěi.

⁷Ə́ laghʼ ndâʼ ńgó ho? Ńgó ə zə̂u yi pye Ísə́lahêl lə pə́ ndôu ngwô, káa gháp lə ghwô gháp zěi; lə́ pye pi Sê lə tsóʼ gháp ghwo zěi. Ə́ ngwǒ lə́ pəcó pye, Sê lə tsóʼó tû záp,

⁸ə́ laghʼ ḿbə́utə́ lə̂ no yi pə́ lə ŋwaʼa cər ŋwaʼa Sê ngô: «Sê lə tsághʼə jîno záp; ə́ ntə́m fwoghʼ nyôghʼ páp, ə́ mbou mbúʼú mətuŋú máp tə ntó nkə́u leʼé wo.»

⁹Fou Davîd lə kə́ ndaʼ yé ngô: «Ńgó lətsei yi gháp fûŋ, ə̂ pə́ ləkei; ə́ mbə́ lənkʉ yi gháp wo pfúŋ mə́u, ə Sê tághʼ ngwôʼ tû páp;

¹⁰ńgó nyôghʼ máp shʉ́ŋ, lə́u gháp kə́ mbyér njwô gháp yʉʼ po; ńgó Sê lâghʼ ngwôʼ ńjíʼ gháp tə gháp cʉ́ʼ ŋə̂i pə̂ ŋuʼú ŋúʼu.»

¹¹Ə́ pə̂ yə́rə́, m mə̂ ntúŋu ngô: Pəyúda lə kotə gháʼá, ə́ pə̂ ńgó gháp fú mpfúŋ ńnúŋ sê tə ə́ pə̂ yi mboʼ gháp kə̂ mbou nde gháp sê po mo? Ə́ ngə́, káa ə̂ pə́ yə́rə́! Gháp lə kotə yə́rə́, ə Sê lei mə́u, ə́ ngʉ̌ pye pi káa gháp pə̂ gháp pəyúda cwôr. A lə ghʉ yə́rə́, ə́ ndághʼ ńdôu ńgó lóŋ pye Ísə́lahêl kôʼ ńté gháp.

¹²Ghíʼ pye Ísə́lahêl lə ghʉ̌ məfaa ə́ leitə yə́rə́, Sê ghʉ̂ ngoŋ ntsəm zʉ̂ tə́koʼ pəi lə̂; ghíʼ pye pi gháp pə́i no Yěso ə́ nou páp khwóghʼ lə̂, ə́ leitə́ yə́rə́ Sê ghʉ̂ pye pi káa gháp pə̂ gháp pəyúda lei mə́u ə́ nzʉ́ tə́koʼ pəi; gháp pə́tsəm lə̌i mbôu mbə́i no Yěso mpfu wo, mə́i lə́u pəi wo fú nkʉ́ʼʉ́ záa gháʼate póo?

¹³N ndaʼ yo no mpfu wo gháʼa lə́ pei pi káa pei pə́ Pəyúda: mə̂ŋ ngaŋə-ntə̂u Yěso Kəlísto, a lə tə́u ghâa ńgó n ngwó ndǎʼ no lə́ pye pi káa gháp pə́ Pəyúda, ghíʼ ə́ pə́ yə́rə́ lə̂, n ngwô lətsei ńté faʼ zâa.

¹⁴M mə̌ njî ńgó n ngwo fǎʼ yə́rə́, pye lâʼ pághʼ jwó, lôŋ gháp kóʼ, ə̂ lêi yə́rə́ ə Sê ghʉ̂ có ntâʼ lə́ páp cwór.

¹⁵Sê lə nyéʼ ntághʼ Pəyúda nzəm, ə́ ngʉ̌ sǎʼ yi lə pə́ təcər zʉ́ Sê gháp pə pye-mə́soŋ ə́ me. Ə leʼé yi Sê ghʉ̌ pyə́ghʼə́ pfú gháp ghʉ̌ fú pə́ gháʼá? Leʼé zêi ghʉ̌ pǒŋ gháʼate, ə́ pə́ ghíʼ ŋuu kwʉ̂ mbou nzʉ̂ʉ lə̂ ləwʉ̂ lə̂!

¹⁶Pə́ lə̌i ngwó lə́ mbələ̂ghʼ, ə́ mbyé nduŋ-mbi kəm ə́ ŋə́ lə̂ Sê, ə́ pə̂ ńgó pfuʼ mbələ̂ghʼ wêi cʉ́ʼ mbə́ pə́ yi Sê. Pə́ lə̌i ŋə́ məŋaŋə tâʼ tʉ̌ lə̂ Sê, ə́ pə̂ ńgó mbô měi cʉ́ʼ mbə́ pə́ mé.

¹⁷Pye Ísə́lahêl pə́ ghíʼ tʉ̌ məwə̂r Olîvə yi pə́ pǐ, Ə́ mə́ mbápə́ ntsúŋú, mə́i Sê lə kwôghʼtə məcó məmbô měi. Ə́ nkwóghʼtə yə́rə́, ə́ mbyé ghô yi koo pə́ ŋuu Pəyúda, ə́ mbə́ ghíʼ pô tʉ̌ məwə̂r Olîvə yi ə́ kôʼ pə́ mbə̂i, ə́ ngwo ndâr lə̂ yʉʼ yi zʉ́ Sê kwóghʼtə́ lêi: o pə̂ mpfu wo, ə́ mə́ nzʉ̂ pəi məci mi ə́ fû lə̂ məŋaŋə tʉ́ məwə̂r Olîvə yi pə́ pə́ mbápə́ ńtsúŋú.

¹⁸Koo o cʉ̂ʼ ndêitə́ yə́rə́, ə́ nzôutə́ məmbô tʉ̌ mi pə́ kə khwóʼ lêi. O yǎa kə́ ŋáʼtə́ ńté hó? Káa gho lə̂ pyéʼ məŋaŋə tʉ̌, məŋaŋə tʉ̌ lə́ pyěʼ wéi.

¹⁹Mboʼ o lâʼ lə́ məŋ ngô: «Pə́ lə khwôʼ məmbô tʉ̌ mêi gháʼá lə̂ ndâr ghâa yʉʼ wó.»

²⁰Ə̂ no lə́nə́ʉ. Pə́ lə kwarə́ gháp yʉʼ wó gháʼá ńté ńgó káa gháp lə ghwô gháp pə̂i-ntə̂ʉ nzəm Yěso Kəlísto, o pou mbə́ yʉʼ wó gháʼá ńté no o ghwô pə̂i-ntə̂ʉ nzəm Yěso Kəlísto. Lə́ koo o lâghʼ ńŋáʼtə́! Laghʼə́ tû zô.

²¹Ghíʼ Sê lə khwóʼ Pəyúda pi gháp pə́ ghíʼ mbô tʉ̌ məwə̂r Olîvə mi pə́ pə́ mbápə́ ńtsúŋú, gho yi o pə̌ ghíʼ ləpô tʉ̌ yi pə́ lə larə́ larə́, o lə̌i ndə́iʼ laghʼə́ tû zô po mə́i pə́ ghʉ̌ nkhwóʼ gho zô lə́wó.

²²Ə́ pə̂ yə́rə́, jwó mbə̂u yi Sê lǎghʼ ńgwǒ poŋə-ntə̂ʉ, ə́ mbǒu nkə́ mbéi pə́ yə́rə́: A pêi nzəm pye pi gháp meʼ laŋə́-ndə̂u záp, ə́ mbou ngwô poŋə-ntə̂ʉ nzəm gho. Lə́ ə́ pə́ ntúŋu ńgó ô pə́ mpfu tsəm, ə́ mə́ njî ńgó a ghwo poŋə-ntə̂ʉ nzəm gho; tə ndə́iʼ yə́rə́ po mə́i a wo khwóʼ gho zô.

²³Lə́ Pəyúda lə̌i ndáʼ mbə́ leʼé có ə́ mbə́i no Yěso Kəlísto, mə́i Sê wo lǎr gháp pə̂ shwi shwî lə̂ tʉ̌ məwə̂r yi pə́ pǐ ə́ mə́ mbápə́ ntsúŋú, ńté no a ghwo mətəʉ lə̂ nkə́ ncí ndâr.

²⁴O pə́ ghíʼ ləpô tʉ̌ məwə̂r Olîvə yi ə́ lə kôʼ cər mbə̂i, mə́i Sê lə khwóʼ ghô ə́ ngwo ndâr lə̂ tʉ̌ məwə̂r Olîvə yi pə́ pǐ, ə́ mə́ mbápə́ ntsúŋú, kwar ndə̂ zô káa lə pə̂ yé yi pə́ nyáŋ khwôʼ gho ə́ wǒ lǎr lə̂ tʉ̌ yi pə́ pə́ mbápə́ ńtsúŋú. Ə́ ngwǒ lə́ Pəyúda mə́i nkwar ndə̂ záp lə pə́ ńgó gháp wo pə́ məmbô tʉ̌ məwə̂r Olîvə mi pə́ pǐ, ə́ mə́ mbápə́ ntsúŋú: Ghíʼ ə́ kə́ mbə́ yə́rə́ lə̂, ə́ wo təi yé mbó Sê lə̂ nkə́ ncí ndâr gháp lə̂ tʉ̌ yi pə́ lə khwóʼ mə́u po.

²⁵Pəfə̌r pâa, n ngwo ghʉ̌ pei jí no yi ə́ pə́ Sê lə ləlwǒ. Ə́ mbóghʼ lə́ pə́ yi mboʼ pei kwâŋ ńgó pei pəghaŋə jîno. Ə no zêi pə́ ńgó pəcó pye lə́ pye Ísə́lahêl pə́ təi tû mbó Sê, ə́ láʼ kə́ ghʉ pə́ yə́rə́ tə́ láʼ kə́u leʼé yi Sê wo ghʉ̌ pye pə́tsəm pi a lə tsóʼ gháp, lə́u gháp pə̂ gháp pəyúda po, gháp shərə́ ə́ mbə́i no Sê.

²⁶Ə̂ ghíʼ Sê ghʉ̌ ghʉ̌ pye Ísə́lahêl pə́tsəm cwór, ə̂ lághʼ ḿbə́utə́ lə̂ no yi Sê pə̌ ndaʼ cər ŋwaʼa ye ngô: «Nzaʼ-nkʉ ghʉ̌ fú túsoŋ Siyôŋ tó, ə́ ghʉ̌ ńgó ngər Yokôp nyér lə̂ nkə́ tə̂i tû mbó Sê.

²⁷Ə kaa yi paghʼ pə pǎp ghʉ̌ wǎr pə́ ńgó, n ngʉ̌ sǒghʼ məfaa ghap.»

²⁸Pə́ pə́ njwô ńgó gháp ghí pəghaŋə mbəu Sê, ə́ ndeitə́ lə̂ no yi gháp lə lə̌ʼ Nkəʉ Shʉʼʉ. Pə́ lə̌i mbóu fú lə̂ no yi ńgó Sê lə̂ lə tsóʼ gháp pə́ jwô ńgó a kə̌ mə́ nkôŋ gháp koŋə́ ńté pəmə́ngâa-njʉʼ páp.

²⁹Kâa Sê pə́ ŋə̂ yé zə̂u lə́ ŋuu, ə́ mbóu mpfú, káa kə́ pə́ tsôʼ yé ŋuu mbóu nkə́p.

³⁰Pei lə pə́ cǒ mpfu, ə́ ndə̂ʼ lə̂ nzúʼ ntsʉ Sê; lə́ ə́ pou ngǐ tə́ʉ mpfu wo, Sê tsâa-mə́jʉ̂ŋ méi ńté ńgó Pəyúda lə kə́ ntəi záp tû mbó Sê lə́wó.

³¹Ə́ kə́ mbə́ pə́ yə́rə́. Pəyúda lə tə̂i tû mbó Sê, ńté tsâa-mə́jʉ̂ŋ yi a lə ghwǒ nzəm pei. Ə̂ lêi yə́rə́, Sê tsáa məjʉ̂ŋ máp záp lə́wó.

³²Sê lə ghʉ pye-mə́soŋ pə́tsəm naa tə̂i tû ŋə́ mbó zʉ́, ńjí ńgó ə́ lei yə́rə́ a nyárə gháp tsâa-mə́jʉ̂ŋ yi a ghwǒ nzəm páp.

³³Kwaʼ lə́nə́ʉ, Sê sâa-sǎa ngúʼ! Jîno yé pə́ tə́ fəiʼi zěi wó, a pə̌ njî ghíʼ zə̂u tsəm ŋəi, mboʼ cǒ ŋuu jî yé zə̂u yi Sê pə̌ nkwaŋ lə̂ ngʉ́ po. Mboʼ cǒ ŋuu jî yé məlaŋə́-ndə̂u mé po.

³⁴Ŋwaʼa Sê pə̌ ndaʼ ngô: «Mboʼ wǒ ŋuu jî mbə̂u yi Sê laghʼ ńkwâŋ məno mé? Mboʼ wǒ ŋuu ŋə̂ yé ntǎghʼ?

³⁵Wǒ ŋuu lə mə́ mbyə̂ghʼ ŋə́ zə̂u lə́ zʉ́, ə́ mboŋə́ pə́ zʉ̂ʼtə pʉŋ zěi?»

³⁶Zə̂u tsəm fû pə́ mbó zʉ́, zʉ́ lə́ pápə ńtʉ́ŋtə́, zə̂u tsəm pou mbə̂ʉ pə́ lə̂ mbó zʉ́. Ləghûʼ pə́ mbó Sê lə̂ mənguʼ mənguʼ! Ámeŋ.