Read Ngombale Lóma 12 Bible Online

Lóma 12 - Ngombale bible

Lóma 12

¹Pəfə̌r, m mə̌ sʉ̂ʉtə wéi ńgó ghíʼ Sê ghwǒ tsâa-mə́jʉ̂ŋ nzəm pághʼə lə̂, pei mêʼ mbəʉ zei lə́ zʉ́, ə́ ndǎghʼ ləcǐ-mbî wei nuŋú poʼ mbó zʉ́. Zêi mbə̂u poʼ poŋə́ Sê gháʼate. Pei lə̌i ngʉ́ yə́rə́, ə́ pə̂ kwaʼ mbə̂u yi pei ghwǒ lə̂ ndághʼ ńgúʼtə́ yé.

²Koo pei ghwô cǐ yi pye nzʉ̂ yo ghwǒ, lə́ pei pə́i Sê ŋə́ wéi jîno yi shwî, ə́ ndaghʼ kə́p məkwaŋtə mi pei cî ngwô. Ə̂ lêi yə́rə́, pei jí zə̂u yi Sê koŋ ńgó pei ghʉ̂, ə́ zə̂u yi ə́ pǒŋ yé, ə́ yi ə́ pǒŋ, ə́ yi fú mbǒŋ gháʼate.

³N ndaghʼ ghíʼ Sê ghwǒ poŋə-ntə̂ʉ yé yi tə́ ndaghʼə nzəm məŋ, ə́ ndǎʼ lə́ pei pə́tsəm ngô: koo pei jwô mbəʉ zéi, koo pei ghʉ̂ pə́ laghʼ wéi ńfúŋ zə̂u yi káa pei yáa mbə́ zěi. Ə́ poŋ ńgó wǒwó jí zə̂u yi a pə̌ zěi. Wǒwó lâghʼ mbə̂u yi a laghʼ ńcôghʼ ntə̂ʉ yé lə̂ Sê, ə́ njí zə̂u yi a pə̌ zěi.

⁴Paghʼə naa ngwǒ tâʼ mbəʉ moʼ, lə́ məyʉʼ měi zâa gháʼate, zarə́-zarə́ yʉʼ ghwo yé faʼ.

⁵Ə́ kə́ mbə́ pə́ yə́rə́ lə́ paghʼə, paghʼə pə̌ tə nzáa gháʼate lə̂, ghíʼ paghʼə nâatə́ lə́ Yěso Kəlísto lə̂, paghʼə cʉ̂ʼ tâʼ mbəʉ moʼ; ə́ ndarə́ mbəʉ zághʼə təcər paghʼə ghíʼ məyʉʼ mbəʉ zʉŋtə lə̂ mbəʉ lə̂.

⁶Sê lə leitə́ lə̂ poŋə-ntə̂ʉ yé yi tə́ ndaghʼə yi a ghwǒ nzəm paghʼə, ə́ ŋə́ ntû faʼ yi wǒwó. Ə ntû faʼ yi ŋuu lə̌i mbə́ lə̂ ntsə́tə nkəʉ yi fû mbó Sê, a kə̂ ntsə́tə́ pə́ lə̂ mbə̂u yi ə́ yǎa mə́ ntúŋu ńgó â tsətə́.

⁷Ə ntû faʼ ŋuu lə̌i mbə́ lə̂ fâʼ mbó pəcó pye, a fâʼ. Ə ntû faʼ ŋuu pə́ lə̂ njyéʼ pye zə̂u, a jyêʼ gháp.

⁸Ə yi ŋuu pə́ lə̂ ncóghʼ mətəʉ pəcó pye, a côghʼ. Ə yi ŋuu pə́ lə̂ ngâp pô, a ghâp tə́ kwaʼ. Ŋuu yi a tə̂ʉ tû-mbi, â ghʉ́ faʼ yé shʉʼʉ. Ŋuu yi a pfûtə pye, â lâghʼ lətsei ḿpfútə́ gháp.

⁹Ə́ poŋ ńgó ŋuu kôŋ fə̌r ye lə̂ ntə̂ʉ yé tsəm. Pei lə̂ʼ no tə́poŋ, ə́ ndǎr mbəʉ zei lə̂ no shʉʼʉ.

¹⁰Pei koŋə́ mbəʉ zéi ghíʼ pəfə̌r koŋə mbəʉ záp təcər páp; pei lâghʼ zaŋə-mbəʉ ńŋə́ məkuʼ méi təcər pei.

¹¹Pei fâʼ mbó Nde tə́ ghʉ̌ lǒŋ, ə́ fǎʼ lə̂ ntə̂ʉ wéi tsəm.

¹²Pei pə́ cər lətsei maa mpfu tsəm, ńté zə̂u yi pei ghí pə́ tsáa, ə́ mə́ njî ńgó Sê ghʉ̌ ŋə́ lə́ pei; ə ngwôʼ pə́ nkə̂u wéi, pei shə̂ghʼ; pei sʉ́ʉtə́ Sê tə́ kâa.

¹³Pəfə̌r péi pə́ mbûŋ zə̂u, pei ŋə̂ zěi lə́ páp, ə́ mbou mpfú pəghəʉ nzeʼ pei maa mpfu tsəm.

¹⁴Ə́ sʉ́ʉtə́ Sê ńgó a cóghʼ mbwórə lə́ pye pi gháp pə́ ngághʼə wéi; pei sʉ́ʉtə́ yé ńgó a cóghʼ pə̂ mbwórə, koo a côghʼ ndou tû páp.

¹⁵Pei pə pye pi gháp pə́ ntsěi nâa ntsěi, pei pə pye pi gháp pə́ ngeʼtə́ nâa ngeʼtə́.

¹⁶Pei tsár ńzúʼú təcər pei. Koo pei lôu pə́ lə̂ mbə́ pye jwǐ, pei fâʼ məfaʼ mi pə́ nyárə ńgó pei ngaŋə shúʼu-mbəʉ. Koo pei nyárə ńgó pei jî no.

¹⁷Koo ŋuu ghʉ̂ no tə́poŋ lə́ pei, pei lâghʼ có ḿbʉ̂ŋ. Pei sáʼ təʉ lə̂ nkə́ ngʉ̂ pə̂ məno shʉʼʉ, lə́ ŋuu ntsəm.

¹⁸Pei ghʉ̂ lə̂ mbə̂u yi ə́ lə̌i ntə́i mêi pə́ lə́ pei, pei pə pye pə́tsəm nyáŋ lə̂ mbwórə.

¹⁹Pəsə̌u pâa, koo pei pʉ̂ŋ mbəu no tə́poŋ yi pə́ ghʉ̌ lə́ pei pə́ pei, lə́ pei nyér Sê lə̂ nyárə́ gháp záŋə-lóŋ yé, ńté no Nde pə̌ ndâʼ cər ŋwaʼa ye ngô: «Məŋ lə̂ ghʉ̌ pʉ̌ŋ mbəu no tə́poŋ. N ngʉ̌ fú lə̂ faʼ yi wǒwó, ə́ côghʼ yé zə̂u laa pô zʉ́!»

²⁰A kə̌ ncí mə́ ndâʼ ngô: «Nji lə̌i mə́ nzáŋə ngaŋə-mbəu gho, o ŋə̂ məzʉ̂ a zʉ̂; ə ndě-nci pə́ nzə̂u yé, o ŋə̂ nci a nô; ńté ńgó o lə̌i ngʉ́ yə́rə́, mə́i sə̂ʉ wo kó yé, â kə́p cǐ yé.»

²¹Koo o pə̂i no tə́poŋ zʉ̂ gho. Tə ncʉ́ʼ yə́rə́, o pə̂ ŋuu yi a laghʼ no shʉʼʉ ḿmâʼ no tə́poŋ ə́ nzʉ́.