Read Ngombale Lóma 13 Bible Online

Lóma 13 - Ngombale bible

Lóma 13

¹Wǒwó ghwo lə̂ nzúʼ ntsʉ pye pi gháp nyáŋ lwoŋ, ə́ mə́ sâʼ lâʼ. Ńté ńgó mətəʉ laghʼ ńsáʼ lâʼ mə́tsəm fû pə́ mbó Sê; pəfou pi ə́ nyáŋ lwoŋ, zʉ́ lə́ lə nyáŋə́ gháp.

²Ə́ pə̂ yə́rə́, ə́ mbə́ ńgó ŋuu yi a ləʼ lə̂ nzúʼ no yi pəsǎʼ lâʼ lǎʼ zěi, â jí ńgó a ləʼ gháʼá no yi Sê lǎʼ zěi. Pye pi gháp ləʼ lə̂ nzúʼ no yi pəsǎʼ lâʼ lǎʼ zěi, shuŋ gháʼá ngwôʼ pə́ páp ə́ ntâghʼ tû páp.

³Ńté ńgó pye pi gháp ghʉ məno shʉʼʉ kâa ghwô gháp lə̂ mbóghʼ pəsǎʼ lâʼ, pye pi gháp ghʉ məno tə́poŋ lə́ ghwǒ lə̂ mbóghʼ gháp. O lə̌i nkôŋ lə̂ nyáŋ tə́ pə́ mbôghʼ pəsǎʼ lâʼ, o ghʉ̂ məno mi ə́ pə́ ndʉŋ-ndʉŋ, ə́ njí ńgó ə́ lei yə́rə́ pə́ ŋə̂ məkuʼ mô,

⁴pəsǎʼ lâʼ faʼ pə́ mbó Sê, lə̂ ndâghʼ ńŋə́ mətəʉ mô lə̂ ngʉ́ məno shʉʼʉ. Lə́ mbə́ yi o lə̌i mə́ ngʉ̂ məno tə́poŋ, o pôghʼ pəsǎʼ lâʼ! Ńté ńgó káa pə lə mêi yé měi ə́ ŋə́ gháp mətəʉ lə̂ ntághʼ ngwôʼ tû pye pi gháp ghʉ̌ məno tə́poŋ: gháp faʼ pə́ mbó Sê, lə̂ ngʉ́ ŋuu yi a pə̌ ngʉ məno tə́poŋ jî ńgó Sê pə̌ nzáŋə́ lóŋ lə́ zʉ́.

⁵Ə̂ zə̂u yi ə́ ghʉ̌, ə́ pə́ ntúŋu yé ńgó paghʼə zúʼ ntsʉ pəsǎʼ lâʼ. Káa paghʼə zûʼ ntsʉ pəsǎʼ lâʼ ńtê pə̂ no paghʼə pə̌ mbôghʼ záŋə-lóŋ Sê, paghʼə zúʼ ntsʉ gháp ńté ńgó ntə̂ʉ wághʼə pə́ ndaʼ ńgó paghʼə ghwo lə̂ ngʉ́ yə́rə́.

⁶Ə́ kə́ ncí mbə́ zə̂u yi ə́ ghʉ̌ pei pə̂ mâʼ ntsəp ə́ ŋə̂ mbó pəsǎʼ lâʼ. Ə pye pi gháp pfû, ə̂ pye pi Sê lə̂ tǎghʼ gháp yʉʼ wó, lə̂ ntsúŋú ndáa-tû záp, ə́ fǎʼ faʼ zêi.

⁷Pei ŋə́ zə̂u yi pei yǎa ngwǒ lə̂ ŋə́ lə́ ŋuu, lə́ zʉ́: ə́ laghʼ ńdâʼ gháʼá ńgó pei mâʼ məntsəp mə́tsəm mi ə́ pə́ ntúŋú, ə́ ŋə́ mbó pye pi gháp ghwǒ lə̂ mpfú; ə́ nzúʼ ntsʉ ŋuu yi pei ghwǒ lə̂ nzúʼ ntsʉ yé, ə́ ŋə́ məkuʼ ŋuu yi pei ghwǒ lə̂ ŋə́ məkuʼ mé.

⁸Koo pei ghwô ŋuu nzǒ, tə ndyéʼ ghíʼ mboʼ ə́ pə̂ pə́ yi nkoŋə, pei koŋə́ mbəʉ zéi təcər. Ŋuu lə̌i ngwô koŋə nzəm pye-mə́soŋ, mə́i a fǔ ngʉ gháʼá zə̂u tsəm yi ləpə̌ʉ Sê pə́ ntúŋú.

⁹Pei pə̂ njî məntǎghʼ Sê mi ə́ laʼ ngô: «Koo o ghʉ̂ məghap, koo o jwî ŋuu, koo o jû zə̂u ŋuu, koo o nâŋ zə̂u ŋuu ə́ ntsáa ńgó ə́ təi pə́ pə̂ zô», pə́ lə ghí lyəghʼtə́ ə́ nǎa mətû məntǎghʼ mêi gháp pə́ məcó ə́ nkə́r ngô: «O ghwo lə̂ nkôŋ fə̌r gho ghíʼ o koŋ tû-mbəʉ zô.»

¹⁰Ŋuu yi a koŋ fə̌r ye kâa pə́ ngʉ̂ yé có no tə́poŋ lə́ zʉ́. O lə̌i nkôŋ fə̌r gho, mə́i o fǔ ŋə̌i ghíʼ ləpə̌ʉ tsəm pə́ ntúŋú.

¹¹Pei pə̌ njî mpfu mbi yi paghʼə pə̌ mə́u mpfu wo, yo mpfu yi pei ghwǒ lə̂ njyê. Ə mpfu yi Sê wo ghʉ̌ paghʼə cwôr, ncʉ́ŋə́ mə́ tə mbáatə́ ə́ ndêi mpfu yi paghʼə lə pə́i no Kəlísto.

¹²Yo pə́ mə́ nkôʼ-nzʉ̂, ə́ cʉ̂ʼ mpfu pwô nzʉ̂ fóghʼ. Ghíʼ ə́ kə́ mbə́ yə́rə́ lə̂, paghʼə kwárə́ mbəʉ zághʼə lə̂ məno tə́poŋ mi paghʼə lə ghʉ̂ cər nzə̌m. Ə́ khwôr məzə̂u ntso mi pə́ laghʼ ńdwóʼo ntso lə̂ yʉʼ yi nkeʼ pə̌ wó.

¹³Paghʼə ŋə̂i ghíʼ ə́ yaa mə́ ntúŋú, ə́ ndʉŋ-ndʉŋ ghíʼ pye pi gháp ŋəi ntə̌ʉ-nəu pə́ ŋə̌i. Koo paghʼə zʉ̂ məzʉ̂ mbaa nó məluʼ lə̂ ghəghəʉ. Koo paghʼə pə̂u nzóʼ, koo paghʼə ghʉ̂ məno məghap, paghʼə páa lə̂ nyáŋ ngʉ̂ məfeʼ təcər paghʼə, ə́ mbou mbáa lə̂ náŋ zə̂u ŋuu ə́ ŋwə́itə́.

¹⁴Pei pə́ ghíʼ Nde Yěso Kəlísto koŋ ńgó pei pə́. Koo pei côghʼ tû zéi lə̂ ngʉ̂ məno mi mbəʉ zéi cʉ́ŋə wéi lə̂ ngʉ̂.