Read Ngombale Lóma 14 Bible Online

Lóma 14 - Ngombale bible

Lóma 14

¹Pei pfú ŋuu yi pə̂i-ntə̂ʉ yé pwôr təcər pei, tə́ tó lǒʼ lə̂ ye mbə̂u yi a laghʼ ńkwâŋ.

²Mboʼ pə̂i-ntə̂ʉ ŋuu laʼ lə́ zʉ́ ńgó â zʉ́ zə̂u tsəm, lə́ ə́ ngwǒ lə́ cǒ ŋuu, pə̂i-ntə̂ʉ yé pwôr tə ndâʼ lə́ zʉ́ ńgó mboʼ a mpfâr yé pə̂ nzap.

³Ə ŋuu yi a pfâr zə̂u tsəm káa a ghwô yé lə̂ ngwághʼ ŋuu yi káa a pə́ mpfâr yé mbap, káa ŋuu yi a pə̌ mpfâr mbap ghwô yé lə̂ ntó lǒʼ ŋuu yi a pfâr yé pə̂ zə̂u tsəm, ńté ńgó Sê lə kə́ mbə́i no yé yé lə́wó.

⁴Ô zô wǒ tə ntô lǒʼ ngaŋə-faʼ ŋuu ndeʼe? A lə̌i mə́ fâʼ shʉʼʉ kəʉ ndə́iʼ pə́ fǎʼ po, mə́i ə́ nâŋtə pə́ tə́-faʼ ye. Ngaŋə-faʼ wêi wo, wo fǎʼ shʉʼʉ, ńté no Nde ghwo mətəʉ lə̂ ndághʼ ńtóutə́ yé.

⁵Pəcó pye kwaŋ ńgó məcó məleʼé lâʼ lei məcó, pəcó kwaŋ záp pə́ ńgó məleʼé lâʼ mə́tsəm pə́ pə́ tâʼ zə̂u. O lə̌i mbə́i mə́ nkwâŋ pə́ lə́ zarə́ mbə̂u, ə́ pə̂ ntúŋu ńgó o tsúŋú njí no yi o pə̌ nkwaŋ zěi cər ntə̂ʉ gho.

⁶Ə ŋuu yi a kwaŋ ńgó có leʼé lâʼ lei có, ghʉ yə́rə́ ə́ ndághʼ ńŋə̂ pə́ ləghûʼtə mbó Nde; ə ŋuu yi a jwô zə̂u tsəm ə́ nzʉ̂ yé zʉ́, ghʉ yə́rə́ ə́ ndághʼ nkə́ ńŋə̂ pə́ ləghûʼ mbó Nde, ńté ńgó a ŋə̂ gháʼá nkhwo mbó Sê lə̂ məzʉ̂ mei. Ŋuu yi káa a pə́ nzʉ̂ yé zə̂u tsəm, ghʉ yə́rə́ ndághʼ ńŋə̂ ləghûʼtə mbó Sê, ə́ nkə́ ndághʼ ńŋə̂ yé pə́ nkhwo mbó Sê.

⁷Ńté ńgó káa cǒ ŋuu ghí pə́ cî mbî, ə́ ndaghʼ pə́ ndʉʉ mətəʉ ye ncí, káa cǒ ŋuu pə́ ngí kwʉ́, ə́ nkoŋ yé pə́ zʉ́.

⁸Paghʼə lə̌i mə́ ncî mbî, mə́i paghʼə cî mbi lə̂ fâʼ mbó Nde, ə́ nkə́ nkwʉ́, mə́i paghʼə kwʉ̂ pə́ lə̂ fâʼ mbó zʉ́. Ə́ laghʼ ḿbə́ ńgó paghʼə lə̌i mbə́ ntəʉ, kəʉ nkwʉ́ kwʉ́, paghʼə pə̂ pə́ pye Nde Yěso Kəlísto.

⁹Ńté ńgó a lə kwʉ́ mbǒu nzʉ́ʉ lə̂ ləwʉ̂ gháʼá lə̂ mbə́ Nde mbó pəpfû, mbaa mbó pətəʉ.

¹⁰Lə́ ə́ ngwǒ lə́ gho, o tô lǒʼ fə̌r gho ńté hó? Gho zô, o wâghʼ fə̌r gho ńté hó? Paghʼə pə́tsəm ghwo lə̂ ngʉ́ ntə́ʉ mbi Sê, a fêʼ wághʼə.

¹¹Nde Sê pə̌ ndaʼ cər ŋwaʼa ye ngô: «Məŋ Nde yi m mbə̌ ntəʉ, n ndaʼ ngô: pye-mə́soŋ pə́tsəm ghʉ̌ kʉ́ʼtə́ sê mbi məŋ, ə́ ghúʼtə́ ghâa wǒwó pə́i mbi lâʼ ńgó məŋ Sê.»

¹²Ə́ pə̂ yə́rə́, ə́ mbə́ ńgó wǒwó təcər paghʼə ghʉ̌ tə́ʉ mbi Sê, ə́ pyétə́ ntsʉ yé pə́ zʉ́, ə́ lǎʼ ghíʼ ye faʼ lə ŋə̌i.

¹³Ə́ pə̂ yə́rə́, ə́ mbə́ ńgó paghʼə nyér lə̂ nkə́ mə́ ntô məlǒʼ mághʼə təcər paghʼə. Lə́ zə̂u yi mboʼ pei ghʉ̂ pə́ ngô: pei páa lə̂ ngʉ̂ có zə̂u yi mboʼ fə̌r wei lêi mə́u, ə́ nkotə́ ḿpfúŋ, kəʉ yi mboʼ ə́ cʉ́ŋə yé, a fâa no.

¹⁴N ndei lə́ Nde Yěso, ə́ fú mə́ njî ńgó có zə̂u yi ə́ ghwǒ lǒʼ kâa pə̂ yé wó. Lə́ mbə́ yi ŋuu lə̌i nkwáŋ ńgó có zə̂u ghwo lǒʼ, mə́i ə́ wo ghwǒ lǒʼ pə́ mbó zʉ́.

¹⁵O lə̌i ndághʼ zə̂u yi o zʉ̂ zěi ńgʉ́ pə̂i-ntə̂ʉ fə̌r gho pwór, ə́ laghʼ ḿbə́ ńgó koo o pyér ngwô gho nkoŋə nzəm zʉ́. Koo o lâghʼ no məzʉ̂ ə́ ngʉ̌ tâʼ fə̌r yi Kəlísto lə kwʉ́ ńté tû yé kə̂u cwí!

¹⁶Koo pei ghʉ̂ ńgó zə̂u yi ə́ pə́ yi shʉʼʉ mbó péi, ə̂ cʉ́ʼ mbə́ pə́ yi pye wo lěi mə́u ə́ kʉ́ʉ wéi tə́poŋ.

¹⁷Ńté ńgó Ləfou Sê kâa pə̂ yé no məzʉ̂, káa kə́ pə̂ yé no məluʼ. Ləfou Sê pə́ pə́ ńgó pə ghʉ̂ məno mi ə́ pə́ ndʉŋ-ndʉŋ, ə́ mbə́ lə̂ nyáŋ lə̂ mbwórə́ mbaa lə̂ lətsei, ə́ pə̂ məzə̂u mi ə́ fû mbó Zəghʼə Ndêi-lěi.

¹⁸Ŋuu lə̌i mə́ fâʼ mbó Kəlísto ə́ ngwô zei yo cǐ, mə́i no yé wo poŋə́ Sê, pye-mə́soŋ póu mbə́i no yé.

¹⁹Ə́ pə̂ yə́rə́ mbə́ ńgó paghʼə lôu pə̂ zə̂u yi ə́ wo ghʉ̌ paghʼə nyáŋ lə̂ mbwórə, mbaa yi ə́ pə́ ngʉ pə̂i-ntə̂ʉ zághʼə pə́tsəm ghûʼ.

²⁰Koo o lâghʼ no məzʉ̂ ńcǒŋ faʼ Sê. Kwaʼ lə́nə́ʉ məzʉ̂ mə́tsəm ə̂ mi mboʼ pə́ zʉ̂, lə́ ə́ pə̂ no tə́poŋ ghíʼ mboʼ o zʉ̂ məcó məzʉ̂ mi mboʼ fə̌r gho leitə́ mə́u ə́ mpfú lə̂ məfaa.

²¹Mboŋə́ ndə̂ʼ mbap, ə́ ndə̌ʼ məluʼ, ə́ ndə̌ʼ zə̂u tsəm yi mboʼ fə̌r gho lêitə́ mə́u ə́ mpfú lə̂ məfaa.

²²Ə kwaŋtə yi o ghwǒ zěi cər ntə̂ʉ gho ńté no zêi yo, lóʼo zěi pei Sê lə̂ jí. Ndʉʉ mboŋ ŋuu yi a ghí pə́ ghʉ no, káa kwaŋtə yé pə́ fêʼ yé yé.

²³Lə́ ŋuu lə̌i mə́ ngwô nzʉ̂ məzʉ̂, kwaŋtə yé pə́ fêʼ yé, a kə́ nzʉ́ zʉ́, mə́i Se wo tághʼ ngwôʼ tû zʉ́, ńté ńgó káa a ghʉ̂ yé gháʼá zə̂u yi ə́ pə̌u lə̂ no yi a pə̂i zěi nzəm Kəlísto. Ə no tsəm yi kâa pə̂u lə̂ no pə̂i-ntə̂ʉ nzəm Yěso Kəlísto, ə̂ məfaa.