Read Ngombale Lóma 15 Bible Online

Lóma 15 - Ngombale bible

Lóma 15

¹Paghʼ pə pye pi pə̂i-ntə̂ʉ záp nzəm Yěso Kəlísto təitə́ mə́ tə paghʼ pə pǎp pə̂ njî ghíʼ mboʼ paghʼ ghʉ̂, ghwo lə̂ ndághʼ ntə̂ʉ shʉʼʉ ńtóutə́ pye pi pə̂i-ntə̂ʉ záp nzəm Yěso Kəlísto pyér ntʉŋə tʉŋə́. Káa paghʼ ghwô wághʼ lə̂ ngʉ́ pə̂ zə̂u yi ə́ wo poŋə́ wághʼ.

²Ə́ pə́ ntúŋu ńgó wǒwó təcər paghʼə lôu pə́ lə̂ ngʉ́ zə̂u yi ə́ wo poŋə́ fə̌r yé, ə́ yi wo ghʉ̌ fə̌r ye zúʼ shʉʼʉ, ə́ pǒu ghʉ̌ pə̂i-ntə̂ʉ fə̌r yé nzəm Yěso Kəlísto ghúʼ.

³Ńté ńgó Kəlísto káa lə lôu yé pə́ lə̂ ngʉ́ zə̂u yi ə́ poŋə́ yé. Tə ncʉ́ʼ yə́rə́, mə́i no yi pə́ lə ŋwáʼá cər ŋwaʼa Sê lə pəutə́ lə́ zʉ́ ngô: «Mənzou mi pə́ lə təi lǎghʼ zóutə́ gho, pə́ lə cʉ́ʼ ndághʼ ńzóutə́ pə́ ghâa.»

⁴Ə zə̂u tsəm yi paghʼə jwô cər ŋwaʼa Sê, ə̂ yi pə́ lə ŋwáʼá tə fú ntsəmbi lə̂ ndághʼ ńtághʼ wághʼə, ńjí ńgó paghʼə lei mə́u, ə́ ngwǒ shəghʼ-ntə̂ʉ, ə́ pou ncóghʼ mətəʉ mághʼə lə̂ ndághʼ ḿbáp zə̂u yi Sê lə ghʉ̌ ndaʼá mə́u lə̂ ngʉ́ ŋə́ lə́ paghʼə.

⁵Ńgó Sê yi zʉ́ lə́ ŋə̂ wéi shəghʼ-ntə̂ʉ, ə́ mbou ncôghʼ ntə̂ʉ wéi, â ghʉ́ pei kûʼ lə̂ ntsár nzúʼú təcər pei, ə̂ lághʼ ḿbə́ ghíʼ Yěso Kəlísto pə̌ nkǒŋ.

⁶Ə́ pə̂ yə́rə́, pei pə́tsəm nâatə́ mənji méi ə́ ndághʼ tâʼ ntə̂ʉ ńgúʼtə́ Sê, zʉ́ yi a pə̌ Tə́ pə Nde wághʼə Yěso Kəlísto.

⁷Ə́ pə̂ yə́rə́, pei pfú mbəʉ zéi təcər pei, ghíʼ Kəlísto lə pfú wéi, ə̂ lêitə́ yə́rə́ pə ghúʼtə́ ləjôghʼ Sê.

⁸Kwaʼ lə́nə́ʉ, məŋ ndaʼ lə́ péi ńgó Kəlísto lə cʉ́ʼ ngaŋə-faʼ Pəyúda, lə̂ ndághʼ ńgʉ̌ ńgó ə zə̂u yi Sê lə ghʉ̌ ndáʼá mə́u mbó pəmə́ngâa-njʉʼ pághʼə pəutə. Mbaa lə̂ ndághʼ nyárə́ ńgó ə Sê laʼ ngʉ́.

⁹A lə kə́ ncí ntó lə̂ ngʉ́ pye pi kâa pə́ Pəyúda ghúʼtə́ Sê ńté tsâa-mə́jʉ̂ŋ yi zʉ́ Sê ghwǒ lə́ pye-mə́soŋ; ə́ pə̂ ghíʼ pə́ lə ŋwaʼá cər ŋwaʼa Sê ngô: «Ə̂ zə̂u yi ə́ ghʉ̌, n ngʉ̌ ghúʼtə gho təcər məlâʼ mi kâa pə̂ yé pəyúda, ə́ pǒu zǎp lə̂ ndághʼ ńŋə́ məkuʼ mô.»

¹⁰Ŋwaʼa Sê kə̌ ncí mə́ ndâʼ ngô: «Pye pi káa gháp pə́ Pəyúda, pei pə pye pi Sê lə tsóʼ gháp ə́ ndaghʼ ńgʉ́ pye pé nâa ntsěi!»

¹¹Pə́ kə́ ncí ŋwaʼá cər wó ngô: «Pei pə́tsəm pi káa pei pə́ Pəyúda, pei ghúʼtə́ Nde, pei pə́tsəm zâp mənci ndághʼ ńgúʼtə́ yé!»

¹²Ntsətə-nkəʉ Sê Esǎya lə kə́ ndaʼ yé ngô: «Ŋuu ngər-ndə̂ Jesê ghʉ̌ tó, a ghʉ̌ lěsê ə́ sáʼ ngoŋ pye pi káa gháp pə́ Pəyúda, gháp cóghʼ ntə̂ʉ lə́ zʉ́, ə́ mə́ nzʉ̂ʼtə ńgó â ghʉ́ gháp cwór.»

¹³Ńgó Sê yi a ghʉ pei kûʼ lə nzʉ́ʼtə́ zə̂u yi a lə ghʉ̌ ndáʼá mə́u lə̂ ngʉ́ ŋə́ lə́ pei, lêitə́ lə̂ pə̂i-ntə̂ʉ yi pei ghwǒ nzəm zʉ́, ə́ fú ŋə́ wéi lətsei gháp mbwórə tə có zə̂u kə́ mbûŋ yé mə́u po, ə̂ pə́ yə́rə́, mətəʉ Zəghʼə Ndêi-lěi ghʉ̂ pei fú nyáŋ, ə́ ntsúŋú mə́ nzʉ̂ʼtə zə̂u yi Sê lə ghʉ̌ ndáʼá mə́u lə̂ ngʉ́ ŋə́ lə́ pei.

¹⁴Pəfə̌r, n fǔ ntsúŋú mə́ njî ńgó kwaʼ pei zéi ghwo ntə̂ʉ shʉʼʉ. Pei pə̌ njî zə̂u tsəm yi ə́ yǎa mə́ ntúŋu ńgó pə jí, ə́ mbou nkûʼ lə ntághʼ mbəʉ zéi təcər pei.

¹⁵Lə́ mə́i n ndə wo lə̂ məcó məyʉʼ cər pəŋwaʼa pi n ndə ŋwáʼá ə́ ŋə́ lə́ pei, ə́ ndǎghʼ zaŋə-mbəʉ ńkʉ́ʉtə́ wéi məzə̂u mi pə́ lə jyéʼ wéi. N ndə ŋwaʼa yə́rə́ ńté no shʉʼʉ yi Sê lə lǎghʼ poŋə-ntə̂ʉ yé yi tə́ ndaghʼə ńgʉ́ lə́ məŋ,

¹⁶ə́ mbou ndâghʼ ghâa ńgʉ̌ ngaŋə-faʼ Yěso Kəlísto, lə̂ fâʼ mbó pye pi káa gháp pə́ Pəyúda. A lə tsóʼ ghâa lə́ pə́ yi n ngwo ŋáa tsətə́ Nkəʉ Shʉʼʉ yi ə́ fú mbó Sê mbó páp, ńjí ńgó Zəghʼə Ndêi-lěi ghʉ̂ gháp cʉ̂ʼ mbə́ ghíʼ poʼ yi pə́ ŋə̂ mbó Sê, ə́ pə̂ yi ə́ poŋə́ yé.

¹⁷Ə̂ zə̂u yi ə́ ghʉ̂ n ndâghʼ ghíʼ paghʼ Yěso Kəlísto təmtə́, ə́ ngwǒ lətsei lə̂ faʼ yi məŋ faʼ zěi mbó Sê.

¹⁸Ńté no, ə́ lə̌i mbə́ yi m mboʼ ndâʼ có no, ə ndâʼ ńté pə̂ faʼ yi Kəlísto lə lěi lə́ məŋ, ə́ ngʉ́ lə́ pye pi káa gháp pə́ Pəyúda, gháp zûʼ ntsʉ Sê. A lə ghí ghʉ yə́rə́, ə́ ndêi lə̂ ntsâr zâa mbaa lə̂ məngʉ̌ məno mâa,

¹⁹a lə ghʉ yə́rə́, ə́ ndeitə́ lə̂ mənkəʼə-məno gháp pə pəndǎa-jwô məno mi Zəghʼə Sê lə ŋə́ ghâa mətəʉ lə̂ ndághʼ ńgʉ̌, ə́ pə̂ mi ə́ nyárə mətəʉ Sê. Yo mbə̂u yi n ndə lǎghʼ sâa-sǎa ńdeʼtə́ Nkəʉ Shʉʼʉ Kəlísto lə̂ fú túsoŋ Yelúsalêm, ə́ ngwo nkə́u cər paghʼə-ngoŋ Ilirî.

²⁰Lə́, n ndə koŋ lə̂ ntsə́tə́ Nkəʉ Shʉʼʉ pə́ lə̂ məyʉʼ mi pə́ laa kə́ zúʼ ghíʼ pə́ kʉ̂ʉ ləjôghʼ Kəlísto wó, ńté ńgó kâa n ndə pə́ nkôŋ ghâa lə̂ ntághʼ ndə̂ ndəu cû ndə̂ yi pye mə́ndeʼe lə póu.

²¹Ə́ faʼ yə́rə́, ə́ laghʼ ḿbə́ ghíʼ pə́ lə ŋwaʼá cər ŋwaʼa Sê ngô: «Pye pi pə́ laa kə́ lâʼ yé gháp no yé ghʉ̌ jwó yé, pye pi gháp laa kə́ zûʼ gháp ghíʼ pə́ kʉ́ʉ no yé, ghʉ̌ zúʼ.»

²²Zə̂ zə̂u yi ə́ kə́ʼtə́ mə́ ghâa məku tə nzáa lə̂ ntó lâʼ pei.

²³Lə́ lə̂ mpfu wo, m myâghʼ mə́ məfaʼ mâa cər mwo məpaghʼə-ngoŋ. Ə́ pə́ mə́ mənguʼ tə nzáa ghíʼ n nkə̌ nkwǎŋ kwaŋə́ lə̂ ntó ngwó wéi,

²⁴n ntáa pə́ lər lə̂ Esəpânyə, ə́ kə́u tə́ʉ lâʼ pei. N nkwaŋ ńgó n ngǐ pə́ lər lə̂ wó ə́ jwó wéi, ə́ mbou fú mə́ njî ńgó pei wo tóutə́ ghâa lə̂ ndə́r tə nkə́u wó, lə́ paghʼə wo nyéʼ cí m mboŋə́ lə̌r.

²⁵Lə́, m mə̌ ndər lə̂ Yelúsalêm mpfu wo, lə̂ mpfútə́ pye Sê pi ə́ pə́ cər túsoŋ zêi.

²⁶Ńté no pye-Kəlísto pi paghʼə-ngoŋ Masedwânə gháp pə pi gháp pə́ cər yi Akayî, lə mâʼ nkâp lə̂ ndághʼ ńtóutə́ pye Sê pi gháp pə́ pəghaŋə-ngwôʼ cər túsoŋ Yelúsalêm.

²⁷Gháp lə jwó pə́ páp ńgó gháp wo pfútə́ gháp, ə́ ŋə̂ məzə̂u lə́ páp yə́rə́, ə́ ndághʼ ńtʉ̂ nzǒ yi gháp pə́ pǎp lə ghwǒ. Ńté ńgó Pye-Kəlísto pi káa gháp pə́ Pəyúda lə pfútə́ gháp lə̂ njí no Sê. Gháp pôu ngwô lə̂ ŋə́ məzə̂u lə́ páp, ə́ ndaghʼ ḿpfútə́ gháp záp lə́wó.

²⁸N ndə̌i ngʉ́ ntʉ́ŋtə́ no zêi tə ə́ ŋə́ nkâp zêi mbó cûʼtə pye Kəlísto Yelúsalêm, m mə̂ ndə̂r lə̂ Esəpânyə, ə́ nděi lâʼ pei.

²⁹N ntsuŋu mə́ njî ńgó n ngʉ̌ tó tə kə́u lâʼ pei, ə mbwórə yi fû mbó Kəlísto nzéʼ ncwə́rə́ lə́ pei.

³⁰Pəfə̌r, ə zə̂u yi m mə̌ ndaghʼ ləjôghʼ Nde wághʼə Yěso Kəlísto, mbaa nkoŋə yi ə́ fû mbó Zəghʼə Ndêi-lěi, ńtúŋú wéi pə́ ngô: Pei sʉ́ʉtə́ Sê ńgó â tóutə́ ghâa, paghʼə pə́tsəm nâa ndwóʼó.

³¹Pei sʉ́ʉtə́ Sê ńgó â pápə́ ghâa tə n ndwôghʼ pətəpə̌i-no Sê pi ə́ pə́ cər paghʼə-ngoŋ Yudêi, mbaa ńgó pye Sê pi gháp pə́ Yelúsalêm pfú ləpuʼú zêi lə̂ məkuʼ.

³²Ə́ pə́ yə́rə́, Sê pə́i, n ndâghʼ lətsei ńtó lâʼ pei, ə́ nkə́u wó ə́ nyéʼ nzə́tə́.

³³Ńgó Sê yi mbwórə tsəm fû pə́ mbó zʉ́, pə́ lə́ pei pə́tsəm. Ámeŋ.