Read Ngombale Lóma 16 Bible Online

Lóma 16 - Ngombale bible

Lóma 16

¹N ncǒghʼ Febe yi a pə̌ fə̌r waghʼə yi məngyě mbó pei, a faʼ faʼ Sê cər cûʼtə pye Kəlísto yi ə́ pə́ Saŋkərê[2]. Məfaʼ pəghaŋə-ntə̂u 18.18

²Pei lâghʼ ləjôghʼ Nde ḿpfú yé, lə̂ mbə̂u yi ə́ pə́ ntúŋu ńgó Pye Sê pfú pəfə̌r páp yə́rə́, a póu mə́ mbûŋ pə̂ hó zə̂u, ə́ ntúŋú wéi pei ŋə̂ lə́ zʉ́. Zʉ́ tû-mbəʉ yé pfútə́ mə́ pye tə nzáa, ə́ mbou mpfútə́ kwaʼ tû-mbəʉ zâa.

³Pei tsêʼtə́ Pərəsîlə gháp Akilásʉ, gháp pə pye pi paghʼ pə pǎp naa fâʼ mbó Yěso Kəlísto.

⁴Ə́ lə cʉ́ʼ məyʉʼ gháp kwʉ́ ńté tû zâa. Kâa m mbə́ ndaʼ ŋuu yi a ŋə̂ nkhwo lə́ páp, tə mbaa məcûʼtə pye-Kəlísto mə́tsəm mi káa gháp pə̂ gháp pəyúda kə́ mə́ ŋə̂ záp nkhwo lə́ páp lə́wó.

⁵Pei tsêʼtə́ mbaa cûʼtə pye Kəlísto yi ə́ kəitə ndə̂ páp. Pei tsêʼtə Epayinêtə, fə̌r ghâa yi lətəi-ndwuŋ. A nduŋ-mbi ŋuu yi a lə pə́i no Yěso Kəlísto cər paghʼə-ngoŋ Azî.

⁶Pei tsêʼtə́ Mǎyaa, a lə faʼ gháʼate ńté wéi.

⁷Pei tsêʼtə́ Adəronikwísʉ gháp Jwinyǎasʉ, gháp pye lâʼ pághʼ, paghʼ pə pǎp lə nǎa mbə́ ndə̂-tsâŋ. Gháp pəghaŋə-ntə̂u Yěso Kəlísto pi jwǐ, gháp lə tsəmbi mbə́i no Kəlísto, m mboŋə́ pə̂i zâa.

⁸Pei tsêʼtə́ Əmpilatúsʉ, â sə̌u ghâa yi lətəi-ndwuŋ nzəm Nde.

⁹Pei tsêʼtə́ Wirəbêŋ, â ngaŋə-ku waghʼə cər faʼ Kəlísto. Pei tsêʼtə́ sə̌u ghâa yi lətəi-ndwuŋ Stakísʉ.

¹⁰Pei tsêʼtə́ Apelə́sʉ, a kə ghʉ məzə̂u mi ə́ sâa-sǎa nyárə́ ńgó a ghwo pə̂i-ntə̂ʉ nzəm Kəlísto. Pei tsêʼtə́ pye pi gháp cî nzeʼ Arisətombûlə.

¹¹Pei tsêʼtə́ Herodyôŋ, â ŋuu lâʼ wághʼə, ə́ ntsêʼtə́ pye pi gháp cî ndə̂ Naasísʉ, ə́ mə́ mbə̂i no Nde.

¹²Pei tsêʼtə́ Tərifênə gháp Tərifôzə, ə̂ pəngyě pi gháp faʼ mbó Nde, ə́ ntsêʼtə́ mǎa Pesîdə, â sə̌u ghâa yi lətəi-ndwuŋ, a faʼ mə́ nzəm Nde gháʼate.

¹³Pei tsêʼtə́ Rofísʉ, â kwaʼ ngaŋə-faʼ yi Nde lə̂ lə tsóʼ yé, ə́ mbou ntsêʼtə́ mə́ ye, a kə̌ mbə́ cǒ mə́ ghaa lə́wó.

¹⁴Pei tsêʼtə́ Asêŋkəlîtə, ə́ ntsêʼtə́ Felengôŋ, ə́ ngʉ̌ Erəmésʉ, ə́ nkʉʼʉ́ Patərobásʉ, mbaa Erəmásʉ, gháp pə pəfə̌r pi gháp pə pǎp pə́ nyâŋ kə̂itə.

¹⁵Pei tsêʼtə́ Filolôngə gháp Julí, ə́ ntsêʼtə́ Nerê gháp fə̌r ye yi məngyě, mbaa Olîməpásʉ gháp pə pye Sê pə́tsəm pi gháp pə pǎp nyâŋ nkə̂itə́.

¹⁶Pei lâghʼ ḿbaʼá ntsêʼtə́ mbəʉ zéi təcər pei. Məcûʼtə pye-Kəlísto mə́tsəm pə́ ntsêʼtə wéi.

¹⁷Pəfə̌r, m mə̌ ndaʼ lə́ pei ńgó pei páa pye pi gháp maʼ ghaptə təcər pei, gháp pə́ tô məlǒʼ no yi pə́ lə jyéʼ wéi zěi, ə́ ndághʼ ńgʉ̌ pei fâa laŋə́-ndə̂u no lə́nə́ʉ. Pei nkhʉ̂ gháp,

¹⁸ńté ńgó mbə̂u pye zêi kâa pə́ fâʼ gháp faʼ Nde wághʼə Kəlísto, gháp lou pə̂ zə̂u yi ə́ wo kə́u ləpəm páp! Ə́ ndaghʼ tsâr ngwâŋ gháp pə məpoŋ məno ńfútə pətəzoŋə́-no.

¹⁹Ŋuu ntsəm pə̌ njî mbə̂u yi pei laghʼ ńzûʼ ntsʉ Nde. Ə́ pə̂ yə́rə́, n ngwô lətsei cər ntə̂ʉ məŋ ńté wéi, ə́ mə́ ntsâa ńgó pei ghwô jîno lə̂ ndághʼ ńgʉ̌ məno shʉʼʉ, ə́ nkhʉ̌ no tə́poŋ mpfu tsəm.

²⁰Ə́ cʉ́ʼ mə́ mbûŋ pə́ məyʉʼ, Sê yi a ŋə̂ mbwórə́ ghôʼ Sə́tə, pei ŋə̂i ndəu zʉ́. Ńgó Nde waghʼə Yěso kə́ mə́ nkʉʼʉ́ ngʉ pə̂ məno shʉʼʉ lə́ pei maa mpfu tsəm!

²¹Timotêi yi a pə̌ ngaŋə-ku ghaa cər faʼ tsêʼtə́ wéi, tə mbaa Lisiyúsʉ, ə́ ngʉ̌ Jásoŋ gháp Sosipatê, pi gháp pye lâʼ pághʼ.

²²Mə̂ŋ Tetiyúsʉ, n ntsêʼtə́ wéi lə̂ ləjôghʼ Nde. Məŋ mpfútə́ Pôl lə̂ ŋwáʼá ŋwaʼa wo.

²³Gawísʉ yi məŋ cî nzeʼ zʉ́ tsêʼtə́ wéi. Cûʼtə pye Kəlísto tsəm kəitə ndə̂ zʉ́. Erâstə yi a loʼo nkâp cər túsoŋ tsêʼtə́ wéi, tə mbaa fə̌r waghʼə Kəratúsʉ. [

²⁴Ńgó Nde waghʼə Yěso Kəlísto kə́ mə́ nkʉʼʉ́ ngʉ pə̂ məno shʉʼʉ lə́ pei maa mpfu tsəm! Ámeŋ*.]

²⁵Paghʼə ghúʼtə́ Sê! A ghwo mətəʉ lə̂ ndêitə lə̂ Nkəʉ Shʉʼʉ yi məŋ tsətə zěi ńté Yěso Kəlísto, ə́ ngʉ́ pə̂i-ntə̂ʉ zéi təitə, ə́ mbou nkə́ ndêitə́ pə́ lə́ zěi, ə́ ngʉ́ pei jî məno mi Sê lə lwǒ, a lə lwo měi tə fú tə nguʼ,

²⁶lə́ ə́ pou ngǐ tə́ʉ mpfu wo, pəŋwaʼa pi pətsətə́-nkəʉ Sê lə ŋwaʼá ghʉ, ə no yi ə́ lə pə́ ləlwǒ lêi kwar zǎa. Sê yi a pə̌ wó tə fú tə leʼé, lə̂ lə ghʉ̌ ńgó pə ghʉ̂ yə́rə́, ńjí ńgó pye-mə́soŋ pə́tsəm lei mə́u, ə́ njí no zêi yi ə́ pə́ ləlwǒ. Ə́ njí yə́rə́, ə́ mbə́i no yé, ə́ mbou nzúʼ ntsʉ yé.

²⁷Paghʼə lêitə́ lə́ Yěso Kəlísto, ə́ ŋə́ ləghûʼ mbó Sê. A kwaʼ ngaŋə jîno. Paghʼə ghʉ̂ yə́rə́ lə̂ mənguʼ mənguʼ! Ə̂ pə́ yə́rə́ Ámeŋ*.