Read Ngombale Lóma 3 Bible Online

Lóma 3 - Ngombale bible

Lóma 3

¹Ə́ lə̌i nkə́ mbə́ yə́rə́, zə̂u yi ŋuu-məsoŋ pə̌ ndaghʼ ńdêi cǒ ńté no â ŋuu Pəyúda pə̂ hó? Ə pəi yi ŋuu zʉ̂ ńté no pə́ púʼ yé ə̂ hó zə̂u?

²Ŋuu pəyúda zʉ̂ pəi lə̂ məsʉ̂ tə nzáa, ə́ ndêi ŋuu yi kâa pə́ ŋuu pəyúda. Ə́ yaa ngǐ pə́ yə́rə́, mə́i Sê lə ghʉ mêi mə̂ məndaʼá pə́ mbó Pəyúda.

³Ə́ pə́ lə́nə́ʉ ńgó pəcó pye təcər páp kâa lə ŋə̂i gháp ghíʼ gháp pə Sê lə laʼá. Tə ghíʼ káa gháp lə ŋə̂i gháp ghíʼ gháp pə Sê lə laʼá lêi, ńjí ńgó Sê wo ghʉ̂ yé zə̂u yi gháp pə pǎp lə ghʉ̌ ndaʼá mə́u lêi po?

⁴Ə ngə́ mboʼ ə́ pə̂ yé yə́rə́ po! Pə́ ghwo lə̂ njí ńgó Sê ghʉ yé no pə́ ghíʼ ə́ yǎa mə́ ntúŋu ńgó ə̂ pə́ yə́rə́, ŋuu-məsoŋ tsəm pôu mbə́ ngaŋə-məlaa. Ə́ ghí pə́ yə́rə́, mə́i pə́ lə ŋwáʼá cər ŋwaʼa Sê ngô: «Gho Sê, pə́ ghwo lə̂ ndêitə́ lə̂ tsâr zô, ə́ njí ńgó ô ŋuu ndʉŋ-ndʉŋ, ə́ mbou mə́ ntúŋu ńgó pə́ lə̌i ntághʼ gho kôr, o fêʼ, ə́ nzʉ́.»

⁵Lə́ pə́ lə̌i ndêitə́ lə̂ məno tə́poŋ mi paghʼə ghʉ měi, ə́ njwó ńgó Sê ŋuu ndʉŋ-ndʉŋ, paghʼə pôu ndâʼ ńgó ho? Mboʼ cǒ ŋuu lâʼ ńgó Sê kâa pə́ ŋuu ndʉŋ-ndʉŋ ńté ngwôʼ yi a tâghʼ tû paghʼ. (N ntsâr gháʼa ghíʼ pye ngoŋ tsâr.)

⁶Ə́ ngə́ kâa pə̂ yé yə́rə́! Ə́ lə pə́ ghíʼi mbə́ yə́rə́, mə́i mboʼ Sê pôu fêʼ pye-mə́soŋ ndəu-nzʉ̂ ghaʼá?

⁷Mboʼ cǒ ŋuu kə̂ ncí ndâʼ ńgó məlaa mi məŋ ntâŋ měi, ə̂ mi ə́ ghʉ pə́ jwô ńgó Sê ngaŋə no-lə́nə́ʉ, ə́ mbou ngʉ́ pə́ jwô ləghûʼ ye. Ə́ lə̌i mbə́ yə́rə́, pə́ pou ntághʼ ngwôʼ tû məŋ ghíʼ tâʼ ngaŋə-məfaa ńté hó?

⁸Pəcó pəghaŋə-ngə̂u pə́ ndaʼ ńgó paghʼ pə̌ ndaʼ ngô: «Pə ghʉ̂ məno tə́poŋ, ńjí ńgó ə́ shə́rə ncʉ́ʼ məno shʉʼʉ!» Ə́ mbə̂u pye pêi, ə̂ pi pə́ ghʉ̌ tághʼ ngwôʼ tû páp ə́ ndʉŋ-ndʉŋ ghíʼ ə́ pə́ ntúŋú.

⁹N ndou gháʼa ndâʼ ńgó ho? Ńgó paghʼ pi paghʼ pə̌ Pəyúda lei pye pi káa gháp pə́ Pəyúda áa? Ə́ ngə́ kâa pə̂ yé yə́rə́! N nyaa mə́ ndáʼ ndéʼtə́ wéi có zə̂u, ńgó ŋuu-məsoŋ tsəm yi a pə̌ ŋuu Pəyúda kəʉ yi kâa pə́ ŋuu Pəyúda, â ngaŋə-məfaa.

¹⁰Pə́ ŋwáʼá cər ŋwaʼa Sê ngô: «Cǒ ŋuu-məsoŋ yi a pə̌ ndʉŋ-ndʉŋ mbi Sê kâa pə̂ yé wó, tə káa pə́ tâʼ moʼ,

¹¹kâa cǒ ŋuu-məsoŋ yi tû yé tsóʼó lə̂ nzúʼ zə̂u pə̂ yé wó cǒ ŋuu-məsoŋ yi a pǒu mə́ ndôu lə̂ njí məlaŋə́-ndə̂u Sê, kâa pə̂ yé wó.

¹²Pye-mə́soŋ pə́tsəm lə meʼ laŋə́-ndə̂u shʉʼʉ, ə́ nǎa ncwí. Kâa cǒ ŋuu-məsoŋ pə̂ yé wó yi a pə̌ ngʉ məno shʉʼʉ, tə káa pə́ tâʼ moʼ.

¹³Mboʼ ntsʉ gháp jwî ŋuu, mətsâr máp pə̂ pə́ mi ə́ fútə pye futə́, mətsâr mi ə́ nkwatə ntsʉ páp côghʼ ghíʼ fei no,

¹⁴Ə tsâr yi kwar ntsʉ páp ləm ləmə́ ə́ mbou ncôghʼ pə̂ məndou tû pye.

¹⁵Məku máp záŋə gháʼate lə̂ ngwó ncwə̂r məci pye,

¹⁶Yʉʼ tsəm yi gháp lěi wó, gháp côŋ məzə̂u yʉʼ wó, ə́ ndə̌r pə́ cʉ̂ʼ mə́ ndâa.

¹⁷Káa gháp koŋ gháp ńgó mboʼ gháp pə pye nyâŋ lə̂ mbwórə.

¹⁸Ə́ ngʉ záp no pə́ tə pǒghʼ Sê.»

¹⁹Paghʼə pə̌ ntsúŋú njî ńgó zə̂u tsəm yi pə́ lə ŋwaʼá cər ŋwaʼa ləpə̌ʉ náŋtə́ pə̂ pye pi gháp lə ghwǒ lə̂ ŋə́i lə̂ ləpə̌ʉ zêi, Sê lə ŋə̂ ləpə̌ʉ zêi ə́ ndághʼ ńdôu ńgó ŋuu ntsəm tsághʼə́ ntsʉ yé, ńjí ńgó zʉ́ lə́ kǔʼ lə̂ ntághʼ ngwôʼ tû ŋuu ntsəm ndəu ndesé.

²⁰Ə̂ zə̂u yi ə́ ghʉ̌, mboʼ Sê táa fû yé lə̂ no yi ńgó ŋuu pə̌ ŋə̂i ghíʼ ləpə̌ʉ pə́ ntúŋú mboŋə́ lǎʼ ńgó ngaŋ pə̂ ndʉŋ-ndʉŋ mbi zʉ́ po; ləpə̌ʉ zə̂u yi pye-mə́soŋ leitə mə́u njî ńgó ghâp ngaŋə-məfaa.

²¹Lə̂ mpfu wo, Sê laʼ mə́ wághʼə ghíʼ a ghʉ mboŋə́ fûŋ ŋuu ńgó ŋuu ndʉŋ-ndʉŋ mbi zʉ́; káa a pə́ fû yé pə́ lə̂ no yi ńgó ŋuu pə̌ ŋə̂i ghíʼ ləpə̌ʉ pə́ ntúŋú, ŋwaʼa ləpə̌ʉ Mə̌usə̂i mbaa yi pətsətə́-nkəʉ Sê lə záʼ mə́ nzʉ̂ ndǎʼ wághʼə no zêi.

²²Sê lei pə́ lə̂ pə̂i-ntə̂ʉ yi ŋuu ghwǒ nzəm Yěso Kəlísto, mboŋə́ fûŋ ngaŋ ńgó ŋuu ndʉŋ-ndʉŋ mbi zʉ́. A ghʉ yə́rə́ lə́ maa ŋuu ntsəm yi a pə̌i no Kəlísto, ńté no gháp pə́ mbi zʉ́ ḿbə́ pə́ tâʼ zə̂u.

²³Ŋuu ntsəm lə fâa no, ə́ sáa ləghûʼ yi a pə̌ mbəʉ Sê.

²⁴Lə́ Sê lêi lə̂ poŋə-ntə̂ʉ tə́ ndaghʼə yi a ghwǒ nzəm pye-mə́soŋ, ə́ fúŋ gháp pye ndʉŋ-ndʉŋ mbi zʉ́, tə́ pfû có zə̂u, ə́ ndeitə́ ghíʼ Yěso Kəlísto yi a lə tó nkwárə́ pye-mə́soŋ cər puʼ no tə́poŋ.

²⁵Ə́ zʉ́ Yěso Kəlísto yi Sê lə pə́i ńgó a kwʉ̂, ə́ ndághʼ məci mé ə́ sóghʼ məno tə́poŋ pye-mə́soŋ pi gháp pə́i yé. Sê lə ghʉ yə́rə́, ə́ ndághʼ ńnyárə ghíʼ ə́ leitə́, a poŋə́ fûŋ ŋuu ńgó ŋuu ńgó ndʉŋ-ndʉŋ mbi zʉ́. Ə́ lə pə̂ cǒ mpfu, pye-mə́soŋ pə̂ faa məno, Sê kə̂ mə́ njwô jwǒ, káa côghʼ yé ngwôʼ tû páp,

²⁶ə́ pou ndêitə́ ghíʼ a ghwǒ shəghʼ-ntə̂ʉ nzəm pye-mə́soŋ. A pou mbə́ mpfu wo, ə́ mə́ nyárə ghíʼ ə́ leitə́, a poŋə́ fûŋ ŋuu ńgó ŋuu ndʉŋ-ndʉŋ mbi zʉ́, a fûŋ pə́ ŋuu yi a ghwǒ pə̂i-ntə̂ʉ nzəm Yěso Kəlísto ńgó ŋuu ndʉŋ-ndʉŋ mbi zʉ́.

²⁷Ghíʼ ə́ mbə́ yə́rə́ lo, tə có no yi mboʼ paghʼə kə̂ ncí ndághʼ ńŋáʼtə́ kə́ mbǒu mbə́ wó? Ə ngə́, káa zêi no! Ńté hó? Ńté no ntəʉ no kâa pyér mbə̂ yé pə̂ ŋə̂i ghíʼ ləpə̌ʉ pə́ ntúŋú, lə́ ə́ pə́ ntúŋu pə̂ mbə́i no Yěso Kəlísto.

²⁸Paghʼ kwaŋ ńgó Sê ghí fúŋ ŋuu ńgó ŋuu ndʉŋ-ndʉŋ mbi zʉ́, ə́ ndeitə́ pə́ lə̂ mbə̂u yi ngaŋ lǎghʼ ngwǒ pə̂i-ntə̂ʉ nzəm Yěso Kəlísto, káa a pə́ ndêitə́ yé pə́ lə̂ mbə̂u yi ngaŋ laghʼ ńŋə̂i ghíʼ ləpə̌ʉ pə́ ntúŋú.

²⁹Mboʼ ə́ lə́ pə́ yə́rə́, mə́i Sê pə̌ pə̂ ndaʼ Sê Pəyúda. Mə́i káa a pə̂ yé Sê pye pi káa gháp pə́ Pəyúda, Kwaʼ lə́nə́ʉ, â kə̂ mbə̂ yé Sê pye pi káa gháp pə́ Pəyúda lə́wó,

³⁰ńté no tâʼ Sê moʼ lə̂ pə̌ wó. A wo lěi lə̂ pə̂i-ntə̂ʉ yi Pəyúda ghwǒ nzəm Yěso Kəlísto, ə́ fúŋ gháp ńgó pye ndʉŋ-ndʉŋ mbi zʉ́, ə́ kə́ pǒu ghʉ̌ pə́ yə́rə́ lə́ pye pi káa gháp pə́ Pəyúda. [1]

³¹Ə́ laghʼ ncʉ́ʼ ḿbə́ ńgó paghʼ leitə lə̂ pə̂i-ntə̂ʉ yi paghʼ ghwǒ nzəm Yěso Kəlísto, ə́ ndâʼ ńgó ləpə̌ʉ kâa pyêr yé có zə̂u áa? Ə́ ngə́, paghʼ laʼ pə́ ńgó pə́ ghwo lə̂ ŋə̂i pə́ ghíʼ ləpə̌ʉ pə́ ntúŋú.