Read Ngombale Lóma 5 Bible Online

Lóma 5 - Ngombale bible

Lóma 5

¹Ghíʼ Sê lə fúŋ wághʼə ńgó pye ndʉŋ-ndʉŋ mbi zʉ́, ə́ ndeitə́ lə̂ pə̂i-ntə̂ʉ yi paghʼə ghwǒ nzəm zʉ́ Sê lə̂, paghʼə cʉ̂ʼ ndêitə́ lə́ Nde wághʼə Yěso Kəlísto wêi, ə́ nyáŋ lə̂ mbwórə.

²Yěso Kəlísto wêi lə tsôʼ laŋə́-ndə̂u, Sê nyárə wághʼə poŋə-ntə̂ʉ yé yi tə́ ndaghʼə yi a ghwǒ nzəm paghʼə, ńté no paghʼə ghwô pə̂i-ntə̂ʉ nzəm zʉ́. Paghʼə ghwô poŋə-ntə̂ʉ Sê yi tə́ ndaghʼə zêi tə ə́ təi, ə́ mboŋə́ pə́ lǎghʼ cî mbî. Ə zə̂u yi ə́ ghʉ paghʼə pə̂ cər lətsei, ə́ pə́ ńgó paghʼə ghwô cər ntə̂ʉ paghʼə ńgó zə̂u yi Sê lə ghʉ̌ ndaʼá mə́u lə̂ ngʉ́ ŋə́ lə́ paghʼə, a ghʉ̌ ŋə́ zěi, zêi zə̂u pə̂ ńgó paghʼə ghʉ̌ ghwo zághʼə yʉʼ cər ləghûʼ ye.

³Kâa pə́i mbə́ pə́ ndaʼ yə́rə́, paghʼə kə̌ ncí mə́ ngwô lətsei, mbaa mpfu yi pye pə́ ŋə̂ wághʼə ngwôʼ, ńté no ngwôʼ pə̌ ngʉ̌ pə́ ghwo shəghʼ-ntə̂ʉ,

⁴ə shəghʼ-ntə̂ʉ pə́ ngʉ ńgó koo pə́ pfûŋ cər nkwaʼtə, ŋuu lei tə́ káa pfúŋ cər nkwaʼtə, ə́ ngwǒ cər ntə̂ʉ zʉ́ ńgó a ghʉ̌ ghwǒ zə̂u yi Sê lə ghʉ̌ ndaʼá mə́u lə̂ ngʉ́ ŋə́ lə́ zʉ́.

⁵Ŋuu lei tə ngwô cər ntə̂ʉ zʉ́ yə́rə́, ə́ lâʼ tî yé tə́ pə́ yə́rə́ po, ńté no Sê lə leitə́ lə̂ Zəghʼə Ndêi-lěi yé, ə́ ncóghʼ nkoŋə ye məntə̂ʉ paghʼə.

⁶Ə no yi n ndaʼ zěi pə́ ńgó, ə́ lə pə́ mpfu yi paghʼə lə pyér pə́ tə ghwǒ mətəʉ lə̂ ndághʼ ńzǒŋ tû zághʼə pə́ paghʼə, Sê tə̂u Yěso Kəlísto, a tô ńkwʉ́ lə̂ tû zághʼə pi paghʼə pəghaŋə məfaa, lə̂ mpfu yi zʉ́ Sê lə tághʼ.

⁷Ə́ təi lə́ pə́ yi mboʼ ŋuu kwʉ̂ lə̂ tû ŋuu yi a pə̌ ndʉŋ-ndʉŋ. Ə́ ngwǒ lə́ ŋuu yi a pə̌ ngʉ məno shʉʼʉ, mə́i ndeʼ có mboʼ cǒ ŋuu pə̂i lə̂ nkwʉ́ lə̂ tû yé.

⁸Paghʼə jwó mpfu wo ghíʼ Sê nyárə wághʼə mbə̂u yi a lǎghʼ ńgwǒ nkoŋə nzəm paghʼə: paghʼə lə pyér pə́ pəghaŋə məfaa, a ghʉ̂ Kəlísto kwʉ̂ lə̂ tû zághʼə.

⁹A lə kwʉ́ yə́rə́, Sê lêitə mə́u ə́ fúŋ wághʼə ńgó pye ndʉŋ-ndʉŋ mbi zʉ́; ghíʼ ə́ kə́ mbə́ yə́rə́ lə̂, paghʼə tsuŋu mə́ njî ńgó mboʼ Kəlísto lâʼ tî yé tə́ ghʉ̌ paghʼə cwôr záŋə-lóŋ Sê po.

¹⁰Paghʼə lə pə́ pəghaŋə mbəu Sê, lə́ Sê lêitə́ lə́ ləwʉ̂ Môu ye, ə́ myǎghʼ mbəu yi ə́ lə pə́ təcər paghʼə pə pǎp lêi. Ghíʼ mbəu zêi kə kə́ mě təcər paghʼə pə pǎp lə̂, paghʼə pə̌ ntsuŋú njî ńgó mboʼ Sê lâʼ tî yé tə́ lěi lə̂ ləwʉ̂ Môu yé, ə́ ngʉ́ paghʼə cwôr po.

¹¹Kâa pə́i mbə́ pə́ ndaʼ yə́rə́! Paghʼə ghwo lətsei ńté Sê, ńté no Nde wághʼə Yěso Kəlísto lə myâghʼ sǎʼ yi ə́ lə pə́ təcər paghʼə pə Sê.

¹²Məfaa lə leitə́ lə́ tâʼ ŋuu moʼ ə́ kə́u cər nzʉ̂, wêi ŋuu pə̂ Ádam, məfaa lâghʼ ləwʉ̂ ńtó cər nzʉ̂. Ə́ leitə́ yə́rə́, ləwʉ̂ kə̂u lə́ ŋuu ntsəm, ńté ńgó ŋuu ntsəm lə faa no.

¹³Sê lə ghí ŋə́ ləpə̌ʉ lə́ Mə̌usə̂i, mə́i məfaa lə láʼ mə́ mbə́ cər nzʉ̂, lə́ ghíʼ lə ghí pə́ mə́i ləpə̌ʉ kə́ pə̂ yé wó lə̂, káa Sê lə pə́ nkwâʼ yé məfaa pye nou no.

¹⁴Lə́, lə̂ fú lə̂ mpfu yi Ádam ə́ ngwó nkə́u lə̂ mpfu yi Mə̌usə̂i, ləwʉ̂ lə kə̂ mə́ mbə̂ghʼ pye-mə́soŋ pəghʼə́, mbaa pye pi gháp lə kə́ faa záp no mbi Sê, lə́ ə́ ngǐ fǎa káa ləʼ gháp pə́ lə̂ nzúʼ ntsʉ yé ghíʼ Ádam. Ádam lə pə́ ləiʼi ŋuu yi a lə təi táa poŋə́ ntó.

¹⁵Lə́ mboʼ pə́ fəiʼ yé məfaa Ádam lə̂ zə̂u yi Sê ŋə̂ lə́ pye tə́ pfû có zə̂u po. Kwaʼ lə́nə́ʉ pye tə nzáa lə kwʉ́tə́ ńté məfaa yi wêi wo tâʼ ŋuu moʼ lə fǎa mbó Sê; lə́ poŋə-ntə̂ʉ tə́ ndaghʼə yi Sê ghwǒ nzəm pye-mə́soŋ ghúʼ nděi məfaa Ádam, ə zə̂u yi a pou ndêitə́ lə́ wêi wo tâʼ ŋuu moʼ, ə́ Yěso Kəlísto, ə́ ŋə̂ lə́ pye tə nzáa tə́ pfû có zə̂u ghwo lətəi-ndwuŋ gháʼate.

¹⁶Ə zə̂u yi Sê ŋə̂ lə́ pye-mə́soŋ tə́ pfû có zə̂u, gháp məfaa yi tâʼ ŋuu moʼ lə ghʉ̌ kâa pə̂ gháp tâʼ zə̂u. Tâʼ ŋuu moʼ lə faa no, Sê fêʼ kôr yé, ə́ ndeitə́ yə́rə́, ə́ ntághʼ ngwôʼ tû pye-mə́soŋ pə́tsəm. Ə zə̂u yi Sê ŋə̂ lə́ pye-mə́soŋ tə́ pfû có zə̂u, lə ghʉ̂ a fûŋ pye-mə́soŋ mbi zʉ́ ńgó pye ndʉŋ-ndʉŋ tə́ náŋtə́ ndwuŋ məno mi gháp lə fǎa měi.

¹⁷Kwaʼ lə́nə́ʉ, ləwʉ̂ lə leitə́ lə̂ məfaa yi tâʼ ŋuu moʼ lə ghʉ̌, ə̂ŋ lə̂ məfaa tâʼ ŋuu moʼ, ə́ ncʉ́ʼ mə́ mbə̂ghʼ pye-mə́soŋ pəghʼə́. Ə faʼ Yěso Kəlísto lə pə́ ndeʼe, ńté no pye-mə́soŋ lə leitə́ lə́ zʉ́, ə́ nzʉ́ pəi poŋə-ntə̂ʉ tə́ ndaghʼə yi Sê ghwǒ nzəm páp: Sê fûŋ gháp ńgó pye ndʉŋ-ndʉŋ mbi zʉ́. Gháp ghʉ̌ leitə́ lə́ Yěso Kəlísto wêi, ə́ ghwǒ ləcwôr tə me, ə́ kə́ pə̂ záp pəfou ghíʼ zʉ́.

¹⁸Ghíʼ tâʼ ŋuu moʼ lə fǎa no, Sê lêi lə́ zʉ́ ə́ ntághʼ ngwôʼ tû ŋuu ntsəm lə̂, ə́ kə́ mbə́ ndʉŋ-ndʉŋ ghíʼ məfaʼ shʉʼʉ mi tâʼ ŋuu moʼ lə ghʉ̌, Sê fûŋ pye-mə́soŋ pə́tsəm ńgó pye ndʉŋ-ndʉŋ mbi zʉ́, ə́ leitə́ yə́rə́ gháp ghwo ləcwôr tə me.

¹⁹Ə́ lə leitə́ lə́ tâʼ ŋuu moʼ yi a lə tə̌i tû ə́ ŋə́ mbó Sê, Sê fûŋ pye tə nzáa ńgó pəghaŋə məfaa; ə́ kə́ mbə́ ndʉŋ-ndʉŋ ghíʼ tâʼ ŋuu moʼ lə zúʼ ntsʉ Sê, ə́ lei yə́rə́, Sê fûŋ pye tə nzáa ńgó pye ndʉŋ-ndʉŋ mbi zʉ́.

²⁰Sê lə ŋə̂ ləpə̌ʉ, ə́ ndaghʼ ńdôu ńgó pye-mə́soŋ jí ńgó gháp pəghaŋə məfaa. Lə́, ə́ ngwǒ lə̂ yʉʼ yi məfaa zǎa wó, poŋə-ntə̂ʉ Sê yi tə́ ndaghʼə zâa yʉʼ wó tə ngáʼ mbô.

²¹Ə́ pə̂ yə́rə́, ghíʼ məfaa ghwo mətəʉ lə̂ ndághʼ ńjwítə́ pye-mə́soŋ lə̂, ə́ kə́ mbə́ ndʉŋ-ndʉŋ ghíʼ Sê ghwǒ mətəʉ lə̂ ndâghʼ poŋə-ntə̂ʉ yé yi tə ndaghʼə ńfúŋ pye-mə́soŋ pə́tsəm ńgó pye ndʉŋ-ndʉŋ mbi zʉ́; ə́ ngʉ̌ ńgó gháp lêitə́ nzəm Nde wághʼə Yěso Kəlísto, ə́ ngwǒ ləcwôr tə me.