Read Ngombale Lóma 6 Bible Online

Lóma 6 - Ngombale bible

Lóma 6

¹Tə paghʼə wo mǎʼ nci laghʼ ńtsóʼ ńgó ho? Paghʼə gháʼa kʉʼʉ́ kə́ pə́ ghʉ̂ pə̂ məfaa lǎghʼ lər lə̂ mbi, ńjí ńgó Sê kə̌ mə́ nkʉ́ʼʉ ngwo pə̂ poŋə-ntə̂ʉ yé yi tə́ ndaghʼə yi a ghwǒ nzəm paghʼə?

²Ə́ ngə́ kâa pə̂ yé yə́rə́! Ghíʼ paghʼə lə kwʉ́ lə̂ məfaa lə̂, mboʼ paghʼə kə̂ ncí mbóu mə́ ngʉ̂ məfaa gháʼa gháʼá?

³Káa pei pə́ njî ńgó paghʼə pə́tsəm pi paghʼə lə pfû-nci lə̂ ndághʼ ńdǎr mbəʉ zághʼə lə́ Yěso Kəlísto, lə ghí pə́ pfû-nci gháʼá, mə́i paghʼə pə pǎp nâatə́ mə́ ə́ ncʉ́ʼ tâʼ ŋuu cər ləwʉ̂ ye mo?

⁴Ə́ lə leitə́ lə̂ pfû-nci zêi, paghʼə pə pǎp naa nkwʉ́, pə́ naa wághʼə pə pǎp ńcóghʼ cər ləshi, ńjí ńgó ghíʼ Tǎa Sê lə lǎghʼ mətəʉ mé mi tə́ fəiʼi zěi wó ńgʉ́ a zʉ̂ʉ lə̂ ləwʉ̂ təcər pəpfû lə̂, paghʼə zághʼ lə́wó kə́ ngwǒ ləcǐ-mbî yi shwî.

⁵Ghíʼ paghʼə lə ghí kwʉ́ lə̂ məfaa ghíʼ Yěso, paghʼə pə pǎp təmtə lə̂, paghʼə ghʉ̌ kə́ təmtə́ pə́ lə́ zʉ́, ə Sê ghʉ́ paghʼə zʉ́ʉ zághʼə lə̂ ləwʉ̂ ghíʼ a lə kə́ ngʉ́ Yěso Kəlísto zʉ̂ʉ yé lə̂ ləwʉ̂ lə̂.

⁶Paghʼə tsúŋú njí ngô: ə́ lə lêitə́ lə̂ ləwʉ̂ Yěso Kəlísto lə̂ tʉ̌-mbʉ̂ŋtə, paghʼə pə pǎp naa nkwʉ́ lə̂ ndwuŋu cǐ yi paghʼə lə ghwǒ wěi cǒ mpfu, ńjí ńgó ə Sê və́rə məkwaŋtə mi ə́ cʉ́ŋə wághʼə paghʼə ghʉ məfaa, ə́ lei yə́rə́ lə́u paghʼə kə̂ mbyêr wághʼə məpuʼ məfaa po.

⁷Ńté ńgó ŋuu lei tə nkwʉ́, mənkʉ no tə́poŋ fû lə́ zʉ́ ńkéʼtə́.

⁸Ghíʼ paghʼə pə Kəlísto kə nǎa nkwʉ́ lə̂, paghʼə tsúŋu mə́ njî ńgó paghʼə pə pǎp ghʉ̌ kə́ nǎa pə́ wó.

⁹Paghʼə pə̌ njî ńgó ghíʼ Sê lə ghʉ̌ Kəlísto zʉ̂ʉ lə̂ ləwʉ̂ lə́, a láʼ pǒu kə́ kwʉ̂ yé po: lə́u ləwʉ̂ pôu kə̂ ngwô yé məcó mətəʉ ndəu zʉ́ po.

¹⁰A lə kwʉ̂ ńté məfaa, ə́ nkwʉ́ tâʼ mpfu moʼ, ə́ kuʼ yə́rə́; a pə̂ mpfu wo ə́ mbə́ ntəʉ, ə́ mə́ ncî mbəʉ Sê.

¹¹Ə́ ndʉŋ-ndʉŋ ghíʼ ə́ kə́ mbə́ yə́rə́ lə̂, pei jí ńgó pei lə kwʉ́ lə̂ məfaa, ə́ pou ndéi ghíʼ pei lǎr mbəʉ zéi lə́ Yěso Kəlísto ə́ mbə́ ntəʉ, pei pə Sê nǎa mbə́.

¹²Ə́ pə̂ yə́rə́, kâa no tə́poŋ kə́ mbyér ngwô yé lə̂ nkə́ mə́ sâʼ mbəʉ zei yi pə̌ nkwʉ́, ə́ ngʉ́ pei cʉ̂ʼ ngʉ̂ pə̂ məno mi mbəʉ zêi cʉ́ŋə wéi pei tsâa lə̂ ngʉ̂.

¹³Koo pei kə̂ ndághʼ məyʉʼ mbəʉ méi ńgʉ́ məfaa, ghíʼ mpfu yi měi yǎa mbə́ pə̂ məzə̂u faʼ laghʼ ńgʉ́ no tə́poŋ. Tə ncʉ́ʼ yə́rə́, pei lâghʼ mbəʉ zéi ńgʉ̌ pə̂ məno shʉʼʉ ghíʼ pye pi gháp pə́ ntəʉ, ə́ pi Sê lə ghʉ̌ gháp zʉ́ʉ lə̂ ləwʉ̂; pei lághʼ mbəʉ zei ntsəm fáʼ məfaʼ Sê;

¹⁴ə̂ pə́ yə́rə́, məfaa láʼ kə́ ngwô yé məcó mətəʉ ndəu pei po, ńté ńgó káa pei pyér mə́ ŋə̂i wéi ghíʼ ləpə̌ʉ pə́ ntúŋú, ə́ ncʉ́ʼ ŋə̂i pə́ lə̂ laŋə́-ndə̂u yi Sê wo lěi mə́u ə́ nyarə́ wéi poŋə-ntə̂ʉ yé yi tə́ ndaghʼə.

¹⁵Tə gháʼa lə́? Ə́ laghʼ mbə́ ńgó paghʼə ghʉ́ məfaa ńté ńgó káa paghʼə pyér ŋə̂i wághʼə ghíʼ ləpə̌ʉ pə́ ntúŋú? Paghʼə ghʉ̂ yə́rə́ ńté ńgó paghʼə pə̌ ŋəi lə̂ laŋə́-ndə̂u yi Sê wo lěi mə́u nyárə́ wághʼə poŋə-ntə̂ʉ yé yi tə́ ndaghʼə áa? Ə́ ngə́ kâa pə̂ yé yə́rə́!

¹⁶Pei tsúŋu mə́ njî ńgó ŋuu lə̌i mbə́i lə̂ mbə́ ngaŋə-faʼ ŋuu, ə́ mə́ nzûʼ ntsʉ yé, a cʉ̂ʼ puʼ ngaŋ; pə́ laʼ gháʼá ghíʼ mboʼ o pə̂i pûʼ məfaa, ə́ cʉ́ŋə gho ńŋə́ lə̂ ləwʉ̂, káa ghíʼ mboʼ o pə̂ nzúʼ ntsʉ Sê, ə́ cʉ́ʼ puʼ yé a ghʉ̂ o pə̂ ŋuu ndʉŋ-ndʉŋ mbi zʉ́.

¹⁷Paghʼə ŋə́ ləghûʼtə mbó Sê, ńté ghíʼ pei lə pə̂ cǒ mpfu ə́ mbə́ məpuʼ məfaa, pei pou ngǐ tə́ʉ mpfu wo, ə́ mbə́i lə̂ ntə̂ʉ wéi tsəm, lə̂ ŋə̂i ghíʼ tsâr Sê yi pə́ lə jyéʼ wéi pə́ ntúŋu ńgó pei ŋə̂i yə́rə́.

¹⁸Sê lə kwarə wéi lə́ məfaa, pei cʉ̂ʼ məpuʼ lə̂ ngʉ́ məno mi ə́ pə́ ndʉŋ-ndʉŋ.

¹⁹N ndaʼ yo no lə́ pei lə̂ mbə̂u yi pye ndəu nzʉ̂ pwo laghʼ ńtsâr záp, ńté ńgó pêi pye pi pə́ laʼ wéi no, káa pei fátə́ nzûʼ wéi. Pei lə pə́ cǒ mpfu, ə́ cóghʼ mbəʉ zei cər məno ncǔ, mbaa cər məno tə́poŋ, ə́ ncʉ́ʼ məpuʼ máp, ə́ pə̂ mi ə́ cʉ́ŋə wéi pei tə̂i tû mbó Sê; lə̂ mpfu wo, pei kə́ mbə́i lə̂ ndághʼ mbəʉ zéi ə́ mbə́ məpuʼ lə̂ məno mi ə́ pə́ ndʉŋ-ndʉŋ. Ə́ ngʉ́ məno mi ə́ pə́ ndʉŋ-ndʉŋ, ə́ mə́ cʉ́ŋə ŋuu lə̂ ngwô lənyâŋ yi a poŋə́ Sê.

²⁰Ə́ lə pə́ mpfu yi pei lə pə́ məpuʼ məfaa, káa pei lə pə́ ngwô wéi kwaŋtə lə̂ ngʉ́ no shʉʼʉ.

²¹Pei lə zʉ́ zárə́ pəi lə̂ məno mi pei lə ghʉ̌ měi, ghíʼ sə̂ʉ wěi cʉ́ʼ mə́ nkô wéi mpfu wo lo? Měi cághʼə ŋuu ŋə̂ pə́ cər ləwʉ̂!

²²Lə́, lə̂ mpfu wo, Sê lə ghʉ mənkʉ puʼ məfaa fû lə́ pei ńkeʼtə́, pei cʉ̌ʼ məpuʼ mé; ə́ pə̂ yə́rə́, pei ghʉ̂ məno mi ə́ wo ghʉ̌ pei cʉ́ʼ pye Sê. Ə pəi yi pei wo zʉ́ mə́u pə́ ghíʼ pei wo ghwǒ ləcwôr tə me.

²³Ə́ pə́ lə́nə́ʉ ńgó pəi yi pə́ zʉ̂ nzəm məfaa, ə̂ ləwʉ̂; lə́ zə̂u yi Sê ŋə̂ lə́ paghʼə tə́ pfû có zə̂u, ə́ pə̂ lə̂ ndêitə́ lə́ Nde waghʼə Yěso Kəlísto, ə́ ngwǒ ləcwôr tə me.