Read Ngombale Lóma 8 Bible Online

Lóma 8 - Ngombale bible

Lóma 8

¹Ə́ tə̂ʉ mpfu wo, ə́ mbə́ ńgó Sê ghʉ̌ kə́ côghʼ yé ngwôʼ tû pye pi gháp lǎr mbəʉ lə́ Yěso Kəlísto po.

²Ńté ńgó mətəʉ mi Zəghʼə Ndêi-lěi lei lə́ Yěso Kəlísto ə́ ngʉ́ pə́ pə̂ wó, lə kwarə wághʼə lə̂ mətəʉ mi ə́ cʉ́ŋə wághʼə paghʼ ghʉ̂ məfaa, ə́ mbou ncʉ́ŋə wághʼə ŋə̂ lə̂ ləwʉ̂.

³Sê lə ghʉ̂ zə̂u yi ləpə̌ʉ Mə̌usə̂i kâa lə kûʼ yé lə̂ ngʉ́, ńté ńgó ləpwôr yi ŋuu-məsoŋ ghwǒ lə ghʉ kâa cǒ ŋuu kûʼ yé lə̂ ŋə̂i ghíʼ ləpə̌ʉ zêi pə́ ntúŋú: Sê lə ghí kwarə́ məfaa lə́ pye-mə́soŋ, ə́ ntə́u kwaʼ Môu ye, a ghi tó ə́ ngwǒ mbəʉ ghíʼ yi pye-mə́soŋ, ə́ pə́ pəghaŋə məfaa. Sê lə lei lə̂ mbəʉ zêi, ə́ mbə́ghʼ məfaa pye-mə́soŋ.

⁴Sê lə ghʉ yə́rə́, ə́ ndaghʼ ńdôu ńgó paghʼə kûʼ lə̂ ŋə̂i ghíʼ ləpə̌ʉ zêi pə́ ntúŋú. Ə́ paghʼə pi káa paghʼə pyér mə́ ngʉ̂ wághʼə məno mi mbəʉ zághʼə lə́ cʉ́ŋə wághʼə ńgó paghʼə ghʉ̂, lə́ ə́ ncʉ́ʼ ngʉ̂ pə́ mi Zəghʼə Ndêi-lěi laʼ ńgó paghʼə ghʉ̂.

⁵Ə pye pi gháp ghʉ pə̂ məno mi mbəʉ záp cʉ́ŋə gháp lə̂ ngʉ́, tâghʼ tû záp pə́ lə̂ məno máp mêi; lə́ pye pi gháp ghʉ məno mi Zəghʼə Ndêi-lěi laʼ ńgó gháp ghʉ̂ tâghʼ tû záp pə́ lə́ měi.

⁶Ŋuu lə̌i mə́ ngʉ̂ məno mi mbəʉ ye lə̂ cʉ́ŋə yé lə̂ ngʉ́, měi cághʼə yé ə́ ŋə́ lə̂ ləwʉ̂; lə́ ŋuu pôu mə́ ngʉ̂ məno mi Zəghʼə Ndêi-lěi lə́ laʼ ńgó a ghʉ̂, mə́i Sê wo ghʉ̌ â pə́ wó, ə́ mbou nyáŋ lə̂ mbwórə.

⁷Pye pi gháp tâghʼ tû záp pə́ lə̂ zə̂u yi mbəʉ záp cʉ́ŋə gháp lə̂ ngʉ́, ə̂ pəghaŋə mbəu Sê; káa gháp pə́ ŋə̂i gháp ghíʼ ləpə̌ʉ Sê pə́ ntúŋú. Mboʼ gháp pəi nkûʼ gháp lə̂ ŋə̂i yə́rə́ po.

⁸Ə pye pi gháp ghʉ pə̂ məno mi mbəʉ záp cʉ́ŋə gháp lə̂ ngʉ́, mboʼ gháp ghʉ gháp zə̂u yi ə́ poŋə́ Sê po.

⁹Lə́ ə́ ngwǒ lə́ pei, mə́i káa pei pə́ ngʉ̂ wéi zə̂u yi mbəʉ zéi cʉ́ŋə wéi lə̂ ngʉ̂; pei ghʉ̂ pə̂ zə̂u yi Zəghʼə Ndêi-lěi lâʼ ńgó pei ghʉ̂, ńté ńgó Zəghʼə zêi pə́ lə́ pei. Ə Zəghʼə Kəlísto lə̌i ndə́iʼ pə́ cər ntə̂ʉ ŋuu po, a pə̂ yé ŋuu ye po.

¹⁰Kəlísto lə̌i mbə́ cər ntə̂ʉ pei, mə́i mbəʉ zei ghʉ̌ kə́ nkwʉ́ kwʉ́ ńté no tə́poŋ yi ə́ pə́ cər wó, lə́ Zəghʼə Ndêi-lěi ghʉ́ pei kə́ mbə́ pə́ wó, ńté ńgó Sê kə fúŋ wéi ńgó pye ndʉŋ-ndʉŋ mbi zʉ́.

¹¹Ə Zəghʼə ŋuu yi a lə ghʉ̌ Yěso zʉ̂ʉ lə̂ ləwʉ̂ təcər pəpfû lə̌i mbə́ lə́ pei, mə́i ngaŋ ghʉ̌ leitə́ lə̂ Zəghʼə yé yi ə́ pə́ lə́ pei, ə́ ghʉ̌ mbəʉ zei yi pə̌ nkwʉ́ pə́ ntəʉ.

¹²Ə́ pə̂ yə́rə́ pəfə̌r, paghʼə ghwo cǒ nzǒ, nzǒ zêi káa pə́ yé nzǒ mbô mbəʉ tə ə́ pə̂ yi mboʼ paghʼə cʉ̂ʼ ŋə̂i pə́ ghíʼ mbəʉ zaghʼə lə̂ cʉ́ŋə wághʼə ńgó paghʼə ŋə̂i yə́rə́.

¹³Pei lə̌i mə́ ngʉ̂ pə̂ məzə̂u mi mbəʉ zéi cʉ́ŋə wéi lə̂ ngʉ̂, mə́i pei wo kwʉ́tə́. Lə́ pei lə̌i ndághʼ Zəghʼə Ndêi-lěi yi ə́ pə́ lə́ pei ńgʉ̂ cǐ tə́poŋ yi pei ghwǒ mê, mə́i Sê wo ghʉ̌ pei pə́ wó.

¹⁴Ŋuu ntsəm yi Zəghʼə Ndêi-lěi pə́ ncaghʼə yé, â môu Sê.

¹⁵Ə Zəghʼə Ndêi-lěi yi ə lə kə́u cər məntə̂ʉ pei, káa ə lə pə̂ yé yi ə́ ghʉ pei cʉ̂ʼ məpuʼ ə́ mbou ngwô ləpôghʼ; lə́ ə̂ Zəghʼə yi ə́ ghʉ pei cʉ̂ʼ ghəpə́ Sê. Ə̂ Zəghʼə zêi yi ə́ cʉ́ŋə wághʼə, paghʼə mâʼ wâr ndâghʼ ńfûŋ Sê ngô: «Ába!» Ə́ ndaghʼ ńdâʼ ngô «Tǎaló!»

¹⁶Zəghʼə Sê zʉ́ tû-mbəʉ yé ghʉ paghʼə fû mə́ njî cər ntə̂ʉ paghʼə ńgó paghʼə ghəpə́ Sê.

¹⁷Ghíʼ paghʼə kə̌ mbə́ ghəpə́ Sê lə̂, paghʼə ghʉ ghwǒ zághʼə zə̂u lə̂ məzə̂u shʉʼʉ mi a lə lóʼó lə̂ ngʉ́ ŋə́ lə́ pye pé, paghʼə pə Kəlísto ghʉ̌ nǎa ghwǒ. Ghíʼ paghʼə kə̌ mə́ njwô zághʼə ngwôʼ ghíʼ a lə kə́ njwô yé mboŋə́ kə́u cər ləghûʼ Sê lə́, paghʼə ghʉ̌ kə́ kə́u zághʼə cər wó lə́wó.

¹⁸M mə̌ njî ńgó ngwôʼ yi paghʼə jwô zěi mpfu wo, kâa kûʼ yé có zə̂u lə́ ləghûʼ yi Sê táa ghʉ̌ paghʼə ghwô.

¹⁹Zə̂u tsəm yi Sê lə tsuŋú pə́ ntsâa lə̂ ntóghʼ njwó mpfu yi Sê wo ghʉ̌ pə jwó ləghûʼ ghəpə́ yé.

²⁰Zə̂u tsəm yi Sê lə tsúŋú, a lə ghʉ ńgó mətəʉ mi kâa pə́ mpfútə yé lə̂ có zə̂u lə̂ cʉ́ʼ sâʼ měi. Kâa měi lə kôŋ yé kǒŋ ńgó ə̂ pə́ yə́rə́, ə Sê lə̂ lə kǒŋ ńgó ə̂ pə́ yə́rə́. Zə̂u pei tsəm pə́ tsâa ńgó ŋuu yi a lə ghʉ ńgó ə̂ pə̂ yə́rə́, pôu ngʉ̌ ə̂ kə́p.

²¹Ə́ laghʼ mbə́ ńgó Sê ghʉ̌ leʼé có, ə́ kwarə́ zə̂u tsəm yi a tsuŋú mbó mətəʉ tə́poŋ mi ə́ laghʼ gháp ńgʉ̂ puʼ. Ńjí ńgó gháp kə́ ndyʉ̂ gháp po, ə́ ngʉ ngwo záp yʉʼ cər ləghûʼ ghəpə́ Sê, lə́u mənkʉ puʼ kə̂ mbyêr yé lə́ páp po.

²²Paghʼə yaa mə́ njî ńgó zə̂u tsəm yi Sê lə tsuŋú pə̂ mpfu wo, ə́ mə́ ntsʉ̂ʉ, ə́ njwô ngwôʼ ghíʼ məngyě yi môu pə̌ ndə̂u yé lə̂.

²³Lə́ kâa pə́ pə̂ ndaʼ zə̂u tsəm yi Sê lə tsuŋú yi ə́ pə́ njwô ngwôʼ zei: paghʼə pi paghʼə ghwǒ Zəghʼə Ndêi-lěi, ə́ pə̂ nduŋ-mbi lə̂ məzə̂u mi Sê kə ghʉ̌ ndáʼá mə́u lə̂ ngʉ́ ŋə́ lə́ paghʼə, paghʼə kə̌ mə́ ntsʉ̂ʉ zághʼə cər məntə̂ʉ paghʼə lə́wó. Lə́ paghʼə pə̂ mpfu wo, ə́ mə́ nzʉ̂ʼtə ńgó â lâghʼ wághʼə ńgʉ́ ghəpə́ yé, paghʼə ncwór ngwôʼ.

²⁴Sê ghʉ mə́ paghʼə cwôr, lə́ paghʼə kə́ ghwô wághʼə zə̂u tsəm. Ńté ńgó mboʼ ŋuu ghwo yé zə̂u yi a yǎa mə́ ntsáa, ə́ mbou kə́ mə́ ntsâa pə́ zěi po. Tə mboʼ ŋuu ghwô zə̂u yi a kə pə́ ntsáa, ə́ mbou nkə́ ncí mə́ ntsâa pə́ zěi gháʼá?

²⁵Paghʼə lə̌i mbə́i ńgó paghʼə ghwo mə́ zə̂u yi káa paghʼə pə́ njwó, ə́ laghʼ mbə́ ńgó paghʼə pə̌ nzʉ̂ʼtə zěi tə́ kâa.

²⁶Ə́ kə́ mbə́ ndʉŋ-ndʉŋ yə́rə́, paghʼə lei tə mə́ mbwór, Zəghʼə Ndêi-lěi pə̂ ntôutə wághʼə. Ńté no káa paghʼə pə́ njî wághʼə sʉ́ʉtə́ Sê ghíʼ ə́ yǎa mə́ ntúŋú; Zəghʼə Ndêi-lěi zʉ́ tû-mbəʉ yé pə́ ndaghʼ mətsâr mi mboʼ cǒ ŋuu kûʼ yé lə̂ ndâʼ měi po, ə́ sʉ̂ʉtə Sê tû paghʼə.

²⁷Ghíʼ Sê pə̌ njwô zə̂u tsəm yi ə́ pə́ cər ntə̂ʉ ŋuu-məsoŋ lə̂, a pə̌ njwô zə̂u tsəm yi Zəghʼə Ndêi-lěi pə́ ntúŋu yé zěi, ńté ńgó Zəghʼə Ndêi-lěi pə́ sʉ̂ʉtə Sê tû pye Sê, lə̂ mbə̂u yi Sê pə̌ nkǒŋ.

²⁸Paghʼə pə̌ njî ńgó Sê ghʉ ńgó zə̂u tsəm kə́ ndyəghʼtə́ pə̂ shʉʼʉ mbó pye pi gháp koŋ yé, ə́ pye pi a lə koŋ gháp koŋə́ fúŋ gháp, ə́ ndǎghʼ gháp ńgʉ́ pye pé.

²⁹Ńté ńgó Sê lə zâʼ nzʉ̂ ə́ ntsóʼ gháp; ə́ mbǒu nkə́ ncí nzáʼ nzʉ̂ ə́ ngʉ̌ gháp shwî Môu ye, ńjí ńgó ə́ lei yə́rə́, a pə̂ môu lətû lə̂ ghəpə́ yé pi zǎa.

³⁰Pye pə́tsəm pi Sê lə fú ntû ə́ ntsóʼ gháp ńgó gháp shwí Môu yé, a kə́ ncí fúŋ gháp záp ə́ ndaghʼ ńgʉ́ pye pé. A lə fûŋ pye pi a lə fúŋ gháp lêi ńgó pye ndʉŋ-ndʉŋ mbi zʉ́, ə́ gháp ghwo záp yʉʼ cər ləghûʼ ye.

³¹Paghʼə kə́ pǒu lǎʼ ńgó ho? Ghíʼ Sê pə̌ nzəm paghʼə lo, mboʼ wǒ ŋuu pôu kûʼ lə̂ ngʉ̂ no tə́poŋ lə́ paghʼə?

³²Ə́ zʉ́ yi káa a lə pâa yé kwaʼ Môu ye lə̂ ngwôʼ, lə́ ə́ féi yé ŋə́. A kwʉ̂ ə́ ndághʼ ńzə́u tû zághʼə pə́tsəm: a wo ghʉ̌ gháʼá poŋə́ títə́ lěi nzəm Môu ye ə́ ŋə́ zə̂u tsəm lə́ paghʼə?

³³Mboʼ wǒ ŋuu pûtə pye pi Sê lə tsóʼ gháp? Wêi ŋuu kâa pə́ yé wó, Sê lə̂ fûŋ ŋuu ńgó ŋuu ndʉŋ-ndʉŋ mbi zʉ́.

³⁴Tə mboʼ wǒ ŋuu pôu tâghʼ ngwôʼ tû páp? Wêi ŋuu kâa pə̂ yé wó, Yěso Kəlísto â ŋuu yi a lə kwʉ́, Sê pôu ngʉ́ a zʉ̂ʉ lə̂ ləwʉ̂, a nyǎŋ lə̂ ndyə́ghʼə́ pô Tǎa Sê yi təʉ, ə́ mə́ nzôŋ tû zághʼə.

³⁵Mboʼ hó zə̂u ghʉ tə lə́u Kəlísto kə̂ mbyér nkôŋ yé wághʼə lə̂ mbə̂u yi a laghʼ ńkôŋ wághʼə po? Ə̂ pâghʼ? Ə mbúʼ mbəʉ? Ə̂ məngwôʼ mi pə́ ŋə̂ lə́ paghʼə ńté no paghʼə pə̌i no Kəlísto? Ə nji áa? Kəʉ pûŋ ló? Məzə̂u mi ə́ tsóʼo mənzoʼ mághʼə kəʉ ləwʉ̂ ló?

³⁶Ə̂ pə́ yə́rə́, ə́ ndaghʼ ḿbəutə lə̂ no yi pə́ lə ŋwáʼá cər ŋwaʼa Sê ngô: «Paghʼ pə̂ mpfu tsəm ə́ mbə̂ pə́ ntsʉ ləwʉ̂ ńté gho. Pə́ ghʉtə lə́ paghʼ pə́ ghíʼ pə́ ghʉtə lə̂ məndənzʉ mi pə́ wo ngwǎr wó.»

³⁷Lə́ ə́ wo lə̂ zə̂u pei tsəm, paghʼ lêi nzəm ŋuu yi a lə kǒŋ wághʼ ə́ nkə́ mbə̂ pə́ pəmaʼ-nzʉ́.

³⁸Ə̂ŋ, n fǔ mə́ njî ńgó ə có zə̂u yi mboʼ ə́ ghʉ tə Sê nyêr lə̂ nkə́ nkôŋ wághʼə kâa pə̂ yé wó: ləwʉ̂ kâa kûʼ yé, ləcǐ-mbî kâa kûʼ yé, pəcwôʼ Sê kâa kûʼ gháp, tə mbaa pə̂ mətəʉ mi ə́ sâʼ nzʉ̂ kâa kûʼ yé, məno mi ə́ leitə mpfu wo kâa kûʼ yé, məno mi ghʉ̌ poŋə́ tó kâa kûʼ yé, kəʉ pə̂ məcó mətəʉ kâa kûʼ yé,

³⁹mətəʉ mi tʉ̌-lə́pû kəʉ mi ə́ pə́ ndəu ndesé, kəʉ pə̂ có zə̂u yi Sê lə tsuŋú lo, có zə̂u yi mboʼ ə́ ghʉ tə Sê nyêr lə̂ nkə́ mə́ nkôŋ wághʼə koŋə́, kâa pə̂ yé wó; a lə leitə́ lə́ Nde waghʼə Yěso Kəlísto, ə́ nyarə́ ńgó a koŋ wághʼə.