Read Ngombale Lóma 9 Bible Online

Lóma 9 - Ngombale bible

Lóma 9

¹Ə no yi n ngwo ndǎʼ wó ə̂ no lə́nə́ʉ; kâa m mə́ ntâŋ ghâa məlaa, ńté no məŋ ŋuu Kəlísto; Zəghʼə Ndêi-lěi pə̌ ngʉ̌ n njî ńgó no yo yi məŋ ndaʼ zěi lo pə́ lə́nə́ʉ, ə ntə̂ʉ ghâa pou lə́u mə́ fêʼ yé ghâa po:

²m mə̌ fʉ gháʼate, lôŋ ghaa pôu mbə́ mpfu tsəm mə́ nzáŋ.

³Ə́ tə́i mbə́ yi mboʼ n ntsâa ńgó Sê cóghʼ ndou tû məŋ, ə́ shághʼə́ wághʼ Kəlísto, ńjí ńgó pəfə̌r pâa pəyúda lei mə́u ə́ mbə́i no Yěso Kəlísto, mə́i n ntsǎa. Paghʼ pə pǎp pye tâʼ lâʼ.

⁴Gháp pye Ísə́lahêl: Sê lə laghʼ gháp ńgʉ́ ghəpə́ yé, ə́ ngʉ̌ gháp jwô ləghûʼ ye, ə́ mbou ngʉ́ gháp pə pǎp war kaa lə̂ məmbə̂u tə nzáa, a ŋə̂ ləpə̌ʉ yé lə́ páp, ə́ ndǎʼ mbə̂u yi mboʼ gháp laghʼ ńgúʼtə́ yé, ə́ ngʉ̌ ndáʼá lə̂ məzə̂u mi a ghʉ̌ ŋə́ lə́ páp.

⁵Ghâp ngər pəmə́ngâa-njʉʼ pi jwǐ, Kəlísto tô ə́ mbə́ ŋuu-məsoŋ, ə́ nkə́ kwâr yé pə́ lə̂ ngər zêi, ə́ zʉ́ yi a lěi zə̂u tsəm yi Sê lə tsuŋú, ə́ mbə́ Sê, pə ŋə́ ləghûʼ mbó zʉ́ lə̂ mənguʼ mənguʼ. Ə̂ pə́ yə́rə́*.

⁶Káa a lághʼ ńdaʼ yé ńgó ndaʼá yi Sê lə ghʉ̌ zěi lə lei fe. Ə́ pə̂ pə́ ńgó pye pə́tsəm pi gháp ngər Ísə́lahêl, kâa pə̂ gháp kwaʼ pye Ísə́lahêl;

⁷kâa pə́ pye pə́tsəm pi gháp kwǎr lə̂ ngər Ábələhâm, pi gháp pə́ kwaʼ ghəpə́ yé, ńté no Sê lə laʼ lə́ Ábələhâm ngô: «O ghʉ̌ lěi pə́ lə́ Ísaghʼ poŋə́ ghwǒ ngər ŋuu-məsoŋ yi məŋ ndə ghʉ̌ ndaʼá mə́u lə̂ ngʉ́ ŋə́ lə́ gho.»

⁸Ə́ laghʼ ńdâʼ ngô: Káa ghəpə́ tsəm pi pə́ koŋ koŋə́ njî gháp pə́ ghəpə́ Sê; ndaʼ ghəpə́ yi pə́ lə ghí jí gháp ə́ ndêitə́ lə̂ ndaʼá yi Sê lə ghʉ̌ lə́ pə́ kwaʼ ghəpə́ Sê.

⁹Sê lə ghʉ̂ ndaʼá mbó Ábələhâm, ə́ ndǎʼ ngô: «Ə́ táa pə́ mpfu wo gháʼá nguʼ gháʼá, n ngí pə̌ʉ tó, ngwě gho Sará ghwô tâʼ môu mbiŋə.»

¹⁰Kâa pə̂ yé pə́ ndaʼ zei yo no. Mboʼ paghʼə kə̂ ncí mbyé fəiʼ lə́ Ləpíka yi a lə pə́ ngwě mə́ngâa-njʉʼ wághʼə Ísaghʼ, gháp zʉ́ jî məfâghʼ.

¹¹Lə́ Sê ghwo ye mbə̂u yi a laghʼ ńtsôʼ pye lə̂ faʼ: a ghí tsôʼ ŋuu ńtê pə̂ faʼ yi a wo cóghʼ wó mbó ngaŋ, kâa tsôʼ yé ŋuu ńtê pə̂ məfaʼ shʉʼʉ mi ngaŋ ghʉ̌ měi. Sê lə laʼ lə́ Ləpíka ngô: «O ghʉ̌ jí ghəpə́ pwô, nduŋ-mbi faʼ mbó ndyəghʼ-nzəm.» Ə́ ngǐ lǎʼ yə́rə́, mə́i a kə́ jî yé gháp tə ə́ pə̂ yi mboʼ pə́ laʼ ńgó gháp ghʉ no shʉʼʉ káa ńgó gháp ghʉ no tə́poŋ. Sê lə ghʉ yə́rə́ lə̂ ndághʼ ńnyárə́ ńgó no yi a ghʉ mə́ ndaʼá mə́u láʼ kə́ pə́ pə́ yə́rə́.

¹³Ə̂ ghíʼ Sê pə̌ ndaʼ cər ŋwaʼa ye ngô: «N ndə koŋ Yokôp, ə́ nděi Esawî.»

¹⁴Tə mboʼ paghʼə mâʼ nci laghʼ ńtsóʼ ńgó ho? Ńgó Sê kâa pə́ ŋuu ndʉŋ-ndʉŋ áa? Ə ngə́ kâa pə̂ yé yə́rə́!

¹⁵Ńté no Sê lə laʼ lə́ Mə̌usə̂i ngô: «N ngʉ̌ tsáa məjʉ̂ŋ ŋuu yi n nkǒŋ lə̂ ntsáa məjʉ̂ŋ mé, ə́ pǒu nyarə́ poŋə-ntə̂ʉ zâa mbó ŋuu yi n nkǒŋ lə̂ nyarə́ poŋə-ntə̂ʉ zâa mbó zʉ́.»

¹⁶Ə́ laghʼ ḿbə́ ńgó Sê ghí tsóʼ ŋuu, káa tsôʼ yé pə̂ lə̂ ləkoŋtə yi pye-mə́soŋ, káa kə́ té pə̂ məfaʼ máp, lə́ ə́ fû pə́ mbó zʉ́ yi a pə̌ ngaŋə tsâa-mə́jʉ̂ŋ.

¹⁷Ə́ pə́ cər ŋwaʼa Sê, Sê pə̂ ndâʼ lə́ fou Egípto ngô: «N ndə tsóʼ ghô ndaghʼ ńgʉ̂ fou gháʼá, lə́ pə́ yi n ngwo leitə́ lə́ gho, ə́ nyarə́ mətəʉ mâa pə jwó, pə́ fú mə́u, ə́ ndeʼtə́ ŋuu yi m mbə̌ wěi, ə́ yʉʼ tsəm ndəu ndesé.»

¹⁸Ə́ pə̂ yə́rə́ mbə́ ńgó Sê pə̌ ntsâa məjʉ̂ŋ ŋuu yi zʉ́ Sê kǒŋ lə̂ ntsáa məjʉ̂ŋ mé, ə́ mbou mə́ ngʉ́ ŋuu yi zʉ́ Sê kǒŋ lə̂ ngʉ́ a tə̂i tû ŋə́ lə́ zʉ́, a tə̂i tû.

¹⁹Ndeʼ có pəcó pye zûʼ gháʼa ə́ túŋú ghâa ngô: «Tə ə́ lə̌i mbə́ gháʼa Sê pôu ncóghʼ fər paa paghʼə ńté hó? Tə́ ə́ lə̌i mbə́ gháʼa wǒ ŋuu pôu kûʼ lə̂ ndə̂ʼ lə̂ ngʉ́ zə̂u yi Sê lə̂ kǒŋ ńgó â ghʉ̂?»

²⁰Gho ŋuu-məsoŋ o gháʼa mbə̂ zô wǒ tə ndə̂ʼ no yi Sê pə̌ nkǒŋ? Ə́ ngwǒŋ gháʼá mə́ ntúŋu mbou-məngwǒŋ tsaʼá ngô: «O lə ghí póu ghâa m mbə́ gháʼa ńté hó ló mo?»

²¹Mboʼ mbou-məngwǒŋ lâghʼ tsaʼá-mə́khʉŋ ḿbóu zə̂u yi a pə̌ nkǒŋ: a lə̌i nkôŋ, a lâghʼ tsaʼá zêi ḿbóu ngwǒŋ yi ə́ ghwǒ lətəi-ndwuŋ, ə́ nkə́ nkôŋ a lâghʼ ḿbóu yi kâa ghwô yé lətəi-ndwuŋ.

²²Sê lə pə́ ndôu lə̂ nyárə́ záŋə́ lôŋ yé, ə́ mbou mə́ ndôu ngʉ́ pə́ jí mətəʉ mé. Lə́ mbou ngwô shəghʼ-ntə̂ʉ gháʼate nzəm pye-mə́soŋ pi gháp pə́ ghíʼ məngwǒŋ mi mboʼ a lə záŋə lóŋ lə́ páp tə mbə́ghʼ gháp.

²³Sê lə pə́ ndôu lə̂ ngʉ́ pə́ jî mbə̂u yi ləghûʼ ye lǎghʼ ńgwǒ ngəwoghʼ; ə́ mbó pye pi gháp pə́ ghíʼ məngwǒŋ mi a ghwǒ tsâa-mə́jʉ̂ŋ nzəm páp. A lə záʼ nzʉ̂ ntsuŋú mêi məngwǒŋ ghíʼ ə́ wo kə́u cər ləghûʼ ye.

²⁴Pə́ laʼ gháʼá wághʼə. Ə́ paghʼə pi a lə fúŋ wághʼə, káa fúŋ pə́ ndaʼ nou Pəyúda, ə́ fúŋ mbaa nou pye pi káa gháp pə́ Pəyúda.

²⁵Ə̂ no yi Sê pə̌ ndaʼ cər ŋwaʼa Ozê ntsətə-nkəʉ ye ngô: «Ə pye pi kâa gháp lə pə́ pye lâʼ pâa n ngʉ̌ fúŋ gháp ńgó pye lâʼ pâa, ə pye pi kâa n ndə pə́ nkôŋ ghâa gháp gháʼate n ngʉ̌ fúŋ gháp ńgó pye pâa pi lətəi-ndwuŋ.

²⁶Yʉʼ yi pə́ lə tə́ʉ wó ə́ ndâʼ lə́ páp ngô: “Káa pei pə́ pye lâʼ pâa” pə́ ghʉ̌ kə́ tə́ʉ pə́ yʉʼ wó ə́ fúŋ gháp ńgó ghəpə́ Sê yi a pə̌ ntəʉ.»

²⁷Esǎya ntsətə-nkəʉ Sê lə kə́ ndaʼ yé no ńté pye Ísə́lahêl ngô: «Tə mbaa pə́ ghíʼ pye Ísə́lahêl lə záa tə mbə́ ghíʼ saŋə-sáŋə yi ə́ nuŋú nkaŋ mə̂i-nci lə̂, có ntâʼ pye lə́ ghʉ̌ ncwór;

²⁸Ńté no ə zə̂u yi Nde Sê zághʼə lə lǎʼ ńgó a ghʉ̌ ghʉ̌ ndəu ndesé, a ghʉ̌ tóghʼ ghʉ̌, ə́ pǒu ghʉ̌ měi yʉʼ tsəm ndəu ndesé.»

²⁹Esǎya zʉ́ tû-mbəʉ yé lə zâʼ nzʉ̂ ndǎʼ ngô: «Ə Sê yi a ghwǒ mətəʉ mə́tsəm lə pə́ ghíʼi ə́ ndə́iʼ pâa có ntâʼ lə̂ ghəpə́ zághʼə po, mə́i paghʼə lə me ghíʼ pye túsoŋ Sodôm mbaa pi túsoŋ Ngomôh.»

³⁰Paghʼə kə́ cí mǎʼ nci laghʼ ńtsóʼ ńgó ho? Mboʼ paghʼ lâʼ ńgó pye pi káa gháp lə pə́ Pəyúda, ə́ mbəi káa pə́ lou gháp lə̂ mbə́ pye ndʉŋ-ndʉŋ mbi Sê; Sê lə leitə́ lə̂ pə̂i-ntə̂ʉ záp nzəm Yěso Kəlísto ə́ fúŋ ńgó pye ndʉŋ-ndʉŋ mbi zʉ́,

³¹lə́ ə́ ngwǒ pye Ísə́lahêl, gháp pə̂ ndôu záp pə̂ ndághʼ mbə̂u yi gháp laghʼ ńŋə̂i ghíʼ ləpə̌ʉ pə́ ntúŋú, ə́ mbə́ ndʉŋ-ndʉŋ mbi Sê, lə́ káa pǒu kuʼ gháp mə́u.

³²Káa pǒu kǔʼ mə́u ńté hó? Ńté ńgó káa gháp lə́ pə́ ndôu gháp ngí pə́ ndʉŋ-ndʉŋ mbi Sê, ə́ nděi pə́ lə̂ pə̂i-ntə̂ʉ nzəm Yěso Kəlísto, gháp lə pə́ nkwâŋ ńgó gháp wo lǎghʼ məfaʼ shʉʼʉ máp ə́ pə́ ndʉŋ-ndʉŋ mbi Sê. Gháp lə ghʉ yə́rə́, ə́ ntó ku záp lə̂ «ləghǒ yi pə́ kotə mə́u ə́ pfûŋ sê»,

³³ə̂ ghíʼ pə́ lə ŋwaʼá cər ŋwaʼa Sê ngô: «Pei jwó, m mə̌ nuŋu ləghǒ túsoŋ Siyôŋ yi pə́ tô ku mə́u, ə́ ngáatə́, ə́ tə́koʼ ləghǒ yi pə́ kotə mə́u mpfúŋ. Lə́ ŋuu yi a pə̌i no ləghǒ zêi, ə sə̂ʉ láʼ kô yé yé po.»