Read Ngombale 1 Korêŋtə 1 Bible Online

1 Korêŋtə 1 - Ngombale bible

1 Korêŋtə 1

¹Məŋ Pôl yi Sê lə leitə́ lə̂ ləkoŋtə ye ə́ ntsóʼ ghâa, ə́ ndaghʼ ńgʉ́ ngaŋə-ntə̂u Yěso Kəlísto ŋwaʼá ŋwaʼa wo. Ə́ ngí ŋwaʼá, fə̌r waghʼə Sosətênə pə̂ se.

²N ŋə̂ wěi lə́ pye Sê pi gháp pə́ túsoŋ Korêŋtə, ə́ mbə́ pye pi Sê lə lǎr gháp lə́ Yěso Kəlísto, gháp cʉ̂ʼ pye Sê, ə́ mə́ ndôu ńgó gháp cʉ́ʼ kwaʼ pye pé. N ŋə̂ wěi mbaa mbó pye pi gháp pə́ yʉʼ tsəm, ə́ mə́ fûŋ ləjôghʼ Nde waghʼə Yěso Kəlísto yi a ghí pə́ Nde gháp, ə́ nkə́ mbə́ waghʼə lə́wó;

³ńgó Tə́ waghʼə Sê gháp Nde waghʼə Yěso Kəlísto ghwô poŋə-ntə̂ʉ yi tə́ ndaghʼə nzəm pei, ə́ ncóghʼ mə́shwítə məntə̂ʉ pei!

⁴M mə̌ ŋə̂ nkhwo lə̂ Sê maa mpfu tsəm ńté wéi, lə̂ poŋə-ntə̂ʉ yi tə́ ndaghʼə yi a ghwǒ nzəm pei ńté ghíʼ pei pə Yěso Kəlísto lə təmtə́ ńcʉ́ʼ tâʼ.

⁵Ghíʼ pei pə Kəlísto lə təmtə́ ńcʉ́ʼ tâʼ lə̂, Sê lə leitə lə́ zʉ́, ə́ ŋə́ wéi məzə̂u shʉʼʉ tə nzáa, ə́ ngʉ̌ pei kûʼ lə̂ ndâʼ tsâr yé, ə́ mbou ngʉ́ pei kûʼ lə̂ njí no lə́nə́ʉ tsəm yi ə́ náŋtə́ no yé.

⁶Pə́ lə laʼ wéi no yi pə́ pə́ njî lə́ Kəlísto, pei zûʼ, ə́ ntághʼ ku mə́u

⁷tə ə́ pə̂ yi pei ghǐ pə́ pâp ńgó Nde waghʼə Yěso pə̂ʉ ńtó, lə́u có zə̂u lə̂ məzə̂u mi Sê ŋə̂ lə́ pye pé pə̂ mbûŋ yé mbó pei po.

⁸Zʉ́ Yěso Kəlísto lə́ wo kə́ pə́ tôutə wéi tə wǒ kə́u ləlyəghʼtə́, njí ńgó a ghʉ ngǐ pə̌ʉ tó, pei pə̂ tə́ lǒʼ.

⁹Ə Sê laʼ ngʉ́, zʉ́ yi a lə tsóʼ wéi ə́ ngʉ́ pei pə Môu yé Nde waghʼə Yěso Kəlísto təmtə ńcʉ́ʼ tâʼ ŋuu.

¹⁰Pəfə̌r pâa, m mbə̂uʼ mbô lə́ pei lə̂ ləjôghʼ Yěso Kəlísto ńgó pei ghwô tâʼ ntsʉ, ńgó koo ngaptə kə̂ mbə́ təcər pei, pei ghwô tâʼ Zəghʼə, ə́ ngwǒ tâʼ kwaŋtə.

¹¹Pəfə̌r pâa, n ndaʼ gháʼá ńté no pye cʉŋə-ndə̂ Kəlowê lə laʼ ghâa ńgó ngaptə pə́ təcər pei.

¹²N ndə zúʼ ńgó ə́ pə́ təcər pei, cǒ ŋuu ghi pə́ laʼ ngô: «Məŋ, m mbə̂ zâa pə́ nzəm Pôl.» Cǒ ŋuu pə̂ ndâʼ yé ngô: «Ə́ ngwǒ lə́ məŋ, m mbə̂ zâa pə́ nzəm Apolósʉ.» Ə cǒ ghi pə́ laʼ ngô: «Məŋ, m mbə̂ zâa pə́ nzəm Sefásʉ.» Ə cǒ pə̂ ndâʼ yé ngô: «Məŋ, m mbə́ zâa pə́ nzəm Kəlísto.»

¹³Kəlísto gháʼá ngaptə́ mo? Pə́ lə kʉʉ gháʼá pə́ Pôl lə̂ tʉ̌-mbʉ̂ŋtə mo? Kəʉ pei lə pfû-nci gháʼá pə́ lə̂ ləjôghʼ Pôl ló?

¹⁴N ŋə̌ nkhwo mbó Sê ghíʼ kâa n ndə ŋə̂ ghâa wéi nci, tə ndyéʼ Kəríspwísʉ gháp Ngawísʉ pi gháp lə pfú nci mbó məŋ.

¹⁵Ə́ laghʼ mbə́ ńgó mboʼ pye lâʼ gháp ńgó gháp lə pfû nci lə̂ ləjôghʼ zâa tə ə́ ncʉ́ʼ ndághʼ ḿbə̂ pye pâa po.

¹⁶Ə̂ŋ, n ndyəghʼə zarə́ no? N ndə kə́ ncí ŋə́ nci lə̂ cʉŋə-ndə̂ Stefanásʉ. Káa n nkə́ mbóu njî ghâa cǒ ŋuu ndeʼe yi n ndə pǒu n nkə́ ŋə́ yé nci.

¹⁷Ńté ńgó káa Kəlísto lə tə́u yé ghâa ńgó n ngwó ŋə́ nci lə́ pye, a lə tə́u ghâa pə́ ńgó n ngwó ntsətə́ Nkəʉ Shʉʼʉ, lə́u ntsətə́ pə́ lə̂ mbə̂u yi pye-mə́soŋ po, ə́ mbóghʼ lə̂ ngʉ́ mətəʉ mi ə́ fû lə̂ ləwʉ̂ Kəlísto ghíʼ a lə kwʉ́ lə̂ tʉ̌-mbʉ̂ŋtə kə̂ nkûʼ yé lə̂ ngʉ̂ có zə̂u po.

¹⁸Məno mi pə́ yaa ndâʼ ntê ləwʉ̂ Yěso Kəlísto lə̂ tʉ̌-mbʉ̂ŋtə, pə́ mbó pye pi gháp pə́ lə̂ laŋə́-ndə̂u ləcwî, ə́ mbə́ pə̂ məno pə. Lə́ ə́ ngwǒ mbó paghʼə pi paghʼə pə̌ lə̂ laŋə́-ndə̂u ləcwôr, ə́ pə̂ mətəʉ Sê.

¹⁹Ŋwaʼa Sê yaa mə́ ndâʼ ngô: «N ngʉ̌ cǒŋ jîno pənjino, ə́ pǒu ghʉ̌ tə lə́u gháp kə nkûʼ gháp lə̂ ndâghʼ jîno záp ńgʉ̂ có zə̂u po.»

²⁰Tə ghíʼ ə́ kə́ mbə́ yə́rə́ lêi, ə njino ghǒ? Nkeʼtə-ləpə̌ʉ pə̂ ghó? Pətúŋ-lə́cʉŋ no pi nzʉ̂ yo pə̂ ghó? Kâa Sê lə ghʉ́ jîno yi nzʉ̂ yo cʉ́ʼ məno pə mo?

²¹Ə́ pə́ yə́rə́, ńté ńgó káa pye-mə́soŋ lə kûʼ gháp lə̂ ndághʼ ndʉʉ jîno ghap ńjí ŋuu yi Sê pə̌ wěi, tə mbaa pə́ ghíʼ a pə̌ sâa-sǎa nyárə jîno yé mbó ŋuu ntsəm lo. Ə̂ zə̂u yi ə́ ghʉ̌, ə Sê lə tághʼ ńgó a wo ghʉ̌ pye pi gháp pə́i no yé ə́ ndeitə́ lə̂ no yi paghʼ lâʼ lə̂ ləwʉ̂ yi Yěso lə kwʉ́ wěi lə̂ tʉ̌-mbʉ̂ŋtə táa cwór; pye pə́ nzúʼ, ə́ pə̂ pə́ məno pə mbó páp.

²²Pəyúda ghí pə́ lə̂ záp yʉʼ pə́ túŋu mələiʼi mi ə́ nyárə mətəʉ Sê, pye Ngərêghʼ pə̂ ntúŋu záp pə̂ jîno.

²³Lə́ ə́ ngwǒ lə́ paghʼ, mə́i paghʼ lâʼ pə̂ no Kəlísto yi pə́ lə kʉ̌ʉ yé lə̂ tʉ̌-mbʉ̂ŋtə, ə́ pə̂ mbó pəyúda, ə́ mbə́ no tə kʉ̌ʉ tə ndáʼ ŋuu, ə́ mbə́ mbó pye pi káa gháp pə̂ gháp pəyúda, ə́ mbə́ məno pə.

²⁴Lə́ ə́ ngwǒ lə́ pye pi Sê lə tsóʼ gháp təcər pəyúda, kəʉ pə́ təcər pye pi káa gháp pə̂ gháp pəyúda, Kəlísto pə̂ mətəʉ Sê, ə́ mbou mbə́ jîno Sê.

²⁵Ńté ńgó zə̂u yi Sê ghʉ̂, pye jwô ə́ fúŋ ńgó ə̂ məno pə, jîno pə́ mə́u ə́ nděi yi pye-mə́soŋ ghʉ̂. Ə zə̂u yi Sê ghʉ̂, pye-mə́soŋ jwô ńgó ə́ pwôr, zěi ghwô mətəʉ ə́ nděi yi pye-mə́soŋ ghʉ̂.

²⁶Pəfə̌r pâa, pei jwó mbə̂u yi Sê lə lǎghʼ ńtsóʼ wéi ńjwó: ə́ pə́ təcər pei, pye pi pye nzʉ̂ pə́ njwô ńgó gháp ghwô jîno, káa gháp zâa gháp, ə pi gháp ghwǒ mətəʉ kâa kə́ nzâa gháp záp lə́wó, ə pi gháp fú lə̂ məcʉŋə-ndə̂ pəghaŋə-zə̂u kâa kə́ ncí nzâa gháp záp lə́wó.

²⁷Lə́, Sê lə tsôʼ məzə̂u mi ə́ pə́ mbó pye cər nzʉ̂ ə́ mbə́ pə́ ghíʼ məno pə, ə́ ndaghʼ ńtə́m sə̂ʉ tû pye pi gháp ghwǒ jîno; a lə tsôʼ zə̂u yi pye nzʉ̂ jwó ńgó ə́ pwôr, ə́ ndaghʼ ńtə́m sə̂ʉ tû ngaŋə-mətəʉ.

²⁸Sê lə tsôʼ zə̂u yi ə́ pə́ cər nzʉ̂ káa pə̂ yé có zə̂u, ə́ mbə́ yi pye-mə́soŋ jwô, ə́ khwôghʼ khwoghʼə́ mənyôghʼ páp; ə́ ndaghʼ ńshúʼu ndwuŋ zə̂u yi gháp kwǎŋ záp ńgó ə̂ yi lətəi-ndwuŋ;

²⁹ńjí ńgó ə́ lei yə́rə́, lə́u cǒ ŋuu məsoŋ kə́ nkûʼ yé lə̂ ŋáʼtə́ mbəʉ ye mbi Sê po.

³⁰Sê lə tə́mtə́ wéi pə Kəlísto, ə́ ndǎghʼ Kəlísto ə́ ngʉ́ zéi jîno: Kəlísto ghʉ̂ Sê fûŋ wághʼə ńgó pye ndʉŋ-ndʉŋ mbi zʉ́, ə́ ndǎghʼ waghʼə ngʉ́ pye Sê, ə́ nkwarə́ wághʼə cər məfaa.

³¹Ə́ laghʼ ḿbə̂utə lə̂ no yi pə́ ŋwaʼá cər ŋwaʼa Sê ngô: «Ŋuu lə̌i mə́ ndôu ńŋáʼtə́ mbəʉ ye, a lâghʼ pə̂ zə̂u yi Nde lə ghʉ̌, ə́ ŋáʼtə́.»