Read Ngombale 1 Korêŋtə 10 Bible Online

1 Korêŋtə 10 - Ngombale bible

1 Korêŋtə 10

¹Pəfə̌r pâa, m mə̌ ndou nkʉ́ʉtə́ wéi məno mi ə́ lə kwátə́ pətə́ paghʼə, ə́ mpfu yi gháp pə Mə̌usə̂i lə nǎa mbə́. Məlâa lə pə́ mbəʉ páp, ə́ mə́ mbápə́ gháp; gháp pə́tsəm pou nâa ntə́u mə̂i-nci.

²Ə́ pə̂ yə́rə́, gháp leitə lə́ Mə̌usə̂i ə́ mpfú nci cər məlâa mbaa cər mə̂i-nci, ə́ ncʉ̂ʼ pye Mə̌usə̂i.

³Gháp pə́tsəm lə naa nzʉ́ tâʼ ntû məzʉ̂ mi ə́ fú mbó Sê,

⁴ə́ mbǒu nâa nó nci yi ə́ fú mbó Sê. Gháp lə nô wêi nci, ə́ pə̂ yi ə́ lə kwar lə́ tə́koʼ ləghǒ yi Sê lə ghʉ̌ ə́ pə̂ ncághʼə gháp; wêi tə́koʼ ləghǒ pə̂ Kəlísto.

⁵Lə́ káa lələʉ pye təcər páp lə pə́ ngʉ̂ gháp zə̂u yi Sê pə̌ nkǒŋ, ə́ mpfúŋ ńkwʉ́tə́ koŋə-məkwaʼá.

⁶Mêi mwo məno lə lei yə́rə́, ńjí ńgó paghʼə fǔ mə́u, ə́ ndaghʼə́ tû zághʼə lə̂ nkə́ mbóu mə́ ngʉ̂ məno tə́poŋ ghíʼ páp.

⁷Koo pei cʉ̂ʼ pəghúʼtə́-mə́zə̂u mi pə́ ghûʼtə ə́ ndâʼ ńgó ə̂ məsê ghíʼ pəcó pye təcər páp lə ghʉ̌ záp yə́rə́. Ə́ leitə yə́rə́, pə́ ŋwáʼa cər ŋwaʼa Sê ngô: «Ə lâʼ lə nyáŋ sê, ə́ nzʉ́ zə̂u, ə́ nó; ə́ nděsê ńzǎp ḿbíŋ.»

⁸Pei páa lə̂ mbə̂u pə̌u nzóʼ, ə̂ ghíʼ pəcó pye təcər páp lə ghʉ̌ yə́rə́, pye tóusʉ ntsap tárə́ lə̂ mə̂m-mbwô tə̂ʉ tâʼ leʼé ə́ nkwʉ́tə́ təcər páp.

⁹Koo paghʼə cʉ́ŋə Nde ńgó â ghʉ́ zə̂u lə́ paghʼə ghíʼ pəcó pye təcər páp lə ghʉ̌ záp yə́rə́, a ghʉ̂ mənô tsôghʼtə gháp, gháp kwʉ̂tə.

¹⁰Koo pei kə̂ mə́ ndə́mtə́ ńté Sê ghíʼ pəcó pye təcər páp lə ghʉ̌ záp yə́rə́, ə Sê tə̂u cwôʼ ye yi a jwîtə pye, a tô ńjwítə́ gháp.

¹¹Məno mêi lə kwâtə pətə́ paghʼə gháʼá ə́ ndaghʼ ńnyárə tâʼ fəiʼ-no. Pə́ lə pou ŋwáʼá měi gháʼá, ńté ghíʼ paghʼə pi paghʼə cʉ́ŋə mə́ tə mə́ mbâatə ləlyəghʼtə́ ngoŋ lo, wo fú mə́u ə́ jí no.

¹²Ə́ pə̂ yə́rə́, ŋuu yi a pə̌ nkwaŋ ńgó a tə̂ʉ tə̌ʉ ghwôtə́ mbəʉ yé ḿbóghʼ lə̂ mpfúŋ.

¹³Mənkwaʼtə mi ə́ kə cə́r wéi, ə̂ mi ə́ cə̂r pə́ ŋuu ntsəm. Ə Sê yi a pə̌ taghʼ-tə-tsôʼ wo pə̂i yé ńgó nkwaʼtə cə́r wéi tə́ ndêi mətəʉ méi po. Ə Sê wo ŋə́ wéi mətəʉ lə̂ ndághʼ ńshə̌ghʼ, ə́ pǒu ŋə́ wéi məsʉ̂ lə̂ ndághʼ ńfú cər wó ńkwár.

¹⁴Ə̂ zə̂u yi ə́ ghʉ̌, pəsə̌u pâa pi lətəi-ndwuŋ, koo pei ghwô có no lə̂ məzə̂u mi pye ghûʼtə, ə́ fûŋ ńgó məsê.

¹⁵N ndaʼ yo no lə́ pei ghíʼ n ndaʼ lə́ pye pi gháp pə́ kwaŋə tû záp; kwaʼ pei zéi, pei náŋtə́ zéi ńjwó ńgó kəʉ no yi n ndâʼ lo ə̂ no-lə́nə́ʉ.

¹⁶Paghʼə ŋə̂ nkhwo mbó Sê ńté tə́tóʼ məluʼ yi paghʼə no wěi gháʼá, kâa lǎghʼ ńtəmtə lə̂ məci Kəlísto mo? Ə́ mbǒu mbwóʼtə́ mbələ̂ghʼ ə́ ŋə̂ nkhwo mbó Sê ə́ mpfár gháʼá, kâa lǎghʼ ńtəmtə lə̂ mbap mbəʉ Kəlísto mo?

¹⁷Ghíʼ tâʼ mbələ̂ghʼ moʼ lə̂ pə̌ wó lə̂, paghʼə pə́tsəm pou ntə́mtə́ ḿpfâr tâʼ mbələ̂ghʼ wêi gháʼá, ə́ laghʼ ńnyárə ńgó paghʼə pə́tsəm təmtə́ ḿbə́ pə́ tâʼ mbəʉ moʼ.

¹⁸Pei náŋtə́ pye Ísə́lahêl ńjwó: ə́ pə́ təcər páp, pye pi gháp pfár mbap yi pə́ lǎghʼ nuŋú poʼ Sê, káa gháp pə Sê yi a ghwǒ lənuŋú poʼ zêi lághʼ ńtəmtə́ gháʼá ḿbə̂ tâʼ mo?

¹⁹N ndou ndáʼ ńgó ho? Ńgó mbap yi pə́ laghʼ ńgûʼtə məzə̂u mi pə́ fûŋ ńgó məsê ghwo cǒ lətəi-ndwuŋ áa? Kəʉ məzə̂u mi pə́ ghûʼtə lêi ghwo cǒ lətəi-ndwuŋ ló?

²⁰Ə ngə́, káa ə̂ ghwo yé cǒ lətəi-ndwuŋ. Lə́ n ndou gháʼá ndâʼ ńgó məzə̂u mi pətəpə̌i-no Sê laghʼ ńgûʼtə məzə̂u mi pə́ fûŋ ńgó məsê lêi, gháp ŋə̂ gháʼá pə́ lə̂ məzəghʼə tə́poŋ. Káa m mə́ nkôŋ ghâa ńgó pei pə məzəghʼə tə́poŋ tə̂m no.

²¹Mboʼ pei pə̂ nô wéi tə́tóʼ Nde, ə́ mbóu mə́ nô yi məzəghʼə tə́poŋ po. Mboʼ pei pə̂ nzʉ̂ wéi məzʉ̂ Nde, ə́ mbóu mə́ nzʉ̂ mi məzəghʼə tə́poŋ po.

²²Paghʼə pə̌ ndou tyə̂ptə́ Nde ńgó lóŋ ye záŋ ńté wághʼə mo? Paghʼə ghwo təʉ ə́ ndə̂i yé mo?

²³Pəcó pye pə́ təcər pei, wǒwó lə́ páp pə̂ ndâʼ ńgó mboʼ a ghʉ zə̂u tsəm ghíʼ a kǒŋ; lə́ mboʼ zə̂u tsəm pfûtə yé ghâa po.

²⁴Koo ŋuu lôu pə́ ndʉʉ pəi ye yi a wo zʉ́, â lôu mbaa yi pəcó pye.

²⁵Pei pfár zə̂u tsəm yi pei zə̂u mətǎa tə́ túŋú ńgó ə́ fú ghó?

²⁶Ńté no nzʉ̂ gháp zə̂u tsəm yi pə́ cər wó pə́ pə̂ mi Nde.

²⁷Ŋuu yi kâa pə̂ yé ŋuu Kəlísto lə̌i ngə́u wéi no lətsei yé, pei pə́i lə̂ ngwó wó, ə́ nkə́u wó, pə́ ŋə́ pə̂ hó lə́ pei, pei zʉ̂ tə́ ghwo məcó məkwaŋtə, tə́ túŋu có no.

²⁸Lə́, ŋuu láʼ lə́ pei ńgó mbap zə̂, ə̂ yi pə́ laghʼ mə́ mǎʼ məsê, koo pei pfâr ńté ŋuu yi a lǎʼ wéi, ə́ mbóghʼ kwaŋtə ngaŋ lə̂ nzúʼ tə́poŋ.

²⁹N ndâʼ kwaŋtə gháʼá, káa lâʼ kwaŋtə zéi; n ndâʼ pə́ yi ŋuu ndeʼe. Lə́ tə mboʼ n nkôŋ ghâa pə́ məŋ ngʉ̂ zə̂u, kwaŋtə ŋuu ndeʼe pou nzúʼ tə́poŋ ńté hó?

³⁰Məŋ ndə̌i ngí zʉ́ məzʉ̂ mâa, ə́ ntsə̌mbi ŋə́ nkhwo mbó Sê, ŋuu pôu ŋwə́itə́ ghâa ńté hó, lə́ mə́i n ŋə mə́ nkhwo mbó Sê?

³¹Ə́ pə̂ yə́rə́, m mə̂ ndâʼ lə́ pei ńgó pei lə̌i mə́ nzʉ́, kəʉ mə́ nó, kəʉ mə́ ngʉ́ pə̂ hó, pei ghʉ̂ pə́ lə̂ mbə̂u yi pə́ wo jwó, ə́ ŋə́ ləghûʼtə mbó Sê.

³²Koo pei ghʉ̂ zə̂u yi ŋuu pəyúda, kəʉ yi ŋuu Gərêghʼ, kəʉ yi ŋuu Kəlísto wo kotə́ mə́u, ə́ pfúŋ.

³³Pei ghʉ́ ghíʼ məŋ! M mə̌ sâʼ zâa təʉ lə́ pə́ yi mboʼ pye pə́tsəm pə̂i no zâa lə̂ məno mâa mə́tsəm. Káa m mə́ ndóu ghâa pə̂ zə̂u yi ə́ wo pfútə́ pə́ ghâa, n ndou pə́ zə̂u yi ə́ wo pfútə́ pye tə nzáa, ńjí ńgó Sê ghʉ̂ gháp cwôr.