Read Ngombale 1 Korêŋtə 11 Bible Online

1 Korêŋtə 11 - Ngombale bible

1 Korêŋtə 11

¹Pei ghʉ́ ghíʼ məŋ, ə́ ndʉŋ-ndʉŋ ghíʼ m mə̌ ngʉ zâa ghíʼ Kəlísto.

²M mə̌ fə́tə wéi ghíʼ pei wo lə̂ zə̂u tsəm, ə́ ntsə̌mbi nkʉ́ʉtə́ ghâa, ə́ mbou mə́ ntâghʼ ku lə̂ məzə̂u mi n ndə jyéʼ wéi měi.

³Lə́ ə́ pou ngáʼá, m mə̂ ndôu ńgó pei jí yo no: ŋuu yi a ghwǒ məngyě, ə̂ ŋuu mbiŋə; ŋuu yi a ghwǒ ŋuu mbiŋə pə̂ Kəlísto, ŋuu yi a ghwǒ Kəlísto pə̂ Sê.

⁴Ŋuu mbiŋə lə̌i mə́ sʉ̂ʉtə Sê kəʉ mə́ ndâʼ no Sê, ə́ ndǎghʼ zə̂u mbǒu tû yé, mə́i a coŋ gháʼá ndwuŋ Kəlísto yi a ghwǒ yé.

⁵Lə́ məngyě ntsəm yi a sʉ̂ʉtə Sê kəʉ ndâʼ no Sê tə́ pǒu tû yé, a coŋ gháʼa ndwuŋ ndə̌u ye yi a ghwǒ yé: A tə̂ʉ mpfu wêi gháʼá, ə́ ncʉ́ʼ mbə́ pə́ ghíʼ məngyě yi pə́ lǎŋ tû yé lə̂.

⁶Ńté ńgó məngyě lə̌i ndə́iʼ pǒu tû yé po, ə́ pə̂ ntúŋu ńgó â lâŋ tû yé. Lə́ ghíʼ, ə́ kə́ mbə́ sə̂ʉ mbó məngyě lə̂ ndâŋ tû ye kəʉ lə̂ nzéʼtə́ mənyuŋu tû mé lə̂, ə́ poŋ ńgó â pôu tû yé.

⁷Ə́ ngwǒ lə́ ŋuu mbiŋə, mə́i kâa ghwô yé lə̂ ngí sʉ́ʉtə́ Sê, ə́ mbǒu tû yé; ńté ńgó a shwǐ Sê, pə́ pou ndêi pə́ lə́ zʉ́, ə́ njwô ləghûʼ Sê. Lə́ ə́ ngwǒ lə́ məngyě, a pə̂ ləghûʼ ŋuu mbiŋə.

⁸Ńté no kâa Sê lə fú yé pə́ lə́ məngyě mbóu ŋuu mbiŋə, a lə fú pə́ lə́ ŋuu mbiŋə, ə́ mbóu məngyě.

⁹Káa Sê lə pôu yé ŋuu mbiŋə ńté məngyě, a lə póu pə́ məngyě ńté ŋuu mbiŋə.

¹⁰Ə̂ zə̂u yi ə́ ghʉ̌, məngyě ghwo lə̂ mbôu tû yé ə́ ndaghʼ ńnyárə́ ńgó a shúʼu mbəʉ ye mbi ŋuu mbiŋə ńté pəcwôʼ Sê[6].

¹¹Ə́ pə́ tə mbə́ yə́rə́, ghíʼ paghʼə pə Nde təmtə́ ḿbə́ tâʼ lə̂, mboʼ məngyě lâʼ yé ńgó káa gháp ŋuu mbiŋə tə́m no po, lə́u ŋuu mbiŋə kə̂ ndâʼ yé ńgó káa gháp məngyě tə̂m no po.

¹²Ńté no Sê lə pə́ tə ndêi pə́ lə́ ŋuu mbiŋə ə́ mbóu məngyě, lə́ məngyě lə̂ pôu njî ŋuu mbiŋə, zə̂u tsəm nâa fû pə́ mbó Sê.

¹³Pei yaa njwô zéi ńgó mboʼ məngyě sʉ́ʉtə́ Sê cər cûʼtə tə́ pǒu tû yé ə́ poŋ?

¹⁴Pə́ wə́ yʉʼ tsəm, ə́ mə́ njî ńgó ə̂ sə̂ʉ mbó ŋuu mbiŋə lə̂ ntwúʼ mənyuŋu tû mé tə ə́ saghʼtə.

¹⁵Lə́ ə́ ngwǒ lə́ məngyě, mə́i ə ntwúʼ mənyuŋu tû tə saghʼtə pə́ mbó zʉ́ ə́ mbə́ pə̂ no məkuʼ, ńté ńgó Sê lə ghʉ̂ mənyuŋu tû məngyě saghʼtə; ə́ ncʉ́ʼ mbə́ mbó zʉ́ pə́ ghíʼ zə̂u yi a lǎghʼ ə́ mbǒu tû yé lə̂.

¹⁶Ŋuu kə́ mə́ nzóŋə no mə́u, a jî ńgó káa paghʼ kə́ ngwô wághʼ có no yi ndeʼe lə̂ ndáʼ, məcûʼtə pye Kəlísto kâa kə́ ngwô gháp záp no yi ndeʼe lə́wó lə̂ ndâʼ.

¹⁷Ə́ có no kə́ ncí ə́ mbə́ wó yi n ngwo lǎʼ no mə́u mpfu wo, ə́ mbə́ yi pei pə̌ ngʉ̌, káa ə̂ pə́ mboŋ yé ghâa. Ńté ńgó ə́ pə́ cər məcûʼtə méi, məno shʉʼʉ cʉ̂ʼ lə̂ nkwátə́ cər wó, mi tə́poŋ lə́ kwatə.

¹⁸Ə́ wo lə̂ məno mi ə́ pə́ sê, nduŋ-mbi no pə̂ ńgó n ndə zúʼ ńgó ə́ pə̂ mpfu yi pei lěi tə nkə̂itə́, pei ghâptə́ mbəʉ zéi lə̂ mənou; m mbôu mə́ njwô ńgó ə́ lə̌i ndə́iʼ hó po, ə́ pə̂ no lə́nə́ʉ.

¹⁹Ə́ yaa mə́ ntúŋu ńgó ngaptə pə́ təcər pei, ńjí ńgó pə́ fú mə́u ə́ njwó pye pi káa gháp kôŋ gháp ngaptə.

²⁰Pei pə̌ nkəitə́ lə̂ nzʉ́ məzʉ̂ Nde, kâa zʉ̂ wéi ghíʼ ə́ yǎa mə́ ntúŋú.

²¹Ńté no ə́ tə̂ʉ mpfu yi pei wo nzʉ̂ məzʉ̂, wǒwó gháŋə ńkhwór pə́ ndʉʉ məzʉ̂ yé, ə nji cʉ̂ʼ ngí pə́ záŋə pəcó pye, pəcó pə̂ nó mbʉ́ʉ[7].

²²Káa məndə̂ méi pə́ wó mi mboʼ pei nyáŋ wó ə́ nzʉ́ mbóu nó mo? Pei laghʼ ńgwâghʼ cûʼtə pye Sê, kəʉ pei laghʼ ńtə̂m pə̂ sə̂ʉ tû pye pi káa gháp ghwô gháp zə̂u? N ngwo lǎʼ lə́ pei ńgó hó? Ə́ ńgó pei ghʉ yə́rə́ ə́ poŋ? Ə ngə́, kwaʼ lə́nə́ʉ mboʼ n fə́tə ghâa wéi lə̂ mbə̂u no zêi po!

²³N ndə jyéʼ wéi zə̂u yi tû-mbəʉ zâa lə zúʼ mbó Nde, ə́ pə̂ ngô: ə́ lə pə́ lətwûʼ yi pə́ lə féi Nde Yěso ńŋə́, a pyê tâʼ mbələ̂ghʼ,

²⁴ə́ ŋə́ nkhwo mbó Sê tə ə́ kuʼ, a pwôʼtə ə́ ndǎʼ ngô: «Yo mbap mbəʉ zâa yi pə́ ŋə̂ lə̂ tû zéi. Pei nyáŋ mə́ ngʉ̂ yə́rə́ ə́ ndaghʼ ńkʉ̂ʉtə ghâa.»

²⁵Gháp zʉ̂ məzʉ̂ tə ə́ kuʼ, a pôu nkhwór tə́tóʼ məluʼ ə́ ndǎʼ ngô: «Tə́tóʼ məluʼ wo ə̂ kaa shwî yi Sê lǎghʼ məci mâa ńgwǎr. Pei cʉ́ʼ mə́ ngʉ̂ gháʼa mpfu tsəm yi pei pə̌ nó, ə́ ndághʼ nkʉ̂ʉtə ghâa.»

²⁶Ńté ńgó mpfu ntsəm yi pei wo pfâr mbələ̂ghʼ wo, ə́ pǒu nó tə́tóʼ məluʼ wo, pei lǎghʼ kʉ́ʉtə́ ləwʉ̂ Nde, ə́ láʼ kʉ̂ʉtə pə́ yə́rə́ tə wǒ kə́u leʼé yi a wo pə̌ʉ tó.

²⁷Ə̂ zə̂u yi ə́ ghʉ̌, ŋuu lə̌i mpfár mbələ̂ghʼ Nde, ə́ mbǒu nó tə́tóʼ məluʼ yé tə́ yǎa nkûʼ mə́u, mə́i a faa no ńté mbap mbəʉ gháp məci Nde.

²⁸Ghíʼ ə́ kə́ mbə́ yə́rə́ lə̂, wǒwó kwáŋə́ tû yé mboŋə́ pfár mbələ̂ghʼ wo, ə́ mboŋə́ nó tə́tóʼ məluʼ wo.

²⁹Ńté ńgó ŋuu lə̌i mpfár mbələ̂ghʼ ə́ mbou nó tə́tóʼ məluʼ Nde tə́ kʉ́ʉtə́ no yi ə́ laghʼ ńdâʼ, mə́i ngaŋ laghʼ ńfûŋ gháʼá ngwôʼ ńcôghʼ ndəu zʉ́.

³⁰Ə̂ zə̂u yi ə́ ghʉ̌, ə́ pə̂ təcər pei, pəghou gháp pə pənkhwô zâa gháʼate, mbaa mə́i pəcó kə kwʉ́tə́ mə́.

³¹Paghʼə lə pə́ ghíʼi mə́ nkwáŋə mətû mághʼə kwaʼ shʉʼʉ, mə́i mboʼ paghʼə lə lwôʼtə tə lə́u ngwʉ wághʼə kôr mbi Sê po.

³²Lə́ Nde feʼ wághʼə, ə́ ndaghʼ ńtâghʼ wághʼə taghʼə́, ə́ ndaghʼ ḿbôghʼ no mboʼ pə́ ghʉ tə́mtə́ wághʼə pə pye nzʉ̂ ńfěʼ.

³³Ghíʼ ə́ kə́ mbə́ yə́rə́ lə̂ pəfə̌r pâa, ə́ lə̌i mbə́ mpfu yi pei kəitə́ lə̂ nzʉ́ məzʉ̂, pei pâp pəcó pye.

³⁴Nji lə̌i mə́ nzáŋə ŋuu, a ghi fú nzeʼ zʉ́, ə́ nzʉ́ zə̂u. Ə́ mbóghʼ lə̂ ngwó yʉʼ yi pei kəitə wó, ə́ ngʉ̂ məcó məno mi Sê wo fú mə́u, ə́ fěʼ wéi. Ə́ ngwǒ lə̂ məcó məno, mə́i n ngʉ̌ tó tə kə́u lâʼ pei poŋə́ tʉ́ŋtə́.