Read Ngombale 1 Korêŋtə 12 Bible Online

1 Korêŋtə 12 - Ngombale bible

1 Korêŋtə 12

¹Pəfə̌r pâa, paghʼə láʼ no mpfu wo lə̂ məzə̂u shʉʼʉ mi Zəghʼə Ndêi-lěi ŋə̂ lə́ pye ńgó gháp lághʼ ńgʉ̌ faʼ Sê; m mə̌ nkoŋ ńgó pei jí no lə́nə́ʉ yi ə́ náŋtə́ məzə̂u mêi.

²Pei pə̌ njî ńgó ə́ lə pə́ mpfu yi pei lə pyér pə́ tə pə̌i no Kəlísto, có zə̂u pə̂ ncʉ́ŋə wéi, pei ghûʼtə məzə̂u mi pə́ fûŋ ńgó məsê, lə́ měi pə̂ pə́ pəcípə́uʼ.

³Ə̂ zə̂u yi ə́ ghʉ̌, m mə̂ nkôŋ ńgó pei jí tâʼ no: Zəghʼə Sê lə̌i ncʉ́ŋə́ ŋuu ńgó â lâʼ no, a côghʼ yé ndou tû Yěso po, mboʼ ŋuu kə̂ ndâʼ yé ńgó Yěso Nde tə́ ghó Zəghʼə Ndêi-lěi lə́ cʉ́ŋə́ yé ńgó â lâʼ yə́rə́ po.

⁴Məzə̂u shʉʼʉ mi Zəghʼə Ndêi-lěi ŋə̂ lə́ pye pə̂ fefe ńgó gháp lǎghʼ ńgʉ̌ faʼ Sê pə́ mbə̂u lə̂ mbə̂u, lə́ Zəghʼə Ndêi-lěi yi ə́ ŋə̂ měi pə̂ pə́ tâʼ moʼ.

⁵Məfaʼ mi Nde ŋə̂ lə́ pye pə́ mbə̂u lə̂ mbə̂u, lə́ Nde yi a ŋə̂ məfaʼ mêi pə̂ pə́ tâʼ moʼ.

⁶Məfaʼ pə́ mbə̂u lə̂ mbə̂u, lə́ tâʼ Sê moʼ lə̂ kə̂ ŋə̂ mətəʉ lə́ maa wǒwó lə̂ ndághʼ ńfǎʼ.

⁷Ə́ pə̂ yə́rə́, ə Zəghʼə Ndêi-lěi lei tə nkə́u lə́ ŋuu, ə́ ŋə̂ yé zə̂u shʉʼʉ laghʼ ńgʉ́ faʼ Sê, ə́ ndeitə́ yə́rə́, ə́ nyarə́ ńgó zêi zə̂u shʉʼʉ pə́ lə́ ngaŋ, ə́ mbə́ lə̂ ndághʼ ḿpfútə́ ŋuu ntsəm.

⁸Ə Zəghʼə Ndêi-lěi kə́u lə̂ cǒ ŋuu, ə́ ngʉ́ a ghwô jîno lə̂ ndághʼ mbwǒr no, ə́ nkə́u lə̂ cǒ ŋuu, ə́ ngʉ́ a ghwô jîno lə̂ ndághʼ mbwǒr no lə̂ mbə̂u yi pə́ wo jí no lə́nə́ʉ. Tâʼ Zəghʼə lə̂ kə̌ ngʉ zə̂u pei tsəm.

⁹Tâʼ Zəghʼə wêi lə̂ kə̌ ngʉ cǒ ŋuu ghwô pə̂i-ntə̂ʉ tə fəiʼ zěi wó; ə́ mbou ngwô lə̂ cǒ, ə́ ŋə́ yé pə̂ mətəʉ lə̂ ndághʼ ńtsúʼ pəghou.

¹⁰Ə́ kə́u lə̂ cǒ ŋuu, ə́ ŋə́ yé mətəʉ laghʼ ńgʉ́ mənkəʼə-məno; ə́ nkə́u lə̂ cǒ ŋuu, yé zə̂u shʉʼʉ laghʼ ńgʉ́ faʼ Sê pə̂ lə̂ ntsə́tə́ Nkəʉ Shʉʼʉ yi ə́ fú mbó Sê; ə́ nkə́u lə̂ cǒ, ə́ ŋə́ yé mətəʉ lə̂ ndághʼ ńjí zə̂u yi ə́ fû mbó Zəghʼə Ndêi-lěi mbaa yi ə́ fû mbó məzəghʼə tə́poŋ; ə́ ngwǒ lə̂ cǒ, ə́ ŋə́ yé mətəʉ lə̂ ntsár mətsâr mi a laa kə́ jyéʼ; ə́ nkə́u lə̂ cǒ ŋuu, ə́ ŋə́ yé mətəʉ lə̂ ndághʼ ńkéʼtə́ mətsâr mei.

¹¹Lə́ tâʼ Zəghʼə wêi moʼ lə̂ kə̌ ngʉ zə̂u pei tsəm, ə́ ŋə̂ yi wǒwó ghíʼ zʉ́ Zəghʼə Ndêi-lěi kǒŋ.

¹²Ə́ ndʉŋ-ndʉŋ ghíʼ mbəʉ ŋuu pə̌ pə́ tâʼ moʼ, məyʉʼ měi zâa; tə mbaa pə́ ghíʼ məyʉʼ měi pə́ tə nzáa záa lə̂, ə́ nkə́ mbə́ pə́ tâʼ mbəʉ moʼ. Ə́ pə́ lə́ Kəlísto, ə́ nkə́ mbə́ pə́ yə́rə́.

¹³Ńté no Sê lə laghʼ tâʼ Zəghʼə ńtə́mtə́ wághʼə, paghʼə cʉ̂ʼ tâʼ mbəʉ, ə́ ndeitə́ lə̂ pfû-nci. Pye lə̌i mbə́ pə́ pəyúda, kəʉ pə̂ pye pi káa gháp pə̂ gháp pəyúda, kəʉ pə̂ məpuʼ, kəʉ pə̂ pəfou-ndʉʉ, mə́i Sê lə cóghʼ pə́ tâʼ Zəghʼə moʼ ntə̂ʉ paghʼə pə́tsəm[8].

¹⁴Ə́ pə̂ yə́rə́, ə mbəʉ kâa ghwô yé pə́ tâʼ kəm, ə ghwo məkəm mbəʉ tə ə́ zâa zǎa.

¹⁵Ə ku lə̌i ndáʼ ngô: «Ghíʼ káa m mbə̂ ghâa pô lə̂, káa paghʼ mbəʉ ghwô no», mə́i có zə̂u yi mboʼ ghʉ tə ə́ títə́ pə́ yʉʼ mbəʉ ŋuu kâa pə́ yé wó.

¹⁶Lətuŋú lə̌i ndáʼ ngô: «Ghíʼ káa m mbə̂ ghâa ləjôghʼ lə̂, kâa m mbə̂ ghâa có yʉʼ mbəʉ» mə́i có zə̂u yi mboʼ ghʉ tə ə́ títə́ pə́ yʉʼ mbəʉ ŋuu kâa pə́ yé wó.

¹⁷Mboʼ mbəʉ tsəm tə́i mbə́ pə̂ ləjôghʼ, mə́i mboʼ mbəʉ zêi zûʼ no gháʼá? Ə́ mbə́ pə̂ ndaʼ lətuŋú, ə zûʼ jaghʼə́ zə̂u gháʼá?

¹⁸Kwaʼ lə́nə́ʉ Sê lə tsúŋu məyʉʼ mbəʉ, ə́ ntʉ́ŋtə́ měi pə́ lə̂ mbə̂u yi a kǒŋ.

¹⁹Mboʼ měi lə ghíʼi nkə̂itə́ ə́ mbə́ pə́ tâʼ yʉʼ mbəʉ, mə́i mboʼ pə́ myaghʼə́ fúŋ ńgó mbəʉ mo?

²⁰Məyʉʼ mbəʉ ə́ zâa, lə́ ə́ nkəitə́ ə́ nkə́ mbə́ pə́ tâʼ mbəʉ moʼ.

²¹Mboʼ ləjôghʼ laʼ yé lə̂ pô ngô: «Mboʼ o pfûtə ghô ghâa lə̂ có zə̂u po», ə tû kə̂ ndâʼ yé lə̂ məku ngô: «Mboʼ pei pfûtə wéi ghâa lə̂ có zə̂u po».

²²Lə́ ə́ pou ngáʼá, mə́i məyʉʼ mbəʉ mi pə́ kwǎŋ ńgó ə́ pwôr, ə̂ mi ə́ ghwǒ faʼ;

²³məyʉʼ mbəʉ mi pə́ nyâŋ ngwâghʼtə waghʼtə́, ə̂ mi pə́ pǒu mbápə́ ə́ ndêi məcó; məyʉʼ mbəʉ mi pə́ nyâŋ nkʉ̂ʉ mənyôghʼ měi pə́ lə̂ sə̂ʉ, ə́ pə̂ mi pə́ pápə́ ə́ nděi məcó;

²⁴ə́ ngwó lə́ məyʉʼ mi pə́ pə́ nkʉ̂ʉ mənyôghʼ měi tə́ kó sə̂ʉ, káa pə pápə yé shʉʼʉ. Lə́ Sê lə pôu ngáʼá ntsuŋú mbəʉ lə̂ mbə̂u yi mboʼ pə́ ŋə̂ məkuʼ lə̂ məyʉʼ mbəʉ mi pə́ wâghʼ měi wághʼə́;

²⁵ə́ pə̂ yə́rə́, mbəʉ kâa ghwô yé ngaptə, tə ncʉ́ʼ yə́rə́, maa yʉʼ mbəʉ tsəm ghwo lə̂ ngí pə́ fǎʼ, ə́ fǎʼ lə̂ mbə̂u yi məcó wo zʉ́ pəi.

²⁶Tâʼ yʉʼ mbəʉ lə̌i mə́ nzûʼ tə́poŋ, mbəʉ tsəm nâa nzúʼ tə́poŋ. Pə lə̌i mə́ ŋə̂ məkuʼ lə́ tâʼ yʉʼ mbəʉ, mə́i məcó məyʉʼ mbəʉ mə́tsəm kə́ ghwo záp məkuʼ mêi lə́wó.

²⁷Pêi mbəʉ Kəlísto, lə́ wǒwó təcər pei pə̂ cǒ tâʼ yʉʼ lə̂ mbəʉ zêi.

²⁸Ə́ kə́ mbə́ pə́ yə́rə́ ghíʼ Sê lə wǒ cər cûʼtə pye Kəlísto, ə́ ntsə̌mbi ntsóʼ pəghaŋə-ntə̂u, ə́ mbáatə́ ə́ ntsóʼ pətsətə́-nkəʉ Sê, ə́ nkə́ ncí ntsóʼ pəcícye, ə́ nzǔŋ mbáatə́ ńtsóʼ pye pi gháp wo ghʉ̌ mənkəʼə-məno, ə́ ntsóʼ pye pi gháp wo ghʉ̌ pəghou shwítə́, ə́ ntsóʼ pye pi gháp ghwǒ məzə̂u shʉʼʉ mi Zəghʼə Ndêi-lěi ŋə̂ lə̂ ndághʼ ḿpfútə́ pəcó pye, mbaa lə̂ ndághʼ ńtʉ́ŋtə́ cûʼtə pye Kəlísto, mbaa lə̂ ndághʼ ńtsár mətsâr tə̂u ndeʼe.

²⁹Káa gháp pə́tsəm pə̂ gháp pəghaŋə-ntə̂u, káa pə̂ gháp pətsətə́-nkəʉ Sê pə́tsəm, káa pə̂ gháp pəcícye pə́tsəm, káa gháp pə́tsəm ghwô gháp məzə̂u shʉʼʉ mi Zəghʼə Ndêi-lěi ŋə̂ lə̂ ndághʼ ńgʉ̌ mənkəʼə-məno,

³⁰káa gháp pə́tsəm ghwô gháp məzə̂u shʉʼʉ mi Zəghʼə Ndêi-lěi ŋə̂ lə̂ ndâghʼ ńtsúʼ pye, káa gháp pə́tsəm kə́ ngwô gháp məzə̂u shʉʼʉ mi Zəghʼə Ndêi-lěi ŋə̂ lə̂ ndâghʼ ńtsár mətsâr tə̂u, mbaa lə̂ ndâghʼ ńkéʼtə́ měi pye zûʼ.

³¹Ə́ pə̂ yə́rə́, pei wó lə̂ məzə̂u shʉʼʉ mi Zəghʼə Ndêi-lěi ŋə̂ lə̂ ndâghʼ ńgʉ̌ faʼ Sê, ə́ ndǒu mi ə́ pfútə́ gháʼate. Lə́, lə̂ mpfu wo, n ngwo nyárə́ wéi laŋə́-ndə̂u yi ə́ lěi məcó mə́tsəm.