Read Ngombale 1 Korêŋtə 13 Bible Online

1 Korêŋtə 13 - Ngombale bible

1 Korêŋtə 13

¹N ndə̌i ntsár mətsâr məlâʼ mə́tsəm, tə ntsár mbaa yi pəcwôʼ-Sê tsâr, lə́ ndə̌iʼ ghwǒ nkoŋə nzəm pye-mə́soŋ po, mə́i m mə̌ nzor ghíʼ ŋwaŋə́ yi pə́ pûʼ, mbaa ghíʼ môu-kʉ́ʼ-fou yi a pə̌ mbáŋə yʉʼ.

²N ndə̌i mbə́i ngwǒ pə̂ mətəʉ laghʼ ńtsə́tə́ Nkəʉ yi fǔ mbó Sê, ə́ njí mənkəʼə-məno mi Sê, ə́ ngwó jîno lə̂ zə̂u tsəm yi ə́ pə́ ləlwǒ, ə́ njí no lə̂ zə̂u tsəm, ə́ mbǒu ngwô pə̂i-ntə̂ʉ yi m mboʼ n ndâghʼ ńkhwôr məkôr ə́ ngwǒ yʉʼ ndeʼe ə́ ntághʼ wó, ə́ ndə́iʼ ghwǒ nkoŋə lə̂ pye-mə́soŋ po, mə́i káa m mbə̂ ghâa có zə̂u.

³N ndə̌i ŋə́ zə̂u pâa tsəm ə́ ndághʼ ḿpfútə́ pye pi nji pə̌ nzáŋə gháp, kəʉ mbə́i fú ntôu mbəʉ zâa pə́ mǒghʼ, ə́ ndə́iʼ ghwǒ nkoŋə po, mə́i ə́ wo pfûtə yé ghâa lə̂ có zə̂u po.

⁴Ŋuu yi a ghwǒ nkoŋə ghwo shəghʼ-ntə̂ʉ; ə́ mə́ mpfútə pye, káa a pə́ ŋwə̂itə yé ŋuu lə̂ zə̂u yé, káa pə́ nyárə yé mbəʉ, káa kə́ pə́ ŋâʼtə yé;

⁵káa a pə́ ngʉ̂ yé məno sə̂ʉ, káa a pə́ ngwóʼo yé, káa a pə́ fátə́ nzáŋə yé lóŋ, káa a pə́ záʼa yé nkwaa ŋuu;

⁶káa a pə́ ntsêi yé ńté məlaa, a tsêi ńté pə̂ no lə́nə́ʉ.

⁷Pə́ lə̌i ngʉ́ pə́ zárə́ mbə̂u no tə́poŋ lə́ ŋuu yi a ghwǒ nkoŋə, a lyə́ghʼə; ə́ ngwǒ lə́ zə̂u tsəm káa kâa yé lə̂ ngwô pə̂i-ntə̂ʉ, ə́ nyáŋ ə́ nzʉ̂ʼtə yé pə́ ńgó zə̂u tsəm táa ghǐ lyəghʼtə́, ə́ lyəghʼtə́ pə̂ shʉʼʉ, ə́ ngwǒ shəghʼ-ntə̂ʉ lə̂ məno mə́tsəm.

⁸Ə nkoŋə yi ŋuu-məsoŋ ghwo nzəm cǒ láʼ cí pə̂ pə́ wó. Lə́ ngwǒ lə̂ mənkəʉ mi pətsətə́-nkəʉ Sê ntsətə mbaa ntsár mətsâr mi pə́ laa kə́ jyéʼ yé, ə̂ mé. Ə njí məno mi ə́ pə́ ləlwǒ ə̂ mé.

⁹Ńté no paghʼə pə̂ mpfu wo, ə́ njí pə̂ có ndyə́ghʼə́ no lə́nə́ʉ, ə Sê káa pə́ nyárə yé wághʼə zə̂u tsəm, paghʼə poŋə́ tsətə nkəʉ yi fǔ mbó zʉ́.

¹⁰A ghʉ̌ lěi tə nyárə́ wághʼə zə̂u tsəm, məyʉʼ jîno yi paghʼə ghwǒ mpfu wo, mê yé.

¹¹Ə́ lə pə́ mpfu yi n ndə pyér pə́ môu, ə́ tsâr ghíʼ môu, ə́ nkwâŋ no ghíʼ môu, ə́ mbeitə no ghíʼ môu; n ndə lei tə ngúʼ tə ə́ mbə́ ŋuu, káa pyér ghʉ ghâa ghíʼ môu.

¹²Ə́ pə́ mpfu wo paghʼə jwô məzə̂u tatə-tatə́ ghíʼ mi paghʼə jwô cər ndwuŋu jwô-sʉ̂ lə̂; lə́ ə́ táa cǒ mpfu, měi fú sâa-sǎa ə́ nkwár mbi paghʼə. M mbə̂ mpfu wo, káa pə́ tsuŋú jî ghâa zə̂u tsəm, lə́ n ngʉ̌ cǒ mpfu, ə́ jí zə̂u tsəm tə lyəghʼtə́ ghíʼ tû-mbəʉ Sê kə́ mə́ njî yé ghâa zâa lə́wó.

¹³Lə̂ mpfu wo, məzə̂u mwo mə́ntárə́ láʼ cí pə̂ pə́ wó, ə̂ pə̂i-ntə̂ʉ nzəm Sê, ə́ mbə́ nyáŋ ə́ mə́ nzʉ̂ʼtə məzə̂u shʉʼʉ mi Sê lə ghʉ̌ ndaʼá mə́u lə̂ ngʉ́ ŋə́ lə́ pye pé, ə́ mbə́ nkoŋə nzəm pye-mə́soŋ. Lə́ yi jwǐ lə̂ məzə̂u mêi mə́ntárə́ pə̂ ngwô nkoŋə nzəm pye-mə́soŋ.