Read Ngombale 1 Korêŋtə 14 Bible Online

1 Korêŋtə 14 - Ngombale bible

1 Korêŋtə 14

¹Ghíʼ ə́ kə́ mbə́ yə́rə́ lə̂, pei tsə́mbi sáʼ təʉ pə́ lə̂ ngwô nkoŋə nzəm pye-mə́soŋ; pei póu tsáa lə̂ ngwô məzə̂u shʉʼʉ mbə̂u lə̂ mbə̂u mi Zəghʼə Ndêi-lěi ŋə̂ lə́ pye pə̂ fefe, ə ndǔŋ-mbi ntsáa pə́ lə̂ ngwô mətəʉ laghʼ ntsə́tə́ nkəʉ yi fû mbó Sê.

²Ŋuu lə̌i ndághʼ mətsâr mi káa pə pə́ nzúʼ ə́ ndáʼ no, mə́i káa a lâʼ yé lə̂ pye-mə́soŋ, a laʼ pə́ lə̂ Sê. Ńté no káa cǒ ŋuu pə́ nzûʼ yé no yi a lâʼ, a laghʼ pə̂ mətəʉ Zəghʼə Ndêi-lěi ə́ ndâʼ məno mi ə́ pə́ ləlwǒ.

³Lə́, ə́ ngwǒ lə́ ŋuu yi a tsətə nkəʉ Sê lə́ pye-mə́soŋ, a tsətə lə̂ ndághʼ ńtóutə́ gháp, gháp kʉʼʉ ngwô pə̂i-ntə̂ʉ nzəm Sê, lə̂ ndághʼ ńŋə̂ mətəʉ máp, mbaa lə̂ ndághʼ ńcôghʼ ntə̂ʉ gháp.

⁴Ŋuu yi a tsâr mətsâr mi káa cǒ ŋuu pə́ nzúʼ yé tôutə pə̂ tû-mbəʉ yé lə̂ nkʉ́ʼʉ́ ngwǒ pə̂i-ntə̂ʉ nzəm Sê, lə́ ə́ ngwǒ lə́ ŋuu yi a ntsə́tə nkəʉ Sê, a tsətə lə̂ ndághʼ ńtóutə́ cûʼtə pye Kəlísto, gháp kʉʼʉ ngwô pə̂i-ntə̂ʉ nzəm Sê.

⁵M mə̌ njwô zâa ńgó ə́ poŋ ńgó pei tsár mətsâr mi káa pye pə́ nzûʼ gháp, lə́ yi ə́ kʉʼʉ́ mbǒŋ ghâa pə̂ ghíʼ mboʼ pei tsə̂tə nkəʉ Sê. Ńté no ŋuu yi a leʼtə nkəʉ Sê lei ŋuu yi a tsâr mətsâr mi káa pə pə́ nzúʼ; laa yi ńgó cǒ ŋuu tə̌ʉ mə́ ndâʼ pye no yi a lâʼ zěi, ghíʼ pye Kəlísto wo zúʼ zʉ́ pəi zěi.

⁶Pəfə̌r pâa, paghʼə pyé fəiʼ ńgó n ndə̌i ntó tə nkə́u lâʼ pei, ə́ ntsár tsâr yi pei wo zûʼ wéi po, ə́ pə̂ ńgó m mpfutə́ wéi lə̂ hó zə̂u? Ə ngə́! Ə zə̂u yi mboʼ n ntô tə nkə́u lâʼ pei, ə́ ngʉ̌ tə ə́ pfûtə wéi pə́ ghíʼ mboʼ pei fû lə̂ məno mi n ndâʼ, ə́ njí məno mi ə́ lə pə́ ləlwǒ, ə́ mi Sê ghʉ̂ n njî měi; ńjí ńgó n ngʉ̂ pei jî no lə́nə́ʉ lə̂ có no, ə́ nzúʼ cǒ nkəʉ yi a fû mbó Sê, ə́ nzʉ́ pəi zâa, məŋ mbôu fú mə́u, ə́ njyéʼ wéi có no.

⁷Paghʼə pyé fəiʼ lə̂ məzə̂u mi pə́ laghʼ ḿbûʼ pîŋ, ghíʼ lakə́ta kəʉ ntsənkoŋ lo; mənji měi lə̌i ndə́iʼ cú ə́ ntsuŋú nkwǎr shʉʼʉ po, pə́ laghʼ hó ə́ ndə́iʼí mənji məzə̂u mi pə́ pə̂uʼ ə́ cû?

⁸Ə ntaŋ lə̌i ncú nji zěi lə́iʼ kwǎr shʉʼʉ po, wǒ tsûŋtə mbəʉ yé lə̂ ngwó ndwóʼo ntso?

⁹Ə́ kə́ mbə́ ndʉŋ-ndʉŋ ghíʼ pei lə̌i ndághʼ mətsâr mi káa pə pə́ nzûʼ yé ńdâʼ pye no gháp ghʉ gháʼá mboŋə́ nzúʼ? Ə́ pə̂ ńgó pei zôr ghíʼ kəfwor mbʉŋ lə̂.

¹⁰Mətsâr pə́ ndəu ngoŋ ə́ nzáa, lə́ yi tə́ lǎghʼ ndáʼ no tə pə́ zûʼ kâa pə́ yé wó.

¹¹Ńté ńgó ŋuu lə̌i mə́ ndâʼ no lə́ məŋ, n ndə́iʼ pə́ zûʼ ghâa tsâr yé po, a pə̂ mbó məŋ mbə́ ngəʉ, n nkə̂ mbə̂ zâa mbó zʉ́ mbə́ ngəʉ lə́wó.

¹²Ə́ pə̂ yə́rə́, pei pi pei pə̌ ntsâa lə̂ ngwô məzə̂u shʉʼʉ mi Zəghʼə Ndêi-lěi ŋə̂ pə̂ fefe, pei tsəmbi ntsáa lə̂ ngwô məzə̂u shʉʼʉ tə nzáa mi mboʼ pei lâghʼ ńtóutə́ cûʼtə pye Kəlísto, pə̂i-ntə̂ʉ záp nzəm Sê kʉʼʉ ndə́r lə̂ mbi.

¹³Ə́ mbə́ yi ŋuu lə̌i mə́ ntsâr mətsâr mi káa pə pə́ nzûʼ yé, a lôu zə̂u shʉʼʉ mbó Zəghʼə Ndêi-lěi, lə̂ ndághʼ ńkéʼtə́ pə́ zûʼ no yi a laghʼ ńdâʼ.

¹⁴Ńté no n ndə̌i ndághʼ tsâr yi káa ŋuu pə́ nzûʼ yé ə́ mə́ sʉ̂ʉtə Sê, mə́i n ndaghʼ pə̂ Zəghʼə zâa ńsʉ́ʉtə́, ə́ mbə́ tə́ mə́ sʉ̂ʉtə yə́rə́ lə́ káa pə́ zûʼ ghâa no yi n ndaghʼ ńdâʼ.

¹⁵Tə məŋ ngwo ghʉ̌ gháʼá? N ngwo sʉ́ʉtə́ Sê lə̂ mbə̂u yi Zəghʼə pə́ ntôutə ghâa ńgó sʉ́ʉtə́, lə́, ə́ sʉ́ʉtə́ lə̂ mbə̂u yi mboʼ ŋuu zûʼ no yi məŋ ndâʼ zěi, n ngwo zǎp lə̂ mbə̂u yi Zəghʼə pə́ ntôutə ghâa ńgó n nzâp, lə́ zǎp lə̂ mbə̂u yi mboʼ ŋuu zûʼ no yi zap zâa laʼ zěi.

¹⁶Ńté no o lə̌i mə́ sʉ̂ʉtə Sê pə́ cər Zəghʼə, mə́i ŋuu yi a nyǎŋ mbəʉ gho ghǐ lǎʼ yé ngô: «Ámeŋ» lə̂ sʉ̂ʉtə yi o lǎghʼ ńŋə́ nkhwo mbó Sê gháʼa ńgó a zǔʼ ńgó ho?

¹⁷Ə sʉ̂ʉtə zô yi o lǎghʼ ńŋə́ nkhwo mbó Sê lə̌i mbə́i mbǒŋ poŋə́, mə́i káa ŋuu yi a nyǎŋ mbəʉ gho zʉ̂ yé có pəi mə́u.

¹⁸M mə̌ ŋə̂ nkhwo mbó Sê ńté no m mə̌ ntsâr mətsâr mi kâa n ndə jyéʼ ghâa ə́ ndêi wéi pə́tsəm;

¹⁹lə́, n ndei tə ntə́ʉ mbi cûʼtə pye Kəlísto, ə́ nkǒŋ lə̂ ndáʼ məno mə́ntaa mi pye wo zǔʼ ə́ nděi ghíʼ m mboʼ n ntə̂ʉ mbi páp ə́ ndáʼ məno tóusʉ ndwuŋ, lə́ ə̂ pə́ mi ŋuu wo zûʼ yé có mə́u po.

²⁰Pəfə̌r koo pei ghwô məkwaŋtə ghəpə́; pei wô lə̂ məno tə́poŋ ə́ mbə́ ghíʼ ghəpə́, ə́ ngwǒ lə̂ məno shʉʼʉ, ə́ mbə́ ghíʼ pye pi gháp cəghʼtə́ mə́.

²¹Ə́ pə́ cər ŋwaʼa Sê ngô: «N ngʉ̌ cʉ́ʼ lə̂ ndâʼ no mbó pye Ísə́lahêl, ə́ lághʼ pye pi gháp tsâr pə̂ mətsâr mi ndeʼe, tə mbaa pə́ yə́rə́, lə́u gháp kôŋ gháp lə̂ nzúʼ məno mi n ndaʼ gháp po.»

²²Ə́ pə̂ yə́rə́, ə ntsár mətsâr mi káa pə pə́ nzúʼ ə́ pə̂ zə̂u yi pətəpə̌i-no Sê laghʼ ńdəiʼi pye pi gháp cóghʼ ntə̂ʉ gháp lə̂ no Sê; lətsətə́ Nkəʉ Sê pə̂ ndâʼ no pə́ mbó pye pi gháp cóghʼ ntə̂ʉ gháp lə̂ no Sê, lə́ káa pə́ ndâʼ yé có no mbó pətəpə̌i-no Sê.

²³Pye Kəlísto lə̌i ngíʼi nkə̂itə́ ndə̂ cûʼtə páp wǒwó təcər páp pə́ ntsâr tsâr yi káa pə pə́ njí, pəcó pətəpə̌i-no Sê tó nkə́u ndə̂ páp wei, gháp tî tə́ lǎghʼ gháp fúŋ məpə?

²⁴Lə́ gháp pə́tsəm lə̌i mə́ ntsətə-nkəʉ yi fǔ mbó Sê, ŋuu yi a pyěr təpə̌i-no Sê tó ńkə́u ndə̂, kəʉ pə́ ndei-laŋə́-ndə̂u zúʼ, mə́i ə́ wo kə̌u ntə̂ʉ yé a jî lə̂ nkwáŋə́ tû yé, mətsâr mei láʼ no lə́ zʉ́;

²⁵məkwaŋtə mi ə́ tə́i mbə́ ləlwǒ ntə̂ʉ zʉ́ kwâr zǎa, a kʉ́ʼtə́ sê, ə́ ntsʉ́ŋə́ tû yé sê, ə́ ŋə́ ləghûʼtə mbó Sê ə́ ndǎʼ ngô: «Kwaʼ lə́nə́ʉ, ə Sê pə́ təcər pei.»

²⁶Pəfə̌r paghʼə wo mǎʼ nci laghʼ ńtsóʼ ńgó ho? Pei lə̌i nkə́itə́ nyáŋ tâʼ yʉʼ, ŋuu wei ghwô zap-nci, a zâp; ŋuu ghwô zə̂u yi a wo jyéʼ pye, a jyêʼ; ŋuu ghwô no yi fú mbó Sê, a tsə̂tə; ŋuu ghwô no yi a lǎʼ lə̂ tsâr yi káa pə pə́ njí, a lǎʼ; ŋuu ghwô lə̂ nkéʼtə́, a kêʼtə; lə́ ə́ pə́ ntúŋu ńgó məno mêi mə́tsəm pə́ mi pfûtə pye Kəlísto lə̂ ngúʼ cər pə̂i-ntə̂ʉ záp.

²⁷Ə́ lə̌i mbə́ yi mboʼ pə́ tsâr mətsâr mi káa pə pə́ nzûʼ yé, pye pə́pwô tsâr; tə ńgó pə́ zâa, ə́ pə̂ pye pə́tárə́, wǒwó tsâr lə̂ ye mpfu, lə́ ə́ pə̂ ntúŋu ńgó ŋuu yi a wo pə́ kéʼtə́ pə̂ sê.

²⁸Ŋuu yi a wo kéʼtə́ lə́iʼ pə́ wó po, koo ŋuu lâʼ no tə nji ye wô tʉ́ cər cûʼtə; ə́ pə̂ yə́rə́ wǒwó cʉ́ʼ mə́ ndâʼ no lə̂ tû-mbəʉ yé mbaa lə̂ Sê.

²⁹Ə́ ngwǒ lə́ pətsətə́-nkəʉ Sê, ə́ pə́ ntúŋu ńgó pye pə́pwô káa pə́tárə́ tsâr, pəcó pye lâʼ záp no yi gháp jwô lə̂ məno mi gháp lǎʼ lêi.

³⁰Ŋuu tə́ʉ mə́ ntsə́tə nkəʉ, ə Sê tsə́tə́ no lə́ cǒ ŋuu yi a nyǎŋ sê, ŋuu yi a yǎa mə́ ntsár nâʼ.

³¹Ńté ńgó mboʼ pei pə́tsəm tsətə-nkəʉ, ŋuu lêi ntsə́tə yé tə nâʼ, cǒ ŋuu lêi nkə́ ntsə́tə yé ə́ njí ńgó ŋuu ntsəm zǔʼ, pə̂i-ntə̂ʉ yé pou nkʉʼʉ́.

³²Ə Sê lə wo lə́ pəntsətə́-nkəʉ pé, ə́ ngʉ̌ tə wǒwó lə́ páp pə̂ njî ye mpfu yi a wo ndaʼ yé no tə lə́u ə̂ pə̂ yé yi no zêi wo ŋə́ʼtə́ yé ŋə́ʼtə́ po.

³³Ńté no ə Sê káa pə̂ yé ngaŋ tághʼə́, a pə̌ pə̂ ngaŋ mbwórə. Ə́ ngwǒ lə́ pəngyě, mə́i gháp ghwo lə̂ nkə́ ngʉ́ pə́ ghíʼ pə́ ghʉ cər məcó məcûʼtə pye Kəlísto mə́tsəm.

³⁴Pə́ lə̌i mbə́ cər məcûʼtə pəngyě nyêʼ nâʼ, káa gháp ghwô gháp lə̂ mpfú tsâr ə́ ndǎʼ no; gháp ghwo lə̂ mbwórə́ nyáŋ sê, ə́ nzúʼ no yi pə́ pə́ ndǎʼ; ə́ pə̂ ghíʼ ləpə̌ʉ lǎʼ yə́rə́.

³⁵Pə́ lə̌i ndâʼ no gháp lə́iʼ tsuŋú zúʼ po, ə́ mə́ ndôu ntsúŋú nzúʼ gháp kə̂u nzeʼ ə́ ntuŋú pələ̂u páp, ńté ńgó kâa pôŋ yé ńgó pəngyě tə́ʉ cər cûʼtə pye Kəlísto ə́ ndǎʼ no.

³⁶Ə no Sê lə ji pə́ lâʼ pei mo? Kəʉ pə́ lə laʼ zěi pə́ ndaʼ mbó pei?

³⁷Ŋuu lə̌i mə́ nkwâŋ ńgó â ntsətə-nkəʉ yi fǔ mbó Sê kəʉ mbó Zəghʼə Ndêi-lěi, mə́i a ghwo lə̂ njí ńgó no yi n ŋwáʼa ńŋə̂ lə́ pei lo ə̂ ləpə̌ʉ yi ə́ fû mbó Nde.

³⁸A lə̌i múŋú, a jî ńgó Nde wo muŋú yé yé.

³⁹Ə́ pə̂ yə́rə́ pəfə̌r pâa, pei tsáa ńgó Sê ŋə́ wéi mətəʉ lə̂ ndághʼ ńtsətə́ nkəʉ ye, lə́ koo pei kə̂ʼtə pəcó pye lə̂ ntsár mətsâr mi káa pə pə́ nzúʼ yé.

⁴⁰Lə́ ə́ pə́ ntúŋu ńgó zə̂u tsəm lêi ghíʼ ə́ pə́ ntúŋú, koo có və́rə có.