Read Ngombale 1 Korêŋtə 16 Bible Online

1 Korêŋtə 16 - Ngombale bible

1 Korêŋtə 16

¹Ə́ ngwǒ lə̂ no ntsəp yi pə́ wo mǎʼ ńŋə́ lə́ pye Kəlísto pi Yelúsalêm, pei zéi lə̌i mə́ mâʼ, pei ghʉ̂ kwaʼ zə̂u yi n ndə lǎʼ lə́ məcûʼtə pye Kəlísto mi Galasî.

²Ə́ lə̌i mbə́ maa sóndəi ntsəm, wǒwó təcər pei wo lə̂ nkâp yi a ghwǒ nzeʼ zʉ́, ə́ ndáptə́ ńdóʼo cǒ, ńjí ńgó koo pə́ zʉ́ʼtə tə n ntô, pə́ poŋə́ mǎʼ ntsəp.

³N ngʉ̌ tó, ə́ ghǐ tə́u pye pi pei kə tsóʼ gháp, ə́ ŋə́ pəŋwaʼa pi gháp lǎghʼ wǒ Yelúsalêm, ə́ ŋə́ nkâp yi pei kə kəitə́ lêi.

⁴Ə́ lə̌i ngʉ́ mə́ ntúŋu ńgó paghʼ pə pǎp nâa ndə̌r, mə́i paghʼ pə pǎp wo nǎa lə̌r.

⁵N ntáa ghǐ tó lâʼ pei, ə́ lěi cər paghʼə-ngoŋ Masedwânə, ńté ńgó n nyaa ngwǒ lə̂ ndêi wó.

⁶Mbə̂ có n ngʉ̂ ntó, paghʼə nyêʼ nyáŋ; mbə̂ có ə́ mbəi nyáŋ tə mpfu məghǎa lêi; ńjí ńgó yʉʼ tsəm yi n nkwǎŋ lə̂ ngwó wó, pei pə̌ mpfútə ghâa.

⁷Ńté no káa m mə́ nkôŋ ghâa ngí jwó wéi mpfu wêi, ə́ mə́ ndêi-lěi. M mə̌ nkwaŋ ńgó Sê lə̌i ngʉ́ mbə́i, paghʼə nyêʼ nyáŋ lâʼ pei.

⁸Lə́, n ngwo nyáŋ Efêzə yaʼa tə lətsei Paŋtekôtə lêi.

⁹Ńté ńgó có laŋə́-ndə̂u tsoʼó mə́ mbi məŋ, lə̂ fâʼ faʼ yi ə́ wo pfútə́ ŋuu ntsəm, tə mbaa pə́ ghíʼ pye pi gháp ləʼ no yi n ndaʼ zěi záa gháʼate.

¹⁰Timotêi lə̌i ntó tə nkə́u lâʼ pei, pei pâa lə̂ ngʉ́ có zə̂u yi mboʼ ə́ ghʉ mbô mé pwór, ńté ńgó a kə̌ mbə̂ yé ngaŋə-faʼ Nde ghíʼ məŋ.

¹¹Koo cǒ ŋuu wâghʼ yé, pei tóutə́ yé; ńjí ńgó â ghí pə̌ʉ tó cə́r ghâa, ə́ ŋə̌i lə̂ mbwórə, ńté no m mbə́ yáʼa, ə́ mə́ nzʉ̂ʼtə yé ńgó gháp pə pəfə̌r nâa ntó.

¹²Ə́ ngwǒ lə́ fə̌r waghʼə Apolósʉ, mə́i n nji mə́ ncóghʼ mətəʉ mé lə́ pə́ yi mboʼ gháp pə pəfə̌r tô lâʼ pei, lə́ káa a pə́ nkôŋ yé lə̂ ntó mpfu wo, lə́ saa ghʉ̌ kwǎr, â tó.

¹³Koo pei lê, pei cóghʼ ntə̂ʉ lə́ Sê tə́ kâa, pei sáʼ təʉ, pei tə̂itə́.

¹⁴Pei lə̌i mə́ ngʉ̂ zə̂u tsəm, pei lâghʼ pə̂ nkoŋə ńgʉ́.

¹⁵Pei pə̌ njî Stefanásʉ gháp cʉŋə-ndə̂ yé, pei pə̌ njî ńgó gháp lə pə́ pəluŋ-mbi pye lə̂ nkə́p cǐ záp cər lâʼ Akayî, ə́ ncʉ́ʼ mə́ fâʼ məfaʼ shʉʼʉ mi pye Kəlísto wo zʉ́ pəi zěi. Ə̂ zə̂u yi ghʉ̌, m mə̌ ndâʼ lə́ pei ngô:

¹⁶pei zúʼ ntsʉ mbə̂u pye zêi, tə mbaa yi ŋuu ntsəm yi gháp pə pǎp naa fâʼ tə́ pwór mbəʉ záp.

¹⁷M mə̌ ntsěi gháʼate ńté Stefanásʉ gháp Foutunatúsʉ ə́ nkʉʼʉ́ Akayikúsʉ, gháp tó, ə́ mbə́ mbəʉ məŋ, ə́ nkə́pə́ tû zéi.

¹⁸Gháp lə côghʼ mətəʉ mâa, ə́ ndʉŋ-ndʉŋ ghíʼ gháp lə côghʼ méi. Pei ŋə́ məkuʼ lə̂ mbə̂u pye ghíʼ páp pêi!

¹⁹Məcûʼtə pye Kəlísto mi ə́ pə́ lə̂ sʉ́ Azî tsêʼtə wéi. Akilásʉ gháp Pərəsîlə, ə́ nkʉʼʉ́ cûʼtə pye Kəlísto yi ə́ pə́ ndə̂ páp tsúŋu ntsêʼtə́ wéi lə̂ ləjôghʼ Nde.

²⁰Pəfə̌r pə́tsəm pi gháp pə́ yaʼa tsêʼtə́ wéi. Pei tsêʼtə́ mbəʉ zéi təcər pei, ə́ mbáʼá ghíʼ pye Sê.

²¹Kwaʼ məŋ Pôl, məŋ ndǎghʼ pô zâa ńŋwaʼá tsêʼtə yo.

²²Ŋuu lə̌i ndə́iʼ kǒŋ no Nde Yěso Kəlísto po, ə Sê côghʼ ndou tû zʉ́. Maranáta «Nde waghʼ, tô!»

²³Ńgó Nde Yěso cóghʼ mbwórə lə́ pei pə́tsəm!

²⁴N ndeitə́ ghíʼ paghʼə pə́tsəm kəitə́ ḿbə́ nzəm Yěso Kəlísto, n nkoŋ wéi.