Read Ngombale 1 Korêŋtə 2 Bible Online

1 Korêŋtə 2 - Ngombale bible

1 Korêŋtə 2

¹Pəfə̌r pâa nzəm Kəlísto, məŋ ndə tó lâʼ pei lə̂ ngʉ́ pei jî məno Sê mi ə́ pə́ ləlwǒ, ə́ ngǐ tsətə́ mêi, káa laghʼ ghâa pə̂ có tsâr yi ə́ tə̌i tə̌i, káa kə́ nyarə́ ghâa wéi ńgó n njî no gháʼate.

²Ńté ńgó n ndə ntághʼ ńgó mboʼ n sʉ̂ŋ ghâa có no ndeʼe təcər pei tə ndyéʼ no Yěso Kəlísto po, ə́ Kəlísto wə̂ yi pə́ lə kʉ̌ʉ yé lə̂ tʉ̌-mbʉ̂ŋtə lə̂.

³Ə̂ zə̂u yi ə́ ghʉ̌, n ndə pə́ təcər pei, ə́ nzúʼ ə́ mbwór, ə́ mbou mbóghʼ tə ngwə̂r;

⁴ə tsâr yi ə́ lə kwar ntsʉ məŋ gháp no Kəlísto yi n ndə leʼtə zěi, kâa lə pə́ nyárə yé jîno yi pye-mə́soŋ laghʼ ńgʉ́ pə́ pə̂i no ńŋə́ lə́ páp. Mətəʉ Zəghʼə Ndêi-lěi lə́ lə ghʉ pye pə̂i ńgó ə̂ no lə́nə́ʉ;

⁵ńjí ńgó ə́ lei yə́rə́, pə̂i-ntə̂ʉ zéi jwóʼo yé lə̂ jîno pye-mə́soŋ po, lə́ njwóʼó pə́ lə̂ mətəʉ Sê.

⁶Ə no Sê yi n njyêʼ zěi, ə̂ jîno yi n njyêʼ mbó pye Kəlísto pi gháp cəghʼtə́ mə́ cər pə̂i-ntə̂ʉ záp. Lə́ jîno zêi, kâa pə̂ yé yi yo nzʉ̂, káa kə́ pə̂ yé yi məzəghʼə tə́poŋ mi ə́ sâʼ yo nzʉ̂, ə́ mbə́ məzəghʼə mi pə́ ghʉ̌ pə́ghʼ měi.

⁷Lə́, paghʼ leʼtə pə̂ jîno Sê, ə́ pə̂ nkəʼə-no yi ə pə́ ləlwǒ, ə́ mbə́ yi Sê lə láʼ mə́ ntsúŋtə́ ńtághʼ tə nzʉ̂ pyêr pə́ tə pə̌ wó, ghíʼ a ghʉ̌ lǎghʼ ńŋə́ ləghûʼ waghʼə.

⁸Kâa cǒ tâʼ lə́ pəfou pi nzʉ̂ yo lə jî yé zěi. Gháp lə pə́ ghíʼi njí no zêi, mə́i káa gháp lə kʉ̂ʉ gháp Nde lə̂ tʉ̌-mbʉ̂ŋtə, ə́ Nde yi a ghwǒ ləghûʼ.

⁹Lə́ ŋwaʼa Sê pə̌ ndâʼ ngô: «Ə zə̂u yi ŋuu məsoŋ laa kə́ jwó, káa zúʼ, káa pə̌i kwǎŋ kwaŋə́, ə Sê lə tsuŋtə́ zêi zə̂u ńté pye pi gháp kǒŋ no yé, ńjí ńgó gháp táa nzʉ́ pəi zěi.»

¹⁰Sê lə pou ngʉ̌ Zəghʼə Ndêi-lěi ghʉ paghʼə lə̂ jî zêi no yi ə́ pə́ ləlwǒ lêi. Ə Zəghʼə Ndêi-lěi lə́ yǎa njí no tsəm, tə mbaa yi ə́ lwǒ kwaʼ tə cʉŋə wó.

¹¹Mboʼ wǒ ŋuu-məsoŋ jî no yi cǒ pə̌ nkwǎŋ tə ndyéʼ tû-mbəʉ yé? Mboʼ ŋuu jî yé no yi cǒ pə̌ nkwǎŋ po tə ndyéʼ Zəghʼə Sê yi ə́ pə́ lə́ ngaŋ.

¹²Ə́ ngwǒ lə́ paghʼə, mə́i káa pə lə ŋə̂ yé Zəghʼə yi nzʉ̂ yo lə́ paghʼə, lə́ pə́ lə ŋə́ pə̂ Zəghʼə yi ə́ fû mbó Sê lə́ paghʼə, ńjí ńgó ə́ lei yə́rə́, paghʼə jî məzə̂u mi Sê lə ŋə́ lə́ paghʼə tə́ pfû có zə̂u.

¹³Káa paghʼ lâghʼ pə̂ tsâr yi pye-mə́soŋ lə lǎghʼ ndʉʉ jîno ghap ńjyéʼ wághʼə, paghʼ laghʼ pə̂ tsâr yi Zəghʼə Sê jyêʼ wághʼə, ə́ ndâʼ no mə́u. Ə̂ zə̂u yi ə́ ghʉ̌, paghʼ ghi pə́ kêʼtə məno mi ə́ náŋtə́ Zəghʼə Sê, ə́ ndaghʼ pə̂ tsâr yi ə́ fú mbó Zəghʼə zêi ńkéʼtə́[1].

¹⁴Ŋuu-məsoŋ yi a kwaʼ pə́ lə̂ jîno yi pə́ lə lǎghʼ njí yé, kâa kûʼ yé lə̂ nzúʼ məno mi Zəghʼə Sê pə́ ndaʼ yé. Ə́ pə́ mbó zʉ́, ə́ mbə́ pə́ ghíʼ məno pə lə̂, ə́ mbə́ yi mboʼ a yâa mbə́i nzûʼ yé po. Ńté no Zəghʼə Ndêi-lěi lə́ ghʉ ŋuu poŋə́ kǔʼ lə̂ nzúʼ mêi məno.

¹⁵Lə́ ə́ ngwǒ lə́ ŋuu yi Zəghʼə Ndêi-lěi pə́ lə́ zʉ́, mə́i a kuʼ lə̂ ntúŋ ləcʉŋ no tsəm tə njí, káa cǒ ŋuu yi mboʼ a tûŋ ləcʉŋ tə njí ghíʼ a pə̌, póu mbə̂ yé wó.

¹⁶Ə́ laghʼ ḿbə̂utə lə̂ no yi ə́ pə́ cər ŋwaʼa Sê ngô: «Mboʼ wǒ ŋuu jî no yi Sê pə̌ nkwǎŋ? Mboʼ wǒ ŋuu ŋə̂ yé ntǎghʼ?» Lə́ ə́ ngwǒ lə́ paghʼə, Kəlísto lə̌i mə́ nkwâŋ pə̂ hó, mə́i paghʼə pə̌ njí.