Read Ngombale 1 Korêŋtə 3 Bible Online

1 Korêŋtə 3 - Ngombale bible

1 Korêŋtə 3

¹Pəfə̌r pâa, kwaʼ lə́nə́ʉ, káa n nkə lâʼ ghâa wéi no ghíʼ pə́ laʼ lə́ pye pi gháp zûʼ ntsʉ Zəghʼə Sê, n nkə laʼ wéi pə́ lə̂ mbə̂u yi pə́ laghʼ ńdâʼ no lə́ pye pi gháp ghʉ pə̂ zə̂u yi mbəʉ zap cʉ́ŋə gháp lə̂ ngʉ́, ə́ ndǎʼ ghíʼ pə́ laʼ no lə́ pye pi gháp wǒ lə̂ no pə̂i-ntə̂ʉ nzəm Kəlísto, ə́ mbyér mbə́ pə̂ ghəpə́ paŋə́.

²N nkə ŋə́ pə́ ləpə̂ʉ lə́ pei, káa n nkə ŋə̂ ghâa məzʉ̂ mi ə́ pə́ ntə̌i lə́ pei, ńté ńgó ə́ lə ghí pə́, mə́i pei kə́ kûʼ wéi lə̂ mpfár zə̂u yi ə́ pə́ ntə̌i. Tə mbaa pə̂ mpfu wo, pei kə́ yáa mbəi nkûʼ wéi lə̂ nzúʼ no yi ə́ tə̌i lə̂ nzúʼ,

³ńté ńgó pei pyěr mə́ ngʉ̂ pə́ ghíʼ pye pi mbəʉ záp lə́ sâʼ gháp. Lə̂ mpfu wo ghíʼ ŋwə́itə́ gháp məzoŋə pyér mbə́ pə́ təcər pei lo, tə káa ə̂ lághʼ ńnyárə gháʼa ńgó pei pyěr mə́ nzûʼ pə́ mbó mbap mbəʉ, ə́ mbou mbyér mə́ ŋə̂i pə́ ghíʼ pye nzʉ̂?

⁴Cǒ ŋuu təcər pei lə̌i nyáŋ tə ndâʼ ngô: «M mbə́ nzəm Pôl», cǒ lâʼ yé ngô: «M mbə̂ zâa pə́ nzəm Apolósʉ», mə́i káa pei kə́ ndághʼ ngʉ̂ gháʼá pə́ ghíʼ pye nzʉ̂ mo?

⁵Pei laʼ yə́rə́ gháʼa, ə́ njwó ńgó Apolósʉ wǒ? Pôl pə̂ wǒ? Paghʼ zʉ́ pəghaŋə-faʼ Sê pi pei lə leitə́ lə́ paghʼ ə́ mbə́i no Yěso Kəlísto. Wǒwó lə́ paghʼ lə ghʉ yé faʼ yi Nde lə cóghʼ mbó zʉ́.

⁶Məŋ Pôl, n ndə pî zə̂u, Apolósʉ cwə́tə, Sê lə̂ ghʉ̂ ə́ sâʼ.

⁷Ə́ pə̂ yə́rə́, ŋuu yi a pi, kâa pə̂ yé có zə̂u; ŋuu yi a cwə́tə kâa kə́ mbə̂ yé có zə̂u lə́wó: ə Sê yi a ghʉ ə́ sâʼ lə̂ ghwǒ məno mêi mə́tsəm.

⁸Ŋuu yi a pǐ gháp ŋuu yi a cwətə pə́ pə̂ ndʉŋ, lə́ ntsoʼó-faʼ wǒwó pə̂u lə̂ faʼ yi a fǎʼ zěi.

⁹Ńté ńgó paghʼ naa mbə́ pəghaŋə-faʼ Sê, pei pə̂ nkâʼ Sê, ə́ nkə́ ncí mbə́ ndə̂ yi Sê pə̌ nkə́r.

¹⁰Ə́ lə leitə́ lə̂ zâa zə̂u yi Sê lə ŋə́ lə́ məŋ tə́ pfû có zə̂u, m mbôu cû ndə̂ ghíʼ tâʼ mbou-məndə̂ yi shʉʼʉ. Cǒ ŋuu ndeʼe pə̌ ndaghʼ faʼ ńdə̂r lə̂ mbi, ə́ mə́ mbôu ndə̂ ndəu wó; lə́ wǒwó laghʼə́ tû yé lə̂ mbə̂u yi a laghʼ mbóu.

¹¹Ńté ńgó cû ndə̂ pə́ mə́ wó, ə́ mbə́ Yěso Kəlísto. Ŋuu yi mboʼ a kə̂ mbóu mbôu có yi ndeʼe kâa pə́ yé wó.

¹²Lə́ pye ghǐ cʉ́ʼ lə́ nkə́r ndə̂ ndəu cû ndə̂ zêi, pəcó pye ghí lǎghʼ tə̌ʉ-gôl ńkə́r, pəcó lághʼ pə̂ tə̌ʉ-nkâp ńkə́r, pəcó pye ghí lǎghʼ məghǒ lətəi-ndwuŋ mbóu, pəcó pye lághʼ pə̂ mətʉ̌ ńkə́r, pəcó pye ghí lǎghʼ zâŋ ḿbáʼ, pəcó pye lághʼ záp pə̂ pʉ̌ʉ ḿbáʼ.

¹³Lə́ leʼé ghʉ kǔʼ, faʼ yi wǒwó nyárə ye mbə̂u, ə́ pə jwó. Lə́ ŋuu lə̌i ndághʼ pə̂ hó ńkə́r ndə̂ ndə̂u wó, mə́i kâa pə̂ yé có zoŋ, faʼ yi wǒwó ghʉ̌ kwǎr zǎa leʼé yi Sê wo nzáʼ kôr təcər páp pə pye-mə́soŋ. Ńté no ə́ ghʉ̌ pə́ leʼé wêi, mǒghʼ jwǐ pə́ sê, ə faʼ yi wǒwó lêi cər wó, ə́ pə poŋə́ jí pô-faʼ yé.

¹⁴Ə́ lə̌i ngʉ́ mbə́ leʼé wêi, zə̂u yi ŋuu lə lǎghʼ ńkə́r ndə̂ lə́iʼ sʉ́ po, ngaŋ pfû ntsoʼó-faʼ ye.

¹⁵Lə́ faʼ yi ŋuu sʉ́, ngaŋ tâŋ ńcwí; ə́ nkə́ ncwór cwórə́, lə́ ə́ ncʉ́ʼ ncwór pə́ ghíʼ ŋuu yi a sǒ cər lə̂ʉ mǒghʼ mboŋə́ cwór.

¹⁶Káa pei pə́ njî ńgó pei gháʼá mbə́ ndə̂ Sê, ə Zəghʼə Sê pou mə́ ncî cər ndə̂ zei mo?

¹⁷Ŋuu lə̌i mvôghʼ ndə̂ Sê, ə Sê ghʉ̂ mvôghʼ yé yé lə́wó. Ńté ńgó ndə̂ Sê pə̌ pə̂ ye zə́ghʼə́-zʉ́, pei lə̂ pou ngáʼá ə́ mbə́ ndə̂ ye zêi.

¹⁸Koo ŋuu fútə mbəʉ ye: ŋuu lə̌i mbə́ təcər pei, ə́ mə́ nkwâŋ ńgó a jîno lə̂ mbə̂u yi pye nzʉ̂ pwo laghʼ ńjî no, ə́ pə́ ntúŋu ńgó â tsə́mbi mbə́i ghəghəʉ mboŋə́ tsuŋú jí no.

¹⁹Ńté no jîno yi pye nzʉ̂ pə́ pə̂ ghəghəʉ mbi Sê. Ə̂ zə̂u yi ghʉ̌, ŋwaʼa Sê laʼ ngô: «Sê laghʼ pə̂ tsâr píʼí yi pye-mə́soŋ laghʼ fûtə pəcó, ə́ ndə̂ʼ ləkei záp ə́ ngôu gháp.»

²⁰Ŋwaʼa Sê kə̌ ncí mə́ ndâʼ ngô: «Nde pə̌ njî məkwaŋtə pənjino; a pə̌ njî ńgó məkwaŋtə máp kâa kuʼ yé có zə̂u.»

²¹Ə́ pə̂ yə́rə́, koo ŋuu lâghʼ ghíʼ â ŋuu mə́ke ńŋáʼtə́, ńté ńgó zə̂u tsəm pə́ pə̂ zéi,

²²ə́ lə̌i mbə́ pə́ Pôl, kəʉ pə́ Apolósʉ, kəʉ pə́ Sefásʉ, kəʉ pə̂ nzʉ̂, kəʉ pə̂ ləcǐ-mbî, kəʉ pə̂ ləwʉ̂, kəʉ pə̂ yo kəm nzʉ̂, kəʉ pə̂ kəm nzʉ̂ yi ə́ pyér poŋə́ tó, mə́i zə̂u pei tsəm pə́ pə̂ péi;

²³lə́ ə́ ngwǒ lə́ pei, mə́i pêi pye Kəlísto, Kəlísto pə̂ mbó Sê.