Read Ngombale 1 Korêŋtə 4 Bible Online

1 Korêŋtə 4 - Ngombale bible

1 Korêŋtə 4

¹Ə́ pə̂ yə́rə́, ə́ mə́ ntúŋu ńgó pə jwó wághʼ ghíʼ pəghaŋə-faʼ Kəlísto, ghíʼ pye pi gháp ghwǒ lə̂ nkéʼtə́ məno Sê mi ə́ pə́ ləlwǒ, ə́ ndâʼ pye.

²Ə zə̂u yi ə́ pə́ ntúŋu mbó pəghaŋə-faʼ pə́ ńgó, gháp kə́ ngʉ́ pə̂ zə̂u yi pə́ lǎʼ ńgó gháp ghʉ̂ zěi.

³Ə́ ngwǒ lə́ məŋ, mə́i káa ə̂ pə́ ngághʼə yé ghâa ghíʼ pei lə̌i ndâʼ no ńté faʼ zâa; kəʉ pə́ ghíʼ pəcó pye lə̌i nyáŋ sê ńnáŋtə́ no ńŋə́ mə́u; kwaʼ məŋ zâa, kâa n nkûʼ ghâa lə̂ ndâʼ ŋuu ghíʼ faʼ zâa pə̂.

⁴Ə́ pə́ lə́nə́ʉ ńgó káa mbəʉ zâa pə́ fêʼ yé ghâa lə̂ faʼ zâa, lə́ káa n ndághʼ ńdôu ghâa lə̂ ndâʼ ńgó káa có lǒʼ pə̂ yé lə̂ faʼ yi məŋ faʼ zěi. Ə Sê zə́ghʼə́-zʉ́ lə̂ feʼ ghâa.

⁵Ə́ pə̂ yə́rə́, koo pei lâʼ no lə̂ faʼ ŋuu tə́ ghó mpfu yi Nde wo ntó wó kuʼ mə́, zʉ́ lə́ táa lǎghʼ nkeʼ tó, ə́ kěʼ zə̂u tsəm yi ə́ lwǒ cər nzə̌m, ə́ ghʉ̌ pə jwó məkwaŋtə mi ə́ pə́ məntə̂ʉ pei. Ə̂ lêitə́ yə́rə́, ə Sê tsóʼ faʼ wǒwó lə̂ ye mbə̂u yi a kə lǎghʼ ńfâʼ.

⁶Pəfə̌r pâa, n nkə wo lə̂ məno mi n nkə lǎʼ wéi, ə́ ndǎghʼ tû-mbəʉ zâa mbaa Apolósʉ ə́ mbyé fəiʼ təcər pei; ə́ ndághʼ ńdou ńgó pei jí no yi pə́ ŋwaʼá cər wo saghʼ-ləghaa ngô: «Koo ŋuu ghʉ zə̂u tə ndêi yi pə́ lə ŋwaʼá ńgó a ghʉ̂.» Ə́ laghʼ ńdâʼ ńgó koo pei tsə̂ʉ nzəm cǒ ŋuu, ə́ ndághʼ ńŋáʼtə́ mbi cǒ.

⁷O lâghʼ hó ńjí ńgó o lêi cǒ ŋuu? O ghwô có zə̂u yi kâa Sê lə̂ lə ŋə́ lə́ gho mo? Ə́ mbə́ yi Sê lə̂ lə ŋə́, o pôu ndághʼ ńŋâʼtə pə́ ghíʼ káa pə lə ŋə́ ŋə́ lə́ gho ńté hó?

⁸Pei ghwo mə́ zə̂u tsəm yi pei kə pə́ ntsáa lə̂ ngwô! Pei cʉ̌ʼ pəghaŋə-zə̂u! Pei cʉ̂ʼ pəfou, lə́ káa paghʼ kə́ mbə̂ wághʼ pəcó! M mə̌ ntsâa ńgó pei cʉ́ʼ pəfou lə́nə́ʉ, ńjí ńgó paghʼə pə́tsəm naa nzʉ́ ləfou zêi.

⁹Ńté ńgó m mə̌ njwô ńgó Sê lə laghʼ wághʼ pəghaŋə-ntə̂u ńgʉ̌ pəlyəghʼ-nzəm, paghʼ cʉ̂ʼ mbə́ pə́ ghíʼ pye pi pə́ záʼ mə́ kôr ghap tə ntághʼ ńgó pə wo jwítə́ gháp, ə́ mǎʼ gháp zǎa mbi lâʼ, ə́ mbi pəcwôʼ Sê, mbaa mbi pye-mə́soŋ.

¹⁰Pâghʼ məpə ńté Kəlísto, lə́ ə́ ngwǒ lə́ pei, pei pə̂ pənjino nzəm Kəlísto; paghʼ pətyáp, lə́ pei pə̂ pəghaŋə mətəʉ; pə́ pə́ ngwâghʼ wághʼ, lə́ ə́ ngwo lə́ pei, ə́ mə́ ŋə̂ məkuʼ méi.

¹¹Tə nkə́u mpfu wo, paghʼ pə̌ njwô ngwôʼ, nji pə̂ nzáŋə wághʼ, ə ndě-nci pə̂ nzə̂u wághʼ, paghʼ pə̌ ŋəi ntsəmə, pə́ pə̂ ngághʼə wághʼ; paghʼ pə̌ nkhʉ̌ ńkóʼ, ə́ nkhʉ́ shíʼ.

¹²Paghʼ ghí zʉ́ zə̂u, ə́ ntsə̌mbi ntáŋə́ gháʼate. Pye pə̂ nzôutə́ wághʼ, lə́ paghʼ pə̂ sʉ̂ʉtə Sê ńgó a cóghʼ mbwórə lə́ páp. Pye pə́ ŋə̂ wághʼ ngwôʼ, lə́ paghʼ pə̂ shə̂ghʼ;

¹³pə́ pə́ ntâŋ məlaa tû paghʼ, lə́ paghʼ pfû pə̂ shʉʼʉ. Pə́ laghʼ wághʼ ńgʉ́ mətyʉŋə ndəu nzʉ̂; paghʼ pə́ mbi pye-mə́soŋ, ə́ mbə́ pə̂ məfəpə fe.

¹⁴Káa n ŋwáʼa yo no lə̂ ndághʼ sə̂ʉ ńkó wéi. Lə́, n ŋwáʼa pə́ lə̂ ndághʼ ńkweitə́ tû zéi, ńté ńgó pêi ghəpə́ zâa pi lətəi-ndwuŋ.

¹⁵Pei lə̌i mbə́i ngwǒ pye pi gháp pə́ njyêʼ wéi no Yěso Kəlísto pə́ tóusʉ ləghə̂m, mə́i káa pei ghwô wéi pətə́ tə nzáa, məŋ lə̂ kə̌ mbə́ tə́ wei, ńté no məŋ lə̂ kə tó ńjyéʼ wéi Nkəʉ Shʉʼʉ, pei poŋə́ jí no Yěso Kəlísto.

¹⁶Ə́ pə̂ yə́rə́, m mə̂ ndâʼ lə́ pei ńgó pei pyé fəiʼ lə́ məŋ.

¹⁷Ə̂ zə̂u yi ə́ ghʉ̌, n ntə̂u Timotêi lə́ pei, a pə́ lə̂ no Yěso Kəlísto, ə́ mbə́ môu ghâa yi n nkǒŋ yé gháʼate, a jî yé pə́ ndaʼ no Nde. A wo jyêʼ wéi mbə̂u yi n ndaghʼ ŋə̂i nzəm Kəlísto, ə́ pə̂ zə̂u yi kwaʼ məŋ zâa n njyêʼ pye zěi cər məndə̂ cûʼtə pye Kəlísto mə́tsəm.

¹⁸Pəcó pye təcər pei kə pə́ ŋáʼtə, ə́ nkwâŋ záp pə́ ńgó n ndáʼ kə́ pǒu tô ghâa lâʼ pei po,

¹⁹Lə́ Nde lə̌i mbə́i, mə́i n ngwo tóghʼ tó, ə́ tó yə́rə́, lə́u tsôʼtə ghâa lə̂ mətsâr mi ngaŋə-ŋâʼtə zêi kə lâʼ mbó lâʼ po, ə́ lǒu pə́ lə̂ njí zə̂u yi gháp kǔʼ lə̂ ngʉ́.

²⁰Ńté ńgó no Ləfou Sê kâa pə̂ yé pə̂ mətsâr mi pə́ kwaŋ kwaŋə́ ńdáʼ, mətəʉ Zəghʼə Ndêi-lěi lə́ ghʉ faʼ.

²¹Pei wó lə̂ məno mwo mə́mbwô ə́ nkâŋ zéi: pei pə̌ nkoŋ ńgó n ndághʼ pə̂ məngwaa ńtó lâʼ pei, kəʉ ńgó n ngí tó, ntə̂ʉ ghâa pə́ mbôŋ ə́ nkə́ mə́ nkôŋ wéi kǒŋ?